1. ¿Kuna jan walinsa José chachajj uñjasïna, ukampis kunsa luräna?

 JACOB chachan José yoqapajj mä jan walinwa uñjasïna. Mä warmiw juparojj “iktʼaskañäni” sasin säna. Uka warmejj Potifar patronapan esposapäkchïnsa, Joseajj janiw jupar istʼkänti. ¿Kunatsa Joseajj uka warmimp jan ikintaskäna? sasin inas maynejj jisktʼaschispa. Potifar chachajj janiw ukankkänti, Joseajj utapan trabajir esclavönwa. Janiw ukakïkiti, Josean uka warmimp jan ikintasiñ munatapatjja, uka warmejj jupar jan waltʼayaspänwa. Uka warmejj sapa kutis jupamp ikintasiñap maykchïnjja, janiw Joseajj munkänti. Kunatsa jan munkäna uka toqet jupajj akham sänwa: “¿Kunjamarak nayajj uka jan wal luririststi, ukat Dios contra juch lurarakiriststi?” sasa (Gén. 39:7-12).

2. ¿Joseajj kunjamatsa adulterio juchajj Jehová Diosatak jan walïtap yatïna?

² ¿Kunjamatsa adulterio jucha lurañajj Diosatak jan walïtap Joseajj yatïna? Moisesan Leyip qellqasiñapatakejj mä 200 maranakaw faltaskäna, ukan wali qhanwa akham sisjjäna: “Janiw adulterio jucha lurañamäkiti” sasa (Éx. 20:14). Ukampis kuntï Joseajj Jehová Diosat yatkäna ukaw Diosatakejj qʼañu jucha lurañajj jan walïtap amuyañatak yanaptʼäna. Jehová Diosajj chacha warmitakiw matrimonio uttʼayäna, uk Joseajj yatïnwa. Sara abuelitapampi pä reyinakajj ikintasiñ munapkäna ukhajja, Diosajj jupar pä kutiw jarkʼaqäna, uk inas Joseajj yatchïna. Kunjamsa Jehová Diosajj Isaac chachan Rebeca esposaparojj jarkʼaqäna uk inas Joseajj amtarakchïna (Gén. 2:24; 12:14-20; 20:2-7; 26:6-11). Taqe ukanakat lupʼisajja, kunatï Jehová Diosatakejj walïki jan walïkaraki ukanak amuyänwa. Niyakejjay Jehová Diosar wal munaschïnjja, cheqap leyinakapar munasïnwa, respetañwa amtarakïna.

3. ¿Kunanakatsa aka yatichäwin yatjjataskañäni?

 ³ ¿Kunatï Jehová Diosatakejj cheqapäki ukar jumajj munastati? Munaspachätawa. Ukampis taqeniw pantjasirïtanjja, jiwasatï jan amuyaskañäni ukhajja, kunatï aka mundotakejj walïki jan walïkaraki ukampejj facilakwa apayassna (Is. 5:20; Rom. 12:2). Aka yatichäwinjja, kunatï Jehová Diosatakejj cheqapäki ukajj kunasa, ukat kunatsa ukar munasiñajj yanaptʼistu ukwa yatjjataskañäni, ukatjja Jehová Diosan leyinakapar jukʼamp munasiñatakejj kunsa lursna ukwa kimsa toqet yatjjataskarakiñäni.

4. ¿Kunatï cheqapäki uka toqet kunsa walja jaqenakajj amuyapjje?

⁴ Jesusajj aka oraqenkkäna ukhajja, religión pʼeqtʼirinakajj cheqapar sarnaqerïpkaspas ukhamwa amuyasipjjäna. Ukampis Jesusajja, mayninakar jan munasiñamp uñjapjjatapata, kunatï walïki jan walïki ukanak jupanak pachpa amtapjjatapat jupanakar juchañchänwa (Ecl. 7:16; Luc. 16:15). Jichha tiemponjja, jaqenakajj jupanakjamäpjjarakiwa. Janis kuna jan walsa lurapkaspa ukhamwa jupanakajj amuyapjje. Mayninakat jilankapkaspas ukhamwa amuyasipjje, mayninakats jan wal parlapjjaraki. Ukham jaqenakarojj Jehová Diosajj wal uñisi, ukham jaqëñajj janirakiw kunatï Jehová Diosatak cheqapäki ukarjamäkiti.

