1. ¿Kunsa babilonionakajj Daniel waynat uñjapjjäna?

 DANIEL PROFETAJJ waynäkäna ukhajja, oraqepatsa utapatsa wali jayaruw babilonionakajj presot apapjjäna. Danielajj waynäkchïnsa ‘kuntï mä jaqejj nayrapamp uñjkaspa’ ukwa babilonionakajj uñjapjjäna, jupajj “jan kuna kamachtʼata suma uñnaqtʼani” waynitünwa, wali importante mä familiatwa jutarakïna (1 Sam. 16:7). Ukatwa palacion serviñapatak yatichapjjäna (Dan. 1:3, 4, 6).

2. ¿Kunatsa Jehová Diosajj Danielar munasïna? (Ezequiel 14:14).

² Jehová Diosajj Danielar wal munasïna, ukampis janiw suma uñnaqtʼanïtapatsa wali importante familiat jutatapatsa munaskänti, jan ukasti kunjam jaqëñsa jupajj amtäna uk uñjasaw jupar munasïna. ¿Kunatsa ukham sistanjja? Danielajj waynitükäna jan ukajj mä 20 maranïkäna ukhajja, Jehová Diosajj jupat jan jitheqtas walja maranak servipkäna uka Noé ukat Job chachanakan sutinakapamp chikwa Danielar aytäna (Gén. 5:32; 6:9, 10; Job 42:16, 17; Ezequiel 14:14 liytʼäta). Jehová Diosajj Danielar munasiskakïnwa, jupajj walja maranakaw sum jakasiwayäna (Dan. 10:11, 19).

3. ¿Kunanakatsa aka yatichäwin yatjjataskañäni?

³ Aka yatichäwinjja, Danielajj kunjam chuymanïnsa ukanakat pay uñjañäni, ukham chuymanïtapaw Jehová Diosatakejj wali valoranïna. Nayraqatjja, Diosat jan jitheqtañasa jan ajjsartʼirïñas kamsañsa muni ukwa yatjjatañäni, kunjamanakansa Danielajj ukham chuymanïtap uñachtʼayäna ukwa mä qhawqha uñjarakiñäni. Ukatjja kunsa ukham chuymanïñatakejj luräna ukwa yatjjatarakiñäni. Ukjjarusti, jupjamäñatakejj kunsa lursna ukwa amuytʼarakiñäni. Aka yatichäwejj wayn tawaqonakatakis qellqatäkchejja, taqeniw Danielat yateqsna.

4. ¿Kunjamsa Danielajj jan ajjsartʼirïtap mä kutejj uñachtʼayäna?

⁴ Jan ajjsarir jaqejj awisajj ajjsarayaskchisa, janiw kunatï walïki uk lurañatakejj ajjsarayasiñapäkiti. Danielajj jan ajjsartʼir waynänwa. Kuna pä toqensa jan ajjsartʼirïtap uñachtʼayäna uk uñjañäni. Amuyatajja, babilonionakajj Jerusalén mark tukjapkäna uka pä mara qhepatwa nayrïr kut jan ajjsartʼirïtap uñachtʼayäna. Nabucodonosor reyejj ajjsarkañ mä samka samkasïna, ukanjja mä jachʼa estatua uñjäna. Ukatwa reyejj kunsa samkasïna, uka samkajj kamsañs muni uk sapjjañapatakejj Babiloniankir taqe yatjjattʼatanakampir Daniel waynampir mayïna. Janitï uk sapkaspänjja, jupanakat taqeniruw jiwarayaspäna (Dan. 2:3-5). Danielajj jankʼakiw kuns lurañapäna, janitï jankʼak kuns lurkaspänjja, waljaniw jiwarapjjaspäna. Ukatwa “kuntï uka samkapajj sañ munki uk reyir qhanañchañatak tiempo mayïna” (Dan. 2:16). Uk lurañatakejj Diosar confiyiri jan ajjsartʼiri ukhamäñapänwa. ¿Kunatsa? Kuna laykutejj uka nayrajj samkanak Danielajj qhanañchänwa sasajj janiw Bibliajj siskiti. Danielajj Sadrac, Mesac, Abednego b amigonakapampiw parläna. “Jupanakarojj alajjpachankir Diosar khuyapayasiñ mayipjjañapatakiw mayïna, ukhamat jupanakar uka secreto qhanañchañapataki” (Dan. 2:18). Jehová Diosasti orasitanakapar istʼänwa, Diosan yanaptʼapampiw Daniel waynajj reyin samkap qhanañchäna. Danielasa amigonakapas jiwañat salvasipjjänwa.

