1. ¿Jehová Diosan taqe luratanakapat lupʼisajj kunsa jisktʼassna?

JEHOVÁ DIOSAN taqe luratanakapat lupʼisajja, inas Davidjam jikjjatastan, jupajj akham sasaw Diosar mä oracionan jisktʼäna: ‘Kunapachatï nayajj alajjpachanakama, amparanakamamp luratanakam uñjta, jumajj lurkta uka phajjsimpi warawaranakamp uñjta ukhajja, ¿kunarak jaqesti jupat amtasiñamatakisti? ¿Kunarak jaqen yoqapasti jupar cuidañamatakisti?’ sasa (Sal. 8:3, 4). Warawaranakat sipansa wali jiskʼakïtapwa Davidajj amuyasïna, jiwasajj inas ukham amuyasirakstan. Ukhamäkchisa Diosajj jiwasanakat llakisiwa, ukajj wal musparayistu. Ukampis Jehová Diosajja, janiw Adanampita Evampit aleqak llakiskänti, jan ukasti familiaparuw tukuyäna, ukwa uñjañäni.

2. ¿Adanampin Evampin kun lurañapsa Jehová Diosajj munäna?

² Aka oraqenjja, Adanampi Evampiw Jehová Diosan nayrïr wawanakapänjja, Jupasti wali munasiri alajjpachankir Awkipänwa. Familiap taypin mä trabajwa churäna. Ukatwa jupanakar akham säna: ‘Walja wawanakanïpjjam, waljaptapjjam, oraqpach phoqantapjjam, apnaqapjjarakim’ sasa (Gén. 1:28). Wawanakanïpjjaspa, aka oraqsa sum cuidapjjaspa ukwa munäna. Adanampi Evampitï istʼasirïpjjaspäna, kuntï Jehová Diosajj jupanakar maykäna uks lurapjjaspäna ukhajja, jupanakampi wawanakapampejj wiñayatakiw Diosan familiapäpjjaspäna.

3. ¿Jehová Diosajj familiap taypin valorani lugara churasaw Adanampir Evampir jachʼañchäna sasajj kunatsa sissna?

³ Jehová Diosajja, familiap taypin valorani lugara churasaw Adanampir Evampir jachʼañchäna. Diosajj jaqenakar lurkäna ukat parlkasajja, akham sasaw Davidajj Diosar säna: ‘Angelanakat sipansa juparojj mä jukʼa minuswa lurtajja, ukatsti  kʼajkiriruw juparojj tukuytajja, jachʼañcharaktawa’ sasa (Sal. 8:5). Cheqasa, Jehová Diosajj janiw jaqenakarojj angelanakjam luriri, chʼamani, yatiñani ukham lurkistuti (Sal. 103:20). Ukampis wali chʼamani angelanakat ‘mä jukʼa minusakwa’ jaqenakar luristu. Ukajj ¡wali musparkañawa! Jehová Diosajj nayrïr awk taykasar lurkäna ukhajja, suma jakasiñwa churäna.

4. ¿Kunas Adanampir Evampir pasäna, ukat kunanaksa aka yatichäwin yatjjataskañäni?

 ⁴ Adanampi Evampejj Diosar jan istʼapjjatapatwa Jupan familiapäñ aptʼasipjjäna, ukajj wali llakkañawa. Kunjamtï aka yatichäwin yatjjatkañänejja, ukham lurapjjatapajj jan walinakanwa wawanakapar uñjasiyäna. Ukampis Diosajj jupar istʼiri jaqenakajj wiñayatak Jupan wawapäpjjañap munkäna uka amtapjja, janiw mayjtʼaykiti. Jichhajja, kunjamanakatsa Diosajj jaqenakar jachʼañchistu ukwa nayraqat yatjjatañäni. Ukatsti Jupan familiap taypinkañ munatas uñachtʼayañatakejj kunsa lursna ukwa yatjjataskañäni. Tukuyarojja, Diosan wawanakapajj kuna bendicionanaksa wiñayatak aka oraqen katoqapjjani ukwa yatjjataskarakiñäni.

5. Jupar uñtasit jiwasar luratapatjja, ¿kunjamsa Jehová Diosar yuspäratas uñachtʼaysna?

⁵Jupar uñtasit lurasaw jachʼañchistu (Gén. 1:26, 27). Niyakejjay Diosar uñtasit luratästanjja, Jupjam munasirïña, khuyaptʼayasirïña, jan jaytjasirïña, cheqapar uñjirïñ yateqsnawa, uñachtʼayaraksnawa (Sal. 86:15; 145:17). Ukham lurañatak chʼamachastan ukhajja, Diosaruw jachʼañchtan, yuspärataswa uñachtʼayaraktanjja (1 Ped. 1:14-16). Kunatï alajjpachankir Awkisar gustki uk lurtan ukhajj kusisitätanwa. Janiw ukakïkiti, niyakejjay Jupjam chuymani luratästanjja, kunjam jaqëñastï familiap taypin Diosajj munki ukham jaqeruw tuksna.

6. ¿Aka oraqe wakichtʼasajj kunjamsa Jehová Diosajj jaqenakar jachʼañchäna?

⁶Jehová Diosajj mä suma lugarwa jakasiñasatak wakichawayi. Nayrïr jaqer lurañatak walja tiempo faltkipanwa Diosajj aka oraqe jaqenakatak wakichawayi (Job 38:4-6; Jer. 10:12). Niyakejjay Diosajj wali munasiri, wajjtʼasiri ukhamächejja, kusisit jakasiñasatakejj taqe kunwa lurawayi (Sal. 104:14, 15, 24). Diosajj kunanaktï lurkäna ukanakat awisajj lupʼïna ukhajja, ‘ukanakajj wali sumätapwa uñjäna’ (Gén. 1:10, 12, 31). Aka oraqen kuna sumanaktï lurkäna taqe ukanak ‘apnaqapjjañapatak’ churasaw jaqenakar jachʼañchäna (Sal. 8:6). Perfecto jaqenakajj kuna sumanaktï Diosajj lurki ukanak wiñayatak cuidasa kusisitäpjjaspa ukwa Diosajj muni. ¿Uka suma promesat Jehová Diosar yuspärapuntanti?

7. Jaqenakajj kunsa jakäwisampi lurañäni uk jiwaspachpa amtirïtasjja, ¿kunjamsa Josué 24:15 textojj uñachtʼayi?

⁷Kunsa jakäwisampi lurañäni uk sapa mayni amtirwa Diosajj lurawayistu. Uka regalo churatapatjja, kunsa jakäwisampi lurañäni uk jiwaspachpaw amtsna (Josué 24:15 liytʼañataki). Jupar serviñ amttan ukhajj munasiri Diosasajj wal kusisi (Sal. 84:11; Prov. 27:11). Uka regalompejj yaqha suma amtanakaruw puriraksna. Jesusajj kunsa uka suma regalompejj luräna uk uñjañäni.

8. Jesusajj jupapachpaw kuns lurañ amtirïna, ¿kunsa mä kutejj ukampi luräna?

⁸ Jesusajja, jupat llakisiñat sipansa mayninakatwa jukʼamp llakisïna, jiwasajj jupatwa yateqassna. Mä kutejja, Jesusampi apostolonakapampejj wali qaritäpjjänwa, ukatwa mä chʼusa lugarar samartʼir sarjjapjjäna. Ukampis  kawkjarutï sarapkäna ukarojj walja jaqenakaw Jesusan yatichäwinakap istʼañatak jutapjjäna, ukatwa samartʼañ jan puedipkänti. Colerañat sipansa Jesusajj uka jaqenakat sinttʼasïnwa, ukatwa “kunayman toqenakat yatichañ qalltäna” (Mar. 6:30-34). Jesusat yateqasisajj tiemposampi chʼamasampi mayninakar yanaptʼtan ukhajj alajjpachankir Awkisaruw jachʼañchtanjja (Mat. 5:14-16). Ukhamatwa Jupan familiap taypinkañ munatas uñachtʼaytanjja.

9. ¿Kuna suma regalsa Jehová Diosajj jaqenakar churawayi?

⁹Diosajj jaqenakarojj wawanïpjjañapatakiw lurawayi, ukat Jupar munasiña serviña wawanakapar yatichapjjañapatakiw encargawayaraki. Jumatï wawanïsta ukhajja, ¿valoranitti uka suma regalo uñjta? Diosajj musparkañanak lurirsa angelanakar lurawaykchejja, janiw jupanakarojj wawanïpjjañapatak lurawaykiti. Khitinakatï wawanïpki uka awk taykanakajj uka privilegiot yuspärapjjañapawa. ‘Kunjamtï Jupajj munki ukarjam cheqañchasa ewjjtʼasa wawanakapar uywapjjañapatakiw’ Diosajj jupanakar confiyawayi (Efes. 6:4; Deut. 6:5-7; Sal. 127:3). Awk taykanakar yanaptʼañatakejja, Diosan markapajj Bibliat apstʼat qellqatanaka, videonaka, cancionanaka, Internetan utjki uka qellqatanakwa jupanakar churi. Cheqansa, alajjpachankir Awkisampi Jesusampejj wawanakar wal munasipjjatapajj qhanaw amuyasi (Luc. 18:15-17). Awk taykanakajj Jehová Diosar confiyapjje ukat wawanakapar sum cuidañatak chʼamachasipjjaraki ukhajja, Diosajj wal kusisi. Ukham luriri awk taykanakajja, wiñayatak Jehová Diosan familiap taypinkapjjañapatakiw wawanakapar yanaptʼapjje.

10, 11. ¿Yoqapar sacrificiot loqtasajj kunanaksa Diosajj jaqenakatak jikjjatawayi?

¹⁰Mayampi familiap taypinkjjañasatakiw munat Yoqapar Diosajj churawayi. Kunjamtï  párrafo 4 ukan uñjaniwayktanjja, Adanampi Evampejj Jehová Diosan familiap taypinkañ aptʼasipjjänwa, wawanakaparus ukhamarakiw aptʼapjjäna (Rom. 5:12). Adanampi Evampejj jupanak pachpaw Diosar jan istʼañ amtapjjäna, ukatwa Diosan familiap taypit jaqsutäpjjañapajj wakisïna. Ukampis ¿wawanakapampejj kunas pasäna? Diosajj jaqenakar wal munasi, ukatwa Jupar istʼirinakat yaqheparojj familiap taypin katoqañatakejj kunatï wakiski uk lurawayi. ¿Kunjamsa uk lurawayi? Jaqenak layku jiwañapatak mä sapa Yoqap churasaw uk lurawayi (Juan 3:16; Rom. 5:19). Uka sacrificio toqew Jupar jan jitheqtas serviri 144.000 jaqenakarojj wawanakapjam katoqawayi (Rom. 8:15-17; Apoc. 14:1).

¹¹ Diosar istʼasiri walja millón jaqenakaw voluntädap lurasipki. Jupanakajja, waranqa maranak tukuyar qhep qhepa yantʼajj utjkani uka pasatat Jehová Diosan familiapar tukuñwa suyasipki (Sal. 25:14; Rom. 8:20, 21). Uka suytʼäwinïpjjatapatwa Luriri Jehová Diosaparojj “Awkija” sasin jichhatpach jakʼachasipjje (Mat. 6:9). Maysa toqetjja, jaktanipkani ukanakajj kuntï Diosajj jupanakat suyki uk yateqañ puedipjjarakiniwa. Jupanakat khitinakatï Diosar istʼañ amtapkani ukanakajj tiempompejja, Jupan familiap taypinkjjapjjarakiniwa.

12. ¿Kuna jisktʼarus qhanañchaskañäni?

¹² Kunjamtï uñjaniwayktanjja, Jehová Diosajj waljanakwa jaqenakar jachʼañchañatakejj lurawayi. Ajllit cristianonakarojj wawanakaparjamaw katoqjje, jan khitins jaktʼkaña ‘walja jaqenakarusti’, machaq mundon wawanakapar tukupjjañapatakiw mä suytʼäwi churi (Apoc. 7:9). ¿Wiñayataki Jehová Diosan familiap taypinkañ munatas uñachtʼayañatakejj kunsa jichhajj lursna?

13. ¿Jehová Diosan familiap taypinkañatakejj kunsa lurañasa? (Marcos 12:30).

¹³Diosar taqe chuyma servisa Jupar munasitas uñachtʼayapjjañäni (Marcos 12:30 liytʼañataki). Diosajj munasiñat walja regalonakwa churistu. Jukʼamp sumäki uka regalonakapat mayajj Jupar adorañawa. ‘Mandamientonakap phoqasawʼ Diosar munasitas uñachtʼaytanjja (1 Juan 5:3). Uka mandamientonakat mayajja, Jesusajj discipulopar tukupjjañapataki, bautisasipjjañapatak jaqenakar yanaptʼañas maykäna ukawa (Mat. 28:19). Ukatjja, Jesusajj maynit maynikam munasiñaswa mayirakistu (Juan 13:35). Jehová Diosajj khitinakatï mandamientonakap istʼapki ukanakaruw oraqpachankir familiap taypin katoqani (Sal. 15:1, 2).

14. ¿Kunjamsa mayninakar munasitas uñachtʼaysna? (Mateo 9:36-38; Romanos 12:10).

¹⁴Mayninakar munasipjjañäni. Jehová Diosajj kunjam Diosäkiti ukanakatjja, munasirïtapaw jukʼamp jilanki (1 Juan 4:8). Janïr uñtʼkayätan ukhatpachaw Jupajj jiwasar munasjjestäna (1 Juan 4:9, 10). Mayninakar munasisajj Jupatwa yateqasisktanjja (Efes. 5:1). Janïr akapach tukjatäkipan Diosar uñtʼapjjañapatak jaqenakar yanaptʼasaw jupanakar munasitas uñachtʼaysna (Mateo 9:36-38 liytʼañataki). Ukhamatwa Diosan familiap taypinkañatakejj kunsa lurapjjañapa uk yateqapjjaspa. Maynejj bautisasjje ukhajja, jupar munasiskakiñasawa, respetaskakiñasarakiwa (1 Juan 4:20, 21). ¿Kunjamsa uk lursna? Jupar confiyasa. Sañäni, kunatsa ukham luri uk jan entiendktan ukhajja, jan wali amtampis uk lurkaspa ukham janiw amuyañasäkiti. Antisas jupar respetañasawa, jiwasat sipan jilankkaspas ukhamwa amuyañasa (Romanos 12:10 liytʼañataki; Filip. 2:3).

15. ¿Khitinakarus khuyaptʼayasiñampi munasiñampi uñjañasa?

¹⁵Khuyaptʼayasiñampi munasiñampi taqenir uñjapjjañäni. Wiñayataki Diosan familiap taypinkañ munstan ukhajja, Biblian yatichäwinakaparjamaw jakañasa. Sañäni, Jesusajja, enemigonakasarusa taqe jaqenakarus khuyaptʼayasiñampi munasiñampi uñjañaswa yatichäna (Luc. 6:32-36). Awisajj uk lurañajj chʼamjamäspawa. Jiwasatakitï ukhamächi ukhajja, Jesusjam amuyaña, lurañwa yateqañasa. Jehová Diosar istʼañataki, Jesusat yateqasiñataki chʼamachastan ukhajja, wiñayataki familiap taypinkañ munataswa alajjpachankir Awkisar uñachtʼaytanjja.

16. ¿Diosan familiapan sumat uñjatäñapatakejj kunsa lursna?

¹⁶Diosan familiapan sumat uñjatäñapatak yanaptʼapjjañäni. Mä familianjja, sullkanakajj jilïrinakapatwa yateqasiñ yatipjje. Jilïrinakatï Biblian yatichäwinakaparjam lurapjjani ukhajja, sullkanakapatakejj yateqaskayäpjjaniwa. Ukampis jan walinak lurapjjani ukhajja, sullkanakapajj ukhamarakiw jan walinak lurapjjaspa. Jehová Diosan familiapanjja niya ukhamarakiw pasi. Diosar jan jitheqtas serviri mä cristianotï apóstata tukjjani, qʼañu juchanak lurjjani, jan ukajj yaqha ukham jan walinak lurjjani ukhajja, mayni cristianonakajj jupjamarakiw lurjjapjjaspa. Ukham luririnakajja, Diosan familiaparojj jan walitwa uñjayapjje (1 Tes. 4:3-8). Jan walinak luririnakat janipun yateqasiñäniti, alajjpachankir Awkisamp sum apasitassa janipun kunampis apaqayasiñäniti.

17. ¿Kunjam amuyañas jan walïki, ukat kunatsa?

¹⁷Kunanakatï utjkistu ukanakar confiyañat sipans Jehová Diosar confiyapjjañäni. Jiwasatï Jehová Diosan Reinop nayrar uchañäni, mandamientonakap respetañäni ukhajja, Jupajj janiw manqʼañsa, issa, utsa faltaykistaniti, Jupaw uk arsuwayi (Sal. 55:22; Mat. 6:33).  Uka promesar confiytan ukhajja, akapachan utjki uka cosasanakaw jarkʼaqestani, kusisit jakasiñsa churistani sasajj janiw amuyktanti. Diosan voluntädap lurañäni ukhakiw cheqpachapun sumak jikjjatasiñäni (Filip. 4:6, 7). Jiwasatï walja cosasanak alasiñatak qollqenïstan ukhasa, ukanak cuidañataki, apnaqañatak tiemposas chʼamasas utjaniti janicha ukwa amuytʼasiñasa. Akhamwa jisktʼasiñasa: “¿Kunanakatï utjitu ukanakarukit chuym uchtjja?” sasa. Jehová Diosajj familiap taypin trabajwa churistu. Ukhamajj janipun kunampis tiempo apaqayasiñäniti. Jesusajj aka oraqenkkäna ukhajja, mä waynajj kunanakapatï utjkäna ukanakar jukʼamp munasisajj janiw Jesusan discipulopar tukkänti, ukhamïpansti Diosar serviñsa, jutïrin Diosan wawapjam katoqatäñsa aptʼasïnwa (Mar. 10:17-22).

18. ¿Jehová Diosar istʼiri jaqenakajj kuna privilegionaksa kuna bendicionanaksa wiñayatak katoqapjjani?

¹⁸ Istʼasir jaqenakajj jukʼamp sumäki uka privilegio katoqapjjani, ukanakajj akanakawa: Jehová Diosar wiñayatak munasiña ukat adoraña. Khitinakatï aka oraqen jakañ suyasipki ukanakajja, Diosajj jupanakan jakasipjjañapatak aka oraqe wali suma lurtʼawayki uk cuidasajj wali kusisitäpjjaniwa. Akat mä jukʼarojja, Diosan Reinop toqew aka oraqesa, kunanakatï ukan utjki ukanakas qalltan kunjamäkäntï ukham sumar tukuyatäjjani. Adanampi Evampejj Diosan familiap jaytasajj kuna jan walinaktï utjayapki taqe ukanakwa Jesusajj askichani. Jehová Diosajj walja millón jaqenakaruw jaktayani, jupanakarojja Paraisor tukuyata aka oraqen jan usuntasa wiñayatak jakasipjjañapatakiw yanaptʼani (Luc. 23:42, 43). Diosar serviri jaqenakajj perfectöjjapjjani ukhajja, taqeniw Davidajj qellqkäna ukham ‘kʼajkirïpjjani, jachʼañchatäpjjarakini’ (Sal. 8:5).

19. ¿Kunsa amtañasa?

¹⁹ Jumatï jan khitins jaktʼkaña ‘walja jaqenak’ taypinksta ukhajj mä suma suytʼäwinïtawa. Diosajj munastamwa, familiap taypinkasma ukwa munaraki. Ukhamajj Jupar kusisiyañatak walpun chʼamachasim. Diosan promesanakapat sapüru lupʼim, chuymamar katjjasirakim. Alajjpachankir munasiri Awkisar adorañ privilegiomsa, wiñayatak Jupar jachʼañchañ suytʼäwims wali valoranit uñjam.