1. ¿Jesusajj nayrïr milagrop lurkäna ukhajj kunanakas pasäna?

 KUNANAKAS 29 mara tukuyarojj pasäna ukanak amtañäni. Uka tiemponwa Jesusajj predicañ qalltaskäna. Jupasa, María mamapasa, yaqhep discipulonakapasa Caná markaruw mä casarasïwir sarapjjäna, uka markajj Nazaret markat alay toqenkiwa, ukanwa Jesusajj jilsurakïna. Mariajj casarasirinakan familiapan amigapänwa, amuyatajj invitadonakar serviñanwa yanaptʼäna. Ukampis kunatï casarasirinakarusa familianakaparus jan wal uñjaykaspäna ukaw pasäna: vinow tukusjjäna. b Inas uka casarasïwirojj waljan sarapjjchïna. Mariajj ratukiw yoqapan ukar sarasajj akham säna: “Vinow jupanakan jan utj-jjeti” sasa (Juan 2:1-3). ¿Kunsa Jesusajj luräna? Umwa ‘suma vinor’ tukuyäna, ukajj wali musparkañänwa (Juan 2:9, 10).

2, 3. 1) ¿Kuna milagronaksa Jesusajj luräna? 2) ¿Kunatsa Jesusan milagronakapat yatjjatañajj wakisi?

² Jesusajj predickäna uka tiemponjja, walja milagronakwa luräna. c Waranq waranqa jaqenakaruw chʼamapampejj yanaptʼäna. Mä kutejja, 5.000 chachanakaruw manqʼayäna, yaqha horasasti 4.000 chachanakaruraki, warminakampiru wawanakampir jakthapsna ukhajja, uka pä milagronakampikiw 27.000 jila jaqenakar manqʼayäna (Mat. 14:15-21; 15:32-38). Uka pä milagro lurkäna ukhajja, Jesusajj usutanakarus waliptayarakïnwa (Mat. 14:14; 15:30, 31). Jesusajj milagro lurasin jaqenakar manqʼayatapa ukhamarak qollatap uñjasajja, taqeniw wal musparapjjäna.

 ³ Jesusan milagronakapat waljanakwa yateqsna. Aka yatichäwinjja, kawkïr yatichäwinakatï Diosar jukʼamp confiyañatak yanaptʼkistaspa ukanakwa yatjjataskañäni. Jesusajj uka milagronak lurkasajj humilde chuymanïtapa, sinttʼasirïtapwa uñachtʼayäna, kunjamsa jupat yateqassna ukwa uñjarakiñäni.

4. ¿Jesusan milagronakapat yatjjatkasajj khitinakatsa yateqsna?

⁴ Jesusan milagronakapajj janiw jupatak yatichkistuti, jan ukasti Awkipatwa yaticharakistu. Cheqansa Jehová Diosaw Jesusarojj milagronak lurañapatakejj chʼam churäna. Hechos 10:38 textojj Jesusat akham siwa: “Diosaw juparojj espíritu santompi ajllïna, chʼamsa churarakïna. Diosajj jupampïskänwa, ukatwa jupajj taqe uka lugaranakar saräna, suma luräwinak lurasa ukhamarak taqe khitinakatï Diablon tʼaqesiyatäpki ukanakar qollasa” sasa. Kunjamtï yatktanjja, Jesusajj Awkipatwa sinttʼasirïñsa jupjam amuyañsa yateqäna, ukaw arsutapansa luratapansa uñjasïna, milagronakapansa ukaw uñjasirakïna (Juan 14:9). Jesusan milagronakapat kimsa yatichäwinakwa jichhajj yatjjatañäni, ukanakaw Diosar jukʼamp confiyañatakejj yanaptʼistani.

5. ¿Kunatsa Jesusajj milagronak luräna? (Mateo 20:30-34).

