1, 2. ¿Kunsa machaq mundo utjañap suykasajj lurañasa?

 JEHOVÁ DIOSAN promesa luratapat wal yuspärtanjja, kuna laykutejj akapach lantejj mä machaq mundo uttʼayañ jupajj arsuwayi, ukan taqe kunas cheqaparurakïniwa (2 Ped. 3:13). Kunapachas uka machaq mundojj utjani uk janis yatkstanjja, kunanakatï pasaski ukanak uñjasajj mä jukʼak faltjjatapwa amuytanjja (Mat. 24:32-34, 36; Hech. 1:7).

² Walja tiempos jan ukajj jukʼa tiempos Testigöstanjja, taqeniw Diosan uka promesapar taqe chuym confiyañatakejj chʼamachasiñasa. ¿Kunatsa? Kuna laykutejj Diosar wal confiyatasajj janiw pachpäjjaspati. Apóstol Pablon arunakaparjamajja, Diosar jan confiyjjañajj “kuna juchatï facilak maniyjkistu” ukamp sasiwa (Heb. 12:1). Jan ukar purtʼasiñatakejja, Jehová Diosajj cheqapuniw mä machaq mundo apanini sasin creyiñatakejj kuna razonanakas utji ukanak sapa kutiw yatjjatañasa (Heb. 11:1).

3. ¿Kunanakatsa aka yatichäwin yatjjataskañäni?

³ Aka yatichäwinjja, Jehová Diosajj machaq mundo utjayapuniniw sasin confiyañatakejj kunas yanaptʼistaspa ukanakat kimsa toqet yatjjataskañäni: 1) Jesusajj juchampit jiwañampit kutsuykistu ukjjat lupʼiña, 2) Jehová Diosan chʼamapat amuytʼaña, 3) kunanakatï Jehová Diosan jakʼapankañatak yanaptʼkistaspa ukanak luraña. Ukatjja kuntï Jehová Diosajj Habacuc profetar siskäna uka arunakajj kunjamsa Diosar jukʼamp confiyañatak yanaptʼarakistu uk yatjjataskañäni. Ukampis nayraqatjja, kunatsa Diosajj mä machaq mundo utjayani siski uka promesar taqe chuym confiyañasajj wakisi ukwa yatjjataskañäni.

 ¿KUNATSA DIOSAR TAQE CHUYM CONFIYAÑASAJJ WAKISI?

4. ¿Kuna amtanakar puriñatakis Diosar jukʼamp confiyañajj wakisi?

⁴ Sapüruw kunayman amtanakar purtanjja, ukatakejj Diosar taqe chuym confiyañaw wakisi. Akanakatakiw mä amtar puriñasajj wakisi: amigonakanïñ toqeta, kusistʼañanak toqeta, yateqañ toqeta, chacha warm jakañ toqeta, wawanak toqeta ukhamarak trabajo toqeta. Akham sasaw jisktʼasiraksna: “¿Kuntï amtkta ukampejj kunsa uñachtʼaytjja? ¿Ukham amtatajajj akapachan tukusirikïtapa Diosajj niyas uka lantejj mä machaq mundo uttʼayañampïkaspa ukar creyitajti uñachtʼayi? Jan ukajj ¿akakis jakañ vidajj utjkaspa ukham amuyir jaqenakjamach mä amtar puriraktjja?” sasa (Mat. 6:19, 20; Luc. 12:16-21). Machaq mundojj niyaw utj-jjani sasin jukʼamp confiyañäni ukhajja, jukʼamp suma amtanakaruw purirakiñäni.

5, 6. ¿Yantʼanakan uñjasktan ukhajj kunatsa Diosar jukʼamp confiyañajj wakisi? Mä uñachtʼäwimp uk qhanañchtʼam.

