33 YATICHÄWI
Jehová Diosajj servirinakapar cuidaskiwa
“Jehová Diosan nayranakapajj khitinakatï jupar ajjsarapki ukanakaruw uñchʼukiski” (SAL. 33:18).
CANCIÓN 4 “Jehová Diosaw Awatirijajja”
¿KUNANAKATSA YATJJATASKAÑÄNI? *
1. ¿Kunatsa Jesusajj discipulonakapar jarkʼaqañapatak Diosar mayïna?
JANÏR jiwayatäkäna uka arumajja, Jesusajj discipulonakapar jarkʼaqañapatakiw alajjpachankir Awkipar mayïna (Juan 17:15, 20). Cheqas Jehová Diosajj nayratpachas servirinakapar jarkʼaqapunïnwa, cuidarakïnwa. Ukampis Jesusajj ak yatïnwa: Supayajj nayrat sipans jukʼampiw discipulonakapar jan waltʼayañapäna, ukatwa Jehová Diosan yanaptʼap munapjjäna.
2. Salmo 33:18-20 qellqatarjamajj ¿kunatsa jan walinakan uñjaskasajj jan ajjsarañasäki?
2 Supayan apnaqat akapachajj kunayman jan walinakanwa cheqpach cristianonakar uñjasiyi. Problemanakajj aynachtʼayistaspawa, Diosar jan jitheqtas servitasas yantʼataw uñjasispa. Kunjamtï aka yatichäwin yatjjatkañänejja, janiw ajjsarañasäkiti. Diosajj cuidaskistuwa, mä arunjja kunanakas pasaskistu taqe ukanakwa uñjaski, jiwasar yanaptʼañatakis jankʼakirakiwa. Bibliankir pä sarnaqäwinakat yatjjatañäni, ukanakajj ‘Jehová Diosan nayranakapajj khitinakatï jupar ajjsarapki ukanakar uñchʼukiskatapwa’ uñachtʼayistani (Salmo 33:18-20 liytʼäta).
SAPAKJAM AMUYASTAN UKHAJJ JEHOVÁ DIOSAW YANAPTʼISTU
3. ¿Kunjamanakan uñjasisas sapakjam amuyassna?
3 Diosar serviri mä jachʼa familia taypinkstansa, awisajj sapakjamaw amuyassna. Sañäni, wayn tawaqonakajj kunanakarus creyipjje ukanak escuel compañeronakap nayraqatan qhanañchapjjañapäki ukhajj inas sapakjam jikjjatasipjjchispa, jan ukajj congregacionat cambiasjjapjje ukhajj inas sapakjam jikjjatasipjjarakchispa. Inas yaqhepajj llakita jan ukajj desanimat jikjjatasstan, ukat “sapakiy ukanak aguantchï” sasin amuyarakstan. Kunjamas jikjjatastan uk janiw entiendipkitaniti sasaw amuysna, ukatwa llakinakas mayninakar jan yatiyjjsnati. Janiw khitis nayat llakiskiti sasaw awisajj amuyjjsna. Sapakjam amuyassna ukhajja, jan khiti yanaptʼirini, llakita ukhamaw jikjjatassna. Ukampis Jehová Diosajj janiw ukham jikjjatasiñas munkiti. ¿Kunatsa ukham sistanjja?
4. ¿Kunatsa Elías profetajj “naya sapakiw jiltʼjjta” sasin säna?
