1. ¿Kunatsa wali kusisitätanjja?

 DIOSAN congregacionapankasajj wali kusisitätanwa. Ukanjja, sumankañ utjayir jaqenakampi ukhamarak kusisita jaqenakampiw utji, ukatwa mä paraisonjam jakastanjja. Ukampis ¿kunjamsa congregacionar jumajj yanaptʼaskta?

2. ¿Kuna uñachtʼäwitsa Pablojj cartanakapan qellqäna?

² Apóstol Pablojj mä uñachtʼäwitwa cartanakapan qellqäna. Ukajja, kunjamsa congregacionan yanaptʼasktan uk amuyañatakiw yanaptʼistani. Congregacionajj jaqen cuerpopar uñtasitawa, congregacionankapki ukanakajj cuerpon partenakapar uñtasitarakiwa sasaw Pablojj säna (Rom. 12:4-8; 1 Cor. 12:12-27; Efes. 4:16).

3. ¿Kuna kimsa toqetsa aka yatichäwin yatjjataskañäni?

³ Pablojj parlkäna uka uñachtʼäwit kunsa yateqsna ukjja, kimsa toqetwa aka yatichäwin uñjañäni. Maya, sapa mayniw congregacionan lurañanakanïtanjja. * Paya, congregacionan qhawqsa yanaptʼasktan uk jan sum amuykstan ukhajj ¿kunsa lursna? Kimsa, kuna lurañtï Diosajj churkistu uk ¿kunatsa sum phoqañasa?

4. ¿Kunsa Romanos 12:4, 5 texton qellqata arunakajj yatichistu?

⁴ ¿Kunsa Pablon uñachtʼäwipat yateqsna? Nayrïr yatichäwi, sapa mayniw congregacionan wakiskir lurañanakanïtanjja.  Akham sasaw Pablojj uñachtʼäwip qellqañ qalltäna: “Mä cuerpojj walja partenakaniwa, ukhamarus uka partenakajj janiw mä pachpa lurañanïpkiti. Jiwasampejj ukhamarakiwa, waljanïkstansa Cristompi mayakïtas laykojj mä cuerpokïtanwa. Niyakejjay sapa maynis cuerpon partenakapar uñtatästanjja, jiwaskamajj mayachtʼatätanwa” sasa (Rom. 12:4, 5). Congregación taypin sapa maynis yaqh yaqha lurañanïkstanjja, taqeniw valoranïtanjja sañwa Pablojj munaskäna.

5. ¿Kunsa Jehová Diosajj mä bendicionar uñtat markapar churi?

⁵ Congregacionan lurañanakanïpki ukanakat pienstan ukhajja, inas khitinakatï congregacionan irpapki ukanakat amtasstan (1 Tes. 5:12; Heb. 13:17). Cheqas Jehová Diosaw Cristo toqejj congregacionar ‘jaqenakjja mä bendicionar uñtat churi’ (Efes. 4:8). Jupanakajja akïr jilatanakäpjjewa: Oraqpachan Jilïr Irpirinaka ukhamarak yanapirinakapa, Comités de Sucursal ukankirinaka, congregacionanak tumptʼir jilatanaka, Diosan markapan escuelanakajj utjki ukan yatichirinaka, jilïr irpirinaka, congregacionan yanapirinakapa. Uka jilatanakajj espíritu santomp uttʼayatäpjjewa, ukhamat jupanakajj Jehová Diosan munat ovejitanakapar cuidapjjañapataki ukhamarak chʼamañchtʼapjjañapataki (1 Ped. 5:2, 3).

6. Kuntï 1 Tesalonicenses 2:6-8 textojj siski ukarjamajja, ¿kun lurañatakis espíritu santompi uttʼayatäpki uka jilatanakajj chʼamachasipjje?

⁶ Congregacionan walja lurañanak phoqapjjañapatakiw espíritu santon yanaptʼapamp uka jilatanakar uttʼayasi. Kunjamtï amparanakasa, kayunakasa cuerpon yaqha partenakapas cuerpor yanaptʼkejja, ukhamarakiw uka jilatanakajj congregacionar kunayman lurañanakamp yanaptʼapjje. Jupanakajj janiw jachʼañchatäñ thaqapkiti, jan ukasti askinakap thaqañat sipansa jilat kullakanakatwa llakisipjje, jupanakar chʼamañchtʼañataki yanaptʼañatakiw wal chʼamachasipjjaraki (1 Tesalonicenses 2:6-8 liytʼañataki). Ukham jilatanak utjatapat walpun Jehová Diosar yuspärtanjja.

7. ¿Kuna bendicionanaksa precursoranakasa misioneronakas katoqapjje?

