1. ¿Kunatsa Jesusan jiwatap amtaskani uka urojj wali importantejja? (Lucas 22:19, 20).

 JEHOVÁ DIOSAN servirinakapatakejja, Jesusan jiwatapajj amtaski uk urojj wali importantepuniwa. Jesusaw arkirinakapar uk amtapjjañapatak mayïna (Lucas 22:19, 20 liytʼäta). Uka wali importante uru suyañatakejj walja razonanakaw utji, ukanakat mä qhawqhanak yatjjatañäni.

2. ¿Kuna razonanakatsa Jesusan jiwatap amtañ urun puriniñap suytanjja?

² Jesusan jiwatap amtaski uka tantachäwejja, Jesusajj juchampit jiwañampit kutsuykistu uk valoranit uñjañatakiw yanaptʼistu. Kunjamanakatsa Jesusan sacrificiot loqtasitapat yuspärsna ukwa amtayarakistu (2 Cor. 5:14, 15). Jilat kullakanakampïñatakisa, maynit maynikam chʼamañchtʼasiñatakis yanaptʼarakistuwa (Rom. 1:12). Sapa marajj walja inactivonakaw uka tantachäwir jutapjje, jilat kullakanakan wali munasiñamp katoqtʼapjjatapatjja, jupanakat yaqhepajj Jehová Diosan ukar kuttʼaniñwa amtapjje. Waljaniw kuntï uka tantachäwin uñjapki istʼapkaraki ukat wal musparapjje, Bibliat yatjjatañwa qalltapjjaraki, ukatwa jiwasatakejj Jesusan jiwatap amtañajj wali wakiskirejja.

3. ¿Kunjamsa Jesusan jiwatap amtañajj mayachtʼatätas uñjañatak yanaptʼistu? (Fotonak uñjjattʼarakïta).

³ Jesusan jiwatap amtaski uka tantachäwejja, oraqpachankir jilat kullakanakasampiw mayachtʼistu, ukatwa uka urun puriniñap wal suyaraktanjja. Oraqpachanjja, Jehová Diosan Testigonakapajj inti jalantjjaruw sapa markan tantachasipjje. Taqeniw kunatsa Jesusan jiwañapajj wakisïna uka toqet parlir mä discurso istʼtanjja, pä cancionanakwa canttanjja, tʼantʼampi vinompi pasayaraktanjja, pusi oracionanak luraski ukarojj taqe chuymaw “amén” saraktanjja. 24 horanakwa taqpach congregacionanakajj uka pachpa lurapjje. Kunjamsa Jehová Diosampi Jesusampejj  jupanakar oraqpachan jachʼañchtan uk uñjasajj walpun kusisipjjpacha.

4. ¿Kunanakatsa aka yatichäwin yatjjataskañäni?

⁴ Aka jisktʼanakaruw aka yatichäwin qhanañchaskañäni: ¿Kunjamsa Jesusan jiwatap amtañatakejj chuymas wakichtʼsna? ¿Kunjamsa yaqhanakarojj uka tantachäwit beneficiasipjjañapatakejj yanaptʼsna? ¿Kunjamsa inactivonakar yanaptʼsna? Ukanakat yatjjatañajj uka wakiskir urutak wakichtʼasiñatakiw yanaptʼistani.

¿KUNJAMSA CHUYMAS WAKICHTʼASSNA?

5. 1) Jesusajj juchampit jiwañampit kutsuykistu ukajj wali valoraniwa, ¿kunatsa uka toqet lupʼiñasa? (Salmo 49:7, 8). 2) “¿Kunatsa Jesusajj jiwäna?” sat videot kunsa yateqta uk qhanañchtʼam.

⁵ Uka wakiskir urutak chuymas wakichtʼañatakejja, Jesusan sacrificiot loqtasitapajj qhawqha valoranisa uka toqetwa lupʼiñasa. Janiw jiwas pachpajj juchampit jiwañampit salvaskasänti (Salmo 49:7, 8 liytʼäta; “¿Kunatsa Jesusajj jiwäna?” sat video uñtarakïta). a Ukhamajj Jehová Diosaw wali munat Yoqapan jiwas layku jakäwip churañapatakejj amtäna, panpachaniw wali jachʼa sacrificio lurapjjäna (Rom. 6:23). Kuna sacrificionaktï Jehová Diosas Jesusas jiwas layku lurawayapki uka toqet jukʼamp lupʼiñäni ukhajja, Jesusajj juchampit jiwañampit kutsuykistu ukarojj jukʼamp valoranitwa uñjañäni. Jichhajja, kunanaksa Jehová Diosampi Jesusampejj jiwas layku lurañatakejj dispuestokïpjjäna, ukanakwa uñjaskañäni. Ukampis nayraqatjja Jesusajj juchampit jiwañampit kutsuykistu uka toqetwa parlañäni.

