1, 2. Salmo 34:8 qellqatarjamajja, ¿kunsa Jehová Diosan suma Diosätap yatiñatakejj lurañasa?

JANIPUN manqʼerïktan uka manqʼsa maynejj wajjtʼkistaspa ukham amuytʼañäni. Uka manqʼa uñjañäni, muktʼañäni, kunanakamp phaytʼatasa ukanak yatiñäni, gustiti janicha uk maynir jisktʼañäni ukhajja, kunjam saboranisa uk mä jukʼa amuyañäniwa. Ukampis malltʼasakiw uk yatsna.

² Jiwasatï Biblia liyiñäni, Bibliat apstʼat qellqatanak liyiñäni, kunjamsa Diosajj bendisi uk mayninakar istʼañäni ukhajja, ukhamarakiw Jehová Diosan suma Diosätap yateqañäni. Ukampis Jehová Diosajj kunja suma Diosapunisa ukjja jiwaspach ‘yantʼasakiw’ cheqpachapun yatiñäni (Salmo 34:8 liytʼañataki). Precursoratsa Diosar serviñ munksna ukham amuytʼañäni, ukampis ukatakejj kunatï jakañatak munaski ukampik jakañasaw wakisini. ‘Diosan Reinop nayrar uchapjjäta ukhajj Jehová Diosaw kunatï wakiski uk churapjjätam’ sasin Jesusajj arsuwaykäna uka promesa inas walja kuti liytʼawaystan, ukampis kunjamsa Jehová Diosajj jiwasamp uka promesa phoqe uk inas jan kunapachas uñjawaykstanti (Mat. 6:33). Ukhamäkchisa, Jesusan promesapar confiyasajj jukʼamp predicañatakiw chʼamachastanjja, ukatwa jukʼa qollqempik jakastan, minus horanakak trabajiraktan. Ukham lurasajja, Diosajj cheqapun jiwasar cuidatapwa jiwaspachpa uñjtanjja. Jehová Diosan suma Diosätapsa yantʼaraktanwa.

3. Salmo 16:1, 2 qellqatarjamajja, ¿khitinakas Jehová Diosan bendicionanakap katoqapjje?

³ Jehová Diosajj ‘taqenimpis suma’ Diosawa, jupar jan uñtʼapki ukanakampis ukhamarakiwa (Sal. 145:9; Mat. 5:45). Yamas khitinakatï Jupar munasipki, taqe chuyma servipjjaraki ukanakaruw jukʼamp bendisi (Salmo 16:1, 2 liytʼañataki).  Kuna sumanaktï lurawayki ukanak jichhajj uñjañäni.

4. ¿Jupar jakʼachasirinakarojj kuna sumanaksa Diosajj churistu?

⁴ Kuntï Jehová Diosat yateqktan ukarjam sapa kuti lurtan ukhajja, kunjamsa yanaptʼistu ukwa jakäwisan uñjtanjja. Sañäni, Diosat jukʼamp yateqawaytan ukat Jupar munasjjaraktan ukhajja, kunanakatï Jupar jan gustki ukanak jan lupʼiñataki, ukanak jaytañatakiw Jupajj yanaptʼawayistu (Col. 1:21). Uka qhepat jakäwis Jupar katuyasjjtan, bautisasjjaraktan ukhajja, jukʼampiw sumanak churistu. Sañäni, qʼoma conciencianëjjtanwa, Jupampis sumwa apasjjaraktanjja (1 Ped. 3:21).

5. ¿Jehová Diosajj kunatï sumäki ukanak churirïtap kunjamsa predicacionan uñjawaytanjja?

⁵ Jehová Diosajj kunatï sumäki ukanak churirïtap sapa kutiw predicacionan uñjtanjja. ¿Jumajj ajjsarirïtati? Jehová Diosan servirinakapat waljaniw ukhamäpjje. Diosar janïr uñtʼkasajja, inas mä jan uñtʼat jaqen utapar predikir sarañ janipun pienskchiyätati. Ukampis jichhajj sapa kutiw uk lurtajja. Yamas Jehová Diosan yanaptʼapampejj kusisita predicañwa yateqawaytajja. Yaqha toqenakansa Diosan yanaptʼap uñjaraktawa. Sañäni, predicacionan maynejj toqjchiyätam ukhajj jan colerañatakiw Diosajj yanaptʼawaytamjja. Diosat jukʼamp yatiñ muniri jaqempi parltʼkayäta ukhajja, kuna texto liytʼañas wakisi uk amtañatakiw yanaptʼawayaraktamjja. Ukatsti jaqenakajj jan istʼañ munapkayätam ukhajj jan aynachtʼas predicaskakiñatakiw chʼam churawayaraktamjja (Jer. 20:7-9).

6. Diosajj jukʼamp suma predikirïñatak yatichkistu ukanjja, ¿kunjamsa suma Diosätap uñjtanjja?

⁶ Suma Diosätapjja jukʼamp suma predikirïñatak yatichasaw Jupajj uñachtʼayarakistu (Juan 6:45). Semanan utjki uka tantachäwinjja kunjamsa yatiysna uka toqet suma wakichtʼat videonakwa uñjtanjja, ukat ukarjam predicañatakiw chʼamañcharakistu. Uka ewjjtʼarjam lurañ inas qalltan mä jukʼa ajjsarchiyätan. Ukampis ukarjam prediktan ukhajja, uka ewjjtʼanakajj territoriosan wali yanaptʼkirïtapwa uñjtanjja. Janiw ukakïkiti, tantachäwinakansa asambleanakansa, janipun predikirïktan ukham toqenakat predicañasatakiw chʼamañchapjjarakistu. Ukham predicañ inas mä jukʼa ajjsararakstan ukampis ukham toqenakat predicañatak chʼamachasiñäni ukhajja, Jehová Diosajj bendisistaniwa. Kunjamansay uñjaskchiñänejja, jiwasatï yaqha toqenakat Diosar jukʼamp serviñatak chʼamachasiñäni, Jupar confiyarakiñäni ukhajj kuna sumanaksa churistani ukanakatwa mä qhawqha jichhajj yatjjataskañäni. Ukatsti, kunanak lurañtï amtawayktan ukanak jikjjatañatakejj kunsa lursna ukwa yatjjatarakiñäni.

7. ¿Jehová Diosar serviñatak chʼamachastan ukhajj kuna bendicionsa katoqtanjja?

⁷Jehová Diosaruw jukʼamp jakʼachastanjja. Colombia markan esposapamp serviri, Samuel * sat ancianot parltʼañäni. Nayrajj kuna congregacionankapkäntï ukan kusisitaw precursorat servipjjäna. Ukampis kawkïr congregacionantï jukʼamp yanaptʼajj munaskäna ukan serviñwa munapjjäna. Ukham serviñatakejj waljanakwa jaytapjjäna. Samuel jilatajj akham siwa: “Mateo 6:33 textorjam lurañwa amtapjjta, ukatwa kunatï jan wakiskäna ukanak jan aljjapjjayätti. Ukampis jakasipkayäta uka uta jaytañaw jukʼamp chʼamäna, uka utajj kunjamtï munapkayäta ukham lurtʼatänwa, janirakiw utats manupkayätti” sasa. Machaq asignacionapanjja, nayrat sipansa  jukʼa qollqekiw jakasiñatakejj munasïna. Jilatajj akham saskakiwa: “Kunjamsa Jehová Diosajj yanaptʼapjjetu oracionanakajsa istʼapjjetu ukwa uñjapjjta. Jupajj nanakar sumat uñjatapa munasitapwa uñjapjjarakta, janipuniw ukham uñjapjjerïkti” sasa. ¿Jumajj Diosar jukʼamp serviñ puedirakismati? Ukham luräta ukhajja, Jehová Diosar jukʼampiw jakʼachasïta, Jupajj janiw kuns faltaykätamti, jan ukat pächasimti (Sal. 18:25).

8. ¿Kunsa Iván jilatampita Viktoria esposapampit yateqta?

⁸Diosar servisajj kusisitätanwa. Iván jilatampita Viktoria esposapampit parltʼañäni, jupanakajj Kirguistán markanwa precursorat servisipki. Kunatï wakiski ukampik jakañwa amtapjjäna, ukhamat kuna asignacionantï yanapajj munaskaspa ukan serviñataki, ukanakat mayajj construccionänwa. Jilatajj akham siwa: “Sapa proyectonwa taqe chuyma trabajipjjayäta. Jaypʼurojj qaritäpkchiyätsa Diosatak wal trabajipjjatajat wali kusisitäpjjayätwa. Ukan suma amigonaka, kunayman suma experiencianak jikjjatawayapkta ukanakat wali kusisitäpjjtwa” sasa (Mar. 10:29, 30).

9. ¿Jan walin uñjaskasas kunsa mä kullakajj jukʼamp predicañatak luri, ukham lurasajj kunsa jikjjati?

⁹ Jan walinakan uñjaskasasa, Jehová Diosar servisajj kusisitäsnawa. Sañäni, África Occidental cheqan jakasiri Miriam sat edadani viuda kullakajj doctoratwa trabajïna. Jubilasjjäna uka qhepatjja precursoräjjänwa. Kullakajj artritis usuniwa, ukatwa utat uta predicki ukhajj mä horaki aguanti. Ukampis carritompi predicasajj jukʼamp horanakwa aguanti. Kullakajj walja revisitanakaniwa, waljaniruw Bibliat yatichaskaraki, yaqheparojj telefonot yatichi. ¿Kunas Diosatak jukʼamp lurañ munañatak yanaptʼäna? Jupajj akham siwa: “Jehová Diosarusa Jesucristorus wal munasta. Qhawqtï Jehová Diosatak lurañ puedkirista ukham lurañatakiw Jupar sapa kuti mayista” sasa (Mat. 22:36, 37).

10. 1 Pedro 5:10 textorjamajja, ¿Jehová Diosar jukʼamp serviñatak chʼamachasirinakajj kunsa Jupat katoqapjje?

¹⁰Jehová Diosaw serviñasatakejj jukʼamp yatichistu. Mauricio sat markan precursorat serviri, Kenny sat jilatajja, ukajj cheqäskapunitapwa uñjäna. Bibliat yatjjatjjasajja universidad jaytjjänwa, bautisasisasti precursorat serviñwa qalltäna. Jupajj akham siwa: “Isaías profetjamäñatakiw chʼamachasta, jupajj akham sänwa: ‘¡Nayajj akankasktwa! ¡Nayar khitita!’” sasa (Is. 6:8). Kenny jilatajj construccionan walja proyectonakanwa trabajïna, kuna artï jiskʼatpach parlkäna uka arur Bibliat apstʼat qellqatanak traduciñanwa yanaptʼarakïna. Jilatajj akham saskakiwa: “Asignacionanakaj phoqañatakejj kun yatiñatejj wakiskäna uk yatichapjjetänwa” sasa. Janiw kunjamsa trabajop lurañapa ukak yateqkänti. Jilatajj akham sarakiwa: “Kunanaksa jan lurañ puedkta ukanak amuyasiñwa yateqawayta, Jehová Diosar serviñatakejj kunjam jaqëñatakis chʼamachasiñaja ukwa yateqawayarakta” sasa (1 Pedro 5:10 liytʼañataki). Jehová Diosampi jukʼamp yatichayasiñatakejj inas jumajj jakäwim mayjtʼayarakchisma.

11. ¿Kunsa jukʼamp predicañatakejj Corea del Sur markankir yaqhep kullakanakajj lurapjjäna, ukham lurasajj kunsa jikjjatapjjäna? (Nayrïr paginankir dibujo uñjjattʼäta).

¹¹ Walja maranak Jehová Diosar servisipki ukanakas machaq asignacionanakan servisajj Diosamp yatichatäñ munapjjarakiwa. COVID-19 usu utjipanjja, Corea del Sur markankir mä congregacionan ancianonakajj akham sasaw qellqapjjäna: “Yaqhep jilat kullakanakajj usutätap laykojj jukʼakwa predikir nayrajj mistupjjäna, ukampis jichhajja videoconferencia toqejj walja horanakwa predikjjapjje.  80 jila marani kimsa kullakanakajj tableta jan ukajj celulara apnaqañwa yateqapjje, jichhajja niya sapüruw predicapjje” sasa (Sal. 92:14, 15). ¿Jehová Diosar jukʼamp serviñ munasmati, ukhamat Jupajj suma Diosätap jukʼamp uñjañataki? Akjjar yatjjataskañäni ukanakaw kunanaktï amtawayktan ukanak jikjjatañatak yanaptʼistani.

12. ¿Jupar confiyirinakarojj kunanak churañsa Jehová Diosajj arsuwayi?

¹²Jehová Diosar confiyañwa yateqañasa. Jiwasatï Jupar confiyañäni ukat kunatï sumäki uk churarakiñäni ukhajja, walja bendicionanakwa churistani, Jupaw uk arsuwayi (Mal. 3:10). Colombia markankiri, Fabiola sat mä kullakajja jupapachpaw uk phoqasir uñjawayi. Bautisasjjäna uka qhepatjja, precursora regularat serviñwa munäna, ukampis jupaw familiapar manteniñatak qollq jila apanirïna. Ukhamasti, kunanakatï jubilasiñatak mayiskäna uk phoqjjäna ukhajja, Jehová Diosaruw yanaptʼa wal mayisïna. Jupajj akham siwa: “Jubilacionat churapki uka qollq katoqañatakejj walja tiempwa jaqenakajj suyapjjeri, ukampis nayarojj mä phajjsi pasatat churjjapjjakitänwa. Ukajj janiw creyiñjamäkänti” sasa. Pä phajjsi pasatatjja, precursorat serviñwa qalltäna. Jichhajj 70 jila maranëjjewa, 20 jila maranakaw precursorat serviski. Uka maranakanjja 8 jaqenakaruw bautisasiñapatak yanaptʼawayi. Kullakajj akham saskakiwa: “Awisajj jan chʼamanjamaw jikjjatasta, ukampis Jehová Diosaw precursorjam sapüru serviskakiñatak yanaptʼawayitu” sasa.

13, 14. ¿Khitinakan sarnaqäwinakapas Jehová Diosar jukʼamp confiyañataki Jupar jukʼamp serviñatak yanaptʼistaspa?

 ¹³Jehová Diosar confiyapkäna ukanakatwa yateqasiñasa. Jehová Diosar jukʼamp serviñatak wal chʼamachasipkäna uka sarnaqäwinakat Biblian qellqatajj waljaw utji. Jupanakajj Diosar confiyapjjatap uñachtʼayañatak mä kun lurañ amtawayapkäna uka qhepatakwa jila parterojj Jehová Diosajj suma bendicionanak churäna. Sañäni, Abrahanajj ‘janis kawkir sarañapsa yatkchïnjja’ utap jaytasin sarjjäna uka qhepatakwa Diosajj jupar bendisïna (Heb. 11:8). Jacob chachajja, mä angelamp nuwasïna uka qhepatakwa mä suma bendición katoqäna (Gén. 32:24-30). Israelitanakajj Suma Oraqer mantañampïpkäna ukhajja, sacerdotenakajj umar taktʼapkäna ukhakiw israelitanakajj Jordán jachʼa jawira paskatañ puedipjjäna (Jos. 3:14-16).

¹⁴ Jichha tiempon Diosar jukʼamp serviñatak chʼamachasipjje, jupar confiyapjje uka jilat kullakanakan sarnaqäwinakapats yateqasiraksnawa. Sañäni, Payton jilatampiru Diana esposapampirojja, Diosar jukʼamp serviñatak chʼamachasiwayapki uka jilat kullakanakan experiencianakap liytʼañaw wal gusti, ukanakat mayajja, “Se ofrecieron para ayudar” * sat qellqatanakajj Internetan jw.org cheqan utjki ukawa. Jilatajj akham siwa: “Ukanak liytʼasajja, maynirus wali suma manqʼa manqtʼasiskir uñjapkirista ukhamaw jikjjatasipjjerïta. Jukʼamp liytʼasajja jukʼampirakiw Jehová Diosan suma Diosätap uñjañsa yantʼañsa munapjjayäta” sasa. Tiempompejja uka chacha warmejj kawkjantï yanaptʼajj munaskäna ukaruw servir sarjjapjjäna. ¿“Se ofrecieron para ayudar” sat cheqankir qellqatanak liytʼawaytati? ¿Predicación en lugares apartados: Australia ukat Predicación en lugares apartados: Irlanda sat videonakajj Internetan jw.org cheqan utjki ukanak uñtawaytati? Taqe ukanakaw Diosar jukʼamp serviñatak yanaptʼistaspa.

15. ¿Diosar serviñ nayrar uchirinakamp chikachasiñajj kunjamsa yanaptʼistaspa?

¹⁵Diosar serviña nayrar uchirinakampiw chikachasiñasa. Janipun manqʼerïktan uka manqʼa manqʼañajj jan chʼamäñapatakejja, khitinakarutï uka manqʼajj gustki ukanakampiw chikachasiñasa. Diosar serviñ nayrar uchirinakamp chikachasiñäni ukhajja kunayman toqet Jehová Diosar jukʼamp serviñajj ukhamarakiw jiwasatak jan chʼamäkaniti. Ukaw Kent jilatampiru Verónica esposapampir pasäna. Jilatajj akham siwa: “Amigonakajasa familianakajasa kunayman toqet Diosar jukʼamp servipjjañajatakiw chʼamañchapjjetäna. Diosan Reinop nayrar uchapkäna uka jilat kullakanakamp chikachasiñaw kunayman toqet Diosar serviñ jan ajjsarañatak yanaptʼapjjetäna” sasa. Jichhajja panpachaniw precursor especialat Serbia sat markan servisipki.

16. Lucas 12:16-21 texton mä uñachtʼäwit parlki ukarjamajja, ¿kunanakatï gustkistu ukanak jaytañatakejj kunatsa dispuestokïñasa?

¹⁶Kunanakatï gustkistu ukanakwa Diosar jukʼamp serviñatakejj jaytañasa. Jehová Diosar kusisiyañatakejja janiw taqe kunanakatï gustkistu ukanak jaytañapunejj wakiskiti (Ecl. 5:19, 20). Kunanakatï gustkistu ukanak jan jaytañ layku Diosar jukʼamp jan serviñ munksna ukhajja, Jesusajj mä uñachtʼäwin parlkäna uka jaqjamaw pantjassna, jupajj suma cosasanak jikjjatañatakejj wal trabajïna, ukampis Diosat armasjjänwa (Lucas 12:16-21 liytʼañataki). Francia markankiri, Christian jilatajj akham siwa: “Janiw Jehová Diosatakisa  familiajatakisa chʼamsa tiempsa apsuskayätti” sasa. Esposapampejj precursorat serviñwa amtapjjäna, ukampis ukatakejj trabajonakapwa jaytapjjäna. Gastonakapatakejja, utanaka, oficinanaka qʼomachasaw trabajipjjäna, jukʼa qollqempik kusisita jakasiñwa yateqapjjarakïna. ¿Uka sacrificionak lurapjjatapat kusisitäpjjeti? Jilatajj akham saskakiwa: “Predicasajj jukʼamp kusisitäpjjtwa, Bibliat yateqerinakarusa revisitanakarus Diosat jukʼamp yateqer uñjasajj wali kusisitäpjjaraktwa” sasa.

17. ¿Kunas mä kullakarojj yaqha toqenakat predicañatak yanaptʼäna?

¹⁷Yaqha toqenakat predicañatakiw chʼamachasiñasa (Hech. 17:16, 17; 20:20, 21). Estados Unidos markankiri, Shirley sat precursorajja, COVID-19 usu utjatapat yaqha toqenakatwa predicäna. Qalltanjja teléfono toqe predicañ ajjsaränwa. Ukampis, superintendente de circuitojj congregacionar visitʼkäna ukhajja, teléfono toqe predicañwa yatichapjjäna, ukat aksarojj sapa kutiw teléfono toqe predikjjäna. Kullakajj akham siwa: “Qalltanjja wal ajjsarayasiyäta, ukampis jichhajj wal gustjjetu. Utat uta predickayätan ukat sipansa jukʼamp jaqenakampiw parltʼapjjta” sasa.

18. ¿Kuna jan walinakatï Diosar jukʼamp serviñat jarkʼistu ukanakar saykatañatakejj kunas yanaptʼistaspa?

¹⁸Mä kun lurañwa amtañasa ukat uk phoqañatakiw chʼamachasiñasa. Jan walinakan uñjasktan ukhajja Jehová Diosaruw yanaptʼa mayistanjja, ukat kunjamsa uka jan walirojj saykatsna ukwa amuytʼasiraktanjja (Prov. 3:21). Sonia sat kullakajja, Europa cheqan romaní aru parlapki uka gruponwa precursora regularat serviski, jupajj akham siwa: “Kuntï lurañ munkta uk mä papelaruw qellqtʼasta ukat qhanaruw ucharakta. Mesajanjja pä thaki pasjasir mä dibujow utjitu. Mä amtar puriñajäki ukhajja, uka dibujwa uñjjatʼta, ukasti uka amtajajj yanaptʼitaniti janicha uk amuytʼasiñatakiw yanaptʼitu” sasa. Sonia kullakajj jan walinakan uñjaski ukhajj jan sinti llakisiñatakiw chʼamachasi. Jupajj akham saskakiwa: “Kunjämanakantï jakäwijan uñjaskta ukhajja, kuntï amtkta uk phoqañatakejj mä perqjamaw jarkʼitaspa jan ukajj mä puentjamaw jikjjatañatak yanaptʼitaspa, ukampis mä perqarjamati jan ukajj mä puenterjamacha uñjäjja uk nayaw amtjjañajajja” sasa.

19. ¿Kuna bendicionanaktï Jehová Diosajj churkistu ukanakat yuspäratas kunjamsa uñachtʼaysna?

¹⁹ Jehová Diosajj kunayman toqetwa bendisistu. Jupar jachʼañchañasatak wal chʼamachasisaw Diosar yuspäratas uñachtʼaysna (Heb. 13:15). Jehová Diosar jukʼamp serviñatakejj kunaymaninakwa lursna, ukham lurañäni ukhajj jukʼampwa Jupajj bendisistani. Ukhamajja, Jehová Diosan suma Diosätap uñjañataki sapüru yantʼañäni. Ukham lurañäni ukhajj Jesusjamarakiw akham sañäni: ‘Manqʼajajj khitankitu ukan munañap lurañawa, kuna lurañtï jupajj churkitu uk tukuyañajarakiwa’ sasa (Juan 4:34).