¿Yatiyätati?
¿Kunatsa Davidan ejercitopan extranjeronakajj utjäna?
DAVIDAN ejercitopanjja, jan israelita chachanakaw utjäna, jupanakat yaqhepajj akanakänwa: Zélec sat ammonita, Urías sat hitita, Itmá sat moabita (1 Crón. 11:39, 41, 46). a “Keretitanakasa, peletitanakasa, [...] guitita chachanakasa”, uka ejército taypinkapjjarakïnwa (2 Sam. 15:18). Inas keretitanakasa peletitanakas filisteonakamp parientëpjjchïna (Ezeq. 25:16). Guititanakajj filisteonakan Gat markapanwa jakapjjäna (Jos. 13:2, 3; 1 Sam. 6:17, 18).
¿Kunatsa Davidajj ejercitopan extranjeronak utjañapatak permitpachäna? Kuna laykutejj janiw juparojj jaytjapkaspänti, janirakiw Jehová Diosarus jaytjapkaspänti. Keretitanakampit peletitanakampit parlkasajj mä qellqatajj akham siwa: “Davidajj apnaqaskäna ukhajja, sinti jan walinakans janiw jupanakajj Davidar jaytjapkänti” sasa (The New Interpreterʼs Dictionary of the Bible). ¿Kunjamatsa uk yattanjja? Kunapachatï “Israelankir taqe chachanakajj” ‘jaqenakpur apthapir’ Seba chachar arkañatak David reyir jaytjapkäna ukhajja, keretitanakasa peletitanakas Davidaruw apoyapjjäna, kutkatasir Seba chachar atipjañatakis yanaptʼapjjarakïnwa (2 Sam. 20:1, 2, 7). Mä kutejja, Adonías yoqapaw Davidarojj reyïñat apaqañ munäna. Ukampis keretitanakasa peletitanakas janiw Davidar jaytjapkänti, Davidjjarojj Salomonan reyïñapatakiw yanaptʼapjjäna, kuna laykutejj Jehová Diosan ajllitätapwa yatipjjäna (1 Rey. 1:24-27, 38, 39).
Yaqha extranjero chachajj janirakiw Davidar jaytjkänti, jupajj Ittái sat guitita chachänwa. Mä kutejj Davidan Absalón yoqapaw jupa contra saytʼasïna, reyit uttʼayapjjañapatakiw Israel markankir chachanakan chuymanakap lunthatäna. Ukhaw Ittái chachampi 600 jaqenakapampejj Davidar yanaptʼapjjäna. Davidasti Ittái chacharojj ‘jumajj extranjerötawa, “¿kunjamarak nayamp chik sarañamatak mayirismasti?”’ sasaw säna. Ukampis Ittái chachajj akham sasaw Davidar säna: “¡Kunjamtï Jehová Diosajj cheqpachapun jakkir Diosäki, juma jachʼa reyis jakaskaraktajja, kawkirutï juma reyejj sarkäta ukaruw naya servirimajj sararakëjja, jakañatakis jiwañatakis ukankapunïwa!” sasa (2 Sam. 15:6, 18-21).
Jehová Diosajj ajllkäna uka David reyirojj janiw Ittái chachajj jaytjkänti.
Keretitanakasa, peletitanakasa, guititanakas extranjeröpkchïnsa, Jehová Diosan cheqpach Diosätap creyipjjänwa, jupan ajllit David reyirus respetapjjänwa. Cheqansa Davidajj jupat jan jitheqtir chachanakan yanaptʼap katoqasajj wal yuspärpachäna.
a Deuteronomio 23:3-6 textonkir mä leyirjamajja, ‘janiw ammonitanakasa ni moabitanakas Israelan congregacionaparojj mantapkaspänti’. Amuyatajja, jupanakajj janiw israelitäpkaspänti ni israelitanakjam taqe derechonïpkaspänti. Ukampis uka leyejj janiw Diosan markapamp chikachasiñsa jupanakamp jakañs jarkʼkänti. Perspicacia para comprender las Escrituras sat libronjja, “Ammonitas” siski uk thaqtäta, ukatjja “Se casan con israelitas” siski uka cheqwa liytʼarakïta.