6. ¿Kunjamsa Jesusajj juchampit jiwañampit kutsuyistu?

⁶ Kutsuyañajja, qhawqtï mä kun alañatakisa jan ukajj recuperañatakis pagaski ukawa. Adán sat nayrïr chachajj perfecto luratänwa. Ukampis juchachaskäna ukhajja, wiñay jakañ aptʼasïnwa, taqpach wawanakaparus wiñay jakañ aptʼasiyarakïnwa. Kuntï Adanajj aptʼawaykäna uk wasitat alañatakejja, Jesusajj perfecto jakäwipwa sacrificiot loqtawayäna. Jesusajj aka oraqenkkäna ukhajj “janiw kuna juchsa lurkänti, janirakiw lakapan kuna engaños utjkänti” (1 Ped. 2:22). Jiwkäna ukhajja, jupajj perfectönwa, ukhamajj Jesusan jakäwipajj Adanajj aptʼawaykäna uka pachpa valoranïnwa (1 Cor. 15:45; 1 Tim. 2:6).

7. ¿Kuna yantʼanakans Jesusajj uñjasïna?

⁷ Aka oraqenkkasajj Jesusajj walja yantʼanakan uñjaskasas alajjpachankir Awkipar istʼapunirïnwa. Wawäkasajja, perfectökasas pantjasir awk taykaparojj istʼapunirïnwa (Luc. 2:51). Waynitöjjäna ukhajja, inas mayninakajj awk taykapar jan istʼañapataki jan ukajj Jehová Diosat jitheqtañapatak chʼamañchapkäna uk aguantañapächïna. Jilïrëjjäna ukhajj Supayaruw saykatañapäna, Supayajj juchachasiñapatakiw yantʼäna, Diosat jitheqtayañwa munarakïna (Mat. 4:1-11). Supayajj kunjamats Jesusar juchar purtʼasiyañ munapunïnwa, ukhamat jiwasar juchampit jiwañampit jan kutsuyañapataki.

8. ¿Kuna yaqha yantʼanaksa Jesusajj aguantäna?

⁸ Aka oraqenkkäna ukhajja, Jesusajj yaqha yantʼanakwa aguantarakïna. Enemigonakapajj arknaqapjjänwa, jiwayañatakiw amenazapjjäna (Luc. 4:28, 29; 13:31). Discipulonakapan pantjasitanakaps aguantarakïnwa (Mar. 9:33, 34). Jiwañapatak juchañchapkäna uka juicionjja, tʼaqesiyapjjänwa, burlasipjjarakïnwa, ukatjja jan walinak lurir jaqerjamaw jiwayapjjäna, wal tʼaqesirakïna (Heb. 12:1-3). Niya jiwañampïskäna ukhajja, Jehová Diosajj janiw jarkʼaqjjänti,  sapakiw qhep qhepa yantʼa aguantañapäna (Mat. 27:46). b

9. ¿Kuna sacrificionaktï Jesusajj lurawayki ukanak amuyañajj kunatakis yanaptʼistu? (1 Pedro 1:8).

⁹ Jesusajj juchampit jiwañampit jiwasar kutsuyañatakejj walpun tʼaqesïna. Kuna sacrificionaktï Jesusajj jiwas layku lurawayki ukanak amuyasajja, jukʼampiw Jesusar munastanjja (1 Pedro 1:8 liytʼäta).

10. Juchampit jiwañampit jiwasar kutsuyañatakejj ¿kuna sacrificio lurañatakis Jehová Diosajj dispuestokïna?

¹⁰ Juchampit jiwañampit jiwasar kutsuyañatakejj ¿kuna sacrificio lurañatakis Jehová Diosajj jankʼakïna? Jehová Diosampi Yoqapampejj wali sumpun apasipjje (Prov. 8:30). Aka oraqenkkasajj kunayman yantʼanakwa Jesusajj aguantäna, ukanak uñjasajj kunjamas Jehová Diosajj jikjjataspachäna uk amuytʼañäni. Kunjamsa Yoqapar jan walinak lurapjjäna, jiskʼachapjjäna, wal tʼaqesiyapjjarakïna uk uñjasajj walpun Jehová Diosajj chuym usuyaspachäna.

