1. ¿Kunatsa tantachäwinakan comentarionak arstʼtanjja?

 ¿KUNATSA tantachäwinakar sartanjja? Taqe kunat sipansa Jehová Diosar jachʼañchiriw sartanjja (Sal. 26:12; 111:1). Tantachäwinakanwa aka jan wali tiemponakan maynit maynikam chʼamañchtʼasiraktanjja (1 Tes. 5:11). Tantachäwinakan comentarionak arstʼañajj ukanak phoqañatakiw yanaptʼistu.

2. ¿Kunapachanakas tantachäwinakan arstʼsna?

² Sapa semanaw tantachäwinakan comentarionak arstʼsna. Sañäni, semana tukuyarojja, Yatiyañataki revistat yatjjataski ukanwa arstʼsna. Semanan apaski uka tantachäwinjja, “Suma yatichäwinak Bibliat thaqapjjañäni” ukhamarak Congregacionan Bibliat yatjjatañataki utjki jan ukajj arstʼañ mayipkistani uka horasanakanwa arstʼsna.

3. 1) ¿Kunatsa comentarionak arstʼañajj chʼamakïspa? 2) ¿Kunjamsa Hebreos 10:24, 25 textojj yanaptʼistu?

³ Comentarionak arstʼasajj taqeniw Jehová Diosar jachʼañchañ muntanjja, jilat kullakanakarus chʼamañchañ munaraktanjja. Ukampis aka razonanakatwa jiwasatak arstʼañajj chʼamäspa: ajjsarañatwa comentarionak jan arstʼjjsnati jan ukajj walja kutiw ampar loqtsna, ukampis janiw taqe horasan arstʼayapkistaspati. ¿Ukanakamp jan aynachtʼañatakejj kunas yanaptʼistaspa? Apóstol Pablojj hebreonakar qellqkäna uka cartanwa ukajj qhanañchasi. Tantachäwinakajj kunja wakiskirisa uka toqet parlkasinjja, ‘maynit maynikam chʼamañchtʼasiñajj’ kunja wakiskirisa ukwa Pablojj qhanstayäna (Hebreos  10:24, 25 liytʼäta). Qhawqsa Diosar confiytan uk mä qhawqha arunakamp arstʼasajj mayninakar chʼamañchtʼsnawa, uk amtañaw jan ajjsaras ampar loqtañatakejj yanaptʼistani. Walja comentarionak jan arstʼañ puedkañäni ukhajja, mayninakan comentarionakap istʼasajj kusisitakïñäniwa (1 Ped. 3:8).

4. ¿Kuna kimsa toqetsa aka yatichäwin yatjjataskañäni?

⁴ Aka yatichäwinjja, kunjamsa mä jiskʼa congregacionan maynit maynikam chʼamañchtʼassna ukwa nayraqat yatjjataskañäni, ukanjja jukʼa jilat kullakanakakiw utji, walja comentarionakaw arstʼasirakispa. Ukjjarojja, kunjamsa mä jachʼa congregacionan chʼamañchtʼassna ukwa yatjjataskarakiñäni, ukan walja jilat kullakanakaw arstʼañ munapjjaraki. Tukuyarusti, mayninakar cheqpach chʼamañchtʼañatakejj comentarionakasajj kunjamäñapasa ukwa yatjjatarakiñäni.

5. ¿Tantachäwinakan jukʼanikïstan ukhajj kunsa maynit maynikam chʼamañchtʼasiñatakejj lursna?

⁵ Mä grupona jan ukajj mä jiskʼa congregacionanjja, tantachäwi sarayir jilatarojj mä qhawqhanikiw comentarionakapamp yanaptʼapjje. Awisanakajja, maynin ampar loqtañapatakejj mä rat suytʼañapawa. Ukhamïpansti tantachäwejj qariyasjjaspawa, janirakiw chʼamañchtʼkirëjjaspati. ¿Ukhamanakan kunsa lursna? Walja comentarionak arstʼañatak chʼamachasipjjañäni, ukhamatwa mayninakarojj jukʼamp comentarionak arstʼapjjañapatak chʼamañchtʼañäni.

6, 7. ¿Kunsa jan sinti ajjsarañatakejj lurasma?