⁷ Inas congregacionasan misioneronaka, precursor especialanaka jan ukajj precursor regularanakajj utjchi. Cheqas oraqpachanwa walja jilat kullakanakajj sapür predicapjje, Bibliatsa yatichapjjaraki. Ukham predicasajj waljaniruw Jesucriston discipulopäñatak yanaptʼasipki. Uka jilat kullakanakajj janis walja utjirinïpkchejja, Jehová Diosajj walja bendicionanakwa jupanakar churi (Mar. 10:29, 30). Congregacionan ukham jilat kullakanak utjatapat walpun Jehová Diosar yuspärtanjja.

8. ¿Kunatsa sapa mayni publicadoranakajj Jehová Diosatak wali valoranïtanjja?

⁸ ¿Espíritu santomp uttʼayat jilatanakampi, precursoranakampi ukhamarak misioneronakampikit congregacionan wali valoranïpjje? Janiwa. Sapa publicadoraw Jehová Diosatakisa congregacionatakis wali valoranïtanjja (Rom. 10:15; 1 Cor. 3:6-9). ¿Kunatsa ukham sistanjja? Cheqas congregacionatakejja, jaqenakar Jesusan discipulopar tukuyañaw wali importantejja (Mat. 28:19, 20; 1 Tim. 2:4). Bautisat publicadoranakasa jan bautisat publicadoranakasa, taqeniw jaqenakar yatichañatak chʼamachastanjja, ukatwa taqenis Diosatak wali valoranïtanjja (Mat. 24:14).

9. ¿Kunatsa congregacionankir kullakanakarojj wali valoranit uñjtanjja?

⁹ Jehová Diosajja, kullakanakarojj kunayman wakiskir lurañanakwa congregación  taypin churaraki. Jupajja, wali valoranitwa casada kullakanakarusa, wawan kullakanakarusa, viudanakarusa, soltera kullakanakarus uñji. Biblianjja, Jehová Diosar kusisiyiri walja warminakatwa parli. Jupanakajj yatiñani, Diosar confiyiri, Diosar taqe chuym serviri, jan ajjsariri, suma luräwinak luriri ukhamäpjjänwa (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Jichha tiempon ukham kullakanakajj utjarakiwa. Ukham kullakanak utjatapat walpun Jehová Diosar yuspärtanjja.

10. ¿Kunatsa edadani jilat kullakanakar wali valoranit uñjtanjja?

¹⁰ Congregacionan edadani walja jilat kullakanak utjatapatjja, ukhamarakiw Jehová Diosar yuspärtanjja. Jupanakat yaqhepajj waynatpachaw Jehová Diosar jan jitheqtas serviwayapjje. Yaqhepajj inas jichhaki Diosar uñtʼawayapjjchi. Ukhamäkchisa taqeniw edadanëjjasajj jan walinakan uñjasipjje, ukatwa congregacionansa predicacionansa waynanakat sipansa jukʼak lurjjapjje. Ukampis predicañatakejj wal chʼamachasipjje, mayninakar yatichañatakisa chʼamañchtʼañatakis wal chʼamachasipjjaraki. Jupanakajj wali yateqaskayäpjjewa. Jehová Diosatakisa jiwasatakis jupanakajj wali munatäpjjewa (Prov. 16:31).

11, 12. ¿Kunjamsa congregacionasankir wayn tawaqonakan luratanakapajj chʼamañchistu?

¹¹ Jichhajj wayn tawaqonakat amuytʼarakiñäni. Supayampi apnaqata ukhamarak kʼari yatichäwinakampi phoqantat akapachan jilsuñajj jupanakatak chʼamakiwa (1 Juan 5:19). Ukhamäkchisa tantachäwinakan arstʼapjjatapasa, predikir sarapjjatapasa, kuntï creyipki uka toqet jan ajjsaras saytʼasipjjatapasa wal chʼamañchtʼistu. Wayn tawaqonaka, jumanakajj congregacionan wali valoranïpjjtawa (Sal. 8:2).

¹² Yaqhep jilat kullakanakatakejja, congregacionan qhawqsa yanaptʼasipki uk amuyañajj chʼamakiwa. ¿Kunas jiwasarojj jan ukham amuyañatak yanaptʼistaspa? Uk jichhajj yatjjatañäni.

13, 14. ¿Kunatsa yaqhepajj congregacionan janis kunatak sirvkaspa ukham amuyasispa?