⁵ Maya, Jesusampi Awkipampejj walpun munasipjjestu. Jesusajj aka oraqenkkäna ukhajja, jaqenakar wal munasitapwa uñachtʼayäna, ukatwa jaqenakan llakinakap apaqañatakejj chʼamapampejj milagronak luräna. Mä kutejja, pä juykhunakaw yanap mayiñatakejj jachʼat artʼapjjäna (Mateo 20:30-34 liytʼäta). Jesusajj “jupanakat wal sinteqtʼasïna” jupanakasti uñj-jjapjjarakïnwa sasaw Bibliajj qhanañchi. Griego arun “wal sinteqtʼasïna” siski uka arojja, mayninakat wal llaktʼasiña, chuymatpach sinttʼasiña sañ muni. Ukham sinttʼasirïtapaw qhawqsa jaqenakar munasi uk uñachtʼayi, sinttʼasirïtapatwa manqʼat awtjatanakarojj manqʼayäna, lepra usuni mä jaqerus qolläna (Mat. 15:32; Mar. 1:41). Ukhamajj ‘wali sinttʼasiri’ Jehová Diosas Yoqapas wal munasistu, jiwasar tʼaqesir uñjasas wal llakisipjjaraki, janiw ukat payachasktanti (Luc. 1:78; 1 Ped. 5:7). Kunanakatï jaqenakar jan waltʼayki ukanakjja, jupanakajj wal chhaqtayañ munapjje.

6. ¿Kunatakis Diosajj Jesusar chʼam churi?

⁶ Paya, jaqenakan taqe llakinakap chhaqtayañatakiw Diosajj Jesusar chʼam churi. Yaqhep jan waltʼäwinak janiw jiwasajj kunjamatsa askichañ puedksnati. Ukampis Jesusajj milagronak lurasaw uk askichañ pueditap uñachtʼayäna. Kunanakatï jaqenakar llakisiyki taqe ukanak chhaqtayañatakejj chʼamaniwa, juch katoqawaytan uksa, juch utjipan jan walinakajj utjki uksa jupajj chhaqtayaniwa, usuntañasa jiwañasa uka taypinkiwa (Mat. 9:1-6; Rom. 5:12, 18, 19). Milagronakapajja, “kunayman usuni jaqenakar” qollirïtapa, jiwatanakar jaktayañatak chʼamanïtapwa uñachtʼayi (Mat. 4:23; Juan 11:43, 44). Jachʼa thayanak tʼakurayañatakisa demonionakar atipjañatakis chʼamanirakiwa (Mar. 4:37-39; Luc. 8:2). Jehová Diosajj Yoqapar chʼam churatap yatiñajj ¿waljjay kusisiyistojja?

7, 8. 1) ¿Jesusan milagronak luratapajj kunar confiyañatakis yanaptʼistu? 2) ¿Kawkïr milagro lurasiñapsa jumajj wal uñjañ munta?

⁷ Kimsa, Diosan Reinopajj apankani uka bendicionanakajj cheqpachapuniw phoqasini sasaw confiysna. Jesusajj jaqëkasin aka oraqen milagronak lurkäna ukajja, kunanaktï alajjpachankir Reyjamajj Diosan Reinopan lurkani ukanakan mä uñachtʼäwipakïnwa. Akat  mä jukʼarojj Cristojj oraq apnaqkani ukan jakañajj kunjamakïnisa uk amuytʼam. Jupajj taqe jaqenakar tʼaqesiyki uka usunaksa, cojöñsa, juykhüñsa, yaqha ukhamanaksa chhaqtayjjaniwa, taqeniw kʼumara jakasjjañäni (Is. 33:24; 35:5, 6; Apoc. 21:3, 4). Janiw mayampis manqʼat pistʼañajj utj-jjaniti, janirakiw desastres naturales ukanakan utjatap laykojj tʼaqesjjañäniti (Is. 25:6; Mar. 4:41). “Sepulturankapki” taqe uka munat familiarasarusa jan ukajj amigonakasarus kusisitaw katoqtʼasjjañäni (Juan 5:28, 29). Machaq mundot lupʼkasajj ¿kawkïr milagro lurasiñapsa wal uñjañ munta?

