1. ¿Kunsa Jehová Diosajj sapa maynir churistu?

 JEHOVÁ DIOSAJJA munasiñampiw sapa mayni servirinakaparojj congregacionan lurañanak churistu. Sapa maynejj yaqh yaqha lurañanïkstansa, taqeniw valoranïtanjja, taqenirakiw wakiskirïtanjja. Apóstol Pablow uk sum amuyañatak yanaptʼistu. ¿Kunjamsa?

2. Efesios 4:16 textorjamajja, ¿kunatsa maynit maynikam valoranit uñjasiñasa, yanaptʼasiñasaraki?

² Kunjamtï aka yatichäwitak apstʼat textojj siskejja, janiw Diosan mä serviriparojj “janiw nayajj jumar munksmati” sasin sisksnati sasaw Pablojj amuytʼayäna (1 Cor. 12:21). Congregacionan suman jakasiña utjañapatakejja, taqeniw valoranit uñjasiñasa, maynit maynikamas yanaptʼasiñasa (Efesios 4:16 liytʼañataki). Congregacionan mayachtʼatäktan ukhajja, jilat kullakanakasajj chʼamañchtʼata, munata ukhamaw jikjjatasipjje.

3. ¿Kunanakatsa aka yatichäwin yatjjataskañäni?

³ ¿Kunanakansa jilat kullakanakasar respetatas uñachtʼaysna? Aka yatichäwinjja aka toqenakatwa yatjjataskañäni: 1) ¿Kunjamsa jilïr irpirinakajj mayni jilïr irpirinakar respetomp uñjapjjaspa? 2) ¿Kunjamsa solter jilat kullakanakasar valoranit uñjatas uñachtʼaysna? 3) ¿Kunjamsa arus jan sum parlirinakar munasitas uñachtʼaysna?

4. Apóstol Pablojj Romanos 12:10 texton qellqkäna uka ewjjtʼarjamajja, ¿kunsa jilïr irpirinakajj lurapjjañapa?

⁴ Jilïr irpirinakajj espíritu santompi uttʼayatäpjjewa, ukampis sapa mayniw yaqh yaqha lurañanakanïpjje, kun lurañsa sum yatipjjaraki (1 Cor. 12:17, 18). Yaqhep jilïr irpirinakajj jichhak uttʼayatäpjjewa, janirakiw experiencianïpkiti. Yaqhepasti edadanëjjapjjewa jan ukajj usutäjjapjjarakiwa, ukatwa jan nayrjam lurañ puedjjapjjeti. Ukhamäkchisa, janiw mä jilïr irpirejj mayni jilïr irpirirojj “janiw nayajj jumar munksmati” sasin sañapäkiti. Antisas taqeniw kuntï Romanos 12:10 (liytʼañataki) texton Pablojj siskäna uka ewjjtʼarjam lurapjjañapa.

5. 1) ¿Kunjamsa jilïr irpirinakajj mayni jilïr irpirinakar respetapjjatap uñachtʼayapjje? 2) ¿Kunatsa respeto uñachtʼayapjjañapajj wali wakiskiri?

⁵ Jilïr irpirinakajja, mayni jilïr irpirinakar sum istʼasaw jupanakar respetapjjatap uñachtʼayapjje. Jilïr irpirinakajj tantachasipki ukhaw ukham lurapjjañapajj jukʼamp wakiskirejja. ¿Kunatsa? La Atalaya 1 de octubre, 1988 revistajj uka toqet akham siwa: “Cristojj espíritu santo toqew congregacionankir jilïr irpirinakarojj Biblian mä ewjjtʼap arsupjjañapatak yanaptʼaspa, jan ukajj mä suma amtar puripjjañapatak yanaptʼaspa, ukwa jilïr irpirinakajj amuyapjje (Hechos 15:6-15). Espíritu santojja, congregacionan taqpach jilïr irpirinakaruw yanaptʼi, janiw mayniruk yanaptʼkiti” sasa.

6. 1) ¿Kunas jilïr irpirinakarojj mayachtʼatäpjjañapatak yanaptʼi? 2) ¿Kunjamsa ukajj congregacionar yanaptʼi?

⁶ Mä jilïr irpirejj mayni jilïr irpirinakar respetompi uñjki ukhajja, janiw tantachasipki ukhajj jupak parlkiti, janirakiw jupakis taqe kunsa yatkaspa ukhamas tukkiti. Jan ukasti kuntï amuyki ukjja humilde chuymampiw arstʼi, kuntï mayninakajj sapki uksa sum istʼaraki. Ukatjja, kuntï Bibliasa ukhamarak ‘suma phoqeri amuyasir esclavosa’ siski ukarjam istʼañatakiw chʼamachasiraki (Mat. 24:45-47). Jilïr irpirinakajj munasiñampi respetompi tantachäwinakap apapjje  ukhajja, Diosaw espíritu santop jupanakar churi, uka espíritu santow congregacionar chʼamañchkir suma amtanakar puripjjañapatak yanaptʼaraki (Sant. 3:17, 18).

