1. ¿Kunsa walja wayn tawaqonakajj jichhakamajj lurawayjjapjje?

 SAPA maraw walja waranqa cristiano wayn tawaqonakajj bautisasipjje. ¿Jumajj bautisasiraktati? Ukhamächi ukhajja, jilat kullakanakas Jehová Diosas wali kusisitäpjjpachawa (Prov. 27:11). Kunanaksa jichhakamajj lurawayta ukanakat amuytʼam. Bibliat wal yatjjatawaypachätajja, inas walja maranak yatjjatawaysta, ukham yatjjatañaw Bibliajj Diosan arupäskapuniwa sasin confiyañatak yanaptʼawaypachätamjja. Ukampis jichhajj sagrado libro qellqayirirojj uñtʼjjtawa, munasjjaraktawa, ukaw jukʼamp importantejja. Jehová Diosar wal munasitam laykuw jakäwim jupar katuyastajja, bautisasjjaraktajja. Ukham luratamajj ¡kusiskañawa!

2. ¿Kunanaksa aka yatichäwin yatjjataskañäni?

 ² Janïr bautisaskasajj inas jan walinakan uñjaschiyäta, inas ukanakajj Diosat jitheqtayañ munchiyätam. Ukampis akat maranakarojja, yaqha jan walinakanwa uñjasirakïta. Diosar munasitamajj thayarjjaspa, jupat jitheqtjjasma ukwa Supayajj munani (Efes. 4:14). Janiw Supayarojj gustop churañamäkiti. Jehová Diosat jan jitheqtañatakisa, jupar jakäwim katuyasiwaykta ukamp phoqañatakis ¿kunas yanaptʼätam? Diosar serviñan jiltaskakiñamawa, mä arunjja cristianjamajj ‘jilïr jaqeruw tukuñama’ (Heb. 6:1). Aka yatichäwinwa kunjamsa uk lurasma uk yatjjataskañäni.

3. ¿Bautisasjjasajj kunsa taqe cristianonakajj lurasipkakiñapa?

³ Maynejj bautisasjje ukhajja, apóstol Pablojj Éfeso markankir cristianonakar ewjjtʼkäna ukarjamaw sarnaqañapa. ‘Diosar  serviñan jilïr jaqer tukupjjam’ sasaw jupajj chʼamañchtʼäna (Efes. 4:13). Uka arunakampejja, “nayrar sartasipkakim” siskaspänsa ukhamänwa. Diosar serviñan nayrar sartatasajja, kunjamtï mä wawajj jiltki ukamp sasiwa sasaw Pablojj sarakïna. Jichhak nasit wawaparojja, awk taykapajj wal munasipjje, kusisitäpjjarakiwa. Ukampis wawajj janiw wiñayatak ukham quedaskaniti. Tiempompejj “kunanaktejj wawanakajj lurapki ukanak apanu[kjjaniwa]” (1 Cor. 13:11). Cristianonakampejj niya ukhamarakiw pasi: bautisasjjasajj Diosar serviñan nayrar sartaskakiñasawa. Nayrar sartañatakejj kunanakas yanaptʼiristam uk mä qhawqha jichhajj uñjañäni.

4. ¿Diosar serviñan jiltaskakiñatakejj kunas yanaptʼiristam, ukat kunatsa? (Filipenses 1:9).

⁴ Jehová Diosar jukʼamp munasiskakim. Jehová Diosarojj wal munasjjtajja. Ukampis jupar munasitamajj jiltaskakispawa. Kunjamsa uk jiltaysna ukjja, Filipenses 1:9 (liytʼäta) textonwa apóstol Pablojj mä toqet qhanañchäna. Filipos markankir cristianonakan munasiñapajj ‘jukʼamp jukʼampi jiltaskakiñapatakiw’ Pablojj Jehová Diosar mayïna. Ukhamajj Diosar munasitasajj ‘jukʼampiw jiltaspa’. Ukampis ukatakejj ‘sum uñtʼañasawa, sum amuytʼañasarakiwa’, mä arunjja Jehová Diosar jukʼamp uñtʼtan ukhajja, jukʼampiw jupar munastanjja. Kunjam chuymanisa, kunjamsa taqe kunsa luri ukas jukʼampiw gustistu. Diosarojj jukʼampiw kusisiyañ muntanjja, janirakiw kunäkipansa chuym pʼakintañ munktanti. Kun lurañassa muni uk yatiñatakisa, kunjamsa ukarjam luraraksna ukatakis wal chʼamachasiraktanjja.

