1. Diosan servirinakapajj nayrïr patak maranakan ¿kunjam organiztʼatäpjjänsa?

 JEHOVÁ DIOSAJJ mä luräwi servirinakapar churi ukhajja, suma organiztʼat uk phoqapjjañapwa muni (1 Cor. 14:33). Suma yatiyäwinakajj taqe oraqpachan predicasiñapwa jupajj munaraki (Mat. 24:14). Jesusaruw predicación pʼeqtʼañapatak uttʼayi. Jesusasti taqe kunas suma organiztʼatäñapatakiw encargasiraki. Nayrïr patak maranakanjja, Jerusalenankir apostolonakampi ancianonakampiw amtanakar puriñatakisa, ukarjam lurapjjañapatak congregacionanakar instruccionanak churañatakis encargasipjjäna (Hech. 15:2; 16:4). Taqe congregacionanakanjja ancianonakaw uttʼayasirakïna, jupanakaw jilat kullakanakar irpapjjäna, uka instruccionanaks churapjjarakïna (Hech. 14:23). Niyakejjay jilat kullakanakajj istʼasirïpjjchïnjja, ‘congregacionanakajj jukʼampiw Diosar confiyapjjäna, urut urutjamaw yapjjattapjjarakïna’ (Hech. 16:5).

2. 1919 marat aksarojj ¿kunjamsa Jehová Diosajj markapar irpaski Biblian yatichäwinakaps churaskaraki?

² Jichha tiemponjja, Jehová Diosajj markapar organiztʼaskakiwa. 1919 marat aksaruw Jesusajj mä qhawqha ajllitanak toqejj predicación organiztʼaski, discipulonakaparus Biblian yatichäwinakap churaskaraki (Luc. 12:42). a Kuntï jupanakajj lurasipki ukajj Jehová Diosan bendisiskatapwa uñachtʼayi (Is. 60:22; 65:13, 14).

3, 4. 1) Suma organiztʼatäñajj kunjamsa yanaptʼistu uk qhanañchtʼam. 2) ¿Kuna toqenakatsa aka yatichäwin yatjjataskañäni?

 ³ Janitï organiztʼatäksnajja, kuna luräwtï Jesusajj churkistu uk janiw phoqañ puedksnati (Mat. 28:19, 20). Ak amuytʼañäni, predicañatak territoriotï jan organiztʼatäkaspajja, sapa mayniw kawkjantï predicañ munki ukan predicaspa. Inas kutin kutin pachpa lugaranakan prediksna, ukampis yaqha cheqanakan janiw ni mä kutis predicaskaspati. ¿Suma organiztʼatäñajj kunjamanakats yanaptʼarakistu?

⁴ Jesusajj aka oraqenkkäna ukhajj wali sumwa discipulonakapar organiztʼäna, jichha tiempon niya uka pachparakwa Diosan markapar organiztʼi. Aka yatichäwinjja, Jesusajj kunja yateqaskañasa ukat kunjamsa Diosan markapajj jupat yateqasisin ukarjam luraraki ukanakatwa yatjjataskañäni. Ukatjja kunsa Jehová Diosan markapar confiyatas uñachtʼayañatakejj lursna uka toqetwa yatjjataskarakiñäni.

DIOSAN MARKAPAJJ JESUSATWA YATEQASI

5. ¿Kunjamsa Diosan markapajj Jesusat yateqasi? (Juan 8:28).

⁵ Jesusajj kuntï lurañapäkäna kuntï sañapäkäna uk alajjpachankir Awkipatwa yateqasïna. Niya ukhamarakiw Diosan markapajj Diosan Aruparjam ewjjtʼanak churistu, yaticharakistu (Juan 8:28 liytʼäta; 2 Tim. 3:16, 17). Ukhamarus sapa kutiw Biblia liyiñatakisa yateqatasarjam sarnaqañatakis Diosan markapajj amtayistu. ¿Kunjamsa uka ewjjtʼarjam lurañajj yanaptʼistu?