⁶ Walja jilat kullakanakajja, tantachäwinakan arstʼapjjañapätap yatisakiw wal ajjsarayasipjje. Jumatï ukhaman uñjassta ukhajja, ¿kunas yanaptʼiristam? Comentarionak arstʼasin mayninakar chʼamañchtʼañatakejj kunas jan ajjsarañatak yanaptʼiristam ukwa thaqasma.

⁷ Yatiyañataki revistan mistkäna uka ewjjtʼanakampiw yanaptʼasisma, uka ewjjtʼanakat mayajja sum wakichtʼasiñawa (Prov. 21:5). b Kuna toqetsa mä yatichäwejj parli uk sum amuyäta ukhajja, ampar loqtañajj facilakïniwa. Jukʼa arunakampikiw arstʼarakisma (Prov. 15:23; 17:27). Mä qhawqha arunakamp arstʼasajj janiw ajjsarayaskätati. Mä qhawqha arunakamp arstʼapki ukhajj facilakwa jilat kullakanakajj amuyapjje, walja arunakamp arstʼañat sipans inas mä qhawqha arunakampik arstʼchisma. Jumatï pachpa arunakamampi mä qhawqha arunakampik arstʼäta ukhajja, sum wakichtʼasitamsa kuna toqetsa mä yatichäwejj parlaski uk amuyatamsa jilat kullakanakajj amuyapjjaniwa.

8. ¿Arstʼañatak chʼamachasktan uk kunjamsa Jehová Diosajj uñji?

⁸ Uka ewjjtʼanakarjam lurkasas inas ajjsarayasitam laykojj mä kutiki jan ukajj pä kutik arstʼchïta, ukampis ¿kunas yanaptʼiristam? Ak amtañamawa, arstʼañatak wal chʼamachaskta ukjja Jehová Diosajj wali valoranitwa uñji (Luc. 21:1-4). Janirakiw kuntï lurirjamäktan ukat sipans jukʼamp maykistuti (Filip. 4:5). Ukhamajj qhawqsa arstʼasma uk amuytʼam, uk lurañatakis chʼamachasim, jan ajjsarañatakejj Jehová Diosar yanaptʼa mayisirakim. Qalltañatakejja, jukʼa arunakamp mä kuti arstʼañwa amtasma.

9. ¿Kunas mä jachʼa congregacionan pasaspa?

⁹ Congregacionamantï walja publicadoranakajj utjchi ukhajja, yaqha toqet llakisiñaw  utjarakispa. Walja jilat kullakanakan comentario arstʼañ munapjjatapatjja, inas jan arstʼjjarakstati. Daniela c kullakat amuytʼañäni, juparojj tantachäwinakan comentarionak arstʼañajj wal gusti. Jupatakejj comentarionak arstʼañajj Jehová Diosar adorañamp sasiwa, ukhamatwa mayninakar chʼamañchtʼi, Biblian cheqa yatichäwinakap pʼeqeruw yatsuraki, ukatwa jupatakejj comentarionak arstʼañajj wali importantejja. Ukampis mä jachʼa congregacionan serviñ qalltäna ukhajja, janiw walja comentarionak churapkänti, awisajj janiw ni maysa churapkänti. Kullakajj akham siwa: “Wal llaktʼasirïta. Mä privilegiojsa apaqapkitaspa ukhamwa amuyasirïta. Walja kuti comentario jan arstʼayjjapjjtam ukhajja, amanutsa jan churapkiristam ukham amuyañwa qalltjjtajja” sasa.

10. ¿Kunsa comentario jumar churapjjañapatakejj lurasma?