⁵ Yantʼanakan uñjasktan ukhaw Diosar jukʼamp confiyañajj wakisiraki, uka yantʼanakat yaqhepajj akanakawa: arknaqat uñjasiña, jan qollkañ usunak utjatapa, jan ukajj yaqha jan walinakaw desanimistaspa. Qalltan uka yantʼanak aguantsnawa, ukampis uka kasta yantʼanakatï jaya tiempo utjaspa ukhajja, aguantañatakisa Jehová Diosar kusisit serviskakiñatakisa, Diosar jukʼamp confiyañaw wakisirakispa (Rom. 12:12; 1 Ped. 1:6, 7).

⁶ Mä yantʼan uñjasktan ukhajja, Jehová Diosajj janipuniw machaq mundo apankaniti sasaw amuyjjsna, ukham amuyatasajj ¿janis Jehová Diosar taqe chuym confiyksna ukhamti sañ muni? Janiw ukhamapunïkaspati. Ak amuytʼañäni. Jallu puriñat sipans juyphik juypjjaspa ukhajja, janis jallojj puriniñapäjjaspa ukhamwa amuyjjsna, ukampis jallojj purinipuniniwa. Sinti desanimatäktan ukhajj niya ukhamarakiwa, machaq mundojj janipunis puriniñapäkaspa ukhamwa amuyjjsna. Ukampis Jehová Diosarutï taqe chuym confiystanjja, Jehová Diosajj arsutap phoqerïtapat janiw payachaskañäniti (Sal. 94:3, 14, 15; Heb. 6:17-19). Ukham confiyañaw Jehová Diosar adorañ nayrar uchañatak yanaptʼistani.

7. ¿Kuna kasta amuyunakampis jan apayasiñasäki?

⁷ Predicañatakejj Diosar jukʼamp confiyañaw wakisiraki. Diosajj niyaw mä machaq mundo utjayani sasin jaqenakar yatiytan ukhajja, uka ‘suma yatiyäwinakajj’ aleq yatiyäwinakakïkaspasa, janis cheqäkaspa ukhamwa waljanejj amuyapjje (Mat. 24:14; Ezeq. 33:32). Ukampis jiwasajj janiw Diosan yatichäwinakapat jupanakjamajj payachasiñasäkiti. Jan ukhaman uñjasiñasatakejj Diosar jukʼamp confiyaskakiñatakiw chʼamachasiñasa. Kunsa ukatak lursna uk jichhajj kimsa toqet uñjañäni.

JESUSAJJ JUCHAMPIT JIWAÑAMPIT KUTSUYKISTU UKJJAT LUPʼIÑA

8, 9. Jesusajj juchampit jiwañampit kutsuykistu ukjjat lupʼiñajj ¿kunjamsa Diosar jukʼamp confiyañatak yanaptʼistu?

⁸ Mä toqetjja, juchampit jiwañampit Jesusajj kutsuykistu ukjjat lupʼiñaw Diosar jukʼamp confiyañatak yanaptʼistani. Diosan promesanakapajj phoqasipuniniw sasin confiyañatakejja, Jesusajj juchampit jiwañampit kutsuykistu ukaw mä garantiajja. Jaqenakarojj kunatsa juchampit jiwañampit kutsuyäna, qhawqsa Jehová Diosajj sacrificasïna uka toqet lupʼiñatak tiempo apstʼasiñajj wali wakiskiriwa. Uka toqet lupʼiñajja, Jehová Diosajj jukʼamp suma mä machaq mundo utjayani, ukanwa wiñayatak jakasirakiñäni sasin jukʼamp confiyañatakiw yanaptʼistani. ¿Kunatsa ukham sistanjja?

