1. ¿Kuna toqetsa jan payachasktanjja?

 JEHOVÁ DIOSAJJ wal munasistu, kunatï walïki ukwa jiwasatak munaraki, taqe servirinakapaw uk yattanjja (Rom. 8:35-39). Biblian wiñay yatichäwinakaparjam sarnaqañajj yanaptʼapunistuwa, janiw ukat payachasktanti (Is. 48:17, 18). Ukampis mä akatjamat jan walin uñjaskañäni ukhajj ¿kamachañänisa?

2. ¿Kuna jan walinakansa uñjassna, ukat kamsasas jisktʼassna?

² Jehová Diosan servirinakapajj taqeniw jan walinakan uñjastanjja. Inas mä familiarasajj kun lurasasa jan ukajj kun arsusas chuym pʼakintchistu. Inas usutätas laykojj nayrjam Jehová Diosar jan serviñ puedjjstanti. Inas desastres naturales ukanakan utjatap laykojj wal tʼaqesiskstan. Jan ukajj inas Diosar servitasat arknaqapjjchistu. Uka jan walinakan uñjasisajja, inas akham jisktʼassna: “¿Kunatsa ukanakajj nayar pasitu? ¿Mä jan walti lurpachätjja? ¿Jehová Diosajj janit bendisjjpachïtu?” sasa. Jumatï ukham amuyirïsta ukhajj jan desanimasimti. Jehová Diosat jan jitheqtir servirinakapat waljaniw ukham amuyapjjarakïna (Sal. 22:1, 2; Hab. 1:2, 3).

3. ¿Kunsa Salmo 34:19 textojj yatichistu?

³ (Salmo 34:19 liytʼäta). Uka textonjja aka pä wakiskir yatichäwinakaw utji: 1) cheqap sarnaqer jaqenakajj jan waltʼäwinakanwa uñjasipjje, 2) Jehová Diosaw uka jan waltʼäwinakat salvi. ¿Kunjamsa Jehová Diosajj uka jan waltʼäwinakat salvistu? Akapachanjja, jan walinakan uñjasikipuniñäniwa, uk amuyañatakiw yanaptʼistu. Jehová Diosajj nayar servisajj kusisitäpjjätawa sasins siskchistojja, ukajj janis jakäwisan jan walinakan uñjasksna ukham janiw sañ munkiti (Is. 66:14). Kunjamas jutïrin wiñayatak jakasjjañäni uka toqet lupʼiñaswa Diosajj muni, cheqas ukham jakasiñaswa jupajj muni (2 Cor. 4:16-18). Ukañkamajj  sapüruw jupar serviskakiñasatak yanaptʼistu (Lam. 3:22-24).

4. ¿Kunanakatsa aka yatichäwin yatjjataskañäni?

⁴ Aka yatichäwinjja, Bibliajj qellqaskäna uka tiempon Jehová Diosar jan jitheqtas servirinakapampita jichha tiempon servirinakapampitwa yatjjataskañäni. Kunjamtï yatjjatkañänejja, mä akatjamatwa jan walinakan uñjassna. Ukampis Jehová Diosar confiyañäni ukhajja, jupajj katjjasipunistaniwa (Sal. 55:22). Diosan uka servirinakapat yatjjatkasajj akham jisktʼasim: “¿Nayatï jupjam uñjasiriskayäta ukhajj kunsa luririskayätjja? ¿Kunjamsa aka sarnaqäwejj Jehová Diosar jukʼamp confiyañatak yanaptʼitu? ¿Kunanaksa aka sarnaqäwit yateqerista?” sasa.

5. ¿Kuna jan walinakansa Labanajj Jacobur uñjasiyäna? (Nayrïr paginankir dibujo uñjjattʼäta).

