1. ¿Jehová Diosajj servirinakapat kunsa uñji?

‘JEHOVÁ DIOSAJJ markaparojj munasiwa’ uk yatiñajj wal kusisiyistu (Sal. 149:4). Kuna sumanaktï lurktan ukanakwa jiwasat uñji, qhawqsa lurirjamätan uksa uñjarakiwa. Ukatsti, amigoparjamaw uñjarakistu. Jiwasatï Jupar jan jitheqtas serviñäni ukhajja, janipuniw jaytkistaniti (Juan 6:44).

2. Jehová Diosajj janiw munaskpachïtuti sasajj ¿kunatsa yaqhep jilat kullakanakajj amuyapjje?

² Inas maynejj akham sischispa: “Diosajj markapar munasiwa, ukampis ¿nayar munaspachïtuti?” sasa. ¿Kunatsa yaqhep jilat kullakanakajj ukham jisktʼasipjjaspa? Oksana * sat kullakajja, jiskʼäkäna ukhajj wal tʼaqesïna. Jupajj akham siwa: “Bautisasjjta ukat precursoräjjayäta ukhajj wali kusisitäyätwa. Ukampis 15 maranak pasatatjja, kuna jan walinakatï jiskʼäkasajj paskitäna ukanakwa amtjjayäta. Jehová Diosajj janiw sumat uñjkpachïtuti, janiw nayar munasiñapajj wakiskiti sasaw amuyjjayäta” sasa. Yua sat mä precursorajja, ukhamarakiw jiskʼäkasajj tʼaqesïna, jupajj akham siwa: “Diosar kusisiyañ munasaw Jupar jakäwij katuyasta, ukampis janipuniw Diosajj nayar munaskitaspati sasaw amuyayäta” sasa.

3. ¿Kuna jisktʼanakarus aka yatichäwin qhanañchaskañäni?

³ Jiwasajja, Diosar jan jitheqtas servir uka pä kullakanakjamarakiw Diosarojj taqe chuyma munassna, ukampis Jupajj janiw munaskpachïtuti sasaw amuyassna. Aka yatichäwin aka pä jisktʼanakaruw qhanañchañäni: ¿Diosajj cheqapuni jiwasar munasitapat kunatsa jan pächasiñasäki?  ¿Diosajj janis munaskistaspa ukham amuyañäni ukhajj kunsa lursna?

4. ¿Kunatsa Diosan munasiñapat pächasiñajj jan walïki?

⁴ Jehová Diosan jiwasar munasitapat jan pächaskañäni ukhajja, jan walinakan uñjaskasas taqe chuymaw Jupar serviskakiñäni. Ukampis, munasiñapat pächasiñäni ukhajja, ‘jukʼa chʼamanikiwa jikjjatasjjañäni’ (Prov. 24:10). Jiwasatï aynachtʼjjañäni, Diosajj janiw munaskituti sasin amuyjjañäni ukhajja, Supayan jan waltʼayatajj janiw aguantañ puedjjañäniti (Efes. 6:16).

5. ¿Jehová Diosan munasiñapat pächasir jilat kullakanakarojj kunas pasawayi?

⁵ Yaqhep jilat kullakanakajja, Diosajj janiw nayat llakiskiti sasin amuyasaw Diosar jan confiyjjapjjeti. James sat mä jilïr irpirejj akham siwa: “Betelansa sirvkchiyäta, yaqha aru parlir congregacionan servisajj kusisitäkchiyätsa, kuntï Jupar serviñatak lurawaykta ukat Diosajj janiw kusisitäkpachati sasaw amuyayäta. Mä kutejja, Diosajj janiw oracionanakaj istʼkpachati sasaw amuyjjayäta” sasa. Betelankiri, Eva sat kullakajj akham sarakiwa: “Diosan munasiñapat pächasjjsna ukhajja, Diosarojj janiw nayrjam sirvjjsnati ni kusisitas sirvjjsnati, ukwa yateqawayta” sasa. Michael jilatajj jilïr irpiriwa, precursor regulararakiwa, jupajj akham siwa: “Diosajj janis munaskistaspa ukham amuyjjtan ukhajja, jukʼat jukʼatwa jitheqtjjtanjja” sasa.

6. ¿Diosajj janis munkistaspa ukham amuyunakajj pʼeqesar jutani ukhajj kunsa lurañasa?