⁸ Jesusajj milagronak lurkäna ukhajja, humilde chuymanïtapa, sinttʼasirïtapwa uñachtʼayäna, jiwasajj ukhamäñasarakiwa. Jesusajj lurkäna uka pä milagronakapat jichhajj parltʼañäni. Nayraqatjja Caná markan casarasïwejj utjkäna ukat parltʼañäni.

9. ¿Kunatsa Jesusajj mä casarasïwin mä milagro luräna? (Juan 2:6-10).

⁹ (Juan 2:6-10 liytʼäta). Mä casarasïwin vinojj tukuskäna ukhajja, ¿Jesusan mä kun lurañapajj wakisipunïnti? Janiwa. Mesiasajj mä milagro toqew vino utjayani sasajj janiw kuna profecias qhanañchkänti. Ukampis jumajj casaraskta uka urutï mä ukhaman uñjasismäna ukhajja, kunjamakis jikjjatasismäna uk amuytʼam. Casarasirin familiapasa casarasirinakasa kunja phenqʼachatas uñjasipjjaspäna ukwa Jesusajj amuytʼpachäna, jupanakat sinttʼasisaw  yanaptʼañ munarakïna. Ukatwa aka yatichäwi qalltan parlaniwayktan uka milagro luräna. Cheqas mä 390 litronak umwa suma vinor tukuyäna. ¿Kunatsa ukham walja vino utjayäna? Inas jiltʼkäna uka vinojj yaqha horasatak imaschispäna jan ukajj casarasirinakar yanaptʼañatak aljaschispäna. ¡Casarasirinakajj walpun yuspärapjjpachäna!

10. ¿Juan capítulo 2 ukan qellqatäki ukat kunanaksa yateqsna? (Dibujo uñjjattʼarakïta).

¹⁰ Juan capítulo 2 ukan parlki ukanakat mä qhawqhanak jukʼamp sum amuytʼañäni. ¿Khitis wakullanakarojj um phoqantäna uk amuytati? Janiw Jesusajj phoqantkänti. Niyakejjay wali aytatäñ jan munkchïntejja, servirinakaruw uk lurapjjañapatak mayïna (versículos 6, 7). Milagro lurañ tukuyatarojja, ¿khitis casarasïwi pʼeqtʼirirojj vino malltʼañapatakejj churäna? Janiw Jesusajj churkänti. Malltʼayañatak apapjjañapatakejj servirinakaruw Jesusajj mayïna (versículo 8). Jesusajj janirakiw vino copa aptasin invitadonak nayraqatan akham siskänti: “¡Jichhak lurkta uka suma vino malltʼapjjam!” sasa.

11. ¿Kunsa Jesusan uka milagropat yateqsna ?

¹¹ ¿Jesusan uka milagro luratapat kunsa yateqsna? Humilde chuymanïñwa yateqsna. Jesusajj janiw uma vinor tukuyatapat jachʼa jachʼa tukkänti. Cheqas Jesusajj janipuniw luratanakapat jachʼañchasirïkänti. Jan ukasti humilde chuymanïnwa, taqe luratanakapatsa Awkiparupuniw jachʼañchirïna, aytarakirïna (Juan 5:19, 30; 8:28). Jiwasatï Jesusat yateqasiñäni ukhajja, humilde chuymanïñäniwa, janirakiw luratanakasatsa jachʼañchaskañäniti. Diosar serviñan kuna luräwjjay katoqchiñäni ukatjja, janiw jiwas pachpajj jachʼañchaskañäniti, jan ukasti wali musparkañ Diosatwa jachʼañchasiñäni, jupar serviñajj mä suma privilegiowa (Jer. 9:23, 24). Cheqas juparupuniw taqe kunats jachʼañchañasa. Jiwasajj janipuniw Jehová Diosan jan yanaptʼapampejj kuns lurksnati (1 Cor. 1:26-31).

