• “Esposojajj yaqha warmimpis kutin kutin engañjkitaspa ukhamwa amuyasiyäta”.

• “Jiskʼachata, jan suma uñnaqtʼani, jan kunatak servir warmïkiristsa ukhamwa amuyasiyäta”.

• “Sapakiw tʼaqesiyäta. Janiw khitimpis uka toqet parlañ puedirïkti”.

• “Jehová Diosarojj janis importkirista ukhamwa amuyasiyäta”.

Uka arunakajja, esposopan pornografía uñchʼukitapat kunjamsa mä warmejj tʼaqesi ukwa uñachtʼayi. Esposotï phajjsinaka jan ukajj mara mara pornografía jamasat uñchʼukiskchi ukhajja, esposatakejj jupar wasitat confiyjjañajj chʼamakïspawa. Mä warmejj akham siwa: “Esposojajj justupakiw nayatakejj yaqha jaqjamäjjäna, kunanakamps imtʼaskpachïtu sasaw jisktʼasirïta” sasa.

¿Esposomajj pornografía uñchʼukiñarut purtʼasi? a Aka yatichäwejj jumjam uñjasiri kullakanakatak wakichtʼatawa. Aka yatichäwinjja, Biblian wiñay yatichäwinakapatwa yatjjatasini, ukanakaw jumar chuymachtʼätam, Jehová Diosajj jumar yanaptʼaskatapwa amtayarakïtam, wasitat kusisitäjjañatakisa Jehová Diosan jakʼapankaskakiñatakis yanaptʼarakïtamwa. b

Esposomajj kunanaksa luraski uk janis taqpach yatkchïtajja, kunanakatï chuymaman sumak jikjjatasiñatak yanaptʼkiristam ukanakwa lurasma. Ukatakejj mä qhawqha ewjjtʼanak yatjjatañäni.

Jan juchañchasimti. Inas mä warmejj esposopan pornografía uñchʼukitapat jupas juchanïkaspa ukham amuyaschispa. Alicia c kullakajja, jupas esposopan pornografía uñchʼukiñapatakejj juchanïkaspa ukhamwa amuyasïna, akham sasaw jisktʼasirakïna: “¿Kunatsa esposojajj nayar uñchʼukiñat sipans yaqha warminakar uñchʼukpacha?” sasa. Yaqhep esposanakajja, kunjamas jikjjatasipjje ukat jupanak pachpaw juchañchasipjje, jupanakas uka jan waltʼäwin jukʼamp jan walir sarañapatak juchanïpkaspa ukhamwa amuyapjje. Daniela kullakajj akham sarakiwa: “Esposojan pornografía uñchʼukiskakitapat walpun colerirïta. Walpun llakisirïta, nayas matrimoniojar jan waltʼaykirista ukhamwa amuyasirïta” sasa.

Jumatï ukhaman uñjassta ukhajja, kuntï esposomajj lurki ukat jumas juchanïkasma ukham janiw Jehová Diosajj uñjktamti, uk amtapunim. Santiago 1:14 textojj akham siwa: “Sapa mayniw munañapampi apayasisa munañapampi katuntayasisajj  yantʼat uñjasi” sasa (Rom. 14:12; Filip. 2:12). Ukhamajj Jehová Diosajj janiw jumar juchañchktamti, antisas jupat jan jitheqtatam wali valoranitwa uñji (2 Crón. 16:9).

Esposomatï pornografía uñchʼukchi ukhajja, janiw ukajj janis suma uñnaqtʼani warmïkasma ukham sañ munkiti. Uk amuyañaw wal yanaptʼiristam. Uka toqet yatjjattʼatanakajja, “kunanaktï mä warmejj jan lurkaspa uka jan wali amuyunakwa mä chachan utjayaspa” sasaw sapjje.

Jan sint llakisimti. Catherine kullakajj akham siwa: “Esposojan pornografía uñchʼukitapat uruy arumaw llakisirïta, janiw pʼeqejat uk apsuñ puedirïkti” sasa. Francisca kullakajj akham sarakiwa: “Esposojan jan kawkinkatap yatisajj chuymajan walpun llakisirïta, jurnälpachaw wal llakisirïta” sasa. Yaqhep esposanakajja, esposopan pornografía uñchʼukiskatap yatipki uka jilat kullakanak taypinkasajj wal phenqʼasipjje. Yaqhepajj saparstʼatjamaw amuyasipjje, kunjamans uñjasipjje uk janis khitis entiendkaspa ukhamwa amuyasipjjaraki.

Ukham jikjjatasitamajj janiw jan walïkiti, ukampis uka toqetak lupʼiskakïta ukhajja, jukʼampikiw llakisjjasma, antisas Jehová Diosamp sum apasitamat lupʼiñamaw jukʼamp walïspa, ukaw nayrar sarantaskakiñatakejj chʼam churätam (Sal. 62:2; Efes. 6:10).