4 Diosat jan jitheqtir Elías profetat parltʼañäni, jupajj vidap salvasiñatakiw 40 jila urunak escapäna, kuna laykutejj Jezabel warmiw jupar jiwayañatak mä juramentomp arsüna (1 Rey. 19:1-9). Ukatwa Eliasajj mä qollu pʼiyan sapak uñjasisajj Jehová Diosar akham säna: “Naya sapakiw jiltʼjjta” sasa (1 Rey. 19:10). Profetanakat jupa sapakis markan jiltʼjjaspa ukhamwa Eliasajj amuyasïna, ukampis ukajj janiw ukhamäkänti. Abdías chachajj 100 profetanakaruw Jezabel warmin jan jiwayatäpjjañapatakejj salväna (1 Rey. 18:7, 13). Ukhamajj ¿kunatsa Eliasajj sapakjam amuyasïna? Abdías chachajj salvkäna uka profetanakarojj taqpachaniruw jiwarayjjapjjpacha sasin inas amuychïna. Kunatï Baal diosan profetanakapampejj Carmelo qollun paskäna uka qhepatjja, janiw khitis Dios toqet saytʼaskänti, inas uk yatisajj sapakjam jikjjatasirakchïna. Maysa toqetjja, kuna jan walintï uñjaskäna uk janis khitis yatkaspa, janis khitis jupat llakiskaspa ukham inas amuychïna. Bibliajj janiw taqe kunpun Eliasat yatiykistuti, ukampis ak yattanwa: kunatsa Eliasajj sapakjam jikjjatasïna uk Jehová Diosajj amuyänwa, kunjam yanaptʼañs yatirakïnwa.
Kuntï Jehová Diosajj Elías profeta laykojj lurkäna uk amtañajja, ¿kunjamsa sapakjam jikjjatastan ukhajj chuymachtʼistu? (Párrafos 5, 6).
5. Eliasan jan sapakïtap uñachtʼayañatakejj ¿kunsa Jehová Diosajj luräna?
5 Jehová Diosajj kunayman toqetwa Elías profetar yanaptʼäna. Arstʼasiñapatakiw chʼamañchäna. Pay kutiw akham sasin jisktʼarakïna: “Elías, ¿kunsa jumajj akan luraskta?” sasa (1 Rey. 19:9, 13). Uka pay kutinjja, Jehová Diosajj wali atencionampiw kunanaktï Eliasajj siskäna taqe ukanak istʼäna. ¿Kunjamsa Diosajj Eliasar jaysäna? Jupajj ukankatap uñachtʼayasa, wali chʼaman Diosätap uñachtʼayasaw jaysäna. Israelitanakat waljaniw nayar adorasipkitu sasaw sarakïna (1 Rey. 19:11, 12, 18). Eliasajja llakinakap Jehová Diosar yatiyasasa, kuntï Diosajj jupar siskäna uk istʼasas sumakiw jikjjatasjjpachäna. Ukatjja Jehová Diosajj wali wakiskir asignacionanakwa Eliasar churäna, Hazael chacharojj Siria markan reyipjamaw uttʼayañapäna, Jehú chacharusti Israel markan reyipjamaw uttʼayañapäna, ukat Eliseorojj profetatwa uttʼayañaparakïna (1 Rey. 19:15, 16). Uka asignacionanak churasajja, Jehová Diosajj kunanakatï chʼamañchtʼkaspa ukanakar chuym uchañapatakiw Eliasar yanaptʼäna, suma amigopäñapatakiw Eliseorojj churarakïna. Sapakjam jikjjatasstan, Jehová Diosan yanapap munarakstan ukhajj ¿kunsa lursna?
6. ¿Sapakjam jikjjatasstan ukhajj kamsasas Jehová Diosar orassna? (Salmo 62:8).