⁶ Diosan munasiñapat pächasiñajj kunatsa jan walïki ukwa uka jilat kullakanakan arsutanakapajj amuytʼayistu. ¿Jehová Diosajj janis munaskistaspa ukham amuyañäni ukhajj kunsa lurañasa? Jankʼakiw pʼeqesat uk apsuñasa. Ukatakejj Diosaruw jiwasar sumankañap churañapataki, chuymassa amuyussa jarkʼaqañapatak mayisiñasa, ukhamat kunatï llakisiykistu uka amuyunak apanukuñataki (Sal. 139:23, TNM; Filip. 4:6, 7). Diosar jan jitheqtas servir yaqhep jilat kullakanakajj ukhamarakiw ukham amuyunak apanukuñatak chʼamachasisipki, uk amtañasapuniwa. Nayra tiemponsa, Diosan yaqhep servirinakapajj ukhamarakiw jikjjatasipjjäna. Kunsa Pablot yateqsna uk jichhajj uñjañäni.

7. ¿Kunanakas Pablor llakisiyäna?

⁷ Walja luräwinakanïsajja, ¿janis taqe ukanak lurañ puedksna ukhamti awisajj amuyastan? Pablojj ukhamaw jikjjatasïna. Jupajj ‘janiw mä congregacionatak llakiskti jan ukasti taqe congregacionanakatwa llakista’ sasaw säna (2 Cor. 11:23-28). ¿Usutätas laykuti llakistan? Pablojja, “mä chʼapiw jañchijan utji” sasaw säna, ukaw wal llakisiyäna, inas mä kunat usutächïna, uk chhaqtañapwa munäna (2 Cor. 12:7-10). ¿Pantjasitas laykut llakistan? Pablojj ukhamarakiw awisajj llakisïna. ¡Wali llakkañ jaqëtwa! sasaw säna, jupajj sapüruw kunatï sumäki uk lurañatak chʼamachasiñapäna (Rom. 7:21-24).

8. Pablojj kunayman jan walinakansa uñjaskchïnjja, ¿kunas Jehová Diosar serviskakiñatak yanaptʼäna?

⁸ Pablojj kunayman jan walinakansa uñjaskchïnjja, Jehová Diosar jan jitheqtas serviskakïnwa. ¿Kunas yanaptʼäna? Pantjasir jaqëtap yatkchïnsa, Jesusan jaqenak layku jiwatapar taqe chuymaw confiyäna, ukaw jupar yanaptʼäna. Ukatjja, Jesusajj taqe khitinakatï nayar “confiyapjjatap uñachtʼayapki” ukanakajj wiñay jakañ katoqapjjani siskäna uka promesap sum uñtʼäna (Juan 3:16; Rom. 6:23). Pablojj Jesusan jaqenak layku jiwataparojj taqe chuymaw confiyäna, ukaw ukan amuyasi. Maynejj jachʼa juchar purtʼasis arrepentischi ukhajja, Diosajj perdoniwa, Pablojj janiw ukat pächaskänti (Sal. 86:5).

9. ¿Gálatas 2:20 texton Pablon arunakapajj qellqatäki ukajj kunsa yatichistu?

⁹ Pablojja, jupa layku jiwañapatak Diosajj Yoqapar khitanitap yatïnwa, ukatwa Diosajj nayar wal munasitu sasin confiyäna. Gálatas 2:20 (liytʼañataki) texto tukuyan qellqatäki uka chuymachtʼkir arunakat amuytʼañäni. Pablojj akham sänwa: ‘Diosan Yoqapajj nayarojj wal munasitu, naya laykurakiw jakäwip churäna’ sasa. Pablojja, Diosamp munatäñatakejj janis walïkaspa ukham janiw amuykänti. Janiw akham siskänti: “Diosajj kunatsa jilat kullakanakarojj munasi uk yattwa, ukampis janipuniw nayar munaskitaspati” sasa. Antisas Romankir cristianonakar akham sänwa: “Juchararäkayätan ukhaw Cristojj jiwas layku jiwawayi” sasa (Rom. 5:8). Diosajj taqeniruw munasistu.

10. ¿Kunsa Romanos 8:38, 39 textojj yatichistu?

¹⁰ (Romanos 8:38, 39 liytʼañataki). Diosan munasiñapajj qhawqha chʼamanisa uk Pablojj yatïnwa. ‘Diosan munasiñapat janiw kunas apaqkistaspati’ sasaw qellqäna. Jehová Diosajj Israel markar wali pacienciampi  uñjatap yatïnwa, jupat khuyaptʼayasitapsa yatirakïnwa. Mä arunjja, ‘Jehová Diosajj Yoqaparuw naya layku jiwañapatak khitaniwayi ukhamajj nayar munasitapat janiw pächaskti’ siskaspas ukhamänwa (Rom. 8:32).