⁹ Jiwasar juchampit jiwañampit kutsuyañatakejj kunanakas wakisïna uk amuytʼañäni. Jehová Diosajj wali munat Yoqapäki suma amigopäkaraki ukaruw aka oraqen perfecto jaqjam nasiñapatak khitanïna. Jesusajj aka oraqenkjjäna ukhajja, wal tʼaqesïna, kunayman jan walinakan uñjasïna, wali llakkañaw jiwarakïna. Cheqas Jehová Diosajj jaqenakar juchampit jiwañampit kutsuyañatakejj wali jila precio pagäna.  Niyakejjay Diosajj wali munasirïchejja, jiwasan mä jukʼa tiempotakik sum jakasiñasatakejj janiw Yoqaparojj ukham tʼaqesiñapatak churkaspänti (Juan 3:16; 1 Ped. 1:18, 19). Niyakejjay Jehová Diosajj wali jila precio pagawaychejja, machaq mundon wiñayatak jakasiñasatakejj kunanakatï wakiski ukanakwa lurani.

JEHOVÁ DIOSAN CHʼAMAPAT AMUYTʼAÑA

10. Efesios 3:20 textorjamajj ¿kunsa Jehová Diosajj luraspa?

¹⁰ Payïr toqetjja, Jehová Diosajj qhawqha chʼamanis uka toqet amuytʼañaw jupar jukʼamp confiyañatak yanaptʼistani. Taqe arsutanakap phoqañatakejj chʼamaniwa. Cheqas jaqen amuyupatakejj mä machaq mundon wiñayatak jakañajj janiw cheqaw sañjamäkaspati. Ukampis Jehová Diosajj kunanakatï jiwasatakejj jan phoqasirjamäkaspa ukanak phoqañwa arsuwayi. Ukhamarus jupajj Taqe Chʼamani Diosawa (Job 42:2; Mar. 10:27). Ukhamajj kunatï jan phoqasirjamäkaspa ukanak ¿janit Diosajj phoqañ arskaspa? (Efesios 3:20 liytʼäta).

11. Jehová Diosan jan phoqasirjamäkäna uka promesanakapat mä qhawqhanak qhanañchtʼam (“ Phoqasiwayki uka yaqhep musparkañ promesanaka” sat recuadro liytʼäta).

¹¹ Kunanaktï Jehová Diosajj nayra servirinakapar arskäna ukanakat mä qhawqha amuytʼañäni, uka promesanakajj janiw phoqasiniw sañjamäkänti. Abrahanampi Sarampejj wali jilïrëjjapjjchïnsa, mä wawanïpjjätawa sasaw jupanakar säna (Gén. 17:15-17). Jumat jutir wawanakamarojj Canaán oraq churäjja sasaw Diosajj Abrahanar arsuwayäna. Ukampis Abrahanat jutir wawanakajja, mä arun israelitanakajja, walja maranakaw Egipton esclavöpjjäna. Ukhamajj inas jupanakajj janipuniw Diosan promesapajj phoqaskaniti sasin amuyapjjchïna, ukampis phoqasïnwa. Walja maranak qhepatjja, wali jilïrëjjäna uka Elisabet warmirojj mä yoqall wawanïyätawa sasaw Jehová Diosajj säna. Diosarakiw María sat virgen tawaqorojj pachpa Wawajaruw ususïta sasin säna. Ukhamatwa kuntï Jehová Diosajj walja maranak nayrajj Edén jardinan arskäna uka promesajj phoqasiñapäna (Gén. 3:15).

12. Josué 23:14 ukat Isaías 55:10, 11 textonakajj ¿kamsistus Jehová Diosan chʼamapatjja?

¹² Jehová Diosan taqpach promesanakapat amuytʼasasa kunjamsa ukanak phoqawayi ukanak amuytʼasasa, wali chʼamanïtapwa amuytanjja. Ukaw Diosajj machaq mundo apanipuniniw sasin jukʼamp confiyañatak yanaptʼistu (Josué 23:14; Isaías 55:10, 11 liytʼäta). Ukhamatwa Diosajj arsuwayki uka machaq mundojj utjapuniniwa, janiw samkakïkiti sasin jaqenakar amuytʼayañatakejj jukʼamp sum wakichtʼatäñäni. Machaq alajjpachampit machaq oraqempit parlkasajj akham sasaw Jehová Diosajj säna: “Aka arunakajja confiykañawa, cheqarakiwa” sasa (Apoc. 21:1, 5).