⁵ Bibliajj qellqaskäna uka tiempon Jehová Diosan servirinakapajj mä akatjamatwa jan walinakan uñjasipjjäna. Jacob chachat parltʼañäni. Juparojj Labán chachan mä phuchapampi casarasiñapatakiw awkipajj mayïna, Labán chachajj Jehová Diosar adorir mä familiarapänwa. Jehová Diosajj walja bendicionanakwa churätam sasaw sarakïna (Gén. 28:1-4). Jacobojj awkipar istʼasajj Labán chachajj jakkäna uka Canaán markaruw viajïna, Labán chachajj pä phuchanakanïnwa, maynejj Lea satänwa, maynïristi Raquel satarakïnwa. Jacobojj Raquel sat sullka phuchapatwa enamorasïna. Jupamp casarasiñatakejj Labán chachatak paqallq maranak trabajiñatakejj dispuestokïnwa (Gén. 29:18). Ukampis janiw kunjamtï amtkäna ukarjam phoqaskänti. Labanajj jupar engañjänwa, Raquelar churañat sipansa Lea sat jilïr phuchaparukiw warmipäñapatak churäna. Mä semana qhepatjja, Raquel phuchapampiw casarjjarakïna, ukampis paqallq maranakampiw jupatak trabajiñapäna (Gén. 29:25-27). Janiw ukakïkänti, kuna acuerdonaktï lurapkäna ukanakans janiw cheqaparjam Jacobur uñjkänti. ¡Labanajj 20 maranakaw Jacobut aprovechasïna! (Gén. 31:41, 42).

6. ¿Kuna yaqha jan walinakansa Jacobojj uñjasïna?

⁶ Jacobojj jukʼamp jan walinakanwa uñjasirakïna. Jupajj mä jachʼa familianïnwa, ukampis wawanakapajj janiw jupanakkam sum apasipkänti. José jilaparus esclavotwa aljantapjjäna. Simeón ukat Leví yoqanakapajj familiaparus Jehová Diosan sutiparus mä phenqʼa uñjayapjjäna. Raquel sat munat esposapas payïr wawap ususkasaw jiwjjäna. Walja maranak manqʼat pistʼañ utjatapatjja, Jacobojj wali jilïrëjjäna ukhaw Egipto markan jakañatak sarjjäna (Gén. 34:30; 35:16-19; 37:28; 45:9-11, 28).

7. ¿Kunjamsa Jehová Diosajj Jacobut wal kusisitap uñachtʼayäna?

⁷ Taqe uka jan walinakansa uñjaskchïnjja, Jacobojj Jehová Diosarus arsutaparus confiyaskakïnwa. Jehová Diosajj jupat wal kusisitapwa Jacobur qhanañchäna. Labanajj walja kutis Jacobur engañjkchïnjja, Jacobojj Jehová Diosan yanaptʼapampejj walja utjirinëjjänwa. Jacobojj José yoqajajj jiwatäjjpachawa sasins amuykchïnjja, walja maranak qhepat jupamp jikisisajj walpun Diosar yuspärpachäna. Jacobojj Jehová Diosamp suma amigöpjjatap laykuw taqe uka jan walinak aguantäna (Gén. 30:43; 32:9, 10; 46:28-30). Jiwasatï Jehová Diosamp suma amigöñäni ukhajja, mä akatjamat jan walinakan uñjaskañäni ukanak aguantañäniwa.

8. ¿Kunsa David reyejj lurañ munäna?

 ⁸ David reyejj kunanaktï Jehová Diosar serviñatak lurañ munkäna ukanak janiw taqpach lurañ puedkänti. Jupajj taqe chuymaw Jehová Diosapatak mä templo lurañ munäna. Uk lurañ munatap Natán profetar yatiyäna ukhajja, profetajj akham sänwa: “Kuntï chuymaman lurañ amtkta uk luraskakim, cheqpach Diosaw jumampïski” sasa (1 Crón. 17:1, 2). Uka arunak istʼasajj Davidajj wal kusispachäna, ¿uk amuyasmati? Inas jupajj kunjamsa templo luräjja sasin amuykiptʼañ qalltjjchïna.

