1. 1) ¿Kunjamsa Russell jilatampi mayni jilatanakampejj Bibliat yatjjatapjjäna? 2) ¿Ukham yatjjatasajj kunsa yateqapjjäna?

 PATAK maranakatsa jukʼamp maranak nayrajja, Russell jilatampi, Bibliat yatjjatiri mä qhawqhanimpiw tantachasiñ qalltapjjäna. Jupanakajja, kunsa Bibliajj Jehová Diosata, Jesucristota, jiwatanakata, Jesusan jiwas layku jiwatapata cheqpachapun yatichi uk yatiñwa munapjjäna. ¿Kunjamsa Bibliat yatjjatapjjäna? Mayniw mä jisktʼa lurirïna, ukatsti taqeniw uka toqet parlir textonak yatjjatapjjerïna. Ukjjarojja, kuntï yateqapkäna ukwa qellqtʼapjjerïna. Jehová Diosan bendicionapampejja, kunsa Bibliajj cheqpachapun yatichi ukwa yateqapjjäna. Ukanakjja, jichhürunakkamaw wali valoranit uñjtanjja.

2. ¿Kunatsa mä profecía jan sum amuyksna?

² Ukampis Bibliat yatjjatirinakajja, Biblian mä yatichäwip amuyañampi, mä profeciajj kamsañsa muni uk cheqapar amuyañampejj jan igualätapwa amuyapjjäna. ¿Kunatsa mä profecía sum amuyañajj chʼamäspa? Maya, jilapartejja phoqasiski jan ukajj phoqasiwayjje ukhaw profecianakajj sumpach amuyasi. Paya, mä profecía sum amuyañatakejj taqpachwa (contexto) uñakiptʼañasa. Mä profecía jan phoqatpach liytʼksna ukhajj inas pantjat amuysna. Ukaw Joel libronkir mä profeciampejj pasawayi. Uka profecía mayamp uñakiptʼañäni, ukatsti kunatsa nayrjam jan amuyjjañasäki ukwa amuytʼarakiñäni.

3, 4. ¿Kunjamsa Joel 2:7-9 textonkir profeciat amuyayätanjja?

³ (Joel 2:7-9 liytʼañataki). Joel profetajja, tʼiju tʼijunakaw Israel markar qʼal tukjapjjani, uka tʼiju tʼijunakajj leonanakan lakapar uñtat wali ari lakanakapampejj Israel markan taqpach plantanakapwa manqʼantapjjani sasaw profeciapan säna (Joel 1:4, 6). Kunjamtï walja tʼiju tʼijunakajj jan khitin jarkʼkay sarapkejja ukar uñtasitaw Diosan markapajj predicapjje sasaw  walja maranakajj uka profeciat amuyayätanjja. Ukham predicatasajj ‘markaru’ mä arunjja religión pʼeqtʼirinakamp apnaqat jaqenakaruw wal llakisiyi sasaw amuyayätanjja. *

⁴ Joel 2:7-9 textok liytʼsna ukhajja, kuntï uka profeciat amuykayätan ukajj walikïkaspas ukhamäspawa. Ukampis taqpach profecía sum uñakiptʼasajja, kuntï amuykayätan uk cambiañ wakisitapwa amuytanjja. Jan nayrjam amuyjjañatakejj pusi razonanakaw utji, ukanak jichhajj yatjjatañäni.

5, 6. 1) Joel 2:20 texto liytʼasajja, ¿kunsa jisktʼassna? 2) Joel 2:25 texto liytʼasajja, ¿kamsasas jisktʼasiraksna?

⁵ Maya, Jehová Diosajj tʼiju tʼijunakat kuntï siskäna uk amuytʼañäni, Jupajj akham sänwa: “[Norte] toqeta jutir tʼiju tʼijunaksa jumanakatjja jayaruw apanukurakï” sasa (Joel 2:20). Jehová Diosan Testigonakapajj Jesusan mayitapar istʼasaw predicapjje, discipuloparuw jaqenakar tukuyapjjaraki. Ukhamajj Testigonakatï tʼiju tʼijunakampi sasïchejja, ¿kunatsa Diosajj jupanakar jayar apanukuspa? (Ezeq. 33:7-9; Mat. 28:19, 20). Diosajj janiw servirinakaparojj jayar apanukkiti, antisas kunatï jan ukajj khititï markapar jan waltʼayki ukaruw jayar apanuku.

