1. Jiwatat jaktañar creyitap ¿kunjamsa mä jiskʼa wawajj arstʼasïna?

 MATTHEW sat mä waynitu jilatajja, mä jan wali usuniwa, walja kutirakiw jupar operapjje. Paqallqo maranïkäna ukhajja, jupampi familiapampejj JW Broadcasting^® programa uñtasipkäna. Uka video niya tukuyarojja, kunjams jilat kullakanakajj jiwatat jaktir munat amigonakaparus familiaranakaparus katoqapjjäna ukwa musicani mä videon uñtapjjäna. b Tukuyjjäna ukhajja, Matthew jiskʼa wawajj tatap mamaparuw jakʼachasïna, amparanakapat kattʼasajj akham sarakïnwa: “Mamita, papitu, ¿uñjapjjtati? Jiwjjä ukhas jaktanjjäwa. Jumanakajj suyapjjetätawa. Taqe kunas walikïskaniwa” sasa. Jiskʼa wawapar jiwatat jaktañar wal creyitap uñjasajj ¿kunjamakis tatap mamapajj jikjjatasipjjpachäna uk amuyasmati?

2, 3. ¿Kunatsa jiwatat jaktañ toqet lupʼiñasa?

² Sapa mä qhawqha tiempotjja, jiwatat jaktañ toqet lupʼiñajj wali wakiskiriwa (Juan 5:28, 29). Kuna laykutejj kunas qharürojj pasani uk janiw yatktanti. Inas wal usuntsna jan ukajj inas mä munat amigosas mä familiarasas mä akatjamat jiwjjchispa (Ecl. 9:11; Sant. 4:13, 14). Jiwatat jaktañajj utjki uka suytʼäwiw uka yantʼanak aguantañatakejj yanaptʼistaspa (1 Tes. 4:13). Bibliarjamajja, alajjpachankir awkisajj sum uñtʼistu, wal munasirakistu (Luc. 12:7). Niyakejjay Jehová Diosajj sum uñtʼchistojja, kunjam jaqëtansa kunanaksa amtasktan taqe ukanakwa jiwatat jaktayasajj kuttʼayjjestani. Jiwasar wal munasitapatjja, wiñayatak jakañaswa muni. Jiwjjchiñänis jaktayistaniwa.

³ Aka yatichäwinjja, jiwatat jaktañajj utjaniwa sasajj kunatsa confiysna ukwa yatjjataskañäni. Aka yatichäwejj kawkïr textot apstʼatäkitï ukat jukʼamp yatjjatañajja, Diosar jukʼamp confiyañatakiw yanaptʼistani, ukan akham siwa: “Jilamajj sartjjaniwa” sasa (Juan 11:23). Ukjjarusti jiwatat jaktañar taqe chuyma creyiñatakejj  kunanaksa lursna ukwa yatjjataskarakiñäni.

4. ¿Maynin promesapar confiyañatakejj kunanakatsa jan payachasiñasäki? Mä uñachtʼäwimp uk qhanañchtʼam.

⁴ Maynin promesapar confiyañatakejja, kuntï arski uk phoqañ munatapatsa, uk phoqañatak chʼamanïtapatsa jan ukajj pueditapatsa janiw payachasiñasäkiti. Ak amuytʼañäni. Utamajj thayan qʼala tukjatäsajj janiw walëjjeti. Ukatwa mä amigomajj akham saraktam: “Nayaw utam wasitat lurañatak yanaptʼäma” sasa. Jupan cheq parlatapatsa, jumar yanaptʼañ munatapatsa janiw payachasktati. Ukhamarus jupajj uta luririwa, ut lurañatakejj herramientanakanirakiwa, ukatwa uta lurirïtapat jan payachasktati. Yanaptʼämaw sataparojj creyiraktawa. ¿Jiwatat jaktañajj utjaniw siski ukarojj creyiraktati? ¿Diosajj uka arsutap phoqañ muniti, uk phoqañatakejj chʼamanirakiti?

5, 6. Jehová Diosajj jiwatanakar wal jaktayañ munatapat janiw payachasktanti, ¿kunatsa ukham sistanjja?