9. ¿Amtapajj jan phoqaskäna ukhajj kunsa Davidajj luräna?

⁹ Uka pasatatjja, jankʼakiw Jehová Diosan Natán profetapajj jan wali yatiyäwinakamp Davidan ukar kuttʼäna. Jehová Diosajj ‘uka pachpa arumaw’ Natán profetarojj janiw Davidajj templo lurkaniti jan ukasti wawanakapat mayniw lurani sasin yatiyäna (1 Crón. 17:3, 4, 11, 12). ¿Uk yatisajj kunsa Davidajj luräna? Kuntï amtkäna uk cambiänwa. Templo lurañatakejj kuna materialanaktï Salomón yoqapajj necesitañapäkäna ukanakwa wakichäna, qollq tantañwa amtarakïna (1 Crón. 29:1-5).

10. ¿Kunjamsa Jehová Diosajj Davidar bendisïna?

¹⁰ Janiw jumajj templo lurkätati sasin yatiykäna ukhajja, Jehová Diosajj mä pacto Davidampejj luräna: jumat jutir wawanakamat maynïriw wiñayatak reyit apnaqani sasaw mä promesa luräna (2 Sam. 7:16). Cristojj Waranqa Maranak Apnaqkani uka machaq mundonjja, Davidajj ukan apnaqer reyejj jupat jutirïtap yatisajj walpun kusisini. ¿Kunsa uka sarnaqäwit yateqsna? Kunanaktï Jehová Diosatak lurañ munktan ukanak janis taqpach lurañ puedkstanjja, Jehová Diosajj jan suyktan uka bendicionanakwa churistaspa.

11. Diosan Reinopajj janis suyapkäna uka horasar purkchïnjja, ¿kuna bendicionanaksa nayrïr patak maranakan jakir cristianonakajj katoqapjjäna? (Hechos 6:7).

¹¹ Nayrïr patak maranakan jakir cristianonakajj mä akatjamatwa jan walinakan uñjasipjjarakïna. Jupanakajj Diosan Reinop puriniñapsa suyasipkchïnjja, kunapachas purinini uk janiw yatipkänti (Hech. 1:6, 7). Ukhamajj ¿kunsa lurapjjäna? Jan tiemponiw predicapjjäna. Suma yatiyäwinakajj walja lugaranakan yatiyasiskatap uñjasajja, Jehová Diosajj luratanakap bendisiskatapwa amuyapjjäna (Hechos 6:7 liytʼäta).

12. Manqʼat pistʼañajj utjkäna ukhajja, ¿kunsa nayrïr patak maranakan jakir cristianonakajj lurapjjäna?

¹² Nayrïr patak maranakan ‘oraqpachanwa’ manqʼat pistʼañajj utjäna (Hech. 11:28). Ukajj cristianonakamppacharuw jan waltʼayäna. Familiajan manqʼapjjañapatakejj kunsa churäjja sasaw wawanakani awk taykanakajj llakisipjjpachäna. Jehová Diosar jukʼamp serviñ amtir wayn tawaqonakajja, inas manqʼat pistʼañ pasjjani ukhaw Diosar jukʼamp serviskäjja sasin sapjjchïna. Ukhamächin janisa, cristianonakajj kunatï pasaskäna ukarjamaw kun lurañs amtapjjäna. Predicañatak chʼamachasisipkakïnwa, Judea markankir jilat kullakanakaparus utjirinakap taqe chuymaw churapjjarakïna (Hech. 11:29, 30).

13. Manqʼat pistʼañajj utjkäna ukhajj ¿kuna bendicionanaksa cristianonakajj katoqapjjäna?

¹³ ¿Kuna bendicionanaksa uka jan wali tiemponakan cristianonakajj katoqapjjäna? Yanap katoqerinakajja, kunjamsa Jehová Diosajj jupanakar cuidaskäna ukwa uñjapjjäna (Mat. 6:31-33). Yanaptʼapkäna uka jilat kullakanakarojj jukʼampiw jakʼachasipjjpachäna. Khitinakatï donacionanakampi yanaptʼapkäna jan ukajj labores de socorro ukan yanaptʼapkäna ukanakajj wal kusisipjjpachäna (Hech. 20:35). Kuna cambionakatï utjkäna ukarjamaw jupanakajj amtanakap mayjtʼayapjjäna, ukatwa Jehová Diosajj taqenir bendisïna.