¹³ Pablon uñachtʼäwipat payïr yatichäwi. Yaqhepajj janis congregacionan valoranïpkaspa ukhamwa amuyasipjje, uka toqetwa Pablon uñachtʼäwipajj parlaraki. Jupajj akham sänwa: “Kayutejj: ‘Janiw nayajj amparäkti, ukatwa janejj cuerpon partepäkti’ saspajja, janiw uka laykojj cuerpon jan partepäkaspati. Jiñchutejj: ‘Janiw nayajj nayräkti, ukatwa janejj cuerpon partepäkti’ saspajja, janiw uka laykojj cuerpon jan partepäkaspati” sasa (1 Cor. 12:15, 16). ¿Kunsa uka arunakat yateqsna?

¹⁴ Congregacionan mayninakamp igualayassna ukhajj janis kunatak sirvksna ukhamwa amuyasjjsna. Yaqhepajj wali suma yatichirinakäpjjewa, yaqhepasti sumwa kuns organiztʼapjje, mayninakarus chuymachtʼiri, chʼamañchtʼiri ukhamäpjjewa. Ukatwa ‘janiw nayajj jupanakjamäkti’ sasin amuyjjsna. Ukham amuyatasajj humilde chuymanïtaswa uñachtʼayi (Filip. 2:3). Ukampis ak amtañäni: sapa kuti ukham igualayassna ukhajja, aynachtʼsnawa. Kunjamtï Pablojj siskänjja, janis congregacionar kunansa yanaptʼksna ukhamwa amuyasjjsna. ¿Kunas jan ukham amuyasiñatak yanaptʼistaspa?

15. Congregacionan kunaymaninaksa lurkstanjja, ¿kunsa 1 Corintios 12:4-11 textorjamajj amtañasa?

¹⁵ Amuytʼañäni, nayrïr patak maranakan jakir cristianonakat yaqheparojja, Jehová Diosajj espíritu santop toqew milagronak lurapjjañapatak chʼam churäna, ukampis janiw taqenejj mä pachpa lurañ katoqkänti (1 Corintios 12:4-11 liytʼañataki). Sapa maynejj janis mä pachpa lurañ katoqapkchïnjja, taqeniw Diosatakejj wali valoranïpjjäna. Cheqas jichhürunakan janiw Jehová Diosajj milagronak lurañatak chʼam churjjestuti. Ukampis yaqh yaqha lurañanakanïkstansa taqeniw Jehová Diosatak valoranïtanjja.

16. ¿Pablon kawkïr ewjjtʼaparjamas sarnaqañasa?

¹⁶ Mayninakampi luratanakas igualayañat sipansa, Pablon ewjjtʼaparjamaw sarnaqañasa.  Jupajj akham sänwa: “Sapa mayniw pachpa luratanakapat amuykiptʼasiñapa, ukhamatwa luratanakaparjam kusisini. Jupajj janiw luratanakapjja yaqhan luratanakapampejj igualayañapäkiti” sasa (Gál. 6:4).

17. ¿Kunjamsa Pablon ewjjtʼaparjam lurañajj yanaptʼistani?

¹⁷ Pablon ewjjtʼaparjam luratanakasat amuykiptʼañäni ukhajja, kunanaksa sum lurañ yattan ukanakwa amuyañäni. Sañäni, inas mä jilïr irpirejj plataformat jan sum arstʼirïkchiti, ukampis predicasajj wali suma yatichirïspawa. Jan ukajj inas mayni jilïr irpirinakat sipans jan sum organiztʼasiñ yatkchiti, ukampis wali munasiri jilïr irpirïspawa, ukatwa jilat kullakanakajj jupamp parltʼañ jan ajjsarayasipkaspati, jan ukajj wali katoqtʼasiri jilatat uñtʼatarakïspawa (Heb. 13:2, 16). Kunanaksa sum lurañ yattan uk sum amuytʼañäni ukhajja, congregacionan yanaptʼaskatasat wal kusisiñäni. Ukatjja, janirakiw kuntï mayni jilat kullakanakajj sum lurañ yatipki ukanakatsa envidiaskañäniti.

18. ¿Kunjamatsa suma yatichirïñ yateqsna?

¹⁸ Congregacionan kunayman lurañanakansa yanaptʼaskstanjja, taqeniw Diosar jukʼamp sum serviñataki, suma yatichirïñatak chʼamachasiñasa. Ukatakejja, Jehová Diosajj markap toqew yatichistu. Sañäni, semanan apaski uka tantachäwinjja, kunjamsa predicacionan jukʼamp suma yatiyirïsna ukwa yatichistu. ¿Uka yatichäwinakamp yanaptʼayasisktanti?

19. ¿Kunas Diosan Reinopat Yatiyirinakataki Escuelar sarañatakejj yanaptʼistaspa?