⁶ Paya, kuntï Joel 2:25 textojj siski uk amuytʼañäni, Jehová Diosajj ukan akham siwa: “Tʼiju tʼijunak jumanak contra khitankta ejercitor uñtata [cosechanakam] tukjañataki uka maranakatjja, nayaw kuttayjjapjjäma” sasa. Uka textonjja, kunanaktï tʼiju tʼijunakajj tukjapki ukanakat “nayaw kuttayjjapjjäma” siw Diosajja. Testigonakatï tʼiju tʼijunakampi sasïchejja, ¿kunatsa kuntï jupanakajj yatiyapki ukajj ‘tukjañatakiwa’ sasin saspa? Cheqansa, Testigonakajj yatiyapki ukajj janiw tukjañatakïkiti, jan ukasti jaqenakan salvasipjjañapataki, jan wali jaqenakan arrepentisipjjañapatakiw yanaptʼi (Ezeq. 33:8, 19). Predicacionajj jaqenakatak mä bendicionawa.

7. Joel 2:28, 29 texton “akanaka qhepatsti” siski ukajja ¿kun amuytʼañatakis yanaptʼistu?

⁷ (Joel 2:28, 29 liytʼañataki). Kimsa, profeciarjamajj kunas nayraqat pasañapäna, kunas ukjjar pasañaparakïna ukanak yatjjatañaw wakisi. Amuytʼañataki, Jehová Diosajj akham sänwa: “Taqe akanaka qhepatsti, nayajj taqe jaqenakjjaruwa ajayojj khitanï” sasa. Mä arunjja, tʼiju tʼijunakajj luräwip tukuyapjjañapäkäna uka qhepatwa Diosajj espíritu santop apayaniñapäna. Diosan Reinopat yatiyirinakatï tʼiju tʼijunakampi sasïchejja, ¿kunatsa Diosajj predicañ tukuyjjapjje uka qhepatak espíritu santop apayanispänjja? Cheqas Diosan espiritupatï jan yanaptʼkistaspajja, jarkʼatasa jan waltʼayañatak arknaqatasa janiw jichhakam predicañ puedkasänti.

8. ¿Apocalipsis 9:1-11 texton parlki uka tʼiju tʼijunakajj khitinakäpjjesa? (Nayrïr paginankir fotonak uñjjattʼäta).

⁸ (Apocalipsis 9:1-11 liytʼañataki). Pusi, Joel profetajj tʼiju tʼiju plagat parlki ukajja, Apocalipsis libron tʼiju tʼijunakat parlkaraki ukampejj igualakiwa sasaw amuyayätanjja, ukatwa kunanaktï tʼiju tʼijunakajj lurapki ukajj Diosan Arup yatiyktan ukamp sasiwa sasin amuyayätanjja. Apocalipsis libronjja, tʼiju tʼijunakajj jaqen ajanupar uñtasita ajanunïpjjewa, “pʼeqenakaparojj qori coronanakjam asjjatatäpjjarakïnwa” siwa (Apoc. 9:7). Uka tʼiju tʼijunakajja, “Diosan sellop jan katoqerinakarukiw [mä arunjja Diosan enemigonakaparukiw] usuchjap[jje]”, phesqa phajjsinakaw ukham lurapjje, tʼiju tʼijunakajj mä phesqa  phajjsikiw jakapjje (Apoc. 9:4, 5). Amuyatajja, Apocalipsis libron parlki uka profeciajj Diosan ajllit cristianonakatwa parlaskpacha. Jupanakajj jan ajjsarasaw Diosan juchañchäwi arunakap aka jan wali pachan yatiyapjje. Ukhamatwa akapachan yanapirinakaparojj jan waltʼayapjje.