14. ¿Kunas Bernabeampir apóstol Pablompir pasäna, ukat kunsa jupanakajj jikjjatapjjäna? (Hechos 14:21, 22).

¹⁴ Nayrïr patak maranakan jakir cristianonakajj walja kutiw arknaqat uñjasipjjäna, awisajj mä akatjamatwa arknaqat uñjasipjjäna. Listra toqen predicasipkäna ukhajj kunas Bernabeampiru apóstol Pablompirojj pasäna  uk amuytʼañäni. Qalltanjja, jaqenakajj wali munasiñampiw katoqapjjäna, istʼapjjarakïna. Ukampis qhepatjja, yaqhep enemigonakapajj jupanak contra saytʼasipjjañapatakiw “jaqenakar” amtayapjjäna, uka jaqenakat yaqhepajj Pablorojj qalampiw jaqjapjjäna, jiwatäkaspas ukhamwa jaytapjjäna (Hech. 14:19). Ukampis Bernabeampi Pablompejj yaqha cheqar sarjjasaw predicasipkakïna. ¿Kunsa ukham lurapjjatapat jikjjatapjjäna? ‘Waljaniruw Jesusan discipulopar tukuyapjjäna’, arunakapampi luratanakapampiw jilat kullakanakar chʼamañchtʼapjjarakïna (Hechos 14:21, 22 liytʼäta). Bernabeampi Pablompejj arknaqatas uñjasipkchïnjja, janiw aynachtʼapkänti, ukajj walja jaqenakaruw yanaptʼäna. Jiwasampejj ukhamarakïniwa, jiwasatï jan aynachtʼkañäni, kuna luräwtï Jehová Diosajj churkistu uk luraskakiñäni ukhajja, walja bendicionanakwa katoqañäni.

15. ¿Kunsa jumajj Alexander Macmillan jilatat yateqta?

¹⁵ 1914 mara janïr purinkän uka nayra maranakanjja, Jehová Diosan servirinakapajj mä kun pasañapwa suyasipkäna. Jupanakat maynïrejj Alexander Macmillan jilatänwa. Uka tiemponjja, mayninakjamarakiw niyaw alajjpachar sarjjañäni sasin suyaskäna. Septiembre de 1914 maranjja, mä discursopan jilatajj akham sänwa: “Inas akajj qhep qhepa discursojäjjchini” sasa. Ukampis janiw ukhamäkänti. Uka qhepatjja jupajj akham sasaw qellqäna: “Niyaw alajjpachar sarjjañäni sasin amuyasajja, inas yaqhepajj ukan jankʼak phoqasiñap munapjjataj uñachtʼayapjjchiyäta” sasa. Ukatsti akham saskakïnwa: “Tatitur serviñan ocupatäsipkakiñajänwa” sasa. Cheqas ukwa jilatajj luräna. Taqe chuymaw predicäna, cuartelar jan sarañ munapjjatapat carcelankapjjäna uka jilatanakat waljaniruw chʼamañchtʼäna, wali jilïrëjjchïnsa tantachäwinakat janiw faltasirïkänti. Alajjpachar sarañ suyaskäna uka tiemponjja, janiw tiempop ina chʼusar aptʼkänti. ¿Kunjamsa ukajj jupar yanaptʼäna? 1966 maranjja, janïr jiwkasajj akham sasaw qellqäna: “Kunjamtï nayrajj Jehová Diosar confiykayätjja ukhamarakwa jichhajj Jehová Diosar taqe chuyma confiyaskakta” sasa. Cheqas uka jilatajj taqe jiwasatak wali yateqaskayawa, jukʼampis khitinakatï akapachan walja tiempo aguantasktan ukanakatakiw wali yateqaskayajja (Heb. 13:7).