7. ¿Kunsa Jesusajj solteröñ toqet amuyäna?

⁷ Congregacionasanjja janiw casado jilat kullakanakakisa ni wawanakani jilat kullakanakakisa utjkiti, jan ukasti walja solter jilat kullakanakaw utjaraki. ¿Kunjamsa jupanakar uñjañasa? Jesusajj kunsa solteröñ toqet amuyäna uk amtañäni. Jesusatakejj Diosan munañap lurañaw nayrankäna, ukatwa jan casaraskänti. Janirakiw casarasipjjañamawa jan ukajj solteröpjjañamawa sasajj sirïkänti. Ukampis yaqhep cristianonakajj solteröñwa amtapjjani sasaw säna (Mat. 19:11, 12). Jesusajj solteröpkäna ukanakarojj respetompiw uñjäna, janiw casadonakat menosäpkaspas jan ukajj kunas jupanakar faltkaspa ukham uñjirïkänti.

8. ¿Apóstol Pablojj kunatakis 1 Corintios 7:7-9 texton cristianonakar chʼamañchäna?

⁸ Apóstol Pablojj Diosar sirvkäna ukhajja Jesusjam solterorakïnwa. Pablojj casarasiñajj janis walïkaspa ukham janiw yatichkänti. Sapa mayniw casarasiñsa solteröñsa amtañapa sasaw säna. Ukampis Jehová Diosar serviñatakejj solteröpjjaspa ukatakiw cristianonakar chʼamañchäna (1 Corintios 7:7-9 liytʼañataki). Pablojj janiw solteronakarojj jiskʼachkänti. Amuytʼañataki, Timoteo soltero waynarojj kunayman asignacionanakwa churäna (Filip. 2:19-22). * Ukhamajj janiw mä jilatarojj casadötap laykusa jan ukajj solterötap laykusa suma wakichtʼatawa jan ukajj janiw wakichtʼatäki sasajj sisksnati (1 Cor. 7:32-35, 38).

9. ¿Casarasiñ toqetsa solteröñ toqetsa kamsnasa?

⁹ Jesusasa Pablosa janiw casarasiñamawa jan ukajj solteröñamawa sasajj yatichkänti. Ukhamajj ¿casarasiñ toqetsa solteröñ toqetsa jiwasajj kamsaraksnasa? La Atalaya 1 de octubre, 2012 revistan akham siwa: “Casarasiñasa solteröñasa Diosan regalopawa. [...] Solteröñajj mä phenqʼäkaspasa tʼaqesiñäkaspasa ukham janiw Jehová Diosajj amuykiti” sasa. Ukhamajj solter jilat kullakanakarojj respetompiw uñjañasa.

10. Solter jilat kullakanakar respetstan ukhajja, ¿kunsa jan lurkañäni?

 ¹⁰ ¿Kunjamsa solter jilat kullakanakan amtanakapar respetatas uñachtʼaysna? Solter jilat kullakanakasajj jan casarasiñatakejj walja razonanïpjjewa. Sañäni, yaqhepanakajj jupanak pachpaw solteröñ amtapjje. Yaqhepasti casarasiñ munapjjewa, ukampis janiw jupanakatakjam mä chacha jan ukajj mä warmi jikjjatapkiti. Yaqhepajj inas viudöpjjchi jan ukajj viudäpjjarakchi. Ukham solter jilat kullakanakarojj janiw ‘kunatsa jan casaraskta’ sasin sañasäkiti, janirakiw ‘pareja thaqañ yanaptʼäma’ sañasäkisa. Inas yaqhepajj yanaptʼa maychistani, ukampis jan maykistani ukhajj janiw ukanakat parljjayañasäkiti. Parljjaysna ukhajja inas chuym ustʼaysna ukwa amuytʼasiñasa (1 Tes. 4:11; 1 Tim. 5:13). Jichhajja, yaqhep solter jilat kullakanakajj kamsapjjesa uk uñjañäni.

11, 12. ¿Kunjamsa solter jilat kullakanakarojj jan munkasin llakisiysna?

¹¹ Congregacionanak tumptʼir soltero mä jilatajja, solteröñajj wal yanaptʼasi sasaw säna, jupajj asignacionap sum phoqaski. Ukampis jupajj akham siwa: “Jilat kullakanakajj suma amtampisa ‘kunatsa jan casaraskta’ sasin sapkchitojja, awisajj llaktʼasiñjamawa” sasa. Betelan servir yaqha solter jilatajj akham sarakiwa: “Solteronakajj sintkañaw sarnaqapjje, solteröñajj janiw walïkiti, janiw solteröñajj Diosan mä regalopäkiti sasinsa yaqhep jilat kullakanakajj sapkaspa ukhamwa awisajj amuyta” sasa.