KUNANAKATÏ JEHOVÁ DIOSAN JAKʼAPANKAÑATAK YANAPTʼKISTASPA UKANAK LURAÑA

13. ¿Kunjamsa tantachäwinakajj Diosar jukʼamp confiyañatak yanaptʼistu?

¹³ Kimsïr toqetjja, kunanakatï Jehová Diosan jakʼapankañatak yanaptʼkistaspa ukanak lurañaw jupar jukʼamp confiyañatak yanaptʼistani. Kunjamsa tantachäwinakajj wal yanaptʼistu uka toqet amuytʼañäni. Anna b sat kullakajja, kunayman toqetwa Diosarojj sapürunjam walja maranak serviwayi, jupajj akham siwa: “Tantachäwinakajj mä anclar uñtataw Diosar confiyaskakiñatakejj yanaptʼitu, arstʼir jilatajj janis suma yatichirïkchi jan ukajj janis jichhak mistur yatichäwinak yatichkchejja, Biblian mä cheqa yatichäwip amuytʼañatakejj yanaptʼapunituwa. Ukaw Diosar jukʼamp confiyañatakejj yanaptʼitu” sasa. Tantachäwinakanjja, Diosar jukʼamp confiyañatak yanaptʼkistu uka  comentarionakwa istʼaraktanjja (Rom. 1:11, 12; 10:17).

14. ¿Kunjamsa predikir mistuñajj Diosar jukʼamp confiyañatak yanaptʼistu?

¹⁴ Predikir mistuñaw Diosar jukʼamp confiyañatak yanaptʼarakistu (Heb. 10:23). 70 maranak jila Testigöjje uka Barbara kullakajj akham siwa: “Predikir mistuñaw Diosar jukʼamp confiyañatak yanaptʼitu. Jehová Diosampit musparkañ promesanakapampit jukʼamp parlasajja, jukʼampiw jupar confiyjjarakta” sasa.

15. ¿Kunjamsa Bibliat sapak yatjjatañajj Diosar jukʼamp confiyañatak yanaptʼistu? (Dibujonak uñjjattʼarakïta).

¹⁵ Bibliat sapak yatjjatañaw Diosar jukʼamp confiyañatakejj yanaptʼarakistu. Susan sat mä kullakarojja, mä horarionïñaw wal yanaptʼi. Jupajj akham siwa: “Domingonakajja jutïr semanan yatjjataskani ukatakiw Yatiyañataki revista wakichtʼasta. Lunesampi martesampejja, semanan apaski uka tantachäwitakiw wakichtʼasirakta. Yaqha urunakasti Bibliat sapak yatjjatañatakiw tiempo apstʼasirakta” sasa. Uka horariorjam phoqañajja, Susan kullakarojj Diosar jukʼamp confiyañatakiw yanaptʼi. Walja maranak central mundialan serviri Irene sat kullakarojja, Biblian profecianakapat yatjjatañaw Diosar jukʼamp confiyañatakejj yanaptʼaraki. Jupajj akham siwa: “Kunjamsa Jehová Diosan profecianakapajj arsutaparjampun phoqasi uk amuyañajj nayatak wali musparkañawa” sasa. c

“KUNJAMATSA PHOQASIKIPUNINIWA”

16. ¿Kuntï Jehová Diosajj Habacuc profetar siskäna ukajj jiwasamppachatakïtap kunjamatsa yattanjja? (Hebreos 10:36, 37).