6. Bibliat yatjjatañajj ¿kunjamsa yanaptʼistu?

⁶ Qellqatanakasamp yanaptʼayasis Biblia yatjjatañajj walja toqenakatwa yanaptʼistu. Bibliat yatjjatañajja, kuntï Bibliajj yatichki ukampi kuna instruccionanaktï Diosan markapajj churkistu ukamp igualtʼayañatakiw yanaptʼistu. Uka instruccionanakajj Bibliarjamätap amuytan ukhajja, Jehová Diosan markaparojj jukʼampiw confiytanjja (Rom. 12:2).

7. ¿Kuna toqetsa Jesusajj predicäna, ukat kunjamsa Diosan markapajj jupat yateqasiraki?

⁷ Jesusajj “Diosan Reinopat suma yatiyäwinak” predicäna (Luc. 4:43, 44). Ukham lurapjjañapatakiw Jesusajj discipulonakapar mayirakïna (Luc. 9:1, 2; 10:8, 9). Jichhürunakanjja, ukhamarakiw Jehová Diosan markapankirinakajj Diosan Reinopat predicapjje, kawkjan jakkasasa jan ukajj kuna luräwinïkasas predicapjjapuniwa.

8. ¿Kuna privilegionïtansa?

⁸ Diosan Reinopat cheqa yatichäwinak yatiyañajja, mä suma privilegiowa. Janiw taqe jaqenakajj uk lurapkaspati. Jesusajj aka oraqenkkäna ukhajja, janiw demonionakarojj jupat yatiyapjjañap permitkänti (Luc. 4:41). Jichhürunakan maynitï Jehová Diosan Testigonakapamp predikir sarañ munchi ukhajja, mä qhawqha mayitanakampi jan ukajj requisitonakampiw phoqañapa. Niyakejjay predicañajj mä privilegiöchejja, ¿kunjamsa uk valoranit uñjatas uñachtʼaysna? Taqe horasan predicasaw valoranit uñjatas uñachtʼaysna. Jiwasajj Jesusjamarakiw cheqa yatichäwinak jaqenakan chuymapar satantañasa, umamp warjjatañasaraki (Mat. 13:3, 23; 1 Cor. 3:6).

9. Jaqenakan Diosan sutip yatipjjañapatakejj ¿kunsa Diosan markapajj lurawayi?

⁹ Jesusajj Diosan sutipwa jaqenakar uñtʼayäna. Jupajj mä oracionan akham sasaw alajjpachankir Awkipar säna: “Sutim uñtʼayaskakïwa” sasa (Juan 17:26). Jehová Diosan markapajj Jesusat yateqasisaw taqe jaqenakan Diosan sutip yatipjjañapatak chʼamachasiraki. Ukatakejj Machaq Mundon Jakirinakataki sat Bibliampiw jilapartejj yanaptʼayasipjje, uka Bibliajj phoqatpachas jan ukajj mä partekis 270 jila arunakanwa utji. Uka traducit Biblianjja,  kawkjantï original qellqatanakan uñstkäna uka cheqanakanwa Diosan sutipajj uñstjje. Apéndice A4 ukat A5 ukanakanjja, kunjamsa Diosan sutipajj Bibliar wasitat uchasiwayjje ukaw qhanañchasi. Español arut Biblia de estudio ukanjja, kunatsa Griego Arut Qellqatanakan 237 kutejj Diosan sutipajj uñstañapa, kuna pruebanakas utji ukaw apéndice C ukan qhanañchasiraki.

10. ¿Kunsa Myanmar markankir mä warmin experienciapajj yatichistu?

¹⁰ Jesusat yateqasisajja, Diosan sutip walja jaqenakan yatipjjañapwa muntanjja. Myanmar markanjja, mä kullakaw 67 marani mä warmir “Diosan sutipajj Jehová satawa” sasin yatichäna. Diosan sutip yatisajj uka warmejj kusisiñat jachaqtʼasïnwa, akham sarakïnwa: “Jichhapuniw Diosan sutipat istʼta. [...] Kunatï wali importantëki ukwa yatichistajja, janipuniw uk yatkayätti” sasa. Diosan sutip uñtʼañajja, jaqenakan jakañ vidapwa cambiaspa, ukwa uka experienciajj uñachtʼayistu.