6 Jehová Diosajj jupar orasiñasatakiw invittʼistu. Kunjamas jikjjatastan uk jupajj yatiwa, kuna horasanakas orasipkakita, nayajj istʼapjjämawa sasaw sistu (1 Tes. 5:17). Jehová Diosatakejja servirinakapan oracionanakap istʼañajj wali kusiskañawa (Prov. 15:8). ¿Sapakjam jikjjatasisajj kamsasas Jehová Diosar orassna? Eliasjamaw llakinakas yatiysna (Salmo 62:8 liytʼäta). Kunas llakisiyistu, kunjamas jikjjatastan ukanak yatiyapjjañäni. Kun lurañajas wakisi uk amuyañatak yanaptʼita sasaw mayissna. Wayn tawaqo, jumatï sapakjam jikjjatassta, escuelan Jehová Diosat parlañ ajjsarayasiraksta ukhajj ¿kunsa lurasma? Kunanakarutï creyktan ukanak respetomp qhanañchtʼañatakejj Diosaruw jan ajjsarañsa, yatiñsa mayisma (Luc. 21:14, 15). Jumatï desanimat jikjjatassta ukhajj ¿kunsa lurasma? Experienciani mä jilatampi jan ukajj mä kullakamp parltʼañatak yanaptʼa Jehová Diosar mayisim, ukatjja yanaptʼkätam uka jilatataki jan ukajj uka kullakatak orarapim, ukhamat kunjamakis jikjjatasta uk amuyañapataki. Jiwasatï kunjamas jikjjatastan uk Jehová Diosar yatiyañäni, kunjamsa oracionanakasar jaysistu ukanak amuyarakiñäni, mayninakan yanaptʼap katoqasirakiñäni ukhajja, janiw sapakjam jikjjataskañäniti.
¿Jilat kullakanakamp jukʼamp predicañatakejj chʼamachastanti? (Párrafo 7).
7. ¿Kunsa Mauricio jilatan experienciapat yateqtanjja?
7 Jehová Diosajj taqeniruw wali wakiskir luräwinak churawayistu. Kunanaktï congregacionansa predicacionansa lurktan ukanak jupajj uñjaskiwa, valoranitwa uñjaraki (Sal. 110:3). Jehová Diosar wali ocupata serviñajj jan sapakjam jikjjatasiñatakiw yanaptʼistu. Uk amuytʼañatakejj Mauricio wayna jilatat parltʼañäni. * Bautisasïna ukat mä jukʼa qhepatjja, mä suma amigopaw Jehová Diosat jukʼat jukʼat jitheqtawayjjäna. Mauriciojj akham siwa: “Amigojar Jehová Diosat jitheqtir uñjasajja, nayajj payachasjjayätwa, ¿Jehová Diosar serviñ arsuwaykta ukamp phoqañ puedïti, familiap taypinkaskakiñs puedïti? sasaw jisktʼasiyäta. Sapakiw jikjjatasiyäta, janiw khitis entiendkitaspati sasaw amuyjjarakiyäta” sasa. ¿Kun lurañas jilatar yanaptʼäna? Jupajj akham saskakiwa: “Jukʼamp predicañaw jan naya pachpatak llakisiñatakisa jan sapakjam jikjjatasiñatakis yanaptʼitäna. Jilat kullakanakamp predicasajj kusisitaw jikjjatasirïta, janiw sapakjam amuyasirïkti” sasa. Jilat kullakanakamp predicañatakejj janis territorion jikisiñ puedkstanjja, kusisitäsnawa. Jupanakamp carta toqe jan ukajj teléfono toqe predicañajj chʼamañchtʼistuwa. ¿Kun lurañas Mauricio jilatar yanaptʼarakïna? Jupajj akham siwa: “Congregacionan jukʼampiw trabajiyäta. Asignacionanakaj jukʼamp sum wakichtʼasiñataki ukat sum arstʼañatakiw chʼamachasirakiyäta. Ukanakaw qhawqsa Jehová Diosasa jilat kullakanakas munasipjjetu uk amuyañatak yanaptʼitäna” sasa.
JAN WALINAKAJJ LLAKISIYKISTU UKHAJJ DIOSAW YANAPTʼISTU
8. ¿Jan walinakan uñjasisajj kunjamas jikjjatassna?
8 Aka qhep qhepa urunakan taqeniw jan walinakan uñjasiñäni (2 Tim. 3:1). Ukampis jan walinakajj mä akatjamatwa pasistaspa, kuna horasas pasistani uk janiw yatksnati. Inas mä akatjamat qollqet pistʼat uñjassna, inas doctorajj mä jan wali usunïtas yatiychistaspa jan ukajj mä munat familiarasajj jiwchispa. Ukhamanakan uñjasisajj wali llakita ukat aynachtʼataw jikjjatassna, yamas mayat mayat problemanakajj jutki, jan ukajj mä pachpa tiemponak walja problemanakan uñjastan ukhaw jukʼamp llakita jikjjatassna. Ukampis ak amtapjjañäni: Jehová Diosaw cuidaskistu, jupaw jan waltʼäwinakar saykatañatakejj yanaptʼistani.