¿Kunjamsa Biblia liyiñasa kuntï liytʼkta ukat lupʼiñas yanaptʼiristam? Biblianjja, sinti jan walinakan uñjasir warminakatwa parli, ukampis llakinakap Jehová Diosar yatiyasajj sumakiw jikjjatasjjapjjäna. Janis Diosajj llakinakap askichkapunkchïnjja, sumankañwa jupanakar churäna. Kunas Anampejj pasäna uk amuytʼam, jupajj “wali llakitapunïnwa”. Anajj “Jehová Dios nayraqatan wali jaya[w] oración luraskäna”, kunarus taqe kunas tukuyañapäna uk janis yatkchïnjja, sumakiw jikjjatasjjäna (1 Sam. 1:10, 12, 18; 2 Cor. 1:3, 4).

Congregacionankir ancianonakan yanaptʼap mayim, jupanakajj “thayat jarkʼaqasiñatak mä imantasiñ lugarjamäpjjaniwa, wal purintir jallut jarkʼaqasiñatak mä imantasiñ lugarjamäpjjaniwa” (Is. 32:2). Jumar chuymachtʼañapatakisa confianzampi parltʼasiñamatakisa, kawkïr kullakampis parltʼasma ukwa ancianonakajj sapjjarakiristam (Prov. 17:17).

“¿Esposojar pornografía uñchʼukiñ jaytañapatak yanaptʼiristti?” sasin inas jisktʼassta. Jïsa, yanaptʼasmawa. Bibliajja, mä jan waltʼäw askichañatakisa jan ukajj wali chʼamani enemigor atipjañatakisa, “mayni sapat sipansa paniniw jukʼamp sumajja” sasaw qhanañchi (Ecl. 4:9-12). Uka toqet yatjjatatanakajj akwa amuyapjje: chacha warmejj jupanakkam yanaptʼasipjje ukhajja, pornografía uñchʼukiñar yatintatäki ukarojj facilakiw yanaptʼasispa, jupanakkamas wasitatwa confianzampi uñjasjjapjjarakispa.

Esposomar yanaptʼañatakejja, cheqapunit pornografía uñchʼukiñ jaytañ muni janicha, uk jaytañatakejj chʼamachasiti janicha ukwa amuytʼañama. ¿Jehová Diosar chʼam mayisiti? ¿Ancianonakan yanaptʼaps thaqarakiti? (2 Cor. 4:7; Sant. 5:14, 15).  ¿Kunanaksa esposomajj pornografía jan uñchʼukjjañatakejj luri? ¿Nayrat sipans jukʼa tiempokit celularsa, tabletsa, yaqha ukhamanaks apnaqjje? ¿Kunanakatï pornografía uñchʼukiñar purtʼasiykaspa ukanakat jitheqtaskiti? (Prov. 27:12). ¿Juman yanaptʼam katoqasiñ muniti? ¿Jan kun imtʼasat jumamp parltʼasi? Ukhamächi ukhajja, inas jumajj jupar yanaptʼchisma.

Ukampis ¿kunjamsa yanaptʼasma? Felisa kullakajj kunsa luri uk amuytʼañäni. Jupajj Héctor jilatamp casaratawa, Hectorajj wawatpachaw pornografía uñchʼukiñar yatintatäna. Esposopajj pornografía wasitat uñchʼukiñ muni ukhajja, Felisa kullakajj esposopan jupar yanaptʼa mayiñatak jakʼachasiñapatakejj wal chʼamachasi. Héctor jilatajj akham siwa: “Esposajarojj jan kun imtʼasaw qhan parltʼirista. Jupajj wali munasiñampiw uñjitu, pornografía uñchʼukiñar jan wasitat purtʼasiñajatakis yanaptʼarakituwa. Kunjamsa pornografía jan uñchʼukiñatakejj chʼamachasiskta uk sapa kutiw jisktʼarakitu. Internet amuyumpi apnaqañatakis yanaptʼarakituwa” sasa. Cheqas esposopan pornografía uñchʼukiñ munatapajj Felisa kullakarojj wal chuym ustʼayi. Kullakajj akham siwa: “Wali colerata chuyma ustʼatas jikjjataskstjja, janiw ukajj esposojarojj pornografía jaytañapatak yanaptʼkaspati. Nayraqatjja esposojajj kunjamas jikjjatasi uka toqetwa parltʼapjjta, ukatjja kunas jan sint llakisiñatak yanaptʼitaspa uka toqetwa parltʼasipjjarakta” sasa.