9. ¿Joel profetasa apóstol Juanas uñjapkäna uka tʼiju tʼijunakajj kunanakansa jan igualäpki?

⁹ Joel librompi, Apocalipsis librompejj tʼiju tʼijunakat parlkasajj mä qhawqha igualäpkchisa, janiw mä pachpatak parlapkiti. Kunanakansa jan igualäpki uk amuytʼañäni. Joel libron parlki uka tʼiju tʼijunakajj plantanak qʼalwa manqʼsupjjäna (Joel 1:4, 6, 7). Ukampis Apocalipsis libron parlki uka tʼiju tʼijunakarojj akham sasïnwa: “Oraqenkir pastonaksa, chʼojjña alinaksa, arbolanaksa janiw usuchjapjjätati” sasa (Apoc. 9:4). Joel profetajj uñjkäna uka tʼiju tʼijunakajj norte toqetwa jutapjjäna (Joel 2:20). Ukampis apóstol Juanajj uñjkäna ukanakajj wali manqha mä pʼiyatwa mistupjjäna (Apoc. 9:2, 3). Joel profetajj uñjkäna uka tʼiju tʼijunakajj jayar apatäpjjänwa, ukampis Apocalipsis libron parlki ukanakajj janiw jayar apatäpkänti, antisas kuntï lurapjjañapäki uk tukuyañatakejj janiw jarkʼatäpkänti. Janirakiw Jehová Diosampejj jan walit uñjatäpkänti. (“ Tʼiju tʼijunakat parlki uka profecianakajj mä qhawqha igualäpkchisa, janiw mä pachpatak parlapkiti” siski uka recuadro uñjjattʼäta).

10. Joel libronsa Apocalipsis libronsa tʼiju tʼijunakat parlki ukanakajj janiw pachpäpkiti, ¿kuna ejemplompis uk qhanañchtʼasma?

 ¹⁰ Yatjjataniwayktan ukarjamajja, uka profecianakajj janiw mä pachpatak parlapkiti. Ukhamasti ¿Joel libronsa Apocalipsis libronsa tʼiju tʼijunakat parlki ukanakajj yaqha yaqhäpjjewa sañti muntanjja? Jïsa. Biblianjja, awisajj mä kunat parlkasajj janiw taqpach cheqanakan uka pachpa sañ munkapuniti. Uk amuytʼañäni, Apocalipsis 5:5 textonjja Jesusarojj ‘Judá tribunkir León’ sasiwa. 1 Pedro 5:8 textonsti Diablojj ‘leonar uñtataw warariski’ sarakiwa. Akakamajja, Apocalipsis libron qellqat profeciampi Joel libronkir profeciampejj janiw pachpäpkiti sañatakejj pusi razonanakatwa amuytʼawaytanjja. Ukhamasti ¿Joel libron qellqat profeciajj kamsañsa munpacha?

11. Tʼiju tʼijunakajj khitinakäpjjesa uk yatiñatakejja, ¿kunjamsa Joel 1:6; 2:1, 8, 11 textonakajj yanaptʼistu?

¹¹ Joel chachan profeciap sum yatjjatasajja, kunjamsa mä ejercitojj israelitanakar jan waltʼayañatak sartañapäna uka toqet parlaskatapwa yaqhep versiculonakan amuytanjja (Joel 1:6; 2:1, 8, 11). Jehová Diosajja, jan kasusir israelitanakar mä ‘ejercitompiw’ mä arunjja babilonio soldadonakampiw castigayäjja sänwa (Joel 2:25). Babilonionakajj norte toqetwa Israel markar jan waltʼayañatak jutapjjañapäna, ukatwa ‘norte toqet jutir’ ejército satäpjje (Joel 2:20). Uka ejercitojj suma organistʼat tʼiju tʼijunakamp sasiwa. Joel profetajj uka ejercitot akham sänwa: “Sapa [soldadojj] thakip saraskaraki [...]. Markarus nuwantapjjarakiwa, perqa patanak jalanaqapjje, uta patanakaruw mistupjje, lunthatanakjamarakiw ventananakat warkoqtawayapjje” sasa (Joel 2:8, 9). ¿Kunas pasäna uk amuytanti? Taqe cheqanwa soldadonakajj utjäna. Janiw imantasiñatak ni mä lugaras utjkänti. Janirakiw khitis babilonionakan espadapat escapañ puedkänti.

