1. ¿Mä paraisonjam jakasktan ukajj kunasa, ukat kun lurañsa amtañasa?

 JICHHÜRUNAKANJJA aka oraqen mä paraisow utji, ukanjja suma jakasiñampi walja lurañanakampiw utjaraki. Waljaniw ukan cheqpach sumankañan jakasipjje, janipun ukat mistuñwa jupanakajj amtapjje. Ukhamarus walja jaqenakan ukankapjjañapwa jupanakajj munapjje. ¿Kunatsa parlasktanjja? Mä paraisonjam jakasktan ukatwa parlasktanjja. a

2. ¿Kunatsa mä paraisonjam jakasktan ukajj wali musparkañajja?

² Uñisisiñampi jan walinakamp phoqantat pachansa jakstanjja, Jehová Diosajj mä paraisonjam jakasiñasatakiw wakichtʼawayi, ukan taqeniw sumankapjje, mayachtʼatäpjjaraki (1 Juan 5:19; Apoc. 12:12). Supayan apnaqat akapachajj kuna jan walinakansa uñjasiyistaspa uk sum Diosajj yati. Niyakejjay Diosajj wal munaschistojja, jupar serviñan jiltañasatak yanaptʼkistu uka seguro lugararuw irpistu. Biblianjja, mä paraisonjam jakasktan ukajj ‘jarkʼaqasiñatak’ mä lugaräkaspasa ‘suma regat mä jardinäkaspas’ ukham qhanañchi (Is. 4:6; 58:11). Jehová Diosan bendicionapampejja, uka paraisonkirinakajj kusisitäpjjewa, aka jan wali qhepa urunakan segurow jikjjatasipjjaraki (Is. 54:14; 2 Tim. 3:1).

3. Isaías 65 capitulon parlki ukajj ¿kunapachas nayraqat phoqasïna?

³ Isaías 65 capitulonjja, mä paraisonjam jakasiñajj kunjamasa uk Jehová Diosajj sum qhanañchäna. Isaiasajj Diosan amuytʼayatäsin qellqkäna uka arunakajja, 537 antes de Cristo maranwa nayraqatajj phoqasïna. Uka tiemponjja, arrepentisipkäna uka judionakajj Babiloniat oraqeparuw kuttʼjjapjjäna. Diosan bendicionapampis yanaptʼapampis qʼala tukjatäkäna uka Jerusalén mark wasitatwa saytʼayapjjäna, mä suma markaruw wasitat  tukuyapjjarakïna. Mayampiw templo saytʼayapjjäna, ukhamat uka cheqan Jehová Dios saparuk Israelan wasitat adorasjjañapataki (Is. 51:11; Zac. 8:3).

4. Isaías 65 capitulon parlki uka arunakajj ¿kunjamsa jichha tiempon phoqasiski?

⁴ Payïr toqetjja, Isaiasan arunakapajj jichha tiemponwa phoqasiraki. 1919 maranwa uka arunakajj phoqasiñ qalltäna, uka maranwa Jehová Diosan servirinakapajj Jachʼa Babiloniat antutatäjjapjjäna. Uka marat aksaruw mä paraisonjam jakasktan ukajj oraqpachan jiltawayi. Diosan Reinopat yatiyirinakajj wali kusisitäpjjänwa, walja congregacionanakwa uttʼayapjjarakïna. Waljaniw nuwasirinaka qʼañu juchan sarnaqerinakäpjjäna, qhepatjja ‘Diosan munañaparjam luratäki uka machaq jaqëñampiw isthapisjjapjjäna’ (Efes. 4:24). Isaiasan arunakapat jilapartejj machaq mundonwa phoqasini. Ukampis jichha tiempon walja bendicionanakatwa disfrutasktanjja. Jichhajja, mä paraisonjam jakasktan ukajj kunjamsa yanaptʼistu, kunatsa ukat janipun mistuñasäki ukanakatwa yatjjataskañäni.

¿KUNA BENDICIONANAKAS UTJI?