¹² Betelan servir soltera mä kullakajj akham siwa: “Taqpach solteronakas casarasiñ munapkaspa, kusistʼañatak tantachasipki ukajj pareja thaqañatakïkaspasa ukhamwa yaqhep jilat kullakanakajj amuyapjje. Mä kutejja, yaqha markaruw mä trabajo lurir khitapjjetäna, uka jaypʼojj tantachäwiw ukan utjäna. Alojtʼkitäna uka kullakajj naya edadani pä jilatanakatwa parlitäna. ‘Janiw pareja thaqarapksmati’ sasinsa siskchitänjja, Tantachasiñ Utar puripjjayäta ukhajja uka pä jilatanakar uñtʼañajatakiw amparat irpitäna. ¡Ukham luratapajj uka pä jilatanakatakisa nayatakisa phenqʼasiñjamänwa!” sasa.

13. ¿Kunas mä soltera kullakarojj wal chʼamañchtʼäna?

¹³ Betelan serviri yaqha soltera kullakajj akham sarakiwa: “Walja maranak precursorat serviri solter jilat kullakanakaruw nayajj uñtʼta, jupanakajj Diosarojj sum servipjje, suma amtanakaruw puripjje, mayninakarus wal yanaptʼapjje, wali kusisitäpjjarakiwa. Jupanakajj congregacionar wal yanaptʼapjje. Janiw solteröpjjatap laykojj mayninakat sipan jilankapkaspas ukham amuyasipkiti, janirakiw jan casarasipjjatapatsa jan wawanïpjjatapatsa janis kunäpkaspa ukham amuyasipkiti” sasa. Taqenir respetompi uñjaski, taqenir wali valoranit uñjaski uka congregacionankañajj wali kusiskañawa. Ukham congregacionanjja janiw khitirus jiskʼachapkiti, janiw khititsa envidiasipkiti, janirakiw khititsa armasipkiti ni khitirus jachʼañchapkiti. Taqeniw munasiñampi uñjasipjje.

14. ¿Kunjamsa solter jilat kullakanakar respetatas uñachtʼaysna?

¹⁴ Jiwasanakatï solter jilat kullakanakarojj kunjam chuymanïpjjesa ukarjam wali valoranit uñjapjjañäni, janirak solteröpjjatapatsa jiskʼachapkañäni ukhajja, jupanakajj kusisitäpjjaniwa. Janiw walsa tʼaqesipkaspa ukham uñjañasäkiti. Jan ukasti Diosar taqe chuyma servipjjatapat wali valoranitwa uñjapjjañasa. Ukham uñjañäni ukhajja, jupanakajj janiw akhamsa jupanakar sisksna ukham amuyasipkaniti: “Janiw nayajj jumar munksmati” sasa  (1 Cor. 12:21). Antisas jupanakar respetatasa ukhamarak congregacionan wali valoranit uñjataswa amuyapjjani.

15. Diosar jukʼamp serviñatakejj ¿kunsa yaqhep jilat kullakanakajj lurawayapjje?

¹⁵ Aka qhepa maranakanjja, Diosar jukʼamp serviñatakejj walja jilat kullakanakaw yaqha aru yateqañ amtawayapjje. Ukatakejj walja cambionakwa lurawayapjje. Arup parlapki uka congregacionatjja yaqha aru parlapki ukaruw cambiasiwayapjje, ukhamat ukan yanaptʼañataki (Hech. 16:9). Ukham yaqha congregacionar sarjjañajj sapa maynitäjjewa. Walja maranakatsa yaqha aru sum parlañ yateqapkchinejja, congregacionarojj wal yanaptʼasipki. Experienciapasa Diosan arunakaparjam sarnaqapjjatapasa jilat kullakanakar wal chʼamañchi. Ukham lurapjjatapajj jiwasatakejj wali valoraniwa.

16. ¿Kunarjamas mä jilatarojj jilïr irpiritsa jan ukajj congregacionan yanapiripatsa uttʼayasiñapa?

¹⁶ Mä jilatatï yateqaski uka aru janïr sum parlañ yatkchi ukhajja, ‘janiw jupajj jilïr irpirïkaspati jan ukajj janiw congregacionan yanapiripäkaspati’ sasin jilïr irpirinakan amuyapjjañapajj janiw walïkaspati. Mä jilïr irpirirusa jan ukajj congregacionan mä yanapiriparusa janiw mä aru parlañ yatiti janicha ukarjamajj uttʼayasiñapäkiti, jan ukasti Biblian utjki uka mayitanakarjamaw uttʼayasiñapa (1 Tim. 3:1-10, 12, 13; Tito 1:5-9).