Ukham parltʼasiñaw esposorojj pornografía jaytañapatakejj yanaptʼi. Esposopar wasitat confiyjjañapatakiw esposar yanaptʼi. Mä chachajj kunanakans chʼamachasiñapa, kunanaks luraski, kawkinkänsa ukanak esposapar jan imtʼas yatiyki ukhajja, janiw desconfianzajj utj-jjeti.

¿Janit jumajj esposomar yanaptʼañatakejj ukham lurkarakisma? Ukhamächi ukhajja, inas aka qellqatat liytʼasin juntuk yatjjatapjjchisma. ¿Kun lurañatakis esposomajj chʼamachasiñapa? Pornografía jaytjjañataki, esposapan wasitat confiyjjañapatakiw chʼamachasiñapa. Kuna jan waltï esposomajj lurki uka toqet jupamp parlañ munkäta ukhajja, janiw esposomajj colerasiñapäkiti. Antisas kunjamsa uka jan waltʼäwejj jumar llakisiytam uk entiendiñatakiw esposomajj chʼamachasiñapa. ¿Kun lurañatakis jumajj chʼamachasiñamaraki? Pornografía jaytjjañatak chʼamachasitaparojj apoyañamawa, wasitat jupar confiyjjañamatak chʼamachaski ukarojj yanaptʼañamarakiwa. Kunanakas jaqenakarojj pornografía uñchʼukiñarojj api, uk jaytañatakejj kun lurañas wakisispa uk paninpach yatjjatapjjañamajj wali wakiskiriwa. d

 Uka jan waltʼäwit esposojamp jan colerasis parlañajj chʼamäniwa sasin amuysta ukhajja, mä anciano jilataruw mä qhawqha tiempo jumanakampïñapatak invittʼasma, parltʼasipkäta ukans yanaptʼapjjarakiristamwa. Ukham lurapjjäta ukhajja, confianzamp parltʼasipkasma uka ancianoruw invittʼapjjasma. Esposomajj pornografía uñchʼukiñ jaytjjchinisa, inas jupar wasitat confiyjjañamatakejj walja tiempo munaschispa. Jan aynachtʼamti. Sum apasiñatakejj kunanakans mejorasipkta uk uñjañatak chʼamachasim. Panimatejj paciencianïpjjäta ukhajja, tiempompejj jukʼamp sumaw apasjjapjjasma (Ecl. 7:8; 1 Cor. 13:4).

Esposomatï pornografía wasitat uñchʼukjjchi ukhajja, uka luratapat janis arrepentiskaspa jan ukajj janipunis uka jan wal jaytañ puedkaspa ¿ukhamti sañ muni? Janiw ukhampunïkaspati. Esposomatï pornografía uñchʼukiñar yatintatächi ukhajja, inas taqpach jakäwipan uk jaytjjañatak chʼamachasiñapajj wakischini. Walja maranakas ukanak uñchʼukiñ jaytjjchinejja, wasitat ukanak uñchʼukiñar kuttʼarakispawa. Wasitat ukar jan kuttʼañatakejja, kunanakas pornografía uñchʼukiñar purtʼasiyi ukanak taq jaytjjañapaw wakisini, pornografía jaytjjatapsa amuyaschejja, kunanaktï uk jaytañatakejj lurki ukanak lurañatakejj chʼamachasiskakiñapawa (Prov. 28:14; Mat. 5:29; 1 Cor. 10:12). ‘Amuyup machaqar tukuyañatakiw’ chʼamachasiñapa, “kunatï jan walïki” ukar uñisiñs yateqañaparakiwa; pornografiasa, masturbasiñ qʼañu juchas uka taypinkiwa (Efes. 4:23; Sal. 97:10; Rom. 12:9). ¿Esposomajj chʼamachasiskiti? Ukhamächi ukhajja, esposomajj pornografía uñchʼukiñ jaytaspawa. e

Esposomatï pornografía uñchʼukiñ jaytañatak janipun kuns lurañ munkchi ukhajja, kutin kutiniw jumajj chuymas pʼakintata, engañjata, colerata jikjjatasisma. Ukampis taqe llakinakam Jehová Diosar yatiyam, ukaw chuymaman sumak jikjjatasiñamatak yanaptʼätam (1 Ped. 5:7). Jehová Diosar jukʼamp jakʼachasiñatakejj Bibliat yatjjataskakim, orasiskakim, kuntï yatjjatkta ukats lupʼiskakim, kunjamsa Jehová Diosajj jumar jakʼachasi uks amuyarakïtawa. “Jehová Diosajj khitinakatï chuyma pʼakintatäpki ukanakan jakʼapankiwa”, kusisit jakasipjjañapatakis yanaptʼañwa munaraki (Sal. 34:18). Suma cristianjam jakañatakis chʼamachasiskakim, ancianonakamp yanaptʼayasim, jutïrin esposojajj cambianiwa sasin suytʼaskakim (Rom. 2:4; 2 Ped. 3:9).