GRIEGO arut traducitäki uka “carro” arojja, Machaq Mundon Jakirinakataki Biblian kunayman carronakatwa parlaspa (Hech. 8:28, 29, 38). Amuyatajja, Etiopía markankir chachajj viajiskäna uka carrojj janiw militaranakana jan ukajj tʼijuñatak aleq corrokänti, jan ukasti mä jachʼa carrönwa. Kunatsa ukham sistan uk uñjañäni.

Etiopía markankir chachajj palacion trabajir mä jilïrïnwa, wali jay viajiskarakïna. “Jupajj autoridadan jaqënwa, Etiopía marka apnaqer Candace reinan serviripänwa, juparakiw taqpach qollqep apnaqäna” (Hech. 8:27). Uka tiemponjja, Etiopía markajj jichhürunakan uñtʼatäki uka Sudán toqet Egipto aynach toqekamänwa. Etiopía markankir chachajj janis sapa kuti uka carrot viajkchïnjja, wali jay viajiñatakejj walja qʼepinakanïpachänwa. Nayrïr patak maranakanjja, pasajeronak apañatakejj kunayman carronakaw utjäna. Ukanakat mayajj pusi llantanïnwa, techjjatatarakïnwa. Biblia toqet parlir mä librojj akham siwa: “Uka carronakarojj walja qʼepinakaw apasispäna, maynejj wali sumwa wali jayanak viajispäna” sasa (Acts—An Exegetical Commentary).

Felipejj jakʼachaskäna ukhajj Etiopía markankir chachajj liyiskänwa. Bibliajj akham siwa: “Ukatwa Felipejj uka carror jakʼachasisajj carromp chik tʼijüna, Isaías profetan qellqatanakapat jachʼat liytʼaskir istʼarakïna” sasa (Hech. 8:30). Uka carronakajj janiw wal tʼijuñatak luratäkänti. Niyakejjay Etiopía markankir chachajj viajkäna uka carrojj kʼachatak sarchïnjja, jupajj liytʼasiskänwa, ukatwa Felipejj tʼijukam jupar jikjjatarakïna.

Etiopía markankir chachajj “Feliperojj jupan ukar makatañapataki ukhamarak jupamp chik qontʼasiñapatak wal ruwtʼäna” (Hech. 8:31). Tʼijuñatak carronak apirinakajja, saytʼataw apapjjerïna. Ukampis pasajeronak apir carrojj wali camponïnwa, ukatwa eunucos Felipes qontʼat sarapjjpachäna.

Kuntï Hechos capítulo 8 ukan siski, historia toqet yatjjatirinakajj uñachtʼayapkaraki ukarjamajja, janiw Etiopía markankir chacharojj guerratak mä carrona jan ukajj tʼijuñatak mä carron qellqatanakasan dibujasjjeti, jan ukasti mä jachʼa carronwa dibujasjje.