1. Taqe jaqenakan ¿kuna amtar puripjjañapsa Jehová Diosajj muni?

 JEHOVÁ DIOSAJJ jiwas pachp kuns amtirwa lurawayistu. Sapüruw amtanakar purtanjja. Jehová Diosar jakäwis katuyasiñasa jilat kullakanakamp chik jupar adorañas wali wakiskir amtawa. Jehová Diosajj taqenin uka amtar puripjjañapwa muni. Kuna laykutejj jaqenakar wal munasi, sum jakasipjjañapwa muni. Jupamp sum apasipjjaspa wiñayatak jakapjjaspa ukwa munaraki (Deut. 30:19, 20; Gál. 6:7, 8).

2. Jan arrepentisipki uka juchachasirinakan ¿kun lurapjjañapsa Jehová Diosajj muni? (1 Juan 2:1).

² Jehová Diosajj janiw khitirus jupar servipjjañapatak obligkiti, sapa mayniw kunsa lurani uk amtjjañapa. Bautisat mä jilatatï jan ukajj mä kullakatï mä jachʼa juchar purtʼaschi ukhajj ¿kunas pasaspa? Jan arrepentiskani ukhajj congregacionat apsutäñapawa (1 Cor. 5:13). Ukhamäkchinisa, jucha lurirejj jupan ukar kuttʼanjjaspa ukwa Jehová Diosajj wal muni. Jupajj juchapat arrepentisipki ukanakaruw perdonañ muni, uka wakiskir razonatwa juchampit jiwañampit jaqenakar kutsuyañatakejj Yoqapar khitanïna (1 Juan 2:1 liytʼäta). Jehová Diosajj wali munasiriwa, ukatwa juchachasirinakarojj arrepentisipjjañapatak chʼamañchtʼi (Zac. 1:3; Rom. 2:4; Sant. 4:8).

3. ¿Kunanakatsa aka yatichäwin yatjjataskañäni?

³ Kunjamsa Jehová Diosajj jucha lurañarusa, jachʼa jucha luririnakarus uñji ukwa jupajj qhanañchistu, jupat yateqasiñaswa munaraki. Aka yatichäwiw uk lurañatak yanaptʼistani. Nayraqatjja, nayrïr patak maranakan Corinto markankir congregacionan mä jachʼa jucha luririrojj kunjamsa uñjasïna ukwa yatjjataskañäni. Ukjjarusti, jachʼa jucha lurirejj arrepentisjjäna  ukhajj kuna instruccionanaksa apóstol Pablojj churäna ukwa yatjjataskañäni. Tukuyarusti, kunjamsa Jehová Diosajj jachʼa jucha luririnakarojj uñji ukwa yatjjataskarakiñäni.

MÄ JILATAN JACHʼA JUCHAR PURTʼASITAPAT ¿KUNAS LURASÏNA?

4. ¿Kuna jan walis Corinto markankir congregacionan pasaskäna? (1 Corintios 5:1, 2).

⁴ (1 Corintios 5:1, 2 liytʼäta). Pablojj misionerot kimsïr kut viajkäna ukhajja, ukhak uttʼayat Corinto markankir congregacionan mä jan waltʼäwi utjatapwa yatïna. Uka congregacionankir mä jilataw madrastrapamp qʼañu jucha luraskäna. “Janiw yaqha markanak taypinsa ukham qʼañu juchajj uñjaskiti” sasaw Pablojj uka toqet qhanañchäna. Inas congregacionankirinakajj uka jilatan ukham luratapajj walikïkaspas ukham amuyapjjchïna, khuyapayasiñamp uñjasajj Jehová Diosats yateqasipkaspa ukham inas yaqhepajj amuyapjjarakchïna. Ukampis Jehová Diosajj janiw markapan jucha lurañanak utjañap munkiti. Uka chachan ukham jan phenqʼani jan wal luratapajja, congregacionaruw jan walit uñjayaskäna. Janiw ukakïkänti, jupatï congregación taypinkaskakispänjja, yaqhep cristianonakajj uka pachp lurañ munjjapjjarakispäna. Ukhamajj ¿kuna instruccionanaksa Pablojj Corinto markankir congregacionar churäna?

5. ¿Kamsasas Pablojj congregacionankirinakar ewjjtʼäna, ukampejj kamsañs munarakïna? (1 Corintios 5:13; dibujo uñjjattʼarakïta).