5. Isaías 65:13 textorjamajj ¿kuna bendicionanaksa mä paraisonjam jakasajj katoqtanjja?

⁵ Diosar serviñan kʼumarätanwa, chʼamañchtʼatarakïtanwa. Mä paraisonjam jakasktan uka taypinkañampi jan ukankañampejj kunansa jan igualäki uk sumwa Isaiasan profeciapajj uñachtʼayi (Isaías 65:13 liytʼäta). Jehová Diosajj jupa jakʼankapjjañapatakejj taqe kunwa servirinakapar churi. Jupajj espíritu santopa, Biblia ukat jukʼampinakamp churistu, ukhamat ukanak manqʼäkaspas ukham manqʼañasataki, umäkaspas ukham umtʼañasataki ukhamarak kusisitäñasataki (Apocalipsis 22:17 liytʼarakïta). Ukampis khitinakatï jan uka paraisonkapki ukanakampejj janiw ukhamäkiti. Jupanakajj ‘manqʼat awtjatäpjjewa’, ‘umat pharjatäpjjewa’, ‘phenqʼachatäpjjarakiwa’. Janiw Diosarojj uñtʼapkiti (Amós 8:11).

6. Joel 2:21-24 texton ¿kuna manqʼañanakatsa aytasi, ukanakajj kunamp sasisa, ukat kunjams yanaptʼistu?

⁶ Joel profetajj mä profeciapanjja, Jehová Diosajj taqe chuymaw markapankirinakarojj wakiski uka manqʼañanak churani sasaw säna, ukanakat yaqhepajj grano, vino, olivo aceite ukanakänwa (Joel 2:21-24). Uka arunakampejja, Jehová Diosaw servirinakaparojj jupar confiyasipkakiñapatak yanaptʼanaksa Biblian ewjjtʼanakaps churani sañwa munaskäna. ¿Kunjamsa jichha tiempon uk luraski? Diosajj Biblia, qellqatanaka, jw.org cheqankir walja yanaptʼanaka, tantachäwinaka, asambleanakwa churistu. Ukanakampiw sapür yanaptʼayassna, sapürutjamarakiw Diosar serviñan kʼumaräsna chʼamañchtʼatarakïsna.

7. ¿Kunatsa kusisitätanjja? (Isaías 65:14).

⁷ Kusisita ukat chuymas chuymätanwa. Cristianonakajj taqe chuymaw Diosar yuspärapjje, ukatwa kusisiñat arnaqasipjje (Isaías 65:14 liytʼäta). ¿Kunatsa “chuymanakapan” kusisitäpjje? Kuna laykutejj Diosan Arupan cheqa yatichäwinakampi, chʼamañchtʼkir promesanakampwa jikjjatapjje, ukaw jupanakar wal chʼamañchtʼi. Jesusan sacrificio loqtasitapjjarus mä suytʼäwinïpjjarakiwa. ¡Jilat kullakanakamp taqe ukanakat parltʼasisajj kusisitäpjjewa! (Sal. 34:8; 133:1-3).

8. Mä paraisonjam jakasktan ukan ¿kunas jilanki?

⁸ Mä paraisonjam jakasktan ukanjja, mayachtʼat jakasiñampi munasiñampiw jilanki, ukanak utjatapat Diosan markapankirinakajj wali kusisitäpjjewa. ‘Wali sum mayachthapki’ uka munasiñajja, machaq mundon jakasiñajj kunjamänisa uk amuyañatakiw yanaptʼistu. Ukanjja, jichha tiempot sipans jukʼamp munasiñaw utjani, taqeniw mayachtʼat jakasipjjarakini  (Col. 3:14). Mä kullakajja, Jehová Diosan Testigonakapar uñtʼasajj kunjamas jikjjatasïna uk akham sasaw qhanañchi: “Kunjamatsa nayasa familiajampis kusisit jakasipjjerista uk janiw yatkayätti. Munasiñajj kunjamas uk Jehová Diosan Testigonakapar uñtʼasaw sum amuyjjta” sasa. Taqe khitinakatejj kusisita chuymas chuyma jikjjatasiñ munapki ukanakajja, mä paraisonjam jakasktan ukaruw mantanipjjañapa. Akapachankir jaqenakajj kunsay jiwasat parlasipkpan, Jehová Dios nayraqatansa jupar adorapki ukanak nayraqatans sumat uñjatätanwa (Is. 65:15).