DIOSAN MARKAPAR CONFIYATAS UÑACHTʼAYASKAKIÑÄNI

11. Diosan markapar confiyapjjatap ¿kunjamsa ancianonakajj uñachtʼayapjjaspa? (Fotonak uñjjattʼarakïta).

¹¹ ¿Kunjamsa ancianonakajj Diosan markapar confiyapjjatap uñachtʼayapjjaspa? Diosan markapat katoqapki uka instruccionanak wali atencionamp liytʼasa, uka instruccionanakarjam lurañatak chʼamachasisaw uñachtʼayapjjaspa. Kunjamsa asignacionanakajj lurasiñapa, kunjamsa oracionanakajj tantachäwinakan lurasiñapa, kunjamsa Criston ovejanakapar uñjapjjañapa uka toqenakatwa instruccionanak katoqapjje. Ancianonakajj Diosan markapat katoqapki uka instruccionanakarjam lurapjje ukhajja, Jehová Diosajj jupanakar munasitapa, cuidaskatapwa jilat kullakanakajj amuyapjje.

12. 1) ¿Kunatsa jiwasar irpapkistu ukanakan instruccionanakapar istʼañasa? (Hebreos 13:7, 17). 2) ¿Kunatsa jiwasar irpapkistu ukanakan suma luratanakap uñchʼukiñasa?

¹² Ancianonakajj mä instrucción churapjjestani ukhajja, ukarjamaw taqe chuym lurañasa. Ukhamtï lurañänejja, jupanakatakejj lurañanakap phoqañajj jukʼamp facilakïniwa. Bibliajj irpapkistu ukanakar istʼañataki taqe chuym sujetasiñatakiw ewjjtʼistu (Hebreos 13:7, 17 liytʼäta). Ukampis uk lurañajj janiw faciläkapuniti, kuna laykutejj ancianonakajj pantjasirïpjjewa. Ukatwa ak amtañasa: jiwasatï suma luratanakap uñchʼukiñat sipans jan wali luratanakapak uñchʼukjjsna ukhajja, kuntï enemigonakasajj lurañas munapki ukwa lurjjsna. ¿Kunatsa ukham sistanjja? Kuna laykutejj ancianonakat jan walinak amuyasajj Diosan markapar desconfiyjjsnawa, cheqas enemigonakasajj ukar purtʼasiñaswa munapjje. Ukhamajj enemigonakasan kʼarinakap amuyañatakisa ukanak rechazañatakis ¿kunanaksa lursna?

JEHOVÁ DIOSAN MARKAPAR CONFIYASKAKIÑÄNI

13. ¿Kunjamsa enemigonakasajj Diosan markapar uñjayapjje?

¹³ Enemigonakasajja, kuna sumanakatï Diosan markapan utjki ukanakajj jan walïkaspas ukham uñjayapjje. Servirinakapajj jañchi toqensa, sum sarnaqañ toqensa, Diosar serviñans suma qʼomäpjjaspa uk Jehová Diosajj muni sasaw Bibliajj qhanañchi. Ukatjja khitinakatï jan walinak lurasipkaki, jan arrepentisipkaraki ukanakajj congregacionat jaqsutäpjjañapawa sasaw qhanañcharaki (1 Cor. 5:11-13; 6:9, 10). Niyakejjay jiwasajj Diosan uka mandatopar istʼstanjja, enemigonakajj jan amuytʼañ munirïksnasa, jan sinttʼasirïksnasa, mayninakat sipans jilanksnas ukham uñjapjjestu.

14. ¿Diosan markapat kʼarinak parlapki ukajj khititsa juti?

 ¹⁴ Khitis jan waltʼayaskistu ukwa amtañasa. ‘Kʼarin awkipäki’ uka Supayaw Diosan markapat kʼarinak parlasiñapatak chʼamañchi (Juan 8:44; Gén. 3:1-5). Ukhamajj jupaw yaqhep jaqenakarojj uka kʼarinak parlapjjañapatak chʼamañchi. Ukwa nayrïr patak maranakan lurarakïna.

15. ¿Kunsa religión pʼeqtʼirinakajj Jesusarusa discipulonakaparus lurapjjäna?

