1. ¿Jehová Diosajj kunjamaw sasmasa?

 ¿JEHOVÁ DIOSAJJ kunjamasa uk piensirïtati? ¿Oraskasajj Jehová Diosajj kunjamäpachaw sasas amuyirïta? Janis jupar uñjkstanjja, Diosajj kunjamasa uk walja toqenakatwa Bibliajj qhanañchi. “Jehová Diosajj intjamawa, escudjamarakiwa”, “nakhantir ninar uñtasitawa” sasaw qhanañchi (Sal. 84:11; Heb. 12:29). Ezequiel profetajja, Jehová Diosajj zafiro qalaru, llijkir metalaru, kurmin qhanatapar uñtasitawa sasaw mä visión toqejj qhanañchäna (Ezeq. 1:26-28). Jehová Diosan ukhamätap amuyañajj inas musparaychistu jan ukajj ajjsaraychistu.

2. ¿Kunatsa yaqhepatakejj Diosar jakʼachasiñajj chʼamäspa?

² Niyakejjay Jehová Diosar jan uñjkstantejja, jiwasar munasitapat inas payachassna. Jan ukajj kunatï nayrajj paskistäna uka laykojj janipuniw Diosajj munaskitaniti sasin inas amuysta, inas jiwasar munasiñapatakejj jan mä awkinïkstanti. Ukampis Jehová Diosajj kunjamas jikjjatastan uk yatiwa, kunatsa jupar jakʼachasiñajj chʼamakïspa uks yatirakiwa. Jiwasar munasitap amuyañasatakejja, jupajj kunja suma chuymanisa uk Arup toqew qhanañchistu.

3. ¿Kunatsa Jehová Diosampita munasiñapampit yatjjataskañäni?

³ Jehová Diosajj kunjam chuymanisa ukjja, munasiña aruw sum qhanstayi (1 Juan 4:8). Jehová Diosajj munasiñawa, taqe kuns munasiñatwa luri, wali munasiriwa, munasiñapajj jan tukuskiriwa, ukatwa jupar jan munasipki ukanakarus munasiñamp uñji (Mat. 5:44, 45). Aka yatichäwin Jehová Diosampit munasiñapampit yatjjataskañäni. Jupar jukʼamp uñtʼasajj jukʼampiw jupar munasiñäni.

JEHOVÁ DIOSAJJ WAL MUNASISTU

4. ¿Jehová Diosan munasirïtapat kunjamas jikjjatasta? (Foto uñjjattʼarakïta).

⁴ “Jehová Diosajj wali munasir chuymaniwa” (Sant. 5:11). Biblianjja Diosajj wali munasir mä taykamp sasiwa, jupa pachpaw  uk qhanañchi (Is. 66:12, 13). Kunjamsa mä taykajj wali munasiñamp wawapar uñji uk amuytʼam. Wali munasiñampiw wawapar ichjjartʼasi, wali munasiñampi suma arunakampiw wawapar parltʼaraki. Kunapachatï wawapajj jachi jan ukajj kuns usuyasi ukhajja, jankʼakiw yanaptʼi. Ukhamarakiw jiwasajj llakitäkañäni ukhajj Diosajj jiwasampïskani. Ukatwa salmistajj akham sasin qellqpachäna: “Kunapachatï llakinakajj aynachtʼaykitäna ukhajja, jumaw nayar chuymachtʼistajja, tranquilokïñatakis yanaptʼistajja” sasa (Sal. 94:19).

5. Jehová Diosan munasirïtapas jan jaytjasirïtapas ¿kunjamakis jumatakejja?

⁵ Jehová Diosajj jan jaytjasir Diosawa (Sal. 103:8). Pantjaskstansa munasiskakistuwa. Israelitanakajj kutin kutiniw Diosar chuym ustʼayapjjäna, ukampis arrepentisipjjäna ukhajja, jupanakar munasiskakitap uñachtʼayaskakïnwa. Mä kutejj markapar akham sänwa: “Nayranakajatakejj jumajj wali valoranïtawa, jumaw jachʼañchäwi katoqtajja, nayajj munassmawa” sasa (Is. 43:4, 5). Jehová Diosajj pachpakïskiwa. Jiwasarojj ukhamarakiw munasistu, janiw ukat payachasiñasäkiti. Jachʼa juchar purtʼasktan ukhas janiw jaytjkistuti. Jiwasatï arrepentisiñäni, jupan ukarus kuttʼjjarakiñäni ukhajja, jiwasar munasiskakitapwa amuyañäni. Jupajj jiwasar ‘taqe chuyma perdonañwa’ arsuwayi (Is. 55:7). Bibliarjamajja, Jehová Diosajj perdonkistu ukhajj ‘samarañ tiemponakwa’ churistu (Hech. 3:19).