5. ¿Kunjamsa Danielajj yaqha horasan jan ajjsartʼirïtap uñachtʼayäna?

⁵ Reyejj samkaskäna uka jachʼa estatuajj kamsañs muni uk qhanañchkäna uka pasatatjja, Danielajj yaqha jan walinwa uñjasïna, ukhajj jan ajjsartʼirïtapwa uñachtʼayañaparakïna. Mä urojja, Nabucodonosor reyejj ajjsarkañ yaqha samka samkasïna, ukanjja mä jachʼa qoqa uñjäna, Danielajj jan ajjsartʼasaw uka samkajj kamsañsa munäna uk reyir qhanañchäna, loqheruw tuküta mä tiempojj janiw reyëjjätati sasaw yatiyarakïna (Dan. 4:25). Danielajj jupa contras saytʼkaspa ukhamwa Nabucodonosor reyejj amuyaspäna, jupar jiwayapjjañapatakiw mä orden churarakispäna. Ukampis Danielajj jan ajjsartʼasaw kuntï sañapäkäna uk arsüna.

6. ¿Kunas Danielarojj jan ajjsarirïñatak yanaptʼpachäna?

 ⁶ ¿Kunas Danielarojj jan ajjsartʼirïñatak jakäwipan yanaptʼpachäna? Waynäkäna ukhajj awk taykapan yateqaskañ sarnaqapjjatapatwa yateqpachäna. Awk taykapajj kuna instruccionanaktï Jehová Diosajj israelit awk taykanakar churkäna ukarojj istʼapjjapunïnwa, Diosan Leyipats Danielarojj yatichapjjarakïnwa (Deut. 6:6-9). Danielajj janiw Tunka Mandamientonakak yatkänti, jan ukasti israelitanakajj kuna manqʼañanaksa manqʼapjjaspa jan manqʼapkarakispa uk sum yatïna (Lev. 11:4-8; Dan. 1:8, 11-13). c Ukatsti Diosan markapan sarnaqäwip sum yatïna, Diosan leyinakapar jan istʼapkäna ukhajj kunas jupanakar pasäna uksa yatirakïnwa (Dan. 9:10, 11). Taqe kunanakatejj jakäwipan paskäna ukanakajja, Jehová Diosasa chʼamani angelanakapas jupar yanaptʼaskatapat jan payachasiñapatakiw yanaptʼäna (Dan. 2:19-24; 10:12, 18, 19).

7. ¿Kunas Danielarojj jan ajjsarirïñatak yanaptʼäna? (Dibujo uñjjattʼarakïta).

⁷ Danielajja, Diosan profetanakapajj qellqapkäna ukanakat yatjjatapunirïnwa, ukanakat mayajj Jeremías profetan qellqatapawa. Ukanakat yatjjatasajja, Babiloniar apat judionakajj markapar niya kuttʼañampïsipkatapwa amuyäna (Dan. 9:2). Profecianakajj kunjamsa phoqasiskäna uk uñjasajja, Jehová Diosarojj jukʼampiw confiypachäna. Maynejj Jehová Diosar jukʼamp confiyki ukhajja, jan ajjsartʼirïtapajj jukʼampiw jiljjattaraki (Romanos 8:31, 32, 37-39 liytʼarakïta). Alajjpachankir Awkipar wal orasiñaw Danielarojj wal yanaptʼäna (Dan. 6:10). Juchanakapwa arsusirïna, kunjamsa jikjjatasïna taqe ukanakwa yatiyirïna, yanaptʼsa mayirakirïnwa (Dan. 9:4, 5, 19). Danielajj jiwasjam jaqekirakïnwa, janiw jan ajjsarirejj naskänti. ¿Jan ajjsarirïñ yateqañatakejj kunsa lurañapäna? Diosan Arupat yatjjatañapänwa, orasiñapänwa, Jehová Diosaruw confiyañaparakïna.

8. ¿Kunas jan ajjsarañatakejj yanaptʼistani?

⁸ Awk taykasajj janis ajjsarirïpkchejja, jan ajjsarirïñatakis chʼamañchapkchistojja, janiw jan ajjsarir nasktanti, jan ajjsarirïñatakejj jiwasaw chʼamachasiñasa. Jan ajjsarirïñajj mä kun yateqañampi sasiwa. Mä kun sum lurañ yateqañatakejja, yatichirisarojj sum uñchʼukiñasawa, jupjam lurañasarakiwa. Jan ajjsarirïñatakejja, jan ajjsarirïpki ukanakatwa yateqasiñasa, jupanak kikpaw lurañasaraki. ¿Kunsa Danielat yateqsna? Bibliat sum yatjjatañasawa, Jehová Diosan amigopäñasarakiwa, ukatakejj chuymatpachaw wal orasiñasa, jupajj yanaptʼapunitaniwa sasin confiyañasarakiwa. Taqe ukanaktï lurañänejja, Diosar confiyatasajj yantʼat uñjaskani ukhajj janiw kunarus ajjsarkañäniti.