9. ¿Kunanakatï tʼaqesiykistu ukanakampejj kunas pasani? (Isaías 65:16, 17).

⁹ Tranquilötanwa, samartʼatarakïtanwa. Yaqhepajj janiw mä paraisonjam jakasktan uka taypinkañ munapkaniti, jupanakat Isaías 65:14 textojj akham siwa: “Chuymanakam usuyasipjjatam laykojja wararipjjätawa, chuymanakaman wal llakisipjjatam laykojja jachapjjarakïtawa” sasa. ¿Diosan servirinakapat kamsasirakispasa? ¿Kunanakatï jupanakar tʼaqesiyki ukanakampejj kunas pasani? Jehová Diosajj akham siwa: “Nayra llakinakajj armatäjjaniwa, nayranakajatakis imantatäjjarakiniwa” sasa (Isaías 65:16, 17 liytʼäta). Taqe jan walinakwa Diosajj chhaqtayani, tiempompejj janipuniw ukanakajj amtatäjjaniti.

10. ¿Kunatsa jilat kullakanakampïñajj mä bendicionawa sasin sista? (Foto uñjjattʼarakïta).

¹⁰ Tantachäwinakan tranquiloki ukat samartʼataw jikjjatastanjja. Ukankasajj aka jan wali pachan utjki uka jan walinakat armasjjtanwa. Mä paraisonjam jakasktan ukan sumankañ utjaskakiñapatakejj ¿kunjamsa yanaptʼsna? Kunjam chuymanïñatakitejj espíritu santon achupajj yanaptʼkistu ukarjamaw sarnaqañasa, ukanakat yaqhepajj akanakawa: munasiña, kusisiña, sumankaña, suma chuymanïña, llampʼu chuymanïña (Gál. 5:22, 23). ¡Diosan markapankañajj mä bendicionapuniwa! Mä paraisonjam jakasktan ukat jan mistkañäni ukhajja, “machaq alajjpachanakampi machaq oraqempwa luräjja” sasin arsuwayki uka promesap kunjamsa Diosajj taqpach phoqani ukwa uñjañäni.

11. Mä paraisonjam jakasktan ukat ¿kunjamas jikjjatasiñasa? (Isaías 65:18, 19).

¹¹ Yuspärtanwa, wali kusisitarakïtanwa. Kunatsa Diosan servirinakapajj kusisitäñatak walja razonanïtan ukwa Isaías profetajj qhanañchäna. Mä paraisonjam jakasktan ukajj Jehová Diosan uttʼayatawa (Isaías 65:18, 19 liytʼäta). Ukatwa Diosajj aka mundon utjki uka organizacionanakat mistupjjañapatak jaqenakar jiwas tayp yanaptʼaski, kuna laykutejj uka organizacionanakajj janiw jaqenakar Diosat cheq  yatichapkiti. Diosajj mä paraisonjam jakasktan uka taypinkapjjañapatakiw jaqenakar yanaptʼañ muni. ¡Diosan markapankatasat wali kusisitätanwa! Ukatwa uka bendicionanakat mayninakar parlañ muntanjja (Jer. 31:12).

12. Isaías 65:20-24 textonkir promesanak liytʼasajj ¿kunjamas jikjjatasta, ukat kunatsa?

¹² Mä paraisonjam jakasktan ukanakat walpun Diosar yuspärtanjja, kunanaktï jutïrin katoqkañäni ukats wal kusisiraktanjja. ¡Taqe kunanaktï machaq mundon uñjkäta lurkarakïta uk amuytʼam! Bibliajj akham siwa: “Ukanjja janiw mä qhawqha urunak jakir asu wawanakajj utj-jjaniti, janirakiw awkiptañ urunakap jan phoqachir jilïr jaqenakas utj-jjaniti” sasa. Ukat akham sarakiwa: “Jupanakajj utanakwa utachasipjjani, ukanwa jakapjjarakini, uvasanakwa yapuchasipjjani, achunakapwa manqʼapjjarakini” sasa. Ukhamarus “janiw inamayakejj wali chʼam tukus trabajipkaniti”, kuna laykutejj Jehová Diosaw jupanakar bendisini. Diosan arsutaparjamajj cheqpachapuniw suma, seguro ukat kusisit jakasipjjani. ‘Janïraw jupanakajj artʼapkaniti’ ukhaw Diosajj “kunanaktï [...] munapki” ukanak jupanakar churani (Is. 65:20-24; Sal. 145:16).