6. Zacarías 2:8 textojj ¿kunsa Jehová Diosat yatichistu?

⁶ (Zacarías 2:8 liytʼäta). Jehová Diosatakejj nayranakapäksnas ukhamätanwa. Nayranakajj cuerpon wali importantewa, jan llamktʼkañarakiwa. Ukatwa Jehová Diosajj “maynitï jumanakar jan wal lurapjjstamjja, kunatï nayatak wali importantëki ukaruw jan waltʼayasipki” siskaspas ukhamajja. Niyakejjay Jehová Diosajj wal munaschistojja, kunjamäsktansa ukat llakisipuniwa, jarkʼaqañwa munarakistu. Tʼaqestan ukhajj tʼaqesirakiwa, ukatwa akham sissna: “Kunjamtï nayranakamar jarkʼaqta ukhamay jarkʼaqtʼasita” sasa (Sal. 17:8).

7. ¿Kunatsa Jehová Diosan jiwasar munasitapat jan payachasiñasäki?

⁷ Jehová Diosajj qhawqsa munastam uka toqet jan payachasiñamwa muni. Inas kunaymanin uñjasisasa jan ukajj problemanakanïsas Diosajj janis munaskiristam ukham amuysta, uk jupajj amuyiwa. Ukatwa Diosan jumar  munasitapat jan payachasiñamäkiti. ¿Kunas ukatak yanaptʼiristam? Kunjamsa Jehová Diosajj Jesusarusa, ajllitanakarusa, taqe jiwasanakarus munasiñamp uñjistu uk yatjjatañaw yanaptʼistaspa.

DIOSAJJ MAYNINAKAR MUNASITAP ARSUWA

8. ¿Kunatsa Jesusajj Awkipan jupar munasitapat jan payachaskäna?

⁸ Jehová Diosampi munat Yoqapampejj waranq waranqa maranakaw juntuk jakasipjjäna. Ukatwa jupanakajj wali mayachtʼatäpjje, wal munasipjjaraki. Janipuniw khitis jupanakjamajj sum apasiwayapkiti. Mateo 17:5 textonjja, Jehová Diosajj Jesusar munasitap qhanwa arsuwayäna. Jupajj janiw “nayajj wal jupat kusista” sasak siskänti, jan ukasti qhawqsa jupar munasi uk yatiñasatakejja, “jupajj wali munat Wawajawa” sasaw säna. Jehová Diosajj Jesusat wal kusisïna, jukʼampis kuntï Jesusajj niy lurañampïskäna ukatwa wal kusisïna (Efes. 1:7). Jesusajj Diosan jupar munasitapat janiw mä jukʼs payachaskänti. Qhawqsa Awkipajj jupar munasïna ukats walja kutiw parlarakïna (Juan 3:35; 10:17; 17:24).

9. ¿Jehová Diosajj kuna arumpis ajllitanakar munasitap uñachtʼayi? (Romanos 5:5).

⁹ Jehová Diosajj ajllitanakar munasitap sarakiwa (Romanos 5:5 liytʼäta). Qhawqsa Diosajj ajllitanakar munasi uk amuytʼañäni. Jehová Diosajj ‘munasiñampiw chuymanakap phoqtʼi’ siwa. Biblia toqet parlir mä librojja, Diosan munasiñapajj jalir umamp sasiwa sasaw qhanañchi. Ukajj qhawqsa Jehová Diosajj ajllitanakar munasi ukwa uñachtʼayistu. Diosan ‘wali munatäpjjatap’ ajllitanakajj sum yatipjje (Jud. 1). Jupanakajj kuntï apóstol Juanajj siskäna ukhamwa sapjjaraki, jupajj akham sänwa: “¡Qhawqsa Awkejj munasistu uk uñjapjjam, jiwasajj Diosan wawanakapa satäpjjtanwa!” sasa (1 Juan 3:1). ¿Diosajj ajllitanakarukit munaspacha? Janiwa, kunjamtï yatjjatkañänejja, Jehová Diosajj taqe servirinakapar munasitapwa uñachtʼayi.