17. Yaqha markar sarjjer familianakajj ¿kunsa amtapjjañapa?

¹⁷ Yaqhep familianakajj jan waltʼäwinakat qhespiñataki jan ukajj trabajo thaqañatakiw yaqha markanakar sarjjapjje. Inas uka markan kuna artï parlapki uka escuelar wawanakapajj sarapjjchi. Awk taykanakas inas trabajonïñatakejj uka markan arup yateqapjjarakchi. Ukampis kuna artï jupanakajj parlapki uka arun mä congregacionasa jan ukajj mä grupos utjaspa ukhajja, ¿kawkïr aru parlir congregacionarus sarapjjañapäspa? ¿Arup parlapki uka congregacionaru jan ukajj kuna artï uka markan parlapki uka congregacionaruch sarapjjañapäspa?

18. Gálatas 6:5 textorjamajja, ¿kunjamsa familia pʼeqtʼirin amtatapar respetatas uñachtʼaysna?

¹⁸ Familia pʼeqtʼiriw kawkïr congregacionarus sarapjjani uk amtañapa, uk amtañajj sapa familiatäjjewa. Kawkïr congregacionar sarañas familiapar jukʼamp yanaptʼaspa ukarjamaw uk amtañapa (Gálatas 6:5 liytʼañataki). Kuntï familia pʼeqtʼirejj amtki ukjja respetañasawa. Congregacionasar jutañ amtapjjani ukhajj sumwa katoqtʼañasaraki (Rom. 15:7).

19. Wawanakapatï congregacionan parlapki uka aru jan sum yatipkchi ukhajja, ¿kunsa familia pʼeqtʼirinakajj lurapjjaspa?

¹⁹ Yaqhep familiajja, kuna artï awkisa taykasa  parlki uka congregacionaruw sarapjje. Ukampis wawanakatï uka markan escuelar sarapjjchi ukhajja, awk taykan arup janiw sum parlapkaspati. Ukatwa tantachäwinakan yatichaski uk jan sum amuyapkaspati, ni Diosar serviñansa nayrar sartapkaspati. Ukhamäspa ukhajja, familia pʼeqtʼirejj Diosaruw yanaptʼa mayisiñapa, ukatjja kunjamsa wawanakaparojj Diosampir markapampir jukʼamp jakʼachasiñ yanaptʼaspa ukwa amuytʼañaparaki. ¿Wawanakapar yanaptʼañatakejj kunsa familia pʼeqtʼirinakajj lurapjjaspa? Kuna artï jupanakajj parlapki ukwa wawanakapar yatichapjjaspa, jan ukajj wawanakapajj kuna aru parlañtï sum yatipki uka congregacionaruw sarapjjarakispa. Kawkïr congregacionar sarañjjay amtapjjchini ukanjja jilat kullakanakajj respetompiw jupanakar uñjapjjañapa, wali valoranitwa uñjapjjañaparaki.

20. ¿Kunjamsa yaqha aru yateqasipki ukanakar respetatas uñachtʼaysna?

²⁰ Kunjamtï uñjawayktanjja, walja congregacionanakanwa jilat kullakanakajj kunayman razonanakat yaqha aru parlañ yateqasipki. Inas jupanakajj uka aru jan sum parlañ puedepkchiti, ukampis parlatap uñchʼukiñat sipansa, qhawqsa Jehová Diosar munasi, jupar serviñatakis chʼamachasi uk amuyañatakiw chʼamachasiñasa. Ukhamatwa jupanakar taqe chuym respetañäni, valoranitsa uñjarakiñäni. Janiw arus jan parlañ yatipjjatap laykukejj jupanakar “janiw nayajj jumar munksmati” sañasäkiti.

21, 22. ¿Kunatsa Jehová Diosar wal yuspärtanjja?

²¹ Jehová Diosajj congregacionan kunayman lurañanakwa sapa maynir churistu, taqe ukanakat wal jupar yuspärtanjja. Chachanakasa, warminakasa, solteronakasa, casadonakasa, wayn tawaqonakasa, edadaninakasa, mä aru sum parlañ yatirinakasa, mä aru jan sum parlañ yatirinakasa taqeniw Jehová Diosatakisa jilat kullakanakatakis valoranïtanjja (Rom. 12:4, 5; Col. 3:10, 11).

²² Apóstol Pablojj jaqen cuerpopat parlkäna uka uñachtʼäwitjja kunayman suma yatichäwinakwa yateqtanjja. Uka yatichäwinakarjam sarnaqañäni ukhajja, congregacionan lurañanakas sumwa phoqañäni, jilat kullakanakarus respetompi munasiñampiw uñjarakiñäni.