¹⁵ Diosan Yoqapjamajj Jesusajj perfectönwa, musparkañ milagronakwa lurarakïna, ukhamäkchïnsa Supayajj mä qhawqha jaqenak toqew kunayman kʼarinak Jesusjjat parläna. Jesusajj “demonionakan apnaqeripan chʼamapampiw demonionakar alissuraki” sasaw religión pʼeqtʼirinakajj jaqenakar sapjjäna (Mar. 3:22). Jesusar juchañchapkäna ukhajja, religión pʼeqtʼirinakajj Dios contra jan wal parliritwa Jesusar juchañchapjjäna, jiwayatäñapatak mayipjjañapatakiw jaqenakar amtayapjjarakïna (Mat. 27:20). Mä qhawqha tiempotjja, Criston discipulonakapajj predicañ qalltapkäna ukhajj enemigonakapajj “jilatanak contraw [...] jaqenakar wiytapjjäna”, arknaqapjjañapatakiw “jan walinak amtayapjjarakïna” (Hech. 14:2, 19). Hechos 14:2 textot parlkasinjja, La Atalaya del 1 de diciembre de 1998 sat revistajj akham sasaw qhanañchi: “Cristianonak conträpkäna uka judionakajj janiw yatiyäwinakak rechazapkänti jan ukasti cristianonakat kʼarinak parlasiñapatakiw jaqenakar amtayapjjäna, ukhamat yaqha markanakankir jaqenakajj cristianonak contra saytʼapjjañapataki” sasa.

16. Kʼarinak parlir istʼañäni ukhajj ¿kunsa amtañasa?

¹⁶ Supayajj kʼarisiskakiwa, ‘oraqen taqe jakirinakaruw’ jichha tiempon engañjaski (Apoc.  12:9). Ukhamajj jiwasatï Diosan markapat jan ukajj Diosan markapan irpapki ukanakat jan walinak parlir istʼañäni ukhajja, kuntï nayrïr patak maranakan Diosan enemigonakapajj Jesusarus discipulonakaparus lurapkäna ukwa amtañasa. Kunjamtï Bibliajj nayratpach sisjjänjja, ukarjamapuniw jaqenakajj Testigonakar arknaqasipki, kʼarinaks jupanakat parlasipki (Mat. 5:11, 12). Enemigonakasan kʼarinakapajj kawkitsa juti uk qhan amuyañäni ukhajja, janiw engañjapkistaniti, jankʼakiw jarkʼaqasirakiñäni. ¿Kunsa jarkʼaqasiñatakejj lurañasa?

17. Kʼarinak istʼasajj ¿kunsa lurañasa? (2 Timoteo 1:13; “ Kʼarinak istʼasajj ¿kunsa lurañama?” sat recuadro liytʼarakïta).

¹⁷ Kʼarinak jan istʼapjjañäniti. Kʼarinak istʼasajj kunsa lurañasa uk qhanwa apóstol Pablojj qhanañchäna. 1 Timoteo 1:3, 4 texton akham sasaw ewjjtʼäna: ‘Falso cuentonakar jan yäqapjjamti’ sasa. Timoteorojj akham sasaw ewjjtʼarakïna: “Jiskʼachir falso cuentonak jan istʼamti” sasa (1 Tim. 4:7). Ak amuytʼañäni: mä jiskʼa wawajj inas mä kuns oraqet aptasisin lakapar apantaschispa, ukampis mä jilïr jaqejj janipuniw uk lurkaspati, kuna laykutejj kawkitsa ukajj juti, kunjamsa ukajj jupar jan waltʼayaspa uk sum yati. Ukatwa jiwasajj kʼarinak jan istʼktanti, jan ukasti ‘cheqa yatichäwinakakwa’ istʼtanjja (2 Timoteo 1:13 liytʼäta).

18. ¿Kunjamsa Jehová Diosan markapar confiyatas uñachtʼaysna?

¹⁸ Aka yatichäwinjja, kunjamanakatsa Diosan markapajj Jesusat yateqasi uk kimsa toqetwa uñjawaytanjja, ukampis janiw ukanakakïkiti. Bibliat yatjjatasajj jukʼampinakwa jikjjatäta. Jilat kullakanakarojj Diosan markapar jukʼamp confiyapjjañapatak yanaptʼaskakim. Jehová Diosar jan jitheqtas serviskakim, janipun Diosan markapat jitheqtamti, uka markap toqew Diosajj munañap phoqaski (Sal. 37:28). Jehová Diosar munasiri jan jaytjasiri markapan serviñajj mä jachʼa bendicionawa. ¡Wali valoranit uk uñjapjjañäni!