¹⁰ ¿Mä kutis Daniela kullakjam jikjjatasirïtati? Ukhamächi ukhajja, ampar loqtañat sipans aleq istʼjjañakiw jukʼamp walïspa sasin inas amuyirista. Ukampis jan aynachtʼamti. ¿Kunsa comentarionak jumar churapjjañapatakejj lurasma? Walja comentarionak wakichtʼasisma. Ukhamtï luräta ukhajja, nayrïr parrafonakan jan comentario churapkätam ukhajj mayni parrafonakanwa comentasma. Yatiyañataki revistat wakichtʼaskäta ukhajja, sapa parrafojj kunjamsa uka yatichäwin pʼeqeñchäwipampejj mayachtʼasi uk amuytʼam. Ukhamatwa kun arjjattʼañatakis wakichtʼatäyäta. Maysa toqetjja, Biblian jan fácil amuykañ yatichäwinakapat parlki uka parrafonakan arstʼañatakiw wakichtʼasisma (1 Cor. 2:10). Niyakejjay uka toqenakat qhanañchtʼañajj chʼamächejja, jilapartejj uka parrafonakan jukʼanikiw ampar loqtapjje. Ukampis jumatï uka ewjjtʼanakarjam lurkasas janipun tantachäwinakan arstʼksta ukhajja, ¿kunsa lurasma? Yatiyañataki revista sarayir jilatampiw janïr tantachäwi qalltkipan parltʼasma, kawkïr jisktʼarus qhanañchañ munasma uk yatiyarakisma.

11. ¿Kunsa Filipenses 2:4 textorjamajj lursna?

¹¹ (Filipenses 2:4 liytʼäta). Diosan amuytʼayataw apóstol Pablojj mayninakat llakisipjjañapatak cristianonakar chʼamañchtʼäna. ¿Kunjamsa tantachäwinakan uka ewjjtʼarjam  lursna? Mayninakajj comentario arstʼañ munapjjarakiwa, ukwa amtañasa.

12. ¿Kunsa mayninakan chʼamañchtʼatäpjjañapatakejj tantachäwinakan lursna? (Foto uñjjattʼarakïta).

¹² Ukatakejj ak amuytʼañäni. Amigonakamamp parlkta ukhajj ¿jumak parlaskañat sipans jupanakar arstʼayaraktajjaya? Tantachäwinakasan niya ukhamarakiwa. Walja jilat kullakanakasajj arstʼapjjaspa ukwa muntanjja. Cheqas Jehová Diosar confiyapjjatap uñachtʼayapjjañapatak arstʼayasaw jilat kullakanakar chʼamañchtʼaraktanjja (1 Cor. 10:24). Waljanin arstʼapjjañapatakejj kunsa lursna uk amuytʼañäni.

13. ¿Kunsa walja jilat kullakanakan arstʼapjjañapatakejj lursna?

¹³ Maysa toqetjja, mä qhawqha arunakampikiw comentarionak arstʼañasa. Ukhamatwa mayni jilat kullakanakan arstʼapjjañapatakejj tiempojj utjaskani. Ancianonakampi walja maranak Diosar servir jilat kullakanakampiw uka toqen yateqaskañäpjjaspa. Mä qhawqha arunakampikis comentkchiñänejja, janiw walja toqenakat parlañasäkiti. Jumatï parrafon parlki ukanak taqpach arstʼätajja, mayninakajj janiw kun arsuñs puedjjapjjaniti. Amuytʼañataki, aka parrafonjja aka pä toqenakatwa parlasktanjja: mä qhawqha arunakamp arstʼañjjata, jan walja toqenakat arstʼañjjatwa parlasktanjja. Aka parrafon arstʼañamatak nayrïr comentario churapjjätam ukhajja, ¿janit uka pä ewjjtʼanakat mayak arstʼkasma?

14. Qhawqha kutis ampar loqtañäni uk amtkasajj ¿kunanaksa amuytʼañasa? (Fotonak uñjjattʼarakïta).

¹⁴ Congregacionan comentario arstʼañatakejj qhawqha kutis ampar loqtäta uk sum amuytʼañamawa. Sapa kuti ampar loqtañäni ukhajja, Yatiyañataki revista sarayir jilatajj jan mä comentario arstʼapki uka jilat kullakanakar comentario churañat sipansa, jumarukiw comentarionak churjjeristam. Ukhamarus mayninakajj janis comentarionak arstʼañatak chʼamachasipjjañapajj wakiskaspa ukhamwa amuyjjapjjaspa (Ecl. 3:7).

15. 1) ¿Kunsa tantachäwin jan arstʼasajj jan lurañasäki? 2) ¿Jisktʼanak lurki uka jilatajj kunanakatsa amuyasiñapa? (“ ¿Kunjamsa mä yatichäwejj sarayasiñapa?” sat recuadro liytʼäta).