¹⁶ Jehová Diosan yaqhep servirinakapajj walja maranakaw akapachan tukusiñap suyasipki. Jaqen amuyupatakejj akapachan tukusiñapajj qheptʼankaspasa ukhamäspawa. Jehová Diosajj kunjamas servirinakapajj jikjjatasipjje uk amuyiwa, ukatwa Habacuc profetar akham säna: “Uka visionan phoqasiñapatak señalat tiempojj faltaskiwa, uka visionajj jankʼakiw phoqasini, kunjamatsa phoqasikipuniniwa. Qheptʼankchinisa,  ¡jumajj suyaskakim! Kunjamatsa phoqasikipuniniwa. ¡Janiw qheptʼankaniti!” sasa (Hab. 2:3). ¿Uka arunakajj Habacuc profetatakikïnti, janit jichhürunakan jiwasar chʼamañchtʼkarakistu? Jehová Diosan amuytʼayatäsajja, apóstol Pablojj machaq mundo suyasipki uka cristianonakatakiw uka arunak aytarakïna (Hebreos 10:36, 37 liytʼäta). Jiwasatï Jehová Diosajj qheptʼankaspas ukham amuystan ukhajj ak amtañasawa, promesapajj “kunjamatsa phoqasikipuniniwa. ¡Janiw qheptʼankaniti!”.

17. ¿Kunjamsa mä kullakajj Jehová Diosajj Habacuc profetar ewjjtʼkäna ukarjam luräna?

¹⁷ Walja cristianonakaw Jehová Diosajj suytʼaskakim siski uka ewjjtʼar istʼapjje, yaqhepanakajj walja maranakaw suytʼasipki. Louise kullakat parltʼañäni, jupajj 1939 maranwa Jehová Diosar serviñ qalltäna. Kullakajj akham siwa: “Uka tiemponjja, Armagedonajj janïr 18 maranak phoqkä ukhaw purinjjani sasaw amuyayäta. Ukampis janiw ukhamäkänti. Uka maranakanjja wali pacienciani Noé, Abrahán, José ukat Jehová Diosan mayni servirinakapat yatjjatañaw yanaptʼawayitu, jupanakajj Diosan arsutap phoqasiñapwa suyapjjañapäna. Ukham suytʼaskakiñaw nayarus mayninakarus machaq mundon jakʼankjjatap amuyañatak yanaptʼawayapjjetu” sasa. Jehová Diosar walja maranak servirinakajj ukhamwa amuyapjjarakpacha.

18. ¿Jehová Diosan luratanakapajj kunjamsa machaq mundojj utjapuniniw sasin creyiñatak yanaptʼistu?

¹⁸ Cheqas janïras machaq mundo uñjkstanjja, kunanaksa uñjtan ukanakat mä qhawqha amuytʼañäni: warawaranakata, qoqanakata, animalanakata, jaqenakata. Ukanakajj janis nayratpach utjkchïnjja, janiw khitis ukanakajj janiw utjkiti siskaspati. Cheqas ukanakajj utjaskapuniwa, Jehová Diosaw lurawayi (Gén. 1:1, 26, 27). Jehová Diosajj mä machaq mundo utjañapatakiw arsuwayi, jupajj uka promesap phoqapuniniwa. Wiñayatakiw jakasjjañäni, jan usuntas kʼumaraw jakasjjarakiñäni. Jehová Diosan amtat tiempojj purinjjani ukhajja, kunanakatï jichhajj cheqpachapun utjki ukhamarakiw machaq mundojj cheqpachapun utjani (Is. 65:17; Apoc. 21:3, 4).

19. ¿Kunanak lurañas Jehová Diosar jukʼamp confiyañatak yanaptʼistani?

¹⁹ Machaq mundon puriniñapkamajja, Jehová Diosar jukʼamp confiyañatakejj chʼamachasisipkakiñäni. Jesusajj juchampit jiwañampit kutsuykistu uka toqet yuspärañatak lupʼiñäni, Jehová Diosan chʼamapat amuytʼañäni, kunanakatï Jehová Diosan jakʼapankañatak yanaptʼkistaspa ukanak lurarakiñäni. Taqe ukanak lurañäni ukhajja, “khitinakatejj Diosar confiyapjjatap laykusa paciencianïpjjatap laykusa Diosan promesap herenciar uñtat katoqapki” ukanak taypinkañäniwa (Heb. 6:11, 12; Rom. 5:5).