13. Isaías 65:25 textorjamajj ¿kuna cambionaksa Jehová Diosar serviñatakejj lurañasa?

¹³ Sumankañana ukat segurow jakastanjja. Espíritu santon yanaptʼapampejja, khitinakatï qhoru jan ukajj phiru animalanakar uñtasitäpkäna ukanakajj cambiawayapjjewa (Isaías 65:25 liytʼäta). Mä arunjja, suma jaqëñatakiw chʼamachasiwayapjje (Rom. 12:2; Efes. 4:22-24). Ukampis Diosan servirinakapajj pantjasir jaqenakjamajj pantjasikipuntanwa. Ukhamäkchisa, Jehová Diosajj ‘taqe kasta jaqenakaruw’ mayachthapi, munasipjjañapataki, sumankapjjañapatakiw yanaptʼaraki, ukajj mä milagrowa (Tito 2:11). ¡Taqe Chʼamani Jehová Diosakiw uk luraspa!

14. ¿Kunjamsa Isaías 65:25 textojj mä jilatan jakäwipan phoqasïna?

¹⁴ ¿Cheqapunit cambionak lursna? Jïsa, mä experienciaw uk uñachtʼayi. 20 marani mä waynajj wali nuwasiri, qʼañu juchan sarnaqeri ukhamänwa. Autonak lunthatatapatsa yaqha jan walinak luratapats walja kutirakiw carcelankäna. Khitimpis nuwasiñak munaskirïna. Kunapachatï Biblian cheqa yatichäwinakap nayrïr kut istʼkäna, Testigonakan tantachäwinakaparus sarjjarakïna ukhajja, mä paraisonjam jakasktan uk jikjjatatapwa amuyäna, uka laykuw jakaskakiñ amtarakïna. Bautisasjjäna uka qhepatjja, kunjamsa Isaías 65:25 textojj jakäwipan walja kuti phoqasïna ukwa amuyäna. Jupajj mä ajjsarkañ leonjamäkchïnsa mä manso ovejäjjänwa.

15. ¿Kunatsa jaqenakarojj mä paraisonjam jakasktan ukar mantanipjjañapatak yanaptʼañ muntanjja, ukat kunjamsa uk lursna?

¹⁵ Isaías 65:13 textojj akham sasaw qallti: “Taqe Kunjjar Munañani Jehová Dios Tatitojj akham siwa” sasa. Isaías 65:25 textojj akham sasaw tukuyaraki: “Siw Jehová Diosajja” sasa. Ukhamajj kuntï jupajj arski ukajj phoqasikipuniwa (Is. 55:10, 11). Mä paraisonjam jakasktan ukajj utjaskapuniwa. Uka toqet Jehová Diosan profeciapajj phoqasirakiwa. Diosajj jupar adorir mä familia uttʼayawayi, ukanjja jan wali pachan jakkasas sumaki ukat segurow jakastanjja (Sal. 72:7). Uka razonanakatwa taqe jaqenakarojj jiwas taypinkapjjañapatak yanaptʼasktanjja. Ukatakejj jaqenakar discipulonakar tukuyañatakiw chʼamachasiñasa (Mat. 28:19, 20).

MÄ PARAISONJAM JAKASKTAN UKAR MANTANIPJJAÑAPATAK YANAPTʼAPJJAÑÄNI

16. ¿Kun uñjasas jaqenakajj mä paraisonjam jakasktan ukar mantaniñ munapjje?