5, 6. ¿Jehová Diosar munasitasajj jukʼamp jiltañapatakejj kunsa luraraksna?

⁵ Maysa toqetjja, Jehová Diosar munasitasajj jukʼamp jiltañapatakejj Yoqaparuw jukʼamp sum uñtʼañasa, Awkipajj kunjam chuymanisa uk jupajj sumwa uñachtʼayi (Heb. 1:3). Jesusar sum uñtʼañatakejja, pusi Evangelionakwa yatjjatañasa. ¿Sapürut Biblia liytʼta? Janitï ukhamäkchi ukhajja, jichhaw Biblia liytʼañ qalltasma. Jesusajj kunsa luräna, kamsarakïnsa uk Biblian liytʼasajja, kunjam chuymanïnsa uk amuytʼam. Waljaniw jupampïñsa jupamp parltʼasiñsa munapjjäna. Jiskʼa wawanakarus ichjjartʼasirakirïnwa (Mar. 10:13-16). Jesusajj wali munasirïnwa, ukatwa discipulonakapajj kunjamas jikjjatasipjjäna uk jan ajjsartʼas sapjjerïna (Mat. 16:22). ¿Kunatsa Jesusajj ukham chuymanïnjja? Kuna laykutejj alajjpachankir Awkipaw ukham chuymanejja. Juparojj taqeniw jakʼachasipjjaspa. Ukatwa Diosarojj orassna, kunjamas chuymasan jikjjatastan uksa saraksna. Ukham luratasat janiw Jehová Diosajj juzgkistaniti. Jupajj munasistuwa, jiwasatsa llakisirakiwa (1 Ped. 5:7).

⁶ Jesusajj jaqenakat sinttʼasirïnwa. Apóstol Mateojj akham sänwa: “Jaqenakar uñjasajj walpun sinttʼasïna, jupanakajj jan awatirini ovejanakjam qʼala usuchnoqata, ananukuta ukhamäpjjänwa” sasa (Mat. 9:36). ¿Kunjamsa Jehová Diosajj jaqenakar uñji? Awkipat parlkasajj Jesusajj akham sarakïnwa: “Jupajj janiw jiskʼa wawanakar uñtasitäpki ukanakat maynin chhaqañapsa munkiti” sasa (Mat. 18:14). Jehová Diosajj jiwasar ukham munasitapat ¡walpun kusistanjja! Jiwasatï Jesusar jukʼamp uñtʼañäni ukhajja, Jehová Diosar munasitasajj jukʼampiw jiltarakini.

7. ¿Kunatsa Diosar serviñan suma saytʼatäpki uka jilat kullakanakan amigopäñama?

⁷ Jehová Diosar munasitamajj jukʼamp jiltañapatakisa Diosar serviñan nayrar sartañatakis ¿kunampsa lurarakisma? Diosar serviñan suma saytʼatäpki uka jilat kullakanakan amigopäñamawa. Uka jilat kullakanakajj kusisitapuniw jakasipjje. Jehová Diosar serviñ amtapjjatapats janiw arrepentisipkiti. Experiencianakap jumar cuenttʼañapatakiw jupanakar  mayisma. Mä wakiskir amtar puriñamächi ukhajja, jupanakampiw ewjjtʼayasisma. Bibliajj akham siwa: “Walja ewjjtʼirinakajj utji ukhajja, taqe kunas sumakiw sari” sasa (Prov. 11:14).

8. ¿Kuntï Bibliajj yatichki uka toqet payachassta ukhajj kunas yanaptʼiristam?