10. ¿Kunjamsa Diosajj jumar munasitap uñachtʼayi?

¹⁰ ¿Kunjamsa Jehová Diosajj jiwasar wal munasitap uñachtʼayi? Jesusajj juchampit jiwañampit kutsuykistu uka toqew jiwasar wal munasitap uñachtʼayistu (Juan 3:16; Rom. 5:8). Janipuniw khitis ukham munasiñ uñachtʼaykistaspati, Jehová Diosajj taqe jaqenak layku jiwañapatakiw wali munat Yoqapar khitanïna, ukhamat juchanakasat perdonatäñasataki, jupan amigopäñasataki (1 Juan 4:10). Jehová Diosampi Jesusampejj wali jila precio pagawayapki ukat sapa kut lupʼiñäni ukhajja, qhawqsa sapa maynir munasipjjestu uk jukʼamp sumwa amuyañäni (Gál. 2:20). Jesusan jiwasar juchampit jiwañampit kutsuyatapajja, janiw Diosan Leyiparjam phoqasiñapatakik utjkänti, jan ukasti jiwasar munasitap laykuw ukajj utjäna, Jehová Diosajj wali valorani Yoqaparuw sacrificiot churäna. Ukhamatwa jiwasar munasitap uñachtʼayistu, jiwasanak layku tʼaqesiñapataki jiwañapatakiw Yoqapar khitanïna.

11. ¿Kunsa Jeremías 31:3 textot yateqtanjja?

¹¹ Kunjamtï uñjaniwayktanjja, Jehová Diosajj janiw munasiñampik uñjkistuti, jiwasar munasitap sarakistuwa (Jeremías 31:3 liytʼäta). Jiwasar munasitapatwa jupan ukar irpanistu (Deuteronomio 7:7, 8 liytʼarakïta). Janiw kunas ni khitis munasiñapat apaqkistaspati (Rom. 8:38, 39). Uka toqet amuytʼasajj ¿kunjamas jumajj jikjjatasta? Jichhajj Salmo 23 liytʼañäni. Uk liytʼkasajj qhawqsa Diosajj Davidar munasïna, qhawqsa jumar munasirakiristam uk amuytʼam.

JEHOVÁ DIOSAN JUMAR MUNASITAPAT ¿KUNJAMAS JIKJJATASTA?

12. ¿Kunsa Salmo 23 capitulojj qhanañchistu?

¹² (Salmo 23:1-6 liytʼäta). Salmo 23 capitulonjja, qhawqsa Jehová Diosajj jupar munasïna,  munasiñamp uñjarakïna uk jan payachasisaw Davidajj säna. Ukanjja Jehová Diosaw Awatirijajja sasaw säna, kunjamsa jupamp apasïna uks sarakïnwa. Niyakejjay Diosajj jupar irpaskchïnjja, Davidajj segurow jikjjatasïna. Taqe kunanwa jupamp yanaptʼayasirakïna. Kunjamsa Jehová Diosajj munasiñamp sapür uñjañapäna uks yatirakïnwa. Diosar ukham confiyañapatakejj kunas Davidar yanaptʼäna uk jichhajj uñjarakiñäni.

13. ¿Kunjamsa Davidajj Diosan jupar cuidaskatap yatïna?

¹³ “Janiw kunas faltkitaniti”. Niyakejjay Jehová Diosajj kunanaktï necesitkäna taqe ukanak churchïnjja, Jehová Diosaw sum uñjaskitani sasaw Davidajj amuyäna. Jehová Diosan amigopätapsa jupat kusisitapsa, Davidajj yatirakïnwa. Ukatwa Davidajj “kunasay pasaskpan kunanaktï necesitkta ukanak janiw Diosajj faltaykitaniti” sasin confiyäna. Taqe llakinakajat sipansa, Jehová Diosan munasiñapaw jukʼamp jachʼajja sasaw confiyarakïna, ukaw kusisita chuymas chuyma jikjjatasiñatakejj yanaptʼäna (Sal. 16:11).