9. ¿Kunjamsa jan ajjsartʼirïñajj yanaptʼistu?

⁹ Jan ajjsartʼirïñajj yanaptʼistaspawa. Alemania markankir Ben d sat jilatat amuytʼañäni. Escuelapanjja, evolución yatichäwiruw creyipjjäna, Bibliajj taqe kunas Diosan luratawa sasin qhanañchki ukajj janiw cheqäkiti sapjjarakïnwa. Mä urojja, Diosaw taqe kuns lurawayi sasin kunatsa jan payachaski uk qhanañchtʼañapatakiw mayipjjäna, jilatasti kuntï creykäna uk jan ajjsartʼasaw qhanañchtʼäna. ¿Ukajj yanaptʼänti? Jilatajj akham siwa: “Profesorajajj sumwa istʼitäna, kunanaktï yatjjatkayäta ukanakatjja, taqpach compañeronakajaruw copianak churarakïna” sasa. ¿Ben jilatan compañeronakapajj kunsa lurapjjäna? Jilatajj akham siwa: “Jupanakat waljanejj sum istʼapjjetäna, nayar  ukham parlir uñjasin musparapjjatapsa sapjjarakitänwa” sasa. ¿Kunsa jilatan experienciapajj uñachtʼayistu? Jan ajjsartʼirïpki ukanakajj respetayasipjjewa, mayninakarojj Jehová Diosar jukʼamp uñtʼañ munapjjañapatakis yanaptʼarakispawa. Ukhamajj jan ajjsartʼirïñatak chʼamachasiñajj janiw inamayäkiti.

10. ¿Jan jaytjasirïñajj kamsañsa muni?

¹⁰ Biblianjja, “jan jitheqtiri” jan ukajj “munasiri jan jaytjasiri” sasin traducitäki uka hebreo arojj munasiñata, taqe chuym jan jitheqtirïñat parlañatakiw apnaqasi. Jilapartejja, Diosajj servirinakapar munasitapat parlañatakiw apnaqasi, Diosan servirinakapajj jupanakkam munasipki ukat parlañatakejj uka pachpa aruw apnaqasiraki (2 Sam. 9:6, 7). Jehová Diosajj jupat jan jitheqtañaswa munaraki. Tiempompejja, jukʼampiw Diosat jan jitheqtkañäniti. Ukaw Daniel profetan jakäwipan uñjasïna.

11. ¿Kunjamsa Danielajj 90 jila maranëjjäna ukhajj Diosat jan jitheqtatap uñachtʼayäna? (Nayrïr paginankir dibujo uñjjattʼäta).

¹¹ Danielajj jakkäna taqe uka urunakanjja, Jehová Diosat jan jitheqtatap walja kutiw uñachtʼayäna. Ukampis 90 jila maranëjjäna ukhajja, mä jachʼa yantʼanwa uñjasïna. Uka tiempon Babilonia markajj medonakampi persanakampi apnaqatänwa, Darío reyiw apnaqaskarakïna. Palacion trabajirinakat yaqhepajj Danielar uñisipjjänwa, janirakiw Jehová Diosar respetapkänti. Ukatwa Danielar jiwayañatakejj arustʼasipjjäna. Danielar yantʼañatakejj Darío reyimpiw mä ley apsuyapjjäna: Danielajj Diosat jan jitheqtiriti jan ukajj Darío reyit jan jitheqtiricha ukwa uñachtʼayañapäna. Reyit jan jitheqtirïtap uñachtʼayañatakisa jan castigatäñatakisa, Danielajj 30 urunakaw Jehová Diosar jan orasiñapäkänti. Jupajj janiw Diosat jitheqtkänti, ukatwa leonanakan putupar jaqontapjjäna. Ukampis jan jitheqtatapatwa Jehová Diosajj jupar salväna (Dan. 6:12-15, 20-22). ¿Kunas Danieljam jan jitheqtirïñatakejj yanaptʼistaspa?

12. ¿Kunsa Danielajj Jehová Diosat janipun jitheqtañatakejj luräna?