⁸ Jan payachasiñatakejj yatjjatañamawa. Kunjamtï  párrafo 2 ukan yatjjataniwayktanjja, Supayajj janiw Diosar serviñan jiltañam munkaniti. Payachasiñampiw Diosat jitheqtayiristam. Biblian yatichäwinakapar jan confiyjjasma ukwa Supayajj muni. Inas mä urojj evolución toqet parlir maynir istʼchïta. Uka yatichäwejj Jehová Diosan sutipwa qʼañuchi. Inas uka toqet nayrajj jan lupʼirïkstati. Ukampis niyakejjay jichhajj waynäjjstajja jan ukajj tawaqöjjstajja, inas profesoranakamajj evolución toqet yatichjjapjjstam. Kuntï yatichapktam ukajj ukhamapunïkaspas ukham inas amuyjjsta. Ukampis ak amtam: mä Lurirejj utjaskapuniti janicha ukanak jan sum yatjjatasaw yatichasipkiristam. Kuntï Proverbios 18:17 texton siski uk amtasiñamawa, ukan akham siwa: “Juchañchatäki uka jaqejja juez nayraqatan cheqäkaspas ukhamwa parli, ukampis juchañchirejj jutasin jupar jisktʼki ukhajja, kunatï cheqäki ukaw qhansti” sasa. ¿Uka textojj kunsa yatichistu? Kunanaktï escuelan yatichapktam ukanak janiw taqpach creyiñamäkiti. Jan ukasti Diosan Arupatwa sum yatjjatañama, Bibliat apstʼat qellqatanakasan evolución toqet kamsisa uk yatjjatam. Evolución yatichäwir creyipkäna uka jilat kullakanakamp parltʼam, mä munasiri Lurirejj utjaskapuniwa sasin creyiñatakejj kunas jupanakar yanaptʼawayi uk jisktʼarakim. * Uka toqenakat parltʼañajja, mä Luririn utjaskapunitap amuyañatakiw yanaptʼätam.

9. ¿Kunsa Melissa kullakan experienciapat yateqta?

⁹ Melissa sat mä kullakarojja, Diosan luratanakapat yatjjatañaw yanaptʼäna. * Jupajj akham siwa: “Evolución yatichäwejj cheqäkaspas ukhamwa profesoranakajj escuelan yatichapjje. Qalltanjja evolución yatichäwejj inas cheqäskapunchi sasin amuyasaw uka toqet jan yatjjatkayätti. Jukʼamp yatjjatirista ukhajj janiw Diosar jukʼamp confiyjjeristti sasaw ajjsarayäta. Ukampis Jehová Diosajj janiw aleq  ukhamak jupar serviñas munkiti, ukatwa kuna toqettï payachaskayäta uka toqet yatjjatañar uchasiyäta. ¿Existe un Creador que se interese por nosotros? sat librwa liytʼayäta, ¿Es la vida obra de un Creador? ukat El origen de la vida. Cinco cuestiones dignas de análisis sat folletonakwa liytʼarakiyäta. Ukanak yatjjatañakiw wakisitayna, kunataksa nayratpach jan yatjjatkpachäyäta sasaw amtasta” sasa.

10, 11. ¿Kunanakas juchar jan purtʼasiñatak yanaptʼiristam? (1 Tesalonicenses 4:3, 4).

¹⁰ Qʼañu jucha lurañ munañ amuyunak apanukuñatak chʼamachasiñamawa. Kunapachatï maynejj waynitöjje jan ukajj tawaqetäjje ukhajja, warmi jan ukajj chacha munañajj jan aguantañjamäspawa, mayninakas qʼañu jucha lurañapatakiw chʼamañchapjjarakispa. Wayn tawaqo, Supayajj jan wali munañanakamampi apayasiñamwa muni. ¿Kunanakas juchar jan purtʼasiñatak yanaptʼiristam? (1 Tesalonicenses 4:3, 4 liytʼäta). Oraskäta ukhajja, kunjamas jikjjatasta uk Jehová Diosar yatiyam, chʼamsa mayirakim (Mat. 6:13). Ak amtapunim, Diosajj yanaptʼañwa muntamjja, janiw juzgañ munktamti (Sal. 103:13, 14). Biblias yanaptʼarakiristamwa. Párrafo 9 ukan parlaniwayktan uka Melissa kullakajja, qʼañu jucha lurañ munañ amuyunak apanukuñatakiw chʼamachasïna. Jupajj akham siwa: “Biblia sapüru liyiñaw jan aynachtʼañatakejj yanaptʼitäna. Ukham lurañajja, jakäwijajj Jehová Diosankatap amtañatakiw yanaptʼitäna. Jehová Diosajj naya jakʼankañ munatapwa amtayarakitäna” sasa (Sal. 119:9).

¹¹ Jan walinakarojj janiw juma sapakejj saykatañamäkiti. Kunjamas jikjjatasta uk awkimaru jan ukajj taykamaruw yatiyañama. Uk lurañajj janiw faciläkiti, ukampis uk lurañajj wali importantewa. Melissa kullakajj akham siwa: “Jan ajjsarañatakejj Jehová Diosaruw yanaptʼa mayiyäta, ukatjja kunjamas jikjjatasiyäta uk papitujaruw awisayäta, uk lurasajj sumakiw jikjjatasjjayäta. Jehová Diosajj nayampejj wali kusisitäpachänwa” sasa.