9. ¿Kuna jan walinakansa Job chachajj uñjasïna?
9 Job chachat parltʼañäni. Mä jukʼa tiemponakwa Diosar jan jitheqtas servir uka chachajj jan walinakan uñjasïna. Mä pachpa urunakwa taqpach uywanakap lunthatapjjäna, jiwarayapjjarakïna, servirinakapas wawanakapas jiwarjjapjjarakïnwa (Job 1:13-19). Mä jukʼa tiempotjja, wali llakitäskäna ukhajj jan wali usumpiw usuntäna, ukajj jan uñtʼkañaw Job chachar jaytäna (Job 2:7). Ukhaman uñjasisajj jupajj akham sänwa: “Nayajj walpun vidajar uñista, janiw jukʼamp jakañ munjjti” sasa (Job 7:16).
Kunja munasiñampis Jehová Diosajj servirinakapar cuidi uk Job chachar uñachtʼayañatakejja, kunjamsa luratanakapar sum cuidi uka toqenakatwa Diosajj jupar parläna. (Párrafo 10).
10. Jan walinakan aguantañapatakejja, ¿kunjamsa Jehová Diosajj Job chachar yanaptʼäna? (Nayrïr paginankir dibujo uñjjattʼäta).
10 Jehová Diosajj kuna jan walinakansa Job chachajj uñjasïna uk sum yatïna. Niyakejjay Job chachar wal munaschïnjja, uka jan walinak aguantañapatakisa jupat jan jitheqtas serviskakiñapatakis kunanaktï necesitkäna ukanakwa churäna. Jehová Dios pachpaw Job chachamp parläna, qhawqha yatiñanisa, jupan luratäpki ukanakarojj kunja munasiñampis uñji ukanakatwa parläna. Musparkañ walja animalanakatwa parlarakïna (Job 38:1, 2; 39:9, 13, 19, 27; 40:15; 41:1, 2). Maysa toqetjja, Diosajj Elihú waynaruw Job chachar chʼamañchtʼañapatakis chuymachtʼañapatakis khitäna. Diosat jan jitheqtir Elihú waynajja, aguantapki uka servirinakaparojj Jehová Diosajj bendisipuniwa sasaw Job chachar amtayäna. Elihú waynajj Job chachar ewjjtʼaspa ukwa Diosajj munarakïna. Elihú waynajja, jupa pachpat jan sint llakisiñapatakiw Job chachar munasiñamp amuytʼayäna. Taqe kun Luriri Jehová Diosat sipans jaqejj janiw kunäkisa sasaw amtayarakïna (Job 37:14). Diosajj mä luräwi Job chachar churarakïna: jupar jan wal lurapkäna uka kimsa amigonakapatakiw orarapiñapäna (Job 42:8-10). ¿Jichha tiempon jan walinakan uñjastan ukhajj kunjamsa Diosajj yanaptʼarakistu?
11. ¿Jan walinakan uñjastan ukhajj kunjamsa Bibliajj chuymachtʼistu?