⁵ (1 Corintios 5:13 liytʼäta). Diosan amuytʼayatäsajja, apóstol Pablojj jan arrepentiskäna uka jucha luririr congregación taypit apsupjjañapatakiw mä carta qellqäna. ¿Kunjamsa Diosat jan jitheqtir cristianonakajj uka jaqer uñjapjjañapäna? Pablojj akham sasaw jupanakar säna: “Jan jukʼampi uka jaqempejj chikachasipjjamti janirak manqʼapjjamsa” sasa (1 Cor. 5:11). Manqtʼasiñatak maynimp qontʼastan ukhajja, jupamp parlañasa walja tiempo jupampïñas facilakïspawa. Ukhamajj uka jaqemp jan chikachasipjjañapatakiw Pablojj uka congregacionankirinakar ewjjtʼaskäna, ukham lurañaw congregacionarojj uka chachjam jan wal lurañat jarkʼaqaspäna (1 Cor. 5:5-7). Ukaw uka jaqerojj Jehová Diosar chuym ustʼayatap amuyasiñapatak yanaptʼaspäna, inas jan wal luratapat phenqʼasisajj arrepentisirakchispäna.

6. Pablon cartap katoqasajj ¿kunsa congregacionankirinakajj lurapjjäna, ukat kunsa juchachasirejj lurarakïna?

⁶ Corintonkir congregacionar cartap apayjjäna uka qhepatjja, Pablojj kunjam chuymampis congregacionankirinakajj uka cartap katoqapjjäna ukwa yatiñ munäna. Ukatwa jupajj Tito jilatan suma yatiyäwinakap  katoqasajj wal kusisïna: congregacionankirinakajj suma chuymampiw cartap katoqasipjjäna, Pablon instruccionanakaparjamaw lurapjjarakïna (2 Cor. 7:6, 7). Pablojj cartap apaykäna ukhat mä jukʼa tiempotjja, uka jaqejj jachʼa jucha luratapat arrepentisjjänwa. Sarnaqäwipsa jan wali amuyunakaps apanukjjänwa, Jehová Diosan cheqap mandatonakaparjamaw sarnaqjjarakïna (2 Cor. 7:8-11). Ukjjarojj ¿kuna instruccionanaksa Pablojj uka congregacionar churpachäna?

¿KUNJAMSA CONGREGACIONANKIRINAKAJJ JUCHAPAT ARREPENTISIRIR UÑJAPJJAÑAPÄNA?

7. ¿Kunatakis jucha luririrojj congregacionat apsutäñajj yanaptʼäna? (2 Corintios 2:5-8).

⁷ (2 Corintios 2:5-8 liytʼäta). Pablojj akham sänwa: “Uka jaqerojj niya taqeniw cheqañchjjapjjtajja, ukhak cheqañchjjapjjam” sasa. Mä arunjja, cheqañchatäñajj arrepentisiñapatakiw uka jaqer yanaptʼäna (Heb. 12:11).

8. ¿Kun lurapjjañapatakis Pablojj congregacionankirinakar mayirakïna?

 ⁸ Pablojj kunsa congregacionankirinakajj jucha luririmp lurapjjañapa uk akham sasaw ewjjtʼäna: “Munasiñampi perdonapjjam, chuymachtʼapjjarakim” sasa. Ukjjarojj akham sarakïnwa: “Qhawqsa juparojj munasipjjta uk uñachtʼayapjjañamatakiw nayajj ewjjtʼanipjjsma” sasa. Ukhamajj Pablojj janiw juchachasirirojj aleq ukhamak katoqapjjañap munkänti, jan ukasti juchachasirir cheqpachapun perdonjjapjjatapsa munasipjjataps arunakapampi luratanakapamp uñachtʼayapjjañapwa munäna. Ukhamatwa juchachaskäna uka jilatan kuttʼanitapat cheqpachapun kusisipjjatap uñachtʼayapjjaspäna.

9. ¿Kunatsa yaqhepatakejj juchapat arrepentisirir perdonañajj chʼamäspäna?

⁹ Yaqhep jilat kullakanakajj inas juchachasirirojj jan taqe chuym katoqapkchïnti, Biblian janiw uka toqet parlkiti. ¿Kunatsa ukhamäspäna? Kuna laykutejj uka jilatan jan wal luratapajj congregacionpacharuw jan waltʼayäna, inas yaqhepajj ukham luratapat chuyma ustʼatäpjjarakchïna. Congregacionankirinakajj Jehová Diosan mandatonakaparjam phoqañatakejj wal chʼamachasipjjäna, ukatwa yaqhepajj uka jachʼa jucha luririrojj congregacionan wali munasiñamp katoqañajj janis walïkaspa ukham amuyapjjaspäna (Lucas 15:28-30 liytʼarakïta). Ukampis ¿kunatsa congregacionar kuttʼanir jilatarojj cheqpachapun munasipjjatap uñachtʼayapjjañapajj wali wakiskirïna?

10, 11. Ancianonakatï juchapat arrepentisirir jan perdonañ munapkaspäna ukhajj ¿kunas pasaspäna?

¹⁰ Juchapat arrepentisir chacharutï ancianonakajj congregacionar jan katoqañ munapkaspäna, jan ukajj jilat kullakanakajj jan munasiñamp katoqapkaspäna ukhajj ¿kunjamakis uka chachajj jikjjatasispäna? Jupajj ‘wal llakisitap laykojj aynachtʼaspänwa’, janipunis