12. ¿Kunas suma amtanakar puriñatakejj yanaptʼätam?

¹² Biblian wiñay yatichäwinakapampejj yanaptʼayasiñamawa. Marat maratjamajja, juma sapakiw kun lurañsa amtjjäta. Ukampis jakäwin janiw wali experiencianïktati. Ukhamajj ¿jan pantjasiñatakisa Jehová Diosamp sum apasitam jan aptʼasiñatakis kunsa lurasma? (Prov. 22:3). Suma amtanakar puriñatakejj kunsa luräna ukwa Kari sat mä kullakajj amtäna. Diosar serviñan suma saytʼatäpki uka cristianonakajja, janiw taqe kunatakipunejj Bibliankir mä mandato necesitapkiti, ukwa jupajj amuyäna. Kullakajj akham siwa: “Mandatonakarjamak luraskañat sipansa, kunjamsa Jehová Diosajj mä kunsa uñji uk amuyañajänwa” sasa. Biblia liytʼkasajj akham jisktʼasim: “Kuntï liytʼaskta ukajja, ¿kunjamsa Jehová Diosajj amuyi uka toqet kunsa yatichitu? ¿Sum sarnaqañatakejj kuna suma wiñay yatichäwis akan utji? ¿Uka wiñay yatichäwirjam sarnaqañajj kunjamsa yanaptʼitani?” sasa (Sal. 19:7; Is. 48:17, 18). Jumatï Biblia liytʼäta, wiñay yatichäwinakaparjam sarnaqarakïta ukhajja, Jehová Diosar kusisiykiri amtanakar puriñajj jumatakejj facilakïniwa. Niyakejjay kunjamsa Jehová Diosajj amuyi uk sapürutjam jukʼamp sum amuyjjchïtajja, janiw taqe kunatakipunejj mä mandato necesitkätati. Ukhamatwa Diosar serviñan jiltaskatam uñachtʼayäta.

13. ¿Kunjamsa suma amigonakajj yanaptʼapjjeristam? (Proverbios 13:20).

¹³ Jehová Diosar munasir amigonak thaqañamawa. Kunjamtï párrafo 7 ukan uñjaniwayktanjja, amigonakamajj Diosar serviñan jiltañatakiw yanaptʼapjjeristam (Proverbios 13:20 liytʼäta). Sara kullakat parltʼañäni. Jupajj janiw Jehová Diosar kusisit sirvjjänti, ukampis  mayaw juparojj yanaptʼäna. Sara kullakajj akham siwa: “Munkayäta ukhapuniw suma amiganak jikjjatayäta. Mä amigajampejja, Yatiyañataki revistat yatjjatañatakiw sapa semana tantachasipjjerïta. Yaqha amigajasti tantachäwinakan comentarionak arstʼañajatakiw chʼamañchtʼarakitäna. Amiganakajan yanaptʼapampejja, Bibliat sapak yatjjatañsa oracionsa wali wakiskiritwa uñj-jjayäta. Jukʼat jukʼatjja Jehová Diosampejj sumwa apasjjayäta, wasitampiw kusisitäjjarakiyäta” sasa.

14. ¿Kunjamsa Julián jilatajj suma amigonak jikjjatäna?

¹⁴ ¿Suma amigonakanïñatakejj kunsa lurasma? Ancianot serviri Julián jilatajj akham siwa: “Waynäskayäta ukhajja, predicacionanwa suma amigonak jikjjatayäta. Jupanakajj wali kusisitaw predicapjjeri, ukaw predicacionan wali kusisitäñatakejj yanaptʼitäna. Ukatwa precursorat serviñ amtayäta. Naya mitanakajampik chikachasisajj jukʼa amigonakanikiyätwa, janiw nayar yanaptʼir amigonakajj utjkitänti, ukwa amuyasiyäta. Betelankjjayäta ukhajja, suma amigonakwa jikjjatarakiyäta. Jupanakaw suma kusistʼañanak ajlliñ yatichapjjetäna, ukaw Jehová Diosamp jukʼamp sum apasiñatak yanaptʼitäna” sasa.

15. ¿Kunsa Pablojj Timoteor ewjjtʼäna? (2 Timoteo 2:20-22).