11 Jehová Diosajja, janiw Job chacharjam cheqak parlkistuti. Ukampis Biblia toqew parlistu (Rom. 15:4). Jutïritak mä suytʼäwi churasaw chuymachtʼistu. Jan walinakan uñjastan ukhajja, Biblian yatichäwinakapaw chuymachtʼistaspa, ukanakat mä qhawqha uñjañäni. Janiw ni kunasa, ni sinti jan walinakas “Diosan munasiñapat apaqkistaspati” sasaw Bibliajj qhanañchistu (Rom. 8:38, 39). Jehová Diosajj “taqe khitinakatï jupar artʼasipki ukanakan jakʼapankiwa”, mä arunjja oracionanakap istʼiwa sasaw Bibliajj qhanañcharaki (Sal. 145:18). Diosar confiyañäni ukhajja, kunayman jan walinakwa aguantañäni, tʼaqeskasas kusisitäñäniwa, ukwa Diosajj sistu (1 Cor. 10:13; Sant. 1:2, 12). Janiw ukakïkiti, Jehová Diosajj wiñay jakañ churasaw bendisistani, ukampis kuna jan walinakantï uñjasktan ukanakajj mä qhawqha tiempotakikiwa, ukwa Bibliajj amtayarakistu (2 Cor. 4:16-18). Jehová Diosajja khititï taqe uka jan walinak utjayki ukaru, mä arunjja Supayampiru ukat taqe khitinakatï jupjamäpki ukanakampir chhaqtayañwa arsuwayi (Sal. 37:10). Kuna jan walinakantï jutïrin uñjaskäta uka tiempon chʼamañchtʼat jikjjatasiñatakejj ¿Bibliankir mä qhawqha versiculonak pʼeqer yatstati?
12. ¿Jehová Diosajj Arup toqe yanaptʼa churkistu uk katoqañatakejj kunsa lurañasa?
12 Bibliat sapa kut yatjjatañataki, kuntï liyktan ukat lupʼiñatak tiempo apstʼassna ukwa Jehová Diosajj muni. Kuntï yateqtan ukarjam lurañäni ukhajja, jukʼampiw Jehová Diosar confiyañäni, jukʼamp sumaw jupampejj apasjjarakiñäni, ukaw aguantañatak chʼam churistani. Maysa toqetjja, Arupar confiyañäni ukhajj espíritu santopampiw Diosajj yanaptʼistani. Espíritu santon yanaptʼapampejja, ‘jaqen chʼamapat jilankki uka chʼamanïñäniwa’, ukaw jan walinakan aguantañatak yanaptʼistani (2 Cor. 4:7-10).
13. ‘Suma phoqeri amuyasir esclavo’ toqe Biblian yatichäwinakap katoqktan ukajja, ¿kunjamsa aguantañatak yanaptʼistu?
13 Jehová Diosan yanaptʼapampejja, ‘suma phoqeri amuyasir esclavojj’ walja yatichäwinaka, videonaka, cancionanakwa apsuwayi. Ukanakaw Jehová Diosar jukʼamp confiyañataki, Diosar serviñan jan ikjañatak yanaptʼistu (Mat. 24:45). Taqe ukanak tiempoparuw katoqtanjja, ukhamajj ukanak taqe chuymaw yatjjatañasa. Estados Unidos markankir mä kullakajja, Diosan uka regalonakapat wal yuspärasajj akham siwa: “40 maranakaw Jehová Diosar sirvjjta, ukampis uka maranakanjja Diosar taqpach chuymamp servitajajj walja kutiw yantʼat uñjasiwayi” sasa. Uka kullakajj kunayman jan walinakanwa uñjasïna. Abuelitopajj autop saytʼayaskäna ukhaw mä machantat choferojj autopar chocantasin abuelitopar jiwayäna. Awk taykapajj jan wali usunakampiw jiwapjjarakïna, jupa pachpas pay kutiw cáncer usunïna. ¿Kunas aguantañatak yanaptʼäna? Kullakajj akham sarakiwa: “Jehová Diosajj cuidapunituwa. Suma phoqeri amuyasir esclavop toqe Biblian yatichäwinakap churkistu ukaw aguantañatak yanaptʼawayitu. Ukatwa Job chachjamajj akham sirista: ‘¡Jiwañajkamajj janipuniw Diosar taqpach chuymamp serviñ apanukkäti!’ sasa” (Job 27:5).
¿Congregacionankir jilat kullakanakar yanaptʼañatakejj kunsa lursna? (Párrafo 14).
14. ¿Jan walinakan uñjasktan ukhajj kunjamsa Jehová Diosajj jilat kullakanak toqejj yanaptʼistu? (1 Tesalonicenses 4:9).