¹² Jehová Diosat jan jitheqtañatakejja, juparojj taqe chuymaw munasiñasa. Danielajj alajjpachankir Awkiparojj wal munasïna, ukatwa jupat jan jitheqtkänti. Jehová Diosajj kunjam chuymanisa, kunjamsa suma chuymanïtap uñachtʼayi ukanakat lupʼisaw Diosar jukʼamp  munasjjpachäna (Dan. 9:4). Ukatsti kuna sumanaktï Jehová Diosajj jupa laykusa markap laykus lurkäna ukanakatwa lupʼïna, wal yuspärarakïna (Dan. 2:20-23; 9:15, 16).

13. 1) ¿Kuna yantʼanakansa wayn tawaqonakajj Diosat jan jitheqtapjjatapat uñjasipjje? Mä experienciamp uk qhanañchtʼam. (Foto uñjjattʼarakïta). 2) “¿Jehová Diosan Testigonakapajj warmi masipampi jan ukajj chacha masipampi sarnaqerinakarojj apoyapjjtati?” sasin jisktʼistaspa ukhajj ¿kamsasas jupanakar qhanañchtʼsna? (“Kunatï cheqapäki ukajja sumankañwa apanini” sat video jw.org cheqan uñtäta).

¹³ Jehová Diosar servir wayn tawaqonakajja, Danieljamarakiw Diosar jan respetiri leyinakapar jan istʼiri jaqenak taypin jakapjje. Uka jaqenakajj Diosaruw munasta sirinakarojj uñisipjjaspawa, wayn tawaqonakarus Diosat jitheqtapjjañapatakiw kunaymanit waytʼapjjaspa. Ukaw Australia markan jakiri Gabriel jilatarojj pasäna. Waynitöjjäna ukhajj colegiopan mä yantʼanwa uñjasïna, profesorapajj mä amigotï chachanakaw gustitu sasin siristam ukhajj kunsa lurasma sasaw jisktʼäna. Khitinakatï uka amigor apoyapkta ukanakajj mä lador saytʼasipjjam, jan apoyapkta ukanakajj maysa lador saytʼasipjjarakim sasaw sarakïna. Gabriel jilatajj akham siwa: “Taqeniw uka amigor apoyirinak toqen saytʼasipjjäna, nayampi mayni Testigompikiw jan apoyirinak toqen saytʼasipjjayäta” sasa. Kunatï ukjjarojj paskäna ukhaw Gabriel jilatan Diosat jan jitheqtirïtapajj jukʼamp yantʼat uñjasïna. Jilatajj akham siwa: “Clasen tukuyañapatakejj waliw faltaskäna, compañeronakajas profesorajas nanakarojj taqe uka horasaw jiskʼachapjjetäna, burlasipjjarakitänwa. Tranquilokïñatakisa, Biblian yatichäwinakap qhanañchtʼañatakis wal chʼamachasiyäta, ukampis janiw istʼañ munapkitänti” sasa. ¿Kunjamas Gabriel jilatajj jikjjatasïna? Jilatajj akham siwa: “Cheqas jiskʼachapkitäna ukajj janiw gustkitänti, ukampis Jehová Diosat jan jitheqtatajatsa Biblian yatichäwinakap arjjatatajatsa, wal kusisiyäta” sasa.

14. ¿Kunsa Jehová Diosat janipun jitheqtañatakejj lursna?

¹⁴ Jiwasatï Jehová Diosar taqe chuym munasiñatak chʼamachasiñäni ukhajja, Danieljamarakiw Jehová Diosat janipun jitheqtkañäniti. Diosar munasitasajj jukʼamp jiltañapatakejja, jupajj kunjam chuymanisa uk sum uñtʼañasawa, ukatakejj kunanaktï jupajj lurawayki ukanakatwa yatjjatsna (Rom. 1:20). Wayn tawaqo, ¿Jehová Diosar jukʼamp munasiñamatakisa jukʼamp respetañamatakis kuna yanaptʼanakas utji? “¿Khitin luratäpachasa?” siski uka cheqanjja, videonakwa uñtasma, jukʼa arunakamp qhanañchtʼat yatichäwinakwa liytʼarakisma. Ukatsti ¿Es la vida obra de un Creador? ukat El origen de la vida. Cinco cuestiones dignas de análisis sat folletonakwa liytʼarakisma. Dinamarca markankir Esther sat mä tawaq kullakajja, uka folletonakat akham sänwa: “Uka folletonakajj kunjamsa wali sum amuytʼayi ukajj wal gustitu, janiw kunarutï creyiñamäki uk sisktamti, jan ukasti juma pachpa mä amtar puriñamatakiw yanaptʼtamjja” sasa. Párrafo 9 ukan parlaniwayktan uka Ben jilatajj akham siwa: “Uka qellqatanakajj Diosar jukʼamp confiyañatakiw yanaptʼawayitu. Jakañ vidajj Diosan lurtʼatawa sasin creyiñatakiw yanaptʼitu” sasa. Taqe ukanak yatjjatasajja, inas kuntï Apocalipsis 4:11 texton siski ukan cheqätap amuyarakchïta, ukan akham siwa: “Nanakan Jehová Diosaja, jumaw jachʼañchäwi, honra katoqañatakisa, chʼamanïñatakisa derechonïtajja. Jumaw taqe kunsa lurtajja” sasa. e

15. ¿Jehová Diosamp suma amigöñatakejj kunampsa luraraksna?