12. Joel profetajj tʼiju tʼijunakat parlkäna uka profeciajj ¿kunjamas phoqasïna?

¹² Babilonionakajja (mä arun caldeonakajja) tʼiju tʼijunakjamaw Jerusalén markarojj 607 (antes de Cristo [a.C.]) maran mantapjjäna. Kuntï ‘caldeonakan reyipajj’ Jerusalenan lurkäna ukat parlkasajja, Bibliajj akham siwa: ‘Waynanakarojja espadampiw jiwarayäna, janiw khititsa khuyaptʼayaskänti waynanakatsa, tawaqonakatsa, awkinakatsa, cojonakatsa. Tatitojj taqeniruw amparapar katuyäna. Ukjjarusti Diosan templopjja phichhantapjjänwa, Jerusalenan perqanakapsa tinkuyapjjänwa, palacionakaparusa ninampiw phichhantapjjäna, ukatsti kunatï jila alanïkäna ukanak taqwa tukjapjjäna’ sasa (2 Crón. 36:17, 19). Babilonionakajj Jerusalén marka tukjapkäna uka qhepatjja, uka cheq pasir jaqenakajj akham sapjjänwa: ‘Aka markajj wasararuw tuku jan jaqeni, jan animalanakani, caldeonakan amparanakapar katuyatarakiwa’ sasa (Jer. 32:43).

13. Jeremías 16:16, 18 textojj kamsañsa muni uk qhanañchtʼam.

¹³ Joel profetajj Jerusalenat mä profecía arskäna ukhat 200 maranak pasatatjja, Jehová Diosajj Jeremías profetaruw pachpa profeciat jukʼamp arsuyäna. Uka profeciarjamajja, babilonio ejercitojj jan walinak lurir israelitanakarojj taqe cheqan thaqsusaw katurapjjañapäna. Diosajj akham sänwa: “Walja katurinakwa nayajj khitanï, israelitanakaru katurapjjañapataki. Walja jiwarayirinakwa khitanirakï israelitanakaru katurapjjañapataki, taqe qollunak toqetsa, ukhamaraki qarqa pʼiyanakatsa wayuraniñapataki taqe israelitanakaru. [...] Mä ukkhampi jupanakarojj pagayarakï ñanqhanaka, ukhamaraki juchanaka luratapatsa” sasa (Jer. 16:16, 18). Jan arrepentisir  israelitanakarojj janiw jachʼa qotanakasa ni bosquenakasa babilonionakat imantkaspänti.

14. ¿Kunapachas Joel 2:28, 29 texton parlki uka profeciajj phoqasïna?

¹⁴ Ukjjarusti Joel profetajj mä suma yatiyäwi profeciapan arsüna. Israel markan mayampiw manqʼajj jilarkir utj-jjañapäna (Joel 2:23-26). Ukatjja jutïrin Diosat cheqa yatichäwinakajj waljanitakiw utjañaparakïna. Jehová Diosajj uka toqet akham sänwa: “Taqe akanaka qhepatsti, nayajj taqe jaqenakjjaruwa ajayojj khitanï, yoqanakamasa, phuchanakamasa nayjjatwa parlapjjani [...]. Ukhamarakiw khaya urunjja servirinakamjjarusa, ajayojjwa khitanirakëjja” sasa (Joel 2:28, 29). Israelitanakajj markapar kutʼjjapjjänwa, ukampis Diosajj janiw ukaratpach espíritu santop apayankänti. Jan ukasti, mä qhawqha patak maranak qhepatwa 33 maran Pentecostés urun espiritup apayanïna. ¿Kunjamatsa uk yattanjja?

15. Hechos 2:16, 17 textorjamajja ¿apóstol Pedrojj Joel 2:28 textot aytkasin kuns cambiäna, kun amuytʼañatakis ukajj yanaptʼistu?