12. ¿Kunjamatsa Jesusat humilde chuymanïñ yateqasiraksna? Mä uñachtʼäwimp uk qhanañchtʼam.

¹² Kunjamatsa Jesusjam humilde chuymanïtas uñachtʼaysna uk uñjañäni. Mä anciano jilatajja, nayrïr kuti taqenitak arstʼañapatakiw siervo ministerial mä wayna jilatarojj walja tiempo yanaptʼi. Ukham yanaptʼatapat uka wayna jilatajj wali sumwa arstʼawayi, congregacionankir jilat kullakanakas wal kusisipjjaraki. Tantachäwi tukuyatarusti mayniw uka ancianorojj akham saraki: “Uka jilatajj wali sumpunjjay discurso arstʼawayejja?” sasa. Uka ancianojj ¿“jïsa, nayaw yanaptʼawayta” saspati? Jan ukajj ¿humilde chuymampich “jïsa, wali sum arstʼawayi, ukajj wali kusiskañawa” saspacha? Maynitï humilde chuymanïchejja, kunanaktï mayninak layku lurki ukanakat janiw jachʼañchasiñapajj wakiskiti. Cheqas Jehová Diosaw ukanak uñjaski wali valoranitwa uñjaraki, uk yatiñaw juparojj wal kusisiyi (Mateo 6:2-4 liytʼarakïta; Heb. 13:16). Jesusjam humilde chuymanïñatak chʼamachasitas uñjasajj Jehová Diosajj wal kusisi (1 Ped. 5:6).

13. ¿Kunsa Jesusajj Naín marka jakʼan uñjäna, ukat kunsa luräna? (Lucas 7:11-15).

¹³ (Lucas 7:11-15 liytʼäta). Jesusajj niya mä mara chikatani predicaskäna ukhajja, Naín markaruw viajïna. Galilea markankir uka markajj janiw Sunem markat jayankkiti, mä 900 maranak nayrajj Sunem markanwa Eliseojj mä warmin yoqall wawapar jaktayäna (2 Rey. 4:32-37). Uka markan punkupar jakʼachasiskäna ukhajja, Jesusajj jiwat kallirinakaruw uñjäna. Uk uñjañajj wali llakkañänwa. Mä viuda warmin sapa yoqapaw jiwjjäna.  Ukhamäkchisa, uka warmejj janiw sapäkiti, jupamp chikajj uka markankir walja jaqenakaw sarasipki. Jesusajj jiwat kallirinakar saytʼayasajja, wali llaktʼatäkäna uka warmir yanaptʼañatakejj yoqaparuw jaktayi. Evangelionakan Jesusan kimsa jaqenakar jaktayatapats parlkchejja, Naín markankir viuda warmin yoqaparuw nayrïr kut jaktayäna.

14. ¿Kunanaksa Lucas capítulo 7 ukan qellqatäki ukanakat yateqsna? (Dibujo uñjjattʼarakïta).

¹⁴ Lucas capítulo 7 ukan parlki ukanakat mä qhawqhanak jukʼamp sum amuytʼañäni. ¿Kunanakas pasäna uk amuytati? Nayraqatjja, Jesusajj “uka warmi[ruw] uñjäna”, ukatsti “walpun jupat sinttʼasïna” (versículo 13). Inas jiwatan mamapajj wali jachtʼasis jiwatan nayraqatap saraskchïna, Jesusarojj uk uñjañaw chuym chʼalljjtayäna. Jesusajj janiw uka warmit aleqak sinttʼaskänti. Jan ukasti luratanakapampiw sinttʼasitap uñachtʼayäna. Kʼachatakwa uka warmirojj “jan jachjjamti” sasin sispachäna. Janiw uka warmimpejj aleqak parlkänti, jan ukasti yoqapar jaktayasajj juparuw “katuyjjarakïna” (versículos 14, 15).

15. ¿Kunsa Jesusan uka milagropat yateqsna?