⁵ ¿Jehová Diosajj jiwatanakar jaktayañ muniti? Jïsa, jupajj muniwa. Jupajj Biblia qellqerinakat waljaniruw jiwatat jaktañ toqet qellqapjjañapatak amuytʼayäna (Is. 26:19; Os. 13:14; Apoc. 20:11-13). Ukhamarus Jehová Diosajj kuntï arski uk phoqapuniwa (Jos. 23:14). Cheqas Jehová Diosajj walpun jiwatanakar jaktayañ muni. ¿Kunatsa ukham sistanjja?

⁶ Kuntï Job chachajj siskäna uk amuytʼañäni. Jupajj jiwkchïsa Jehová Diosajj wasitatwa wal uñjañ munitani sasaw säna (Job 14:14, 15). Jehová Diosajj uka pachparakwa jiwapki uka servirinakapatakejj muni. Jupanakarojj wal jaktayañ muni, kʼumar jakasipjjaspa, kusisitäpjjaspa ukwa munaraki. Kunatï cheqäki uk jan uñtʼas jiwapki taqe uka jaqenakatakejj ¿kunsa Jehová Diosajj munaraki? Wali munasiri Awkisajj ukhamarakiw jupanakar jaktayañ muni (Hech. 24:15). Jupan amigonakapäpjjaspa, wiñayatak aka oraqen jakapjjarakispa ukwa muni (Juan 3:16). Cheqas Jehová Diosajj taqe jiwatanakaruw jaktayañ muni.

7, 8. ¿Kunatsa Jehová Diosajj jiwatanakar jaktayañatakejj chʼamaniw sistanjja?

⁷ ¿Jehová Diosajj jiwatanakar jaktayañatakejj chʼamanirakiti? Jïsa, ukhamawa. Jupajj ‘Taqe Chʼamani Diosawa’ (Apoc. 1:8). Enemigopajj khitïskpansa, jupajj chhaqtayaspawa, jiwañarus chhaqtayarakiniwa (1 Cor. 15:26). Uk yatiñajj wal chʼamañchtʼistu, chuymachtʼarakistuwa. Emma Arnold sat kullakan experienciapat amuytʼañäni. Jupasa familiapasa, kunayman jan walinakanwa Segunda Guerra Mundialan uñjasipjjäna. Uka kullakan munat familiaranakapasa munat amigonakapas campos de concentración nazi ukan jiwapjjäna, kullakajj phuchapar chuymachtʼañatakejj akham sänwa: “Jaqenakatï wiñayatak jiwapjjaspa ukhajj ¿jiwañajj Diosat sipans jukʼamp chʼamanïkaspas ukhamäspajjaya?” sasa. Cheqas janiw kunas ni khitis Jehová Diosat sipans jukʼamp chʼamanejj utjkaspati. Diosaw jaqenakarojj lurawayi, ukhamajj jiwatanakar jaktayañatakejj chʼamanirakiwa.

⁸ Maysa toqetjja, Diosajj taqe kunwa amtaspa, ukatwa jiwatanakarojj jaktayaniw saraktanjja. Biblianjja, warawaranakarojj sutitkam jawsi siwa (Is. 40:26). Diosajj taqe jiwatanakatwa amti (Job 14:13; Luc. 20:37, 38). Khitinakatï jiwatat jaktanipkani ukanakat taqe kunwa amtaspa, jiwki ukajj kunjam jaqënsa, kunjamansa jakasïna, kunanaks amtasïna taqe ukanakwa Diosajj amtaspa.

9. ¿Kunatsa jumajj jiwatat jaktañajj utjaniw sasin confiyta?

⁹ Kunjamtï yatjjataniwayktanjja, Jehová Diosajj jiwatanakar jaktayäw siski uka promesaparojj confiysnawa, kuna laykutejj jupajj arupar phoqañ muniwa, chʼamanirakiwa. Maysa  toqetjja, jupajj yaqhep jiwatanakarojj jaktayänwa, ukatwa jupajj arupar phoqaniwa sistanjja. Bibliajj qellqaskäna uka tiemponjja, Jehová Diosajj mä qhawqha chachanakarusa Jesucristorusa, jiwatanak jaktayapjjañapatakiw chʼam churäna. Jesusajj jiwatat jaktaykäna ukanakat may jichhajj uñjañäni. Ukajj Juan capítulo 11 ukankiwa.