¹⁵ Maynejj congregacionan jan wali amigötap amuysta ukhajj ¿kunsa lurasma? Nayrïr patak maranakan utjkäna uka cristiano congregacionanjja, Diosar jan taqe chuyma servir cristianonakaw utjäna, ukwa apóstol Pablojj yatïna. Ukatwa jupanakat jitheqtañapatak Timoteor ewjjtʼäna (2 Timoteo 2:20-22 liytʼäta). Alajjpachankir Awkisampi sum apasitasajj wali valoraniwa, jupamp sum apasiñatakejj wal chʼamachasiwaytanjja. Ukhamajj janiw Jehová Diosamp sum apasitas aptʼasiykistaspa uka amigonakanïñasäkiti (Sal. 26:4).

16. ¿Kunanak lurañsa amtasma?

¹⁶ Yanaptʼkiristam uka amtanakar puriñamawa. Ukanakajja Diosar jukʼamp confiyañataki, suma cristianöñatak yanaptʼkiristam ukanakawa (Efes. 3:16). Ukatakejj sapa kutiw Bibliat yatjjatasma, sapürurakiw Biblia liytʼasma (Sal. 1:2, 3). Ukatjja jukʼampiw Jehová Diosar chuymatpach orarakisma. Inas kusistʼañanak wali amuyumpi ajlliñamächini, tiempo jan ina chʼusar aptʼasiñsa yateqañamächini (Efes.  5:15, 16). Jehová Diosajja, jupar serviñan wal chʼamachasitam uñjasajj wal kusisi.

17. ¿Mayninakar yanaptʼañajj kunjamsa yanaptʼätam?

¹⁷ Mayninakar yanaptʼasajj Diosar serviñanwa jiltäta. Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35). Chʼamamampi ukat tiempo apstʼasisa mayninakar yanaptʼäta ukhajja, wali kusisitaw jikjjatasïta. ¿Kunjamsa mayninakar yanaptʼasma? Inas usut jilat kullakanakaru jan ukajj jilïrinakar lurañanakamp yanaptʼchisma, jan ukajj inas celularapampi tabletapampi yanaptʼarakchisma. Jumatï bautisat waynitüsta ukhajja, siervo ministerialjam serviñwa amtasma, ukhamat jilat kullakanakar yanaptʼañataki (Filip. 2:4). Khitinakatï Diosar jan uñtʼapki ukanakar Reinon suma yatiyäwinakap yatiyasaw munasitam uñachtʼayarakisma (Mat. 9:36, 37). Ukatjja precursor regularata, Betelana jan ukajj construccionan serviñwa amtasma.

18. ¿Kunjamsa Diosar jukʼamp serviñajj jupar serviñan jiltañatak yanaptʼiristam?

¹⁸ Diosar jukʼamp serviñajja, Diosar serviñan jiltañatakiw yanaptʼätam. Precursor regularat servïta ukhajja, Escuela para Evangelizadores del Reino ukaruw sarasma, Betelana jan ukajj construccionanwa servirakisma. Precursorat serviri Kaitlyn sat mä tawaqo kullakajj akham siwa: “Experienciani jilat kullakanakamp predicañajja, bautisasjjayäta uka qhepat Diosar serviñan jukʼamp jiltañatakiw yanaptʼawayitu. Jupanakat yateqasiñajj Bibliat jukʼamp yatjjatañataki, suma yatichirïñatakiw yanaptʼitäna” sasa.

19. Diosar serviñan jiltaskakïta ukhajj ¿kuna bendicionanaksa katoqäta?

¹⁹ Diosar serviñan jiltaskakïta ukhajja, walja bendicionanakwa katoqäta. Kunanakatï jan servirïki ukanakampis janiw tiempo aptʼaskätati (1 Juan 2:17). Mayninakajj jan wali amtanakar purisajj jan walinakanwa uñjasipjje, ukampis jumajj janiw ukhaman uñjaskätati. Kusisita ukat sumaw jakasirakïta (Prov. 16:3). Yateqaskay sarnaqatamajja, yaqha jilat kullakanakarusa, wayn tawaqonakarusa, jilïr jilat kullakanakarus wal chʼamañchtʼani (1 Tim. 4:12). Jukʼampis Jehová Diosamp suma uñjatätam yatisasa, amigomätam yatisas sumakiw jikjjatasïta, kusisitarakiyätawa (Prov. 23:15, 16).