5. ¿Bibliarjamajj kunatï cheqapäki ukajj kamsañsa muni? Uk qhanañchtʼam.

⁵ Kunatï cheqapäki ukarjam lurañajj wali askiwa, mä arunjja kunatï cheqapäki ukarjam lurañajj kunatï Jehová Diosatakejj walïki ukarjam luraña sañwa muni. “Cheqapa” jan ukajj “justicia” sasin Biblian traducisiwayki uka arunakajja, Jehová Diosan leyinakaparjam jakaña sañwa muni. Sañäni, Jehová Diosajj comerciantenakarojj akham sasaw säna: “Pesanakamajj phoqata jan mayjtʼayata ukhamäñapawa” sasa (Deut. 25:15). Ukhamajja mä cristianotï Jehová Dios nayraqatan cheqaparjam sarnaqerit uñjatäñ munchi ukhajja, taqe negocionakapanwa honradöñapa. Kunatï Diosatakejj cheqapäki ukar munasir jaqejja, janiw mayninakar jan cheqaparjam uñjasiñap munkiti. Jehová Diosar taqe kunan kusisiyañatakejja, kuntï Diosajj amuyki ukarjamapuniw kuns lurañ amti (Col. 1:10).

6. ¿Kunatï Jehová Diosatakejj walïki jan walïkaraki ukarojj kunatsa confiysna? (Isaías 55:8, 9).

⁶ Biblianjja Jehová Diosaw ‘justicia utjayirejja’ sasaw qhanañchi. Ukajj ¿kamsañsa muni? Kunatï cheqapäki ukajja, mä arunjja cheqpach justiciajj Diosatwa juti (Jer. 50:7). Niyakejjay Diosajj Luririsächejja, jupakiw kunatï walïki jan walïkaraki ukanak sañatakejj derechoni. Jiwasajj pantjasiri juchachasiri ukhamätanwa, ukatwa kunatï walïki jan walïkaraki uk jan sum yatksnati. Ukampis Jehová Diosajj perfectowa, ukatwa kunatï walïki jan walïkaraki uk sum yati (Prov. 14:12; Isaías 55:8, 9 liytʼäta). Ukampis ¿cheqap leyinakaparjam sarnaqañ puedsnati? Jïsa, kuna laykutejj ‘jupar uñtasit’ luratätanwa (Gén. 1:27). Cheqap leyinakaparjam lurañsa wal munaraktanjja. Alajjpachankir Awkisar wal munasitas laykuw jupat yateqasiñatakejj chʼamachastanjja (Efes. 5:1).

7. ¿Kunatsa uttʼayat leyinakajj utjañapa? Uk qhanañchtʼam.

⁷ Kunatï walïki jan walïkaraki uka toqet Jehová Diosajj leyinak churkistu ukar taqe chuym istʼtan ukhajja, sumakiw jakastanjja. Kunatsa ukham sistan uk amuytʼañäni. Sapa bancotejj qollqejj qhawqha valoranïnisa uk amtaspa ukhajja, janiw walïkaspati. Doctoranakasa jan ukajj enfermeranakas munañaparjamak hospitalan qollapjjaspa ukhajja, yaqhep usutanakajj jiwapjjaspawa. Cheqansa uttʼayat leyinakar istʼañajj yanaptʼistuwa. Jehová Diosan leyinakapampejj ukhamarakiwa, ukanakajj jiwasan askisatakiwa.

8. ¿Kunatï Diosatakejj cheqapäki ukar munasirinakajj kuna bendicionanaksa katoqapjjani?