11. Kunjamtï 1 Timoteo 1:12-15 texton siskejja, Pablojj jan walinaksa nayrajj lurkchïnjja, ¿kunatsa Diosan jupar munasitapat jan pächaskäna?

¹¹ (1 Timoteo 1:12-15 liytʼañataki). Pablojj kunanaktï janïr cristianökasajj lurkäna ukanakat lupʼisajj wal llakispachäna. Taqe jucharar jaqenakat “nayaw jukʼamp juchararätjja” sasaw säna, uk sasajj janiw kʼariskänti. Janïr cristianökasajj walja markanakanwa cristianonakar jan waltʼayañatak arknaqäna, yaqheparojj carcelaruw apayäna, yaqhepanakar jiwayapkäna ukhas apoyänwa (Hech. 26:10, 11). Pablojj cristianöjjasajja, nayrajj mä cristiano chacha warmir jiwayapjjañapatak apoykäna ukan wawaparus uñtʼkaspa ukham amuytʼañäni. ¿Kunjamakis Pablojj jikjjatasispa? Nayra luräwinakapat Pablojj wal arrepentisïna, ukanak jan cambiañ pueditap yatïnwa. Jesusan jupa layku jiwatapat jan pächasisajj akham sasaw qellqäna: “Nayajj Diosan wali khuyapayasiñapatwa ukham serviskta” sasa (1 Cor. 15:3, 10). ¿Kunsa ukat yateqtan? Cristojj sapa mayni jiwasanak laykuw jiwawayi, ukhamatwa Diosampejj sum apassna, ukat janiw pächasiñasäkiti (Hech. 3:19). Kunanakantï nayrajj pantjasiwayktan uka pachajj Testigöchiyätan janisa, kuntï jichhasa, jutïrinsa lurkañäni ukaw Jehová Diosatakejj jukʼamp importantejja (Is. 1:18).

12. 1 Juan 3:19, 20 textorjamajja, ¿janis kunatak sirvksna janis munatäñasajj wakiskaspa ukham amuyasiñäni ukhajj kunsa lurañasa?

¹² Awisajj, pantjasir chuymasaw engañjistaspa, janis kunatak sirvksna, janis munatäñasajj wakiskaspa ukhamwa amuyayistaspa  (1 Juan 3:19, 20 liytʼañataki). Ukatwa Jesusan jiwatapajj janis juchanakas perdonkaspa ukham amuyjjsna. Ukham amuyañäni ukhajja, ‘Diosajj chuymasat sipansa jukʼamp jachʼätapwa’ amtañasa. Munasir Jehová Diosajj janis munkistaspa, janis perdonkistaspa ukhamsa amuykstanjja, janiw ukhamäkiti, Jupajj munasistuwa, perdonarakistuwa. Diosan munasiñapat jan pächasiñapatakiw chuymasar yanaptʼañasa. Ukatakejj sapüruw Bibliat yatjjatañasa, orasiñasa, jilat kullakanakampis chikachasiñasapuniwa. Kunatsa ukanak lurañajj wali wakiskiri uk uñjañäni.

13. ¿Bibliat yatjjatañajj kunjamsa yanaptʼistu? (“ ¿Kunjamsa Bibliat yatjjatañajj jupanakar yanaptʼawayi?” sat recuadro uñjjattʼäta).

¹³ Bibliat sapür yatjjataña. Bibliat sapür yatjjatañäni ukhajja, Jehová Diosajj kunjam Diosasa uk jukʼampiw yatiñäni, qhawqsa munasistu uksa amuyarakiñäniwa. Bibliat sapür lupʼiñajj sum amuytʼasiñataki, chuymasansa amuyusans “kunatejj jan walïki ukanak askichañataki[w]” yanaptʼistani (2 Tim. 3:16). Kevin sat mä jilïr irpirejj janis kunatak sirvkaspa ukhamaw amuyasïna, jupajj akham siwa: “Salmo 103 qellqatat liytʼaña, ukat ukjjat lupʼiñaw janis kunatak sirvkirista ukham jan amuyjjañataki, Diosajj kunjamsa uñjitu uk sum amuyañatak yanaptʼitäna” sasa. Párrafo 5 ukan parlaniwayktan uka Eva kullakajj akham sarakiwa: “Jehová Diosatakejj kunas jukʼamp wakiskiri uka toqet lupʼiñatakejj sapa jaypʼuw tiempo apsusta. Ukaw sum jikjjatasiñatak yanaptʼitu, Diosar jukʼamp confiyañatakis yanaptʼarakituwa” sasa.