¹⁵ Comentarionak arstʼañatak walja jilat kullakanakajj ampar loqtapki ukhajja, inas munktan ukham walja kuti jan arstʼañ puedkchiñäniti. Tantachäwejj tukuyjje ukhakamajja, janiw ni mä kutis arstʼawayksnati. Cheqas ukajj wali llakkañäspawa, ukampis janiw chuym ustʼayasiñasäkiti (Ecl. 7:9).

16. ¿Kunsa comentario arstʼirinakar chʼamañchtʼañatakejj lursna?

¹⁶ Janis kunjamtï munkta ukham walja kuti comentarionak arstʼkchïtajja, mayninakan arstʼapjjatap sumwa istʼasma, tantachäwi tukuyatarusti arstʼatapat felicittʼarakismawa. Jupanakan suma arunakapajj kunjamtï jumajj arstʼañ munkayäta ukhamarakiw jilat kullakanakar chʼamañchtʼaspa (Prov. 10:21). Mayninakar felicittʼtan ukhajja, jupanakarojj chʼamañchtʼaraktanwa.

17. 1) ¿Kunsa awk taykanakajj lurapjjaspa? 2) Videorjamajja, ¿kuna pusi yanaptʼanakas mä comentario wakichtʼasiñatakejj utji? (Nota uñjjattʼarakïta).

¹⁷ ¿Tantachäwinakan maynit maynikam chʼamañchtʼasiñatakejj kunanakampsa luraraksna? Jumatï jiskʼa wawanakanïsta ukhajja, qhawqha maranïpjjes ukarjamaw jupanakarojj comentarionak wakichtʼasipjjañapatakejj yanaptʼañama (Mat. 21:16). Yaqhep tantachäwinakanjja,  casadonakajj kuna jan waltʼäwinakans uñjasipjje, qʼañu juchanakan sarnaqañajj kunatsa jan walïki uka toqenakatwa yatjjatasispa. Ukhamäkchisa, wawanakajj maya jan ukajj pä parrafonakan arstʼapjjaspawa. Ukhamarus sapa kuti ampar aytapkani ukhajj janiw arstʼapkapuniniti, uk amuyapjjañapatakis yanaptʼapjjañamarakiwa. Uktï wawanakamar qhanañchtʼapjjäta ukhajja, jupanakar comentario churañat sipans mayninakar churapjjani ukhajj janiw jupanakajj llakisipkaniti (1 Tim. 6:18). d

18. Comentarionak arstʼktan ukhajja, ¿kunas jiwas pachpat jan sint parlañatakejj yanaptʼistaspa? (Proverbios 27:2).

¹⁸ Jehová Diosar jachʼañchañatakisa jilat kullakanakar chʼamañchtʼañatakisa taqeniw comentarionak arstʼañatak wakichtʼassna (Prov. 25:11). Awisajj inas jiwas pachpat arstʼchiñäni, ukampis janiw jiwasatak jil parlañasäkiti (Proverbios 27:2 liytʼäta; 2 Cor. 10:18). Antisas arstʼatasanjja, Jehová Diosampi, Arupampi, markapampiw nayrankañapa (Apoc. 4:11). Ukampis mä parrafontï jiwaspachpat arstʼañasatak maychistu ukhajja, jiwas pachpat arstʼañajj walikïskiwa. Jutïr parrafotak utjki uka jisktʼanwa ukajj amuyasi.

19. 1) ¿Tantachäwinakan mayninakat llakisiñäni ukhajj kunas utjani? (Romanos 1:11, 12). 2) ¿Kunatsa jumarojj tantachäwinakan arstʼañajj gusttam?

¹⁹ Tantachäwinakan kunjamapunis comentarionakajj arstʼasiñapa ukarjam arkañat sipansa, mayninakar chʼamañchtʼañatakejj taqeniw comentarionak arstʼañatak chʼamachassna. Yaqhep jilat kullakanakajja, ukatakejj jukʼampiw comentarionak arstʼapjje. Yaqhepasti arstʼañjamäki uka horasan arstʼasajj kusisitäpjjewa, mayninakajj arstʼañ munapki uk uñjasajj kusisitäpjjarakiwa. Jiwasatï tantachäwinakan mayninakat llakisiñäni ukhajja, taqeniw maynit maynikam chʼamañchtʼasisajj kusisiñäni (Romanos 1:11, 12 liytʼäta).