¹⁹ Yaqha yanaptʼajja, Diosan Reinopat Yatiyirinakataki Escuelawa. Uka escuelajj 23 maranit 65 marankam precursor jilat kullakanakatakiwa. ¿‘Janipuniw uka escuelar sarañ puedkäti’ sasat amuytanjja? Kunanakas uka escuelar sarañ jarkʼistu uk mä listar qellqañat sipansa, kunatsa sarañ muntan ukwa qellqtʼasiñasa. Ukjjarusti uka escuelar sarañatakejja, kunas requisitonak phoqañ yanaptʼistani ukwa qellqtʼasiñasaraki. Jehová Diosan yanaptʼapampi ukhamarak chʼamachasitasampejj kunatï jan lurañjamäki uk lurañäniwa.

20. ¿Kunsa Romanos 12:6-8 textot yateqsna?

²⁰ Pablon uñachtʼäwipat kimsïr yatichäwejja, Romanos 12:6-8 (liytʼañataki) texton qellqatawa. Uka textonjja, ‘sapa maynejj may may lurañanakwa katoqtanjja’ sasaw Pablojj mayamp säna. Ukampis jichha kutinjja, ‘kunanaktï lurañ yatktan ukampejj jilat kullakanakaruw chʼamañchtʼañasa ukhamarak chuymachtʼañasa’ sasaw jukʼamp qhanstayi.

21, 22. ¿Kunatï Robert ukhamarak Felice jilatanakar paskäna ukat kunsa yateqsna?

²¹ Kunas Robert * sat mä jilïr irpirir pasatayna uk uñjañäni. Jilatajj yaqha markan serviskäna ukhaw markapankir Betelan serviñapatak asignapjjäna. Juparojj akham sapjjänwa: “Janiw kuna jan walsa lurktati, janiw uka layku cambiapksmati” sasa. Ukhamsa sapkchïnjja, jilatajj akham siwa: “Walja phajjsinakaw jan kusisitäjjayätti, janis nayra asignacionaj sum phoqkirista ukhamwa amuyasiyäta. Awisajj Betelat sarjjañwa munayäta” sasa. ¿Kunjamatsa jilatajj mayamp kusisitäjjäna? Mä jilïr irpiriw yanaptʼäna, jupar akham sänwa: “Jehová Diosajj kuntï nayra asignacionanakan yatichawaykistu ukajja, jichha asignacionanakan jukʼamp sum yanaptʼañatakiw yanaptʼistu” sasa. Robert jilatajja, nayra asignacionapat lupʼiskakiñat sipansa, jichha asignacionap kunjamsa sum phoqaspa ukatakiw chʼamachasiski.

 ²² Niya ukar uñtasitaw Felice Epíscopo jilatar pasarakïna. Jupampi esposapampejj Galaad Escuelatwa 1956 maran graduasipjjäna, Bolivia markanwa congregacionanak tumptʼirit servipjjarakïna. 1964 maranjja mä wawanïpjjänwa. Felice jilatajj akham siwa: “Asignacionajajj wali munatänwa, ukatwa jaytañajj nanakatak chʼamäna. Mara enterow aynachtʼayäta. Ukampis Jehová Diosan yanaptʼapampejj janiw llakisjjayätti, suma awkïñatakiw chʼamachasjjayäta” sasa. ¿Jumajj Robert ukhamarak Felice jilatanakjamat llakit uñjasta? ¿Congregacionan nayrjam jan lurañanakanëjjasajj aynachtʼatat jikjjatasta? Ukhamächi ukhajja, kunsa Jehová Diosar jukʼamp serviñatak jichhajj lurasma, ukhamarak jilat kullakanakar yanaptʼañatakis lurasma uka toqetwa lupʼiñama, ukhamatwa jukʼamp kusisit jakasïta. Ukhamasti kunanaktï sum lurañ yatktan ukanakamp mayninakar yanaptʼaskakiñäni. Congregacionar yanaptʼasajja, jukʼamp kusisitaw jakasiñäni.

23. 1) ¿Kunatakis tiempo apstʼasiñasa? 2) ¿Kunsa akjjar jutki uka yatichäwin yatjjataskañäni?

²³ Jehová Diosatakejj sapa mayniw wali valoranïtanjja. Jupajj familiap taypinkatasat kusisitäsna ukwa muni. Kunjamsa jilat kullakanakasar yanaptʼsna uka toqet lupʼiñatak tiempo apstʼasiñäni, ukarjam lurañatak chʼamachasirakiñäni ukhajja, Diosan congregacionap taypin yanaptʼaskataswa amuyañäni. Akjjar jutkani uka yatichäwinjja aka jisktʼanakaruw qhanañchaskañäni: ¿Kunjamsa jilat kullakanakasar uñjtanjja? ¿Kunjamsa jupanakar valoranit uñjatas uñachtʼaysna?