14 Jehová Diosan servirinakapajj llakinakan uñjasipki ukhajja, maynit maynikamaw munasiñ uñachtʼayasipjje, chuymachtʼasipjjaraki, Diosaw ukham lurapjjañapatak yatichi (2 Cor. 1:3, 4; 1 Tesalonicenses 4:9 liytʼäta). Jilat kullakanakajj Elihú waynjamaw jan walinakan uñjastan ukhajj Diosat jan jitheqtas serviñatak yanaptʼapjjestu (Hech. 14:22). Ukwa Diana kullakajj qhan uñjäna. Esposopajj wal usuntäna ukhajja, congregacionankirinakaw kullakar wal chʼamañchtʼapjjäna, Diosar taqe chuyma serviskakiñapatakis yanaptʼapjjarakïna. Kullakajj akham siwa: “Uka phajjsinakajj nanakatak wali chʼamapunïnwa, ukampis uka phajjsinakanjja Jehová Diosajj wali munasiñampis chʼamani amparapamp ichjjarupkitaspa ukhamaw jikjjatasipjjayäta. Congregacionankir jilat kullakanakas wal yanaptʼapjjetäna, jupanakajj visittʼapjjetänwa, jawsanipjjetänwa, qhomanttʼapjjarakitänwa, ukanakaw nayrar sartañatakejj yanaptʼapjjetäna. Janiw auto apnaqañ yatkti, ukhamajj jupanakaw puedkayäta ukhajj tantachäwinakaru predicacionar sarañajatak yanaptʼapjjetäna” sasa. ¡Congregacionan wali munasiri jilat kullakanakan utjatapajj wali kusiskañawa!
JEHOVÁ DIOSAJJ MUNASIÑAMPI JIWASAR CUIDATAPAT YUSPÄRAÑASAWA
15. ¿Jan walinakar saykatsnawa sasajj kunatsa jan payachasktanjja?
15 Taqeniw mä jan walins uñjasiñäni. Ukampis kunjamtï yatjjataniwayktanjja, ukanakar saykatañatakejj janiw sapakïkañäniti. Jehová Diosajj mä munasiri awkjamajj cuidapunistuwa. Jupaw jiwasampïski, yanaptʼañapatak ruwtʼastan ukhajj jankʼakiw istʼistu, yanaptʼañatakis jankʼakirakiwa (Is. 43:2). Jan walinakarojj saykatsnawa, janiw ukat payachasktanti. ¿Kunatsa? Kunanaktï aguantañatakejj necesitktan taqe ukanakwa Jehová Diosajj churistu, mä arunjja oración, Biblia, Biblian yatichäwinakapa ukat munasiri jilat kullakanakwa churistu.
16. ¿Jehová Diosajj jiwasar cuidaskakiñap munstan ukhajj kunsa lursna?
16 Alajjpachankir munasir Awkisajj jiwasat llakisitapat wal yuspärtanjja. Jupïpanwa “chuymanakasajj wal kusisi” (Sal. 33:21). ¿Diosajj munasiñamp jiwasar cuidatapat kunjamsa yuspärsna? Yanaptʼanak churkistu taqe ukanak aprovechasaw yuspärsna. Diosajj jiwasar cuidaskakiñap munstan ukhajj chʼamachasiñasawa, mä arunjja jupar istʼañataki, kunatï jupatak walïki uk lurañatakiw chʼamachasiñasa. Ukhamtï lurañänejja, wiñayatakiw Jehová Diosajj cuidistani (1 Ped. 3:12).
CANCIÓN 30 Jupaw Awkijasa Diosajasa Amigojasa
^ Jehová Diosatï jan yanaptʼkistaspajja, jan walinakar janiw saykatañ puedksnati. Aka yatichäwejja Jehová Diosajj servirinakapar cuidaskatapwa uñachtʼayistani, mä arunjja kuna jan walinakantï uñjasktan uk uñjaskatapa, ukanakar saykatañatakejj kunanaktï necesitktan ukanak jiwasar churatapwa uñachtʼayistani.
^ Yaqhep sutinakajj cambiasiwayiwa.