16. ¿Herbert jilatampi esposapampejj kuna jan walinsa mä akatjamat uñjasipjjäna? (Santiago 4:14).

¹⁶ Jehová Diosan servirinakapat waljaniw mä akatjamat usuntat uñjasipjje. Herbert Jennings jilatajj kuntï sarnaqäwipan qellqkäna uk amuytʼañäni. b “Nayampi esposajampejj wali kusisitaw Ghana markan misionerot servisipkayäta” sasaw jilatajj qhanañchäna. Ukampis tiempompejja, pʼeqet usutätapwa doctoranakajj yatiyapjjäna. Kuna jan walintï jilatajj uñjaskäna ukajja, “jan suyapkayäta uka urjamänwa” sasaw Herbert jilatajj qhanañchi, uka arunakjja Santiago 4:14 (liytʼäta) textorjamaw arsüna. Ukatsti akham sasaw qellqarakïna: “Kunatï pasasipkitäna uk amuyasajja, Ghana markat sarjjañatakiw wakichasjjapjjayäta, walja munat amigonakajat despidtʼasisajja doctoramp qollayasiñatakiw Canadá markar kuttʼjjapjjayäta” sasa. Herbert jilatampi esposapampejj ukham sinti jan walinakans uñjasipkchïnjja, Jehová Diosaw jupanakarojj jupat jan jitheqtas servisipkakiñapatakejj yanaptʼäna.

17. ¿Kunjamsa Herbert jilatan sarnaqäwipajj yaqha jilat kullakanakar yanaptʼawayi?

¹⁷ Kuntï Herbert jilatajj chuymapatpach sarnaqäwipan siskäna ukajja, waljaniruw yanaptʼawayi. Mä kullakajj akham sasaw qellqäna: “Janiw yaqha sarnaqäwejj ukham chuymajar  purtʼirïkituti […]. Kunjamsa Herbert jilatajj qollayasiñatakejj misionerot serviñ privilegiop jaytäna uk yatiñajja, kunatï nayar paskitäna uk wali amuyump uñjañatakiw yanaptʼitäna” sasa. Yaqha jilatajj akham sasaw qellqarakïna: “Tunka jila maranak ancianot servisajja, pʼeqet usutätaj laykuw ancianot serviñ jaytjjayäta. Janis kunatakis sirvkirista ukham amuyasitaj laykojja sarnaqäwinak liytʼasajj wal llakisjjerïta […]. Ukampis Herbert jilatan nayrar sartañatak chʼamachasitapaw wal chʼamañchtʼitäna” sasa. Mä akatjamat jan walinakan uñjasisin aguanttan ukhajja, mayninakarojj chʼamañchtʼsnawa, ukwa Herbert jilatan sarnaqäwipajj amtayistu. Ukhamajj janis kunjamtï munkayätan ukham jakaskstanjja, Jehová Diosar confiyatasasa aguantatasas yaqhanakar yanaptʼaspawa (1 Ped. 5:9).

18. ¿Kunsa Nigeria markankir mä viuda kullakat yateqsna? (Uka experiencia uñachtʼayki uka fotonak uñjjattʼam).