11. Jesusan jiwatapat kunjamas Jehová Diosajj jikjjataspachäna uk amuyañatakejj ¿kunas yanaptʼistu?

¹¹ Mä wawan jiwatapajj kunja llakkañasa ukjja, khitinakantï mä wawajj jiwki ukanakaw amuyapjjaspa. Jiwatat jaktañar wals confiystanjja, janiw ukajj wali munat amigosana wali munat familiarasan jiwatapat wal llakisktan uk chhaqtaykiti. Ukajja, 33 maran munat Yoqapajj tʼaqeskäna, jiwarakïna uk uñjasajj kunjamsa Jehová Diosajj jikjjataspachäna uk amuytʼañatakiw yanaptʼistu (Mat. 3:17). c

12. Jesusan jiwatap amtaskani uka urun puriniñapkamajj ¿kunanak lurañatakis tiempo apstʼassna?

¹² Jesusan jiwatapajj amtaskani uka urun puriniñapkamajj ¿janit Jesusajj juchampit jiwañampit kutsuykistu uka toqet jukʼamp yatjjatañatak tiempo apstʼaskasma? Bibliat sapaki jan ukajj familiampi yatjjatkasaw uk lurasma. Uka toqet jukʼamp yatjjatañatakejja, Jehová Diosan Testigonakapan Bibliat yatjjatapjjañapataki sat librota jan ukajj qellqatanakasatwa liytʼasma. d Jesusan jiwatap amtañatak Bibliat liytʼañajj utjkani uk liytʼarakim, ukajj Cristianjam Jakañataki ukat Yatiyañataki: Tantachäwin yatjjatañataki sat qellqatankiwa. Jesusan jiwatap amtañ urutak wakichatäki uka video uñtañs janirak armasimti. Jiwasatï uka tantachäwitak chuymas wakichtʼañäni ukhajja, mayninakarojj Jesusan jiwatap amtaskani uka tantachäwit beneficiasipjjañapatakiw yanaptʼañäni (Esd. 7:10).

 MAYNINAKAR YANAPTʼAÑÄNI

13. Jesusan jiwatapajj amtaskani uka tantachäwit beneficiasipjjañapatakejj ¿kunsa nayraqat lurañasa?

¹³ Jesusan jiwatapajj amtaskani ukat beneficiasipjjañapatakejj ¿kunjamsa mayninakar yanaptʼsna? Nayraqatajj invitañasawa. Predicacionan invitacionanak lakirkchiñänisa, inas invitañ munktan ukanakan sutinakap qellqtʼassna, familiaranakaru, trabajonkir compañeronakaru, escuelankir compañeronakaru, jan ukajj uñtʼatanakaruw invitsna. Imprimit invitacionanakasatï jan utj-jjestanejja, internetan utjkistu uka invitacionwa aptʼaysna. Qhawqhanis jutapjjani uk janiw yatktanti, ukhamajj ¡taqenir invitasipkakiñäni! (Ecl. 11:6).

14. Maynir invitación churañajj kunja wakiskirisa uk mä experienciamp qhanañchtʼam.

¹⁴ Maynir invitación churkäta ukhajja, inas jupajj uka tantachäwir jutañ amtchini. Mä urojja, mä kullakarojj jumampiw Jesusan jiwatap amtañatak saräjja sasaw esposopajj säna, kullakajj wal kusisirakïna. ¿Kunatsa kullakajj wal kusisïna? Kuna laykutejj esposopajj janiw Testigökiti, walja kutirakiw kullakajj jupar invitatayna, ukampis esposopajj janiw sarirïkänti. ¿Kunas esposopar cambiañatak yanaptʼäna? Nayajj uñtʼkta uka ancianow mä invitación churitu sasaw säna. Esposopajj janiw uka marak sarkänti, jukʼamp maranakaw uka tantachäwir sarjjäna.

15. ¿Jesusan jiwatap amtañatak maynir invitasajj kunsa amtañasa?

¹⁵ Ak amtañasapuniwa, Jesusan jiwatap amtañatak invitktan ukajj inas jisktʼanakanïchini, yamas janitï tantachäwinakasar jutirïkchi ukhajj jisktʼanakanïspawa. Ukatwa kuna jisktʼanakanïspasa, kunjamsa ukar qhanañchtʼsna ukanak amuykiptʼañajj wakisispa (Col. 4:6). Inas jupajj akham jisktʼaschi: “¿Kunas uka tantachäwin luraspacha? ¿Qhawqha horanakas uka tantachäwejj apaspacha? ¿Kunjam isthaptʼatas sarañäpacha? ¿Ukar mantañatakejj pagañäpachati? ¿Qollq mayipjjpachati?” sasa. Invitadosarojj kuna jisktʼanakanïtasa sasin inas jisktʼsna, ukat kuntï yatiñ munki uk jisktʼaraksna. “Jesusan jiwatap amtapjjañäni”, “¿Kunjamsa  tantachäwinakajj apasi?” sat videonakwa uñtaysna, ukatjja “¡Wiñayatakiw kusisit jakasisma!” sat libron 28 yatichäwipatwa mä qhawqhanak qhanañchtʼaraksna.