14. ¿Kunjamanakatsa Diosajj munasiñap uñachtʼayistu?

¹⁴ Jehová Diosajj wali munasiñampiw cuidistu, jukʼampis jan walinakan uñjasktan ukhaw munasiñamp uñjistu. Claire kullakat parltʼañäni, a jupajj 20 jila maranakaw Betelan serviski. Familiapajj kunayman jan walin uñjaskäna ukhajja, jupajj janiw kamachtʼasiñs puedkänti: tatapajj infarto cerebralampiw tʼaqesïna, mä kullakapajj expulsatarakïnwa, familiapan negociopas qʼal aynachtʼäna, utsa aptʼasipjjarakïnwa. ¿Kunjamsa Jehová Diosajj jupanakar cuidaskatap uñachtʼayäna? Claire kullakajj akham siwa: “Jehová Diosajj sapüruw necesitapkäna ukanak familiajar churäna.  Walja kutiw necesitapkayäta ukat sipansa jukʼamp churapjjetäna. Kunjamsa yanaptʼapjjetäna uk lupʼipuntwa, kunja munasiñampis uñjawayapjjetu uk janipuniw armkäti. Ukaw jan walinakan uñjaskasas nayrar sartaskakiñatak yanaptʼitu” sasa.

15. ¿Kunjamsa Davidajj chʼam katjjatäna? (Dibujo uñjjattʼarakïta).

¹⁵ “Jupasti chʼamañchtʼituwa”. Davidajj kunayman jan walinakanwa uñjasïna, ukatwa awisajj wal llakisïna (Sal. 18:4-6). Ukampis kunja munasiñampis Jehová Diosajj jupar uñjäna ukaw chʼam katjjatañatak yanaptʼäna. Jehová Dios amigopajj ‘walja pastonakarus irpkaspa’, ‘kawkjantï umajj wal utjki uka samartʼañ lugaranakarus irpkaspa’ ukhamwa Davidajj jikjjatasïna. Ukhamatwa chʼam katjjatäna, kusisitaw Diosar serviskakïna (Sal. 18:28-32).

16. Jehová Diosajj chʼam katjjatañatak yanaptʼkayätam ukhajj ¿kunjamas jikjjatasiyäta?

¹⁶ Jan walinakan uñjasktan ukhajj akham saraksnawa: “Jehová Diosajj munasiri jan jaytjasiri Diosawa, ukatwa jiwasajj jan tukusktanti” sasa (Lam. 3:22; Col. 1:11). Kunas Rachel kullakar pasäna uk uñjañäni. COVID-19 pandemianjja, esposopaw juparusa Jehová Diosarus jaytjjäna, ukatwa kullakajj wali llakitäna. ¿Kunjamsa Jehová Diosajj jupar yanaptʼäna? Kullakajj akham siwa: “Jehová Diosajj wali munasiñampiw uñjitäna. Nayatak tiemp apstʼasir amigonakwa churitäna, jupanakajj manqʼwa apanirapipjjetäna, chʼamañchtʼkir arunakampi textonakampwa apayanipjjetäna, kusisitaw uñkattʼapjjetäna, Jehová Diosan nayar cuidaskataps amtayapjjarakitänwa. Munasir jachʼa familianïtajat sapa kutiw Jehová Diosar yuspärta” sasa.

17. ¿Kunatsa Davidajj “janiw kuna jan walirus ajjsarkti” sasin säna?

¹⁷ “Janiw kuna jan walirus ajjsarkti, [...] jumaw nayampïsktajja”. Davidajj wali chʼaman enemigonakanïnwa. Ukampis Jehová Diosan jupar munasitapaw seguro ukat jarkʼaqat jikjjatasiñatakejj yanaptʼäna. Diosajj jupamp chikäskapunitapwa Davidajj amuyasïna, ukatwa akham sasin cantäna: “Taqe ajjsarañanakajatwa jupajj salvitäna” sasa (Sal. 34:4). Davidajj awisajj walsa ajjsarayaskchïnjja, Diosan jupar munasitap yatisajj janiw ajjsarjjänti.