¹⁶ Mä paraisonjam jakasktan ukan wali sumäñapatakejj taqeniw yanaptʼsna, ukhamat walja  jaqenakajj ukar mantaniñ munapjjañapataki. Ukatakejj Jehová Diosatwa yateqasiñasa. Jupajj janiw jaqenakarojj munkir jan munkir jupan ukar irpankiti, jan ukasti munasiñampiw jupan ukar irpani (Jer. 31:3; Juan 6:44). Khitinakatï Jehová Diosat yateqapki, suma chuymanïpkaraki ukanakajja, Jehová Diosajj kunja suma chuymanisa uk yatisajj juparuw jakʼachasipjje. Mä paraisonjam jakasktan ukarojja, suma chuymanïtas uñjasaw jaqenakajj mantaniñ munapjjaspa, ukatakejj ¿kunanaksa luraraksna?

17. Mä paraisonjam jakasktan ukar jaqenakan mantaniñ munapjjañapatakejj ¿kunsa lurañasa?

¹⁷ Mä paraisonjam jakasktan ukar jaqenakan mantaniñ munapjjañapatakejja, jilat kullakanakaruw munasiñamp uñjañasa, khuyaptʼayasiñasarakiwa. Nayra Corinto markanjja, jan creyentëpkäna ukanakajj tantachäwir sarasajj akham sapjjänwa: “Cheqapuniw Diosajj jumanakampïski” sasa. Tantachäwinakar sarasajj ukhamarak jaqenakajj sapjjaspa ukwa muntanjja (1 Cor. 14:24, 25; Zac. 8:23). Ukatwa “maynit maynikamas sumankapjjarakim” siski uka ewjjtʼarjam lurañasajj wali importantejja (1 Tes. 5:13).

18. ¿Kun uñjasas jaqenakajj Diosan markapar mantaniñ munapjjaspa?

¹⁸ Jilat kullakanakarojja, kunjamtï Jehová Diosajj uñjki ukham uñjañatakiw chʼamachasiñasa. Ukatwa kunja suma chuymanïpjjes uk uñjañatak chʼamachastanjja, janiw pantjasitanakap uñchʼukktanti, kuna laykutejj ukanakajj jutïrin chhaqtayatäjjaniwa. Jan waltʼayasiñanak munasiñamp askichañatakejj aka ewjjtʼarjam lurañaw yanaptʼistani, ukan akham siwa: “Maynit maynikam suma chuymamp uñjasipjjam, maynit maynikamas sinttʼasipjjam” sasa (Efes. 4:32). Taqe khitinakatï ukham uñjatäñ munapki ukanakajja, mä paraisonjam  jakasktan uka taypir mantaniñwa munapjjani. b

MÄ PARAISONJAM JAKASKTAN UKA TAYPINKASIPKAKIÑÄNI

19. 1) ¿Mä paraisonjam jakasktan ukar wasitat kuttʼanipki ukanakajj kamsapjjesa? (“ Diosat jitheqtirinakajj kuttʼanjjapjjewa” sat recuadro liytʼäta). 2) ¿Kun lurañsa amtañasa? (Dibujo uñjjattʼarakïta).

¹⁹ ¡Mä paraisonjam jakasitasat wal kusistanjja! Uka paraisojj nayrat sipans jukʼamp sumäjjewa, janipuniw kunapachas Jehová Diosan servirinakapajj ukataq utjirïkiti. Diosajj jiwasatak uttʼayawayki uka paraisot yuspärapjjapuniñäni. Khitinakatï suma, kusisita, tranquilo, seguro jikjjatasiñ munapki ukanakajja, mä paraisonjam jakasktan ukaruw mantanipjjañapa, janipuniw ukat mistupjjañapäkiti. Ukampis wal amuyasiñasawa, Supayajj engañjañwa munistu, mä paraisonjam wali sum jakasktan ukatwa jitheqtayañ munarakistu (1 Ped. 5:8; Apoc. 12:9). Janipun jan wali amtap phoqasiyañäniti. Mä paraisonjam jakasktan ukajj wali sumawa, qʼomawa, sumankañaw ukan utjaraki, taqe chʼamasamp uka paraíso jarkʼaqapjjañäni.