14. ¿Oracionajj kunjamsa yanaptʼistu?

¹⁴ Diosar sapür orasiña (1 Tes. 5:17). Suma amigonakajj sapa kutiw parltʼasipjje, kunjamas jikjjatasipjje uks cuenttʼasipjjarakiwa. Jehová Diosampejj ukhamarakiwa. Kunjamas jikjjatastan kunsa pienstan, kunanakas llakisiyistu ukanak cuentʼtan ukhajja, Jupar confiyataswa uñachtʼaytanjja. Jiwasar munasitapwa amuyaraktanjja (Sal. 94:17-19; 1 Juan 5:14, 15). Párrafo 2 ukan parlaniwayktan uka Yua sat kullakajj akham siwa: “Oraskasajja, janiw kunatï uka urojj paskitu ukak yatiykti, jan ukasti kunjamas jikjjatasta, kunsa amuyta ukanakwa yatiyta. Diosar mä empresan jefeparjam uñjañat sipansa, wawanakapar munasir Awkirjam uñjañwa jukʼat jukʼat yateqawayta” sasa. (“ ¿Liytʼjjtati?” sat recuadro uñjjattʼäta).

15. ¿Kunjamsa Jehová Diosajj sapa maynir munasitap uñachtʼayistu?

¹⁵ Jilat kullakanakamp chikachasiña. Jupanakajj Diosan regalopawa (Sant. 1:17). Alajjpachankir Awkisajj “taqe horasan” munasiri  jilat kullakanak churasaw jiwasat llakisitap uñachtʼayistu (Prov. 17:17). Colosas markankir cristianonakar qellqkäna uka cartapanjja, Pablojj khitinakatï jupar yanaptʼkäna ukanakan sutinakapwa aytäna, ‘jupanakaw wal chuymachtʼapjjetu’ sasaw sarakïna (Col. 4:10, 11). Jesusas amigonakapan yanaptʼap munarakïnwa, yanaptʼap katoqasajj yuspärarakïnwa, juparojj angelanaka, jaqenakaw yanaptʼapjjäna (Luc. 22:28, 43).

16. ¿Kunjamsa jilat kullakanakajj Jehová Diosar jakʼachasiñatak yanaptʼistu?

¹⁶ ¿Congregacionankir jilat kullakanakan yanaptʼap thaqtanti, yanaptʼayasiraktanti? Jehová Diosamp sum apasir jilat kullakanakar llakinakas cuenttʼañajja, Diosar janis confiyksna uk janiw sañ munkiti, antisas ukham lurasajj jarkʼaqastanwa. Párrafo 5 ukan parlaniwayktan uka James jilatajj akham siwa: “Diosamp sum apasir jilat kullakanakan amigopäñajj wal yanaptʼitu. Janis khitis munaskitaspa ukham amuyasta ukhajj uka munat amigonakajaw pacienciampi istʼapjjetu, nayar munasipjjataps amtayapjjarakitu. Diosajj jupanak toqew nayar munasitapa, nayat llakisitap uñachtʼayitu, ukwa amuyta” sasa. Congregacionan suma amigonakanïñajj wali wakiskiriwa.

17, 18. ¿Khitirus istʼañasa, ukat kunatsa?

¹⁷ Supayajj aynachtʼjjsna, jan walinak lurjjsna ukwa muni. Diosajj janis munaskistaspa, salvatäñasatakejj janis walïksna ukham amuyañaswa munaraki. Ukampis kunjamtï yatjjataniwayktanjja, ukajj janiw cheqäkiti.

¹⁸ Diosajj sapa mayni servirinakapar wal munasistu, wali valoranitwa uñjarakistu. Jiwasatï Jupar istʼañänejja, Jesusjamaw munasiñapan sarnaqaskakiñäni (Juan 15:10). Ukhamajja, Supayasa, chuymasas Diosajj janis munaskistaspa ukham amuyayañ munistani ukhajj jan istʼañäniti. Antisas Jehová Diosar istʼapjjañäni, Jupajj kuna sumatï chuymasan utjki ukwa uñji. “Markaparojj munasiwa”, jumarus munasiraktamwa, jan ukat pächasiñäniti.