16. ¿Jesusan jiwatap amtañatak saririnakajj kuna yaqha jisktʼanakanïpjjaspasa?

¹⁶ Jesusan jiwatap amtaskani uka qhepatjja, inas invitadosajj jukʼamp jisktʼanakanïchini. Kunatsa jan khitisa jan ukajj yaqhepakejj tʼantʼa manqʼäna vinsa umäna sasin jisktʼaschi. Qhawqha kutis Jesusan jiwatapajj amtasiñapa sasin inas jisktʼasirakchi. Taqpach tantachäwinakasant uka pachpajj lurasi janicha uk inas yatiñ munarakchi. Jesusan jiwatap amtaskani uka tantachäwin arstʼir jilatajj uka toqet qhanañchjjchinisa, inas ukanakat jukʼamp yatiñ munchi. Jisktʼanakapar qhanañchañatakejja, “¿Por qué los testigos de Jehová celebran la Cena del Señor de forma diferente a otras religiones?” sat yatichäwimpiw yanaptʼayasisma, ukajj jw.org cheqankiwa. Jesusan jiwatap amtaskani uka nayrasa, apaskani ukhasa, uka qhepatsa, kunanaktï lurirjamäktan ukanak lurañatakiw chʼamachasiñasa, ukhamat ‘suma chuyman’ jaqenakan uka wakiskir tantachäwit beneficiasipjjañapataki (Hech. 13:48).

INACTIVONAKAR YANAPTʼAÑÄNI

17. ¿Kunjamsa ancianonakajj inactivonakar yanaptʼapjjaspa? (Ezequiel 34:12, 16).

¹⁷ ¿Jesusan jiwatap amtaskani uka semananakajj kunjamsa ancianonakajj inactivonakar yanaptʼapjjaspa? Jupanakat llakisipjjañapawa, munasiñampiw uñjapjjañaparaki (Ezequiel 34:12, 16 liytʼäta). Ancianonaka, Jesusan jiwatap amtaskani uka nayrajj qhawqhanirutï visittʼapkasma jan ukajj jawstʼapkasma ukhanimp parltʼapjjam, jumanakat wal llakisipjjta, wal yanaptʼañ munapjjaraksma sasin sapjjam. Jesusan jiwatap amtañatak invittʼapjjam, munasiñamp katoqtʼapjjam. Uka pasatatjja, uka munat jilat kullakanakasarojj visittʼasipkakim jan ukajj jawstʼasipkakim, kunatï Diosar serviskakiñatak wakiski ukanakamp yanaptʼasipkakim, ukhamat Jehová Diosan ukar kuttʼanipjjañapataki (1 Ped. 2:25).

18. ¿Kunjamsa taqenejj inactivonakar yanaptʼsna? (Romanos 12:10).

 ¹⁸ Jesusan jiwatap amtañatak jutapkani uka inactivonakarojja, congregacionankirinakajj taqeniw yanaptʼsna. ¿Kunjamsa uk lursna? Jupanakar munasiñampi, suma chuymampi, respetomp uñjasaw yanaptʼsna (Romanos 12:10 liytʼäta). Ak amtapjjapuniñäni, Jehová Diosan wali munat uka ovejitanakapatakejj mä tantachäwir jutañajj inas chʼamakïchïna, kunjamakis jilat kullakanakajj katoqapjjetani sasin inas llakisisipkchi. e Kunanakatï mayjtʼasiykaspa ukanak jan jisktʼapjjañäniti, janirak chuym ustʼaykaspa ukanak sapjjañäniti (1 Tes. 5:11). Jupanakajj munat jilat kullakanakäsipkakiwa, Jehová Diosar jupanakamp adorjjasajj wal kusisiraktanjja (Sal. 119:176; Hech. 20:35).

19. ¿Jesusan jiwatap amtasajj kunanaks jikjjattanjja?

¹⁹ Kunjamtï yatjjatawayktanjja, Jesusaw sapa mara jiwatap amtañasatakejj mä mandato jaytawayistu. Jesusan jiwatap amtañajj jiwasarus yaqhanakarus walja toqenakatwa yanaptʼistu (Is. 48:17, 18). Jehová Diosarus Jesusarus jukʼamp munasiñasatakiw yanaptʼistu. Kunanaktï jupanakajj jiwas layku lurawayapki ukanakat yuspäratas uñachtʼayañatakis yanaptʼarakistuwa. Jilat kullakanakasampejj jukʼampiw mayachtʼistu, Jesusajj juchampit jiwañampit kutsuykistu ukat walja bendicionanakwa katoqtanjja, ukanakat disfrutapjjañapatakiw jaqenakar yanaptʼaraksna. Ukhamajj maran may kuti Jesusan jiwatapajj amtaski ukatak wakichtʼatäñatakejj chʼamachasipjjañäni.