¹⁵ Apóstol Pedrojj Diosan amuytʼayatäsajj Joel 2:28, 29 textot aytasaw kunatï 33 maran Pentecostés urun paskäna uka toqet parläna. Uka urun nueve de la mañana jakʼanakajja, mä milagro toqew espíritu santo waljanejj katoqapjjäna, ukhamatwa jupanakajj ‘Diosan musparkañ luräwinakapat parlapjjäna’ (Hech. 2:11). Apóstol Pedrojja Joel profetan arunakapat aytasajj kuna arunaksa jan kikpa arskäna uk amuytʼañäni (Hechos 2:16, 17 liytʼañataki). Diosan amuytʼayatäsajj Pedrojj janiw “taqe akanaka qhepatsti” sasin qalltkänti, jan ukasti ‘qhepa urunakanjja, Diosajj kunayman jaqenakjjaruw espíritu santopat warjjatanini’ sasaw säna. Qhepa urunaka sasinjja, Jerusalenan qhepa urunakapatwa parlaskäna,  mä arunjja 70 maran tʼunjatäñapäkäna uka nayra urunakatwa parlaskäna. ¿Kunsa ukarjamajj amuytʼtanjja? Joel profetan tʼiju tʼijunakat parlir profeciapajj phoqasjjäna ukhat walja maranak pasatatwa Joel 2:28, 29 textonkir profeciajj phoqasiskäna.

16. 1) ¿Kunjamsa nayrïr patak maranakan Diosan espiritupajj predicasiñapatak yanaptʼäna? 2) ¿Kunjamsa jichhürunakan yanaptʼaskaraki?

¹⁶ Jehová Diosajj nayrïr patak maranakan cristianonakar espíritu santop churkäna ukat aksaruw jukʼamp predicasjjäna. 61 mara jakʼanakan apóstol Pablojj Colosas markankir cristianonakar carta qellqkäna ukhajja, “suma yatiyäwinakajj oraqpachanwa yatiyasjje” sasaw säna (Col. 1:23). “Oraqpachanwa yatiyasjje” sasinjja, kawkjanakarutï jupampi mayni cristianonakampejj predikir sarapkäna uka cheqanakatwa Pablojj parlaskäna. Espíritu santon yanaptʼapampejja, jichhürunakan jukʼampiw taqe cheqan yatiyasjje, cheqas ‘oraq tukuykamaw’ yatiyasiski (Hechos 13:47; ‘ Espíritu santoj warjjatanëjja’ siski uka recuadro uñjjattʼäta).

17. ¿Joel profetajj tʼiju tʼijunakat parlki uka profeciat kunjamsa jichhajj amuyjjtanjja?

¹⁷ ¿Joel profetan profeciapajj kamsañsa muni, jan ukajj kunas cambiawayi? Joel 2:7-9 texton qellqat profeciajj kamsañsa muni uk jichhajj sum amuyjjtanjja. Uka profeciajja janiw kunjamsa jichhürunakan Diosan arunakap yatiyasktan uk sañ munkiti, jan ukasti kunjamsa 607 (a.C.) maran babilonio soldadonakajj Jerusalén marka qʼal tukjapjjäna uk sañwa muni.

18. ¿Kunas Diosan servirinakap toqet jan cambiawayki?

¹⁸ ¿Kunas jan cambiawayki? Diosan markapajj taqe cheqanakanwa suma yatiyäwinak kunaymanit predicaski (Mat. 24:14). Gobiernonakajj kunaymanitsa jarkʼkchistojja, suma yatiyäwinak predicaskaktanwa. Jehová Diosan bendicionapampejja nayra maranakat sipansa jukʼampiw jan ajjsartʼas Reinon suma yatiyäwinakap yatiyasktanjja. Biblian profecianakap sum amuyañatakejja, humilde chuymampiw Diosan yanaptʼap thaqaskaktanjja. Jupaw horasapar ‘kunatï cheqäki uk qhanañchistani’, ukat janiw pächasktanti (Juan 16:13).