¹⁸ COVID-19 pandemiajja, Jehová Diosan servirinakapat waljaniruw jan waltʼayi. Nigeria markankir mä viuda kullakat amuytʼañäni, jupan manqʼañanakapas qollqepas jukʼakëjjänwa. Mä alwajja mä taza arrozapakiw utj-jjäna, ukatwa jiskʼa imill wawapajj kunsa ukat manqʼañäni sasin mamapar jisktʼäna. Kullakasti janiw manqʼas ni qollqes utj-jjestuti, ukampis Sarepta markankir viuda warmit yateqasiñasawa sasaw sarakïna. Qhep qhepa manqʼa wakichtʼasisajja, Jehová Diosarukiw confiyjjapjjañapäna (1 Rey. 17:8-16). Chika urojj kunsa manqʼasipjjani uk janïr amtapkäna ukhajja, jilatanakajj manqʼañanakwa mä cajar churapjjäna. ¡Uka cajanjja mä semanats jila manqʼasiñatakiw utjäna! Ukhaw kullakajj kuntï jiskʼa imill wawapar siskäna uk Jehová Diosan wali atencionamp istʼatap amuyasïna. Ukhamajj jiwasatï Jehová Diosar confiyañäni ukhajja, mä akatjamat jan walinakan uñjaskañäni ukajj jupar jukʼamp jakʼachasiñatakiw yanaptʼistani (1 Ped. 5:6, 7).

19. ¿Kuna jan walinaksa Alexéi Yershov jilatajj aguantäna?

 ¹⁹ Jichha qhepa maranakakiw walja jilat kullakanakajj mä akatjamat arknaqat uñjasipjje. Kunas Rusia markankir Alexéi Yershov jilatar pasäna uk amuytʼañäni. 1994 maran bautisaskäna ukhajja, Jehová Diosan Testigonakapajj librekiw predicapjjäna, tantachäwinaks apapjjäna. Ukampis qhepat taqe kunaw Rusia markan mayjtʼäna. 2020 maranjja, mä akatjamatwa mä qhawqha policianakajj Alexéi jilatan utapar mantapjjäna, utap thaqsusajj utjirinakapwa apasjjapjjäna. Mä qhawqha phajjsinak qhepatjja, markan leyinakap contras jan walinak lurkaspa ukhamwa autoridadanakajj juchañchapjjäna. Janiw ukakïkänti, Bibliats yateqañ munkaspa ukham tukur mä jaqen grabat videonakarjamaw juchañchapjjäna, uka jaqejj mä marats jilaw ukham tukutayna. ¡Ukham luratapajj jan walipunïnwa!

20. ¿Kunsa Alexéi jilatajj Jehová Diosamp jukʼamp suma amigöñatak luri?

²⁰ Kunatï Alexéi jilatar paskäna ukajj ¿kunatakis yanaptʼäna? Jichhajj Jehová Diosampejj jukʼamp suma amigöjjapjjewa. Jupajj akham siwa: “Esposajampejj sapa kutiw juntuk orasipjjta. Jehová Diosatï jan yanaptʼkitaspänjja janiw uka jan walinak aguantkiriskayätti” sasa. Ukat akham sarakiwa: “Bibliat yatjjatañaw llakimp jan aynachtʼañatakejj yanaptʼitu. Nayra tiempon Jehová Diosar jan jitheqtas servipkäna ukanakatwa lupʼirakta. Tranquilokïskañasa Jehová Diosar confiyañas qhawqha wakiskiris ukjja, Biblian qellqat walja sarnaqäwinakapaw uk uñachtʼayistu” sasa.

21. ¿Kunsa aka yatichäwin yateqawaytanjja?

²¹ ¿Kunsa aka yatichäwin yateqtanjja? Akapachan jakkasajj kuna jan walinakansa uñjasiñäni uk janis yatkstanjja, Jehová Diosar confiyañäni ukhajj jupajj yanaptʼapunistaniwa. Aka yatichäwejj kawkïr textot apstʼatäkitï ukan akham siwa: “Cheqap sarnaqer jaqen jan waltʼäwinakapajj waljawa, ukampis Jehová Diosaw taqe ukanakatjja salvi” sasa (Sal. 34:19). Ukatwa kuna jan walinakantï uñjasktan ukanakar jan chuym uchktanti, jan ukasti kunjamsa Jehová Diosajj chʼamapamp katjjasistani ukaruw chuym uchtanjja. Ukhamtï lurañäni ukhajja, apóstol Pabljamarakiw akham sañäni: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filip. 4:13).