¹⁵ ¿Kunsa Jesusan uka milagropat yateqtanjja? Khitinakatï maynin jiwatapat wali llaktʼatäsipki ukanakat sinttʼasiñwa yateqtanjja. Jesusajj mä viuda warmin yoqaparuw jaktayäna, jiwasajj janiw jupjamajj jiwatanakar jaktayksnati. Ukampis khitinakatï maynin jiwatapat wali llaktʼatäsipki ukanakat sinttʼasiñ yateqsnawa. Nayraqatjja wali amuyumpiw uñjañasa, ukjjarusti kunatï llakitarojj yanaptʼkaspa chuymachtʼkaspa ukwa arsuñasa, lurañasaraki (Prov. 17:17; 2 Cor. 1:3, 4; 1 Ped. 3:8). d Mä qhawqha arunak sañasa, munasiñamp kun lurañasa, maynirojj wal yanaptʼaspa.

16. ¿Parrafon parlki uka experienciat kunsa yateqtanjja? (Uka experiencia uñachtʼayki uka foto uñjjattʼam).

¹⁶ Kunas mä qhawqha maranak nayrajj mä tantachäwin pasäna uk amuytʼañäni. Jiwatat jaktirinakat parlir mä cancionajj cantasiskäna ukhajja, mä kullakajj yaqha kullakaruw jachaskir uñjäna, uka kullakan phuchapajj  ukhakiw jiwatayna. Niyakejjay kullakajj kunatsa uka kullakajj llaktʼatäskäna uk yatchïnjja, ratukiw uka kullakan ukar sarasajj qhomanttʼäna, uka cancionan tukuyañapkamaw jupamp chik cantarakïna. Llakitäkäna uka kullakajja, jilat kullakanakarojj jukʼampiw munasjjäna. Uka tantachäwir saratapat walpun kusisirakïna. Kullakajj akham siwa: “Salón del Reinon yanaptʼa katoqañ janiw payachaskayätti” sasa. Khitinakatï maynin jiwatapat wali llaktʼatäpki, “sinti desanimatäpki” ukanakat sinttʼasiñatak mä kunsa lurañäni ukjja, Jehová Diosajj uñjaskiwa, wali valoranitwa uñjaraki (Sal. 34:18).

17. ¿Kunsa aka yatichäwin yatjjatawaytanjja?

¹⁷ Jesusan milagronakapat yatjjatañajj Diosar jukʼamp confiyañatakiw yanaptʼistu. Evangelionakan parlki uka milagronakajja, Jehová Diosasa Jesusas jiwasar wal munasipjjatapwa uñachtʼayistu, Jesusajj taqe jaqenakan llakinakap chhaqtayañatak chʼamanïtapsa, Diosan Reinopajj niya apankani uka bendicionanakan phoqasiñapätapsa uñachtʼayarakistuwa. Ukanakat yatjjatañajja, Jesusajj kunjam chuymanïkänti uka toqet lupʼisin jupat yateqasiñatakiw yanaptʼistu. Familiampi Bibliat yatjjatkasina jan ukajj sapaki Bibliat yatjjatkasinjja, ¿janit Jesusan mayni milagronakapat yatjjatañ amtkasma? Ukanakat kunanaksa yateqasma uk amuytʼam, yaqhanakampis uka toqet parltʼarakim. Ukaw mayninakamp sum parltʼasiñatak yanaptʼätam (Rom. 1:11, 12).

18. ¿Kunanakatsa jutïr yatichäwin yatjjataskañäni?

¹⁸ Jesusajj predickäna uka tiempojj niya tukuyañampïkäna ukhajja, jiwatanakar jaktayatapat Biblian qellqatäki uka kimsïr qhep qhepa milagro luräna. Ukampis ukajj janiw mayni milagronakjamäkänti: pusi uru sepulturankjjäna uka wali munat amigoparuw jaktayäna. ¿Kunanaksa uka milagrot yateqsna? ¿Jiwatat jaktañajj utjaniwa sasin jukʼamp confiyañatakejj kunsa lursna? Jutïr yatichäwinwa ukanakat yatjjataskañäni.