18. Ajjsarayasktan ukhajj ¿kunjamsa Jehová Diosan jiwasar munasitap yatiñajj yanaptʼistu?

¹⁸ Jan walinakan uñjasisajj wal ajjsarayasktan ukhajja, ¿Jehová Diosan jiwasar munasitap yatiñajj kunjamsa yanaptʼistu? Precursorat  servir Susi kullakajja, kunjamsa jupasa esposopas yoqapan jupa pachpa jiwayasitapat jikjjatasipjjäna uk akham siwa: “Ukham sinti jan walin uñjasktan ukhajja, qʼal aynachtʼtanjja, jan khiti yanapirini, jan kamachtʼasirjama ukhamaw amuyastanjja. Ukampis Jehová Diosajj qhawqsa munasipjjetu uk yatiñaw suma cuidata, jarkʼaqata jikjjatasiñatak yanaptʼapjjetu” sasa. Párrafo 16 ukan parlaniwayktan uka Rachel kullakajj akham sarakiwa: “Mä arumajja, wali llakita, wali sustjatäyätwa, janiw aguantirjamäjjayätti, ukatwa Jehová Diosar wali jachtʼasis orasiyäta. Ukaratpachaw Diosan nayar yanaptʼatap amuyasïyäta, kunjamtï mä taykajj wawapar ichjjartʼki ukhama. Ukat sum iktʼasjjarakïyäta. Janipuniw uk armkäti” sasa. Ancianot servir Tasos jilatajja, cuartelar jan sarañ munatapat pusi maraw carcelankäna. Kunjamsa Jehová Diosajj munasiñamp uñjäna uk akham sasaw qhanañchi: “Jehová Diosajj kuntï necesitkayäta ukat sipans jukʼamp churitäna, ukaw jupar jukʼamp confiyañatak yanaptʼitäna. Carcelan llawintatäkasajj llakimp qʼala aynachtʼañjamäkchïnsa, Jehová Diosaw kusisit jikjjatasiñatakejj espíritu santop churitäna. Kunatï paskitäna ukajj ak amuyañatakiw yanaptʼitäna: nayatï Jehová Diosar jukʼamp confiyäjja, jukʼampiw munasiñap uñjarakëjja. Ukatwa carcelankkasajj precursor regularat serviñ amtayäta” sasa.

WALI MUNASIR DIOSASAR JAKʼACHASIÑÄNI

19. 1) ¿Diosan jiwasar munasitap yatisajj kunjams orasiñäni? 2) Diosan munasiñapat parlir textonakat ¿kawkïrinakas chuymamar purtʼtamjja? (“ Qhawqsa Diosajj munasistu uk uñachtʼayir textonaka” sat recuadro liytʼäta).

¹⁹ Parlaniwayktan uka experiencianakajja, Jehová Diosan ‘wali munasirïtapwa’ uñachtʼayistu (2 Cor. 13:11). Jupajj sapa mayni jiwasanakatwa llakisi, ‘jupan munasirïtapatsa jan jaytjasirïtapats’ janiw payachasktanti (Sal. 32:10). Diosajj kunjamsa munasiñap uñachtʼayistu uka toqet sapa kuti lupʼiñäni ukhajja, qhawqsa jiwasat llakisi uk jukʼamp sum uñjañäni, jukʼampirakiw jupar jakʼachasiñäni. Ukhamajj taqe kunwa Diosar oracionan yatiysna, ukhamat qhawqsa jupan munasiñap necesittan uk jupar yatiyañataki. Juparojj taqe llakinakaswa yatiysna, kunjamas jikjjatastan uk amuyatapatsa jiwasar yanaptʼañ munatapats janiw payachasiñasäkiti (Sal. 145:18, 19).

20. ¿Kunatsa Jehová Diosan munasirïtapajj jupar jakʼachasiyistu?

²⁰ Kunjamtï mä thaya urun ninajj juntʼuchkistojja, ukhamarakiw Jehová Diosan munasiñapajj yantʼanakansa jan walinakans chuymachtʼistaspa. Ukhamajj chuymachtʼkiristam, sumankañ churkiristam uka munasir Jehová Diosar jakʼachasim. ¡Jehová Diosan jiwasar munasitapat walpun kusistanjja! Taqeniw akham sañ munaraktanjja: “Jehová Diosar wal munasta” sasa (Sal. 116:1).