¹⁵ Jehová Diosar jukʼamp munasiñatakejja, Jesús Yoqapat yatjjatañaw yanaptʼarakistani. Ukwa Alemania markan jakiri Samira sat tawaq kullakajj luräna. Jupajj akham siwa: “Jehová  Diosarojj Jesús toqew jukʼamp sum uñtʼawayta” sasa. Wawäkäna ukhajja, Jehová Diosan munasirïtap amuyañajj Samira kullakatakejj chʼamänwa, ukampis janiw Jesusat ukham amuykänti. Kullakajj akham siwa: “Jesusajj chuymajaruw purtʼitäna, jupajj wawanakarojj munasïnwa, jupan amigopäñas facilakïnwa” sasa. Jesusar jukʼamp uñtʼäna ukhajja, jukʼampiw Diosar uñtʼjjäna, munasjjarakïnwa. Samira kullakajj akham saskakiwa: “Jukʼat jukʼatwa Jesusajj Awkipjamätap amuyjjayäta, Jesusajj Awkipjamapuniw taqe kuns luri. Nayajj ak amuyarakiyäta, Jehová Diosajj jaqenakamp jukʼamp sum uñtʼayasiñ munäna, ukatwa Yoqaparojj aka oraqer khitanirakïna” sasa (Juan 14:9). Wayn tawaqo, jumatï Jehová Diosamp jukʼamp suma amigöñ munsta ukhajja, ¿janit Jesusar jukʼamp sum uñtʼañatak chʼamachaskasma? Ukhamtï lurätajja, jukʼampiw Jehová Diosar munasïta, janirakiw jupat jitheqtkätati.

16. ¿Kunjamsa mayninakar jan jaytjirïñajj yanaptʼistu? (Salmo 18:25; Miqueas 6:8).

¹⁶ Jilapartejja, khitinakatï mayninakar jan jaytjirïpki ukanakajj suma amigonakanïpjjewa, walja tiempow suma amigöpjjaraki (Rut 1:14-17). Jehová Diosat jan jitheqtkañäni ukhajja, chuymasan sumakiw jikjjatasiñäni. ¿Kunatsa? Kuna laykutejj Jehová Diosajj jupar jan jaytjir amigonakaparojj jan jaytjañwa arsuwayi (Salmo 18:25; Miqueas 6:8 liytʼäta). Taqe chʼamani Luririsat sipan janis kunäkstanjja, jupajj wiñayatakiw amigosäñ muni. ¿Janit ukajj kusiskañäki? Janiw kuna yantʼasa, kuna enemigosa, ni jiwañas Jehová Diosamp sum apasitas aptʼasiykistaspati (Dan. 12:13; Luc. 20:37, 38; Rom. 8:38, 39). Ukhamajj Daniel profetat yateqasitasasa Jehová Diosat jan jitheqtatasas janiw inamayäkaniti.

17, 18. ¿Kunanakampsa Danielat yateqsna?

¹⁷ Aka yatichäwinjja, Danielajj kunjam chuymanïnsa ukanakat paya yateqawaytanjja, ukampis jakäwipat jukʼampinakwa yateqsna. Jehová Diosajj Danielarojj samkanak samkasiyäna, visionanak uñjayäna, profecianakajj kamsañsa muni uk qhanañchañapatakiw yanaptʼarakïna. Uka profecianakat waljaw phoqasiwayjje, yaqhep profecianakasti kunanakas jutïrin pasani kunjamsa aka oraqenkir jaqenakarojj yanaptʼani mayjtʼayarakini ukwa qhanañchistu.

¹⁸ Jutïr yatichäwinjja, Daniel libronkir pä profecianakat yatjjataskarakiñäni. Uka profecianakat sum amuytʼañajja, wayn tawaqonakarus jilïrinakarus taqeniruw jichha tiempon suma amtanakar puriñatak yanaptʼistu. Uka profecianakaw jan ajjsarirïñatakisa jan jaytjasirïñatakis yanaptʼarakistani, ukhamatwa niya puriniñampïski uka yantʼanakar saykatañatakejj wakichtʼatäñäni.