10. ¿Jesusajj Betania markar pä uru sarañan predicaskäna ukhajj kunas pasäna, ukat kun lurañsa jupajj amtäna? (Juan 11:1-3).

¹⁰ (Juan 11:1-3 liytʼäta). Betania markanjja, Lazarompi, María ukat Marta kullakanakapampiw jakapjjäna, jupanakajj Jesusan amigonakapäpjjänwa (Luc. 10:38-42). 32 mara tukuyarojja, Lazarow usuntäna, kullakanakapajj wal llakisipjjarakïna. Ukatwa Jesusar yatiyapjjañapatakejj mä yatiyäwi apayäna, jupajj Jordán jawir khurkatankaskänwa, pä uru sarañankarakïnwa (Juan 10:40). Ukampis kunapachatï Jesusajj uka yatiyäw katoqkäna ukhanakaw Lazarojj jiwjjäna. Jesusajj Lázaro amigopan jiwatap yatkchïnsa, Betania markar janïr sarkasajj pä urump ukan quedasiñwa amtäna. Ukhamajj Betania markar purjjäna ukhajja, Lazarojj pusi urunakaw jiwatäjjäna. Jesusajj kunatï amigonakapar yanaptʼkaspa, Diosarus jachʼañchkaspa ukwa lurañ muni (Juan 11:4, 6, 11, 17).

11. ¿Uka sarnaqäwit kunsa suma amigöñat yateqsna?

¹¹ Uka sarnaqäwejj suma amigöñatwa yatichistu. Mariampi Martampejj mä yatiyäw Jesusar apayapjjäna ukhajja, janiw Betania markar jutañap mayipkänti. Jan ukasti munat amigopan usutätapakwa yatiyapjjäna (Juan 11:3). Lazarojj jiwjjäna ukhajja, Jesusajj kawkjankkäntï ukjatpachaw jupar jaktayaspäna. Ukampis María ukat Marta amiganakapampïñatakiw Betania markar sarañ amtäna. ¿Chuymapat ukham yanaptʼasir mä amigomajj juman utjtamti? Ukhamächi ukhajja, “jan walinakajj utjki ukhajj” jupaw yanaptʼätam (Prov. 17:17). Jiwasatï Jesusat yateqasiñänejja, ukham yanaptʼasiri amigöñäniwa. Lazarot parltʼaskakiñäni, kunas uka qhepat pasäna uk jichhajj uñjarakiñäni.

12. ¿Jesusajj Martar kamsänsa, ukat kunatsa Jesusajj arupar phoqaniw sasin confiyaspäna? (Juan 11:23-26).

¹² (Juan 11:23-26 liytʼäta). Martajj Jesusan Betania marka jakʼankjjatap yatïna ukhajja, jankʼakiw jupan ukar saräna, akham sarakïnwa: “Tata, jumatï akankasmänjja, janiw jilajajj jiwkasapänti” sasa (Juan 11:21). Cheqas Jesusajj Lazaror qollaspänwa, ukampis mä musparkañ milagro lurañwa amtäna. Jesusajj akham sasaw Martar mä promesa luräna: “Jilamajj sartjjaniwa” sasa. Ukatjja arupar confiyañapatakiw akham sasin chʼamañchtʼäna: “Jiwatat jaktañasa jakañasa nayätwa” sasa. Cheqas ukhamawa, Diosaw Jesusarojj jiwatanak jaktayañapatakejj chʼam churi. Ukhakamajja, Jesusajj mä jiskʼa imill wawaruw jiwkäna ukaratpachajj jaktayäna, ukat mä waynaruw jaktayarakïna, inas juparojj jiwkäna uka pachpa urun jaktaychïna (Luc. 7:11-15; 8:49-55). Ukampis  ¿pusi urunak jiwata, cuerpopas thujstata mä jaqerojj jiwatat jaktayaspänti?

13. Juan 11:32-35 textorjamajj ¿kunjamas Jesusajj Mariampir mayninakampir jachir uñjasajj jikjjatasïna? (Dibujo uñjjattʼarakïta).

¹³ (Juan 11:32-35 liytʼäta). Kunas pasäna uk amuytʼañäni. Lazaron María sat mayni kullakapajja, Jesusar jakʼachasisajj Marta kullakapjamaw akham sarakïna: “Tata, jumatï akankasmänjja, janiw jilajajj jiwkasapänti” sasa. Jupasa jupar compañirinakasa, wali llaktʼatäpjjewa. Jupanakar uñjasasa, jachir istʼasasa, Jesusajj wal llaktʼasiraki. Amigonakapat sinttʼasisajj jachaqtʼasirakiwa. Mä munat familiarana jan ukajj mä munat amigon jiwatapajj kunja llakkañasa uk jupajj amuyiwa, ukatwa jupanakan llakip chhaqtayañ muni.

14. Mariar jachir uñjasajj kunjamas Jesusajj jikjjatasïna ukajj ¿kunsa Jehová Diosat yatichistu?

¹⁴ Marian jachatapat kunjamas Jesusajj jikjjatasïna ukajja, Jehová Diosajj kunja sinttʼasirisa ukwa yatichistu. ¿Kunatsa ukham sistanjja? Kunjamtï pasïr yatichäwin yatjjataniwayktanjja, Jesusajj Awkipjam amuyirïtapa, sinttʼasirïtapwa uñachtʼayi (Juan 12:45). Ukhamajj kunjamsa Jesusajj amigonakapan wali llaktʼatäpjjatapat jachaqtʼasïna uk liytʼtan ukhajja, maynin jiwatapat jachaqtʼastan ukhajj ukhamarakiw Jehová Diosajj jiwasat wal sinttʼasi (Sal. 56:8). ¿Janit uk yatiñajj wali munasiri Diosar jukʼamp jakʼachasiñasatak yanaptʼkistu?

15. Juan 11:41-44 textorjamajj ¿kunas Lazaron sepulturapan pasäna? (Dibujo uñjjattʼarakïta).

¹⁵ (Juan 11:41-44 liytʼäta). Lazaron sepulturapar purisajja, Jesusajj sepulturar atkatatäki uka qal ateqapjjam sasaw säna. Ukampis Martajja, Lazaron cuerpopajj niya thujstatäjjpachawa sasaw säna. Jesusasti juparojj sarakïnwa: “Jumatï creyïtajja Diosan kʼajkir chʼamapwa uñjäta sasajj ¿janit sisksma?” sasa (Juan 11:39, 40). Ukatsti Jesusajj alajjpachar uñtasaw taqenin uñjkat mä oración luräna. Kuntï niya lurañampïski ukat Jehová Diosaruw jachʼañchañ munäna. Ukjjarusti “¡Lázaro, mistunim!” sasaw jachʼat artʼäna, Lazarosti sepulturat mistunïnwa. Kunatï mayninakatakejj jan lurañjamäki ukwa Jesusajj luräna (español arut Biblia de estudio ukanwa Juan 11:17 texton notap liytʼäta).

16. Juan capítulo 11 ukan qellqatäki ukajj ¿kunjamsa jiwatat jaktañajj utjapuniniw sasin jukʼamp confiyañatak yanaptʼistu?

 ¹⁶ Juan capítulo 11 ukan qellqatäki ukajja, jiwatat jaktañajj utjapuniniwa sasin jukʼamp confiyañatakiw yanaptʼistu. Kamsasas Jesusajj Mariar mä promesa luräna uk amtañäni, jupajj akham sänwa: “Jilamajj sartjjaniwa” sasa (Juan 11:23). Jesusajj Awkipjamarakiw jiwatanakar jaktayañ muni, jaktayañatakis chʼamanirakiwa. Jesusan jachaqtʼasitapajja, jiwañarusa, jiwañajj kuna llakinaktï utjayki ukanak wal chhaqtayañ munatapwa uñachtʼayi. Lazaror jaktayasajja, jiwatanakar jaktayañatak chʼamanïtap may kutimpiw Jesusajj uñachtʼayäna. Kuntï Jesusajj Martar amtaykäna uk amuytʼarakiñäni, jupajj akham sänwa: “Jumatï creyïtajja Diosan kʼajkir chʼamapwa uñjäta sasajj ¿janit sisksma?” sasa (Juan 11:40). Diosajj jiwatanakar jaktayäwa siski uka arsutapar creyiñatakejj walja razonanakaw utjistu. Ukampis jiwatat jaktañajj utjaniwa sasin taqe chuym creyiñatakejj ¿kunsa lursna?

17. Biblian qellqatäki uka jiwatat jaktirinakat liytʼktan ukhajj ¿kunsa lurañasa?

¹⁷ Nayra tiempon jaktapkäna ukanakat liytʼañasawa, lupʼiñasarakiwa. Biblianjja jiwatat jaktir kimsaqallqo jaqenakatwa parli, jupanakajj aka oraqen jakañatakiw jaktapjjäna. c ¿Sapa mayni ukanakat jukʼamp yatjjatañatakejj chʼamachassnati? Yatjjatkasajja, kunjamsa jiwasjam chachanakasa, warminakasa, wawanakas jaktapjjäna ukwa amuytʼañasa. Kunanaksa ukanakat yateqsna ukwa thaqañasa, kunjamsa ukanakajj Jehová Diosan jiwatanakar jaktayañ munatapsa, jaktayañatak chʼamanïtapsa uñachtʼayi ukwa amuytʼañasaraki. Jukʼampis Jesusan jaktatapatwa wal lupʼiñasa, jupan jaktatapaw jukʼamp importantejja. Jaktatap qhepatjja, Jesusarojj walja patak jaqenakaw uñjapjjäna, ukaw jiwatat jaktañajj utjapuniniw sasin confiyañatak yanaptʼistu (1 Cor. 15:3-6, 20-22).

18. ¿Jiwatat jaktañat parlki uka cancionanakampejj kunjamsa chʼamañchtʼassna? (Nota liytʼarakïta).

 ¹⁸ Jiwatat jaktañat parlki uka “adorañ cancionanakampi” chʼamañchtʼasiñasawa (Efes. 5:19). d Uka cancionanakaw jiwatat jaktañajj utjapuniniw sasin jukʼamp confiyañatak yanaptʼistu. Taqe chuym creyiñatakis yanaptʼarakistuwa. Ukatwa familiampi Bibliat yatjjatkasajj uka cancionanak istʼañasa, cantañasa, kunsa letranakapajj yatichistu uksa parltʼañasa. Uka cancionanak pʼeqer yatsuñasawa, letranakapas chuymasankañaparakiwa. Ukhamajj jakäwis aptʼasirjam mä yantʼan uñjasiñäni jan ukajj mä munat familiarasas amigosas jiwani ukhajja, Jehová Diosan espíritu santopaw uka cancionanak amtañatak yanaptʼistani. Ukaw chuymachtʼistani, chʼamañchtʼarakistani.

19. ¿Jiwatat jaktirinakat lupʼkasajj kunanaks amuytʼasma? (“ ¿Kunanaksa jisktʼasma?” sat recuadro liytʼäta).

¹⁹ Amuytʼañasawa. Machaq mundon kunjamas jakasjjañäni uk amuytʼirwa Jehová Diosajj lurawayistu. Mä kullakajj akham siwa: “Machaq mundon jakasiñajj kunjamänis uk walja tiempow amuytʼta, niyas Paraisonkasajj rosa panqaranak muktʼkirista ukhamwa amuyta” sasa. Bibliajj qellqaskäna uka tiempon Diosar jan jitheqtas servirinakar uñtʼañajj kunjamänisa uk amuytʼapjjañäni. ¿Jupanakat kawknïrirus jukʼamp uñtʼañ munasma? ¿Kunsa jupar jisktʼasma? Jiwjjapjje uka munat familiaranakasampi amigonakasampi wasitat jikisjjañajj kunjamänisa uk amuytʼapjjarakiñäni. Jupanakarojj kamsasas katoqäta, qhomanttʼarakïta uk amuytʼam, jupanakar uñjasajj kunja kusisitäyätasa uk amuytʼarakim.

20. ¿Kunsa luraskakiñasa?

²⁰ Jiwatat jaktañaw utjani sasin arsutapat walpun Jehová Diosar yuspärtanjja. Jupajj arsutap phoqañ muniwa, phoqañatakis chʼamanirakiwa sasaw confiytanjja. Diosajj sapa maynirus akham siskistaspa ukhamawa: “Munat familiaranakamas amigonakamas jaktanjjapjjaniwa” sasa. Jiwatat jaktañajj utjaniwa siski uka arunakar confiyasipkakiñäni. Ukhamtï lurañänejja, uka suma arunak arsuri Jehová Diosarojj sapa kutiw jukʼamp jakʼachasiñäni.