 ⁸ Leyinakapar respetañatak chʼamachasipki ukanakarojj Jehová Diosajj bendisiwa. Jupajj akham sasaw arsuwayi: “Cheqap sarnaqer jaqenakaw oraq katoqapjjani, wiñayatakiw ukan jakapjjarakini” sasa (Sal. 37:29). Diosan leyinakaparjam taqeni sarnaqjjapjjani ukhajj ¿kunjamakis jakasiñäni uk amuyasmati? Kusisitaw jakasiñäni, sumankañana, mayachtʼata ukhamaw jakasirakiñäni. Jehová Diosajj uka bendicionanak katoqañamwa muni. Ukhamasti kunatï Diosatakejj cheqapäki ukar munasiñatakejj walja razonanakaw utjistu. ¿Kunatï cheqapäki ukar jukʼamp munasiñatakejj kunampsa lursna? Uk kimsa toqet uñjañäni.

9. ¿Kunatï cheqapäki ukar munasiñatakejj kunas yanaptʼistani?

⁹ Maya: Khititï leyinak churkistu ukaruw munasiñasa. Kunatï cheqapäki ukar munasiñ munstan ukhajja, kunatï walïki jan walïkaraki uka toqet leyinak churkistu uka Diosaruw jukʼamp munasiñasa. Jehová Diosar jukʼamp munasiñäni ukhajja, jukʼampirakiw cheqap leyinakaparjam sarnaqañ munañäni. Adanampit Evampit amuytʼañäni. Jupanakatï Jehová Diosar munasipjjaspäna ukhajja, jupar istʼasapuniw sarnaqapjjaspäna (Gén. 3:1-6, 16-19).

10. ¿Kunjamsa Jehová Diosajj amuyi uk sum amuyañatakejj kunsa Abrahanajj luräna?

¹⁰ Janiw Adán ukat Eva chacha warmjam lurañ munktanti. Jupanakjam jan pantjasiñatakejj sapürutjamaw Jehová Diosar jukʼamp sum uñtʼañasa, kunja suma chuymanisa uk valoranitwa uñjañasa, kunjamsa jupajj amuyi uk entiendiñatakiw chʼamachasiñasaraki. Ukhamtï lurañänejja, jukʼampiw Jehová Diosar munasiñäni. Diosar wal munasir Abrahán chachat parltʼañäni. Kuntï Diosajj lurañ amtkäna uk janis sum amuykchïnjja, janiw Dios contra saytʼaskänti, jan ukasti Diosar jukʼamp sum uñtʼañatakiw wal chʼamachasïna. Jehová Diosajj Sodoma, Gomorra markanak tʼunjañ amtatap Abrahanajj yatïna ukhajja, jan wali jaqenakarojj cheqapar sarnaqer jaqenakamp chikaw “oraqpachan Juezapajj” tʼunjpachäni sasaw qalltan ajjsarayasïna. Ukampis Diosajj janipuniw uk lurkaspati sasaw amuyjjäna. Ukatwa humilde chuymamp Jehová Diosar jisktʼäna. Diosasti pacienciampiw jisktʼanakapar qhanañchäna. Jehová Diosamp parlañ tukuyjjäna ukhajja, Diosajj taqe jaqenakan chuymanakap sum yatitapa, jan wali jaqenakarojj cheqapar sarnaqer jaqenakamp chik janipun castiguirïtapwa Abrahanajj amuyäna (Gén. 18:20-32).

11. ¿Kunjamsa Abrahanajj Jehová Diosar munasitapsa jupar confiyatapsa uñachtʼayäna?

¹¹ Sodoma, Gomorra markanakat Jehová Diosamp parlkäna ukajj Abrahanan chuymaparuw purtʼäna. Nayrat sipans Awkipar jukʼamp munasiñapataki, respetañapatakiw yanaptʼarakïna. Mä qhawqha maranakatjja, Abrahanajj mä jan walinwa uñjasïna. Ukaw Diosar qhawqsa confiyäna uk yantʼäna. Jehová Diosajj Isaac munat yoqapar sacrificiot loqtañapatakiw mayïna. Niyakejjay Abrahanajj Jehová Diosar jukʼamp sum uñtʼjjchïnjja, janiw Diosar kunsa jisktʼjjänti, antisas kun lurañaptï Diosajj maykäna uk lurañatakiw wakichtʼasïna. Ukampis ukanak lurañajj jupatakejj chʼamakïpachänwa. Kuntï Diosat yateqkäna uka toqetwa lupʼpachäna, Jehová Diosajj janiw kunatï jan cheqapäki uk lurkaspati, ni qhoru chuymampis kuns lurkaspati, uk Abrahanajj sum yatïna. Isaac munat yoqajar Diosajj jaktayaspawa sasaw jupajj amuyäna, ukwa apóstol Pablojj qhanañchäna (Heb. 11:17-19). Abrahanan ukham amuyatapajj walikïskänwa, kuna laykutejj Jehová Diosajj Isaac yoqamajj mä jachʼa markan awkipäniwa sasaw Abrahanar mä promesa arsuwayjjäna. Ukampis uka tiempotakejj  janïraw Isaac chachajj wawanakanïkänti. Abrahanajj Jehová Diosar munasïnwa, ukatwa cheqaparupuniw Diosajj kuns lurani sasin amuyäna. Kuntï Diosajj maykäna ukajj jupatak wali chʼamäkchïnsa, taqe chuyma confiyasaw jupar istʼäna (Gén. 22:1-12).

12. ¿Kunsa Abrahán chachat yateqassna? (Salmo 73:28).

¹² ¿Kunsa Abrahanat yateqassna? Sapürutjamaw Jehová Diosar jukʼamp sum uñtʼañasa. Ukhamtï lurañänejja, juparojj jakʼachasiñäniwa, jukʼampiw munasirakiñäni (Salmo 73:28 liytʼäta). Ukatjja Diosan amuyuparjam lurañatakejj concienciasajj wakichtʼatarakïniwa (Heb. 5:14). Ukhamatwa maynejj mä jan wal lurañasatak yantʼistani ukhajj “janiwa” sañäni. Kunatï Jehová Diosan chuymap ustʼaykaspa, jupamp sum apasitas aptʼasiykistaspa ukanak lurañs janiw mä jukʼsa pienskañäniti. ¿Kunatï Jehová Diosatakejj cheqapäki ukar munasitas uñachtʼayañatakejj kunampsa lursna?

13. ¿Kunatï cheqapäki uk jikjjatañatakejj kunsa lurañasa? (Proverbios 15:9).

¹³ Paya: Kunatï cheqapäki ukar jukʼamp munasiñatakejj sapüruw chʼamachasiñasa. Cuerposajj chʼamanïñapatakejj sapa kutiw ejercicio lurañasa. Ukhamarakiw Jehová Diosan cheqap leyinakapar jukʼamp munasiñatakejj sapüru wal chʼamachasiñasa. Diosajj qhawqtï lurirjamäktan uk amuyiwa, janiw ukat jukʼamp lurañas maykistuti (Sal. 103:14). Jupajja “justicia utjañapatak wal chʼamachaski ukarojj munasiwa” (Proverbios 15:9 liytʼäta). Jehová Diosar jukʼamp serviñ amttan ukhajja, uk jikjjatañkamajj wal chʼamachastanjja. Kunatï cheqapäki uk jikjjatañatakejj ukhamarakiw chʼamachastanjja. Diosasti pacienciampiw kunatï cheqapäki ukar jukʼamp munasiñatak yanaptʼistani, mä arunjja sapürutjam jukʼamp mejorañatakiw yanaptʼistani (Sal. 84:5, 7).

14. ¿‘Cheqapar sarnaqañ pecho jarkʼaqasiñ chalecojj’ kunamp sasisa, kunatsa uk uchtʼasitäñajj wali importantejja?

¹⁴ Jehová Diosajja, kunatï cheqapäki uk lurañajj janiw chʼamäkiti sasaw munasiñamp amtayistu (1 Juan 5:3). Kunatï cheqapäki uk lurañajj jarkʼaqestuwa, sapüruw ukamp jarkʼaqatäñ necesittanjja. Apóstol Pablojj mä armadurat  parlkäna ukat amuytʼañäni (Efes. 6:14-18). ¿Kunas mä cristianon chuymap jarkʼaqe? ‘Cheqapar sarnaqañ pecho jarkʼaqasiñ chalecow’ jarkʼaqe, ukajj Diosan cheqap leyinakapamp sasiwa. Kunjamtï pecho jarkʼaqasiñ chalecojj chuym jarkʼaqkejja, ukhamarakiw Diosan leyinakapajj chuymas jarkʼaqe, mä arunjja chuyma manqhasan kunjamätansa ukwa jarkʼaqe. Ukatwa cheqapar sarnaqañ pecho jarkʼaqasiñ chalecomp uchtʼasitäñajj wali importantejja (Prov. 4:23).

15. ¿Kunjamsa cheqapar sarnaqañ pecho jarkʼaqasiñ chaleco uchtʼastanjja?

¹⁵ ¿Kunjamsa cheqapar sarnaqañ pecho jarkʼaqasiñ chaleco uchtʼastanjja? Diosan leyinakaparjam sapüru kuns lurañ amtasaw uk uchtʼastanjja. Kuna toqetsa parlañäni, kuna musicsa ischʼukiñäni, kuna kusistʼañanaksa uñtañäni, kuna libronaksa liyiñäni ukanak janïr amtkasajj akham sasaw jisktʼasiñasa: “¿Ukanakajj kuna amuyunaksa chuymajan utjayani? ¿Jehová Diosar kusisiyaniti? ¿Kunanakatï Diosatakejj jan walïki ukanak lurañ munañaruch apitani, sañäni qʼañu jucharu, nuwasiñaru, nayatakik taqe kuns munañaru, naya pachpatak llakisiñaruch apañ munitani?” sasa (Filip. 4:8). Kunatï Jehová Diosatakejj walïki ukarjam taqe kuns lurañäni ukhajja, kunanakatï jan walïki ukanakat chuymasajj jarkʼaqatäniwa.

16, 17. Jehová Diosan leyinakapar wiñayatak istʼañ puedsnawa, ¿kunjamsa Isaías 48:18 textojj uk uñachtʼayi?

¹⁶ ¿Janiw sapürusa ni sapa marasa Jehová Diosan cheqap leyinakaparjam sarnaqañ puedkäti sasin llakistan ukhajj kamachsnasa? Kuna toqetsa Diosajj Isaías 48:18 (liytʼäta) texton parläna uk amuytʼañäni. Justiciasajja, mä arun kunatï cheqapäki ukajj ‘lamar qotan oladanakapjamäspawa’ sasaw Jehová Diosajj arsüna. Lamar qota thiyansa oladanak mayat maya jutir uñjksna ukham amuytʼañäni. Uk uñchʼukkasajja, ¿oladanakajj janiw mä urojj utj-jjaniti sasin sissnati? Janiwa. Wali nayra maranakatpachaw oladanakajj qota thiyar puriski, jutïrinsa puriskakiniwa, janiw ukat payachasktanti.

¹⁷ ¿Justiciasajj lamar qotan oladanakapjam jan tukuskirïñapatakejj kunsa lurañasa? Mä amtar puriñatakejja, kuntï Jehová Diosajj lurañas munki ukwa nayraqat amuytʼañasa, ukat ukarjamaw lurañasaraki. Mä amtar puriñajj chʼamäkchinisa, munasiri Awkisajj chʼam churapunistaniwa, kunatï cheqapäki ukarjam sapüru lurañatakis yanaptʼaskakistaniwa (Is. 40:29-31).

18. ¿Kunatsa amuyusarjamakejj mayninakar jan juzgañasäki?

¹⁸ Kimsa: Jehová Diosaruw juzgañapatak dejañasa. Diosan cheqap leyinakaparjam sarnaqañatakis chʼamachaskstanjja, janiw mayninakar juzgañasäkiti, janirakiw jupanakat sipans jukʼamp cheqap sarnaqer jaqëksnas ukham amuyasiñasäkiti. Mayninakar amuyusarjam juzgañatak derechonïksnas ukham janiw amuyasiñasäkiti, ukham amuyasisajj jachʼa jachʼaw tuksna. Jehová Diosakiw “oraqpachan Juezapa[jja]”, ukwa jiwasajj amtañasa (Gén. 18:25). Diosajj janiw juezat uttʼaykistuti, Jesusas akham sarakïnwa: “Jan khitirus juzgapjjamti, ukhamat jan juzgatäñataki” sasa (Mat. 7:1). *

19. Jehová Diosaw cheqaparjam juzgaskani sasin confiyatap ¿kunjamsa Joseajj uñachtʼayäna?

¹⁹ Cheqapar sarnaqeri José chachat mayamp parltʼañäni. Mayninakajj jan walsa jupar lurapkchïnjja, janiw jupanakar juzgkänti. Pachpa jilanakapaw jupar jan wal lurapjjäna, esclavotwa aljantapjjäna, Joseajj jiwatäkaspas ukhamwa papitupar creyiyapjjarakïna. Mä qhawqha maranakatjja, mayampiw Joseajj jilanakapamp jikisïna. Niyakejjay Joseajj wali chʼamani apnaqerëjjchïnjja,  jan sinttʼasisaw jupanakar juzgaspäna, vengasirakispänwa. Jilanakapajj nayra luratanakapat taqe chuyma arrepentisitäpkchïnsa, Joseajj jiwasat vengasiniwa sasaw ajjsarapjjäna. Ukampis Joseajj akhamwa jilanakapar säna: “Jan ajjsarapjjamti, ¿nayajj Diosätti jumanakar juzgañatakejja?” sasa (Gén. 37:18-20, 27, 28, 31-35; 50:15-21). José chachajja, Jehová Diosakiw jupanakar juzgañatakejj derechoni sasaw humilde chuymamp amuyäna.

20, 21. ¿Mayninakat sipans jukʼamp cheqapar sarnaqer jaqëksnas ukham jan amuyasiñatakejj kunas yanaptʼistani?

²⁰ José chachat yateqasisajja, jiwasajj ukhamarakiw Jehová Diosaw juzgaskani sasin amuytanjja. Kunatsa jilat kullakanakajj mä kuns lurapjje uk yatksnas ukham janiw tukktanti. Kunas chuymanakapan utji uk janiw yatktanti, “Jehová Diosa[kiw] jaqen amuyunakap uñanti” (Prov. 16:2). Maynejj kuna markatäskpasa yaqha costumbrenïskpasa, Diosajj taqe kasta jaqenakaruw munasi. Jupajj “chuymanakamjja wali jachʼa jistʼarapjjam” sasaw sistu (2 Cor. 6:13). Juzgañat sipansa, taqe jilat kullakanakaruw munasiñasa, cheqas ukatakiw chʼamachasiñasa.

²¹ Jan Testigöpki ukanakarojj janiw juzgkaraktanti (1 Tim. 2:3, 4). Jehová Diosar jan servipki uka familiaranakasarojj janiw juzgktanti, janipuniw Testigöpkaspati sasins janiw amuykaraktanti. Ukham lursna ukhajj jachʼa jachʼaw tukusksna, mayninakat sipans jukʼamp cheqapar sarnaqer jaqëksnas ukhamaw tukuskaraksna. Jehová Diosajj “taqe cheqanwa” arrepentisipjjañapatak “taqe jaqenakar” tiempo churaski (Hech. 17:30). Mayninakat sipans jukʼamp cheqapar sarnaqer jaqenakjam amuyasipki ukanakarojja, Jehová Diosajj jan cheqapar sarnaqeritwa uñji, janipun uk armasipjjañäniti.

22. ¿Kunatï cheqapäki ukarojj kunatsa jumajj munasta?

²² Kunatï Jehová Diosatakejj cheqapäki ukar munasiñäni ukhajj kusisitäñäniwa, mayninakatakis yateqaskayarakïñäniwa. Ukham lurañäni ukhajja, wal munasipjjestani, Diosasarus wal munasipjjarakini. ‘Cheqapar sarnaqañat awtjatäsipkakiñäni’ (Mat. 5:6). Cheqap leyinakaparjam sarnaqañatak sapüru chʼamachasitas Jehová Diosajj uñjaskiwa, ukham luratasajj jupar wal kusisiyi, janiw ukat payachasktanti. Akapachankir jaqenakajj urut urutjamajj jukʼamp jan walinaksa lurjjapjjchejja, janiw aynachtʼañasäkiti. “Jehová Diosajj cheqapar sarnaqer jaqenakarojj munasiwa”, janipun uk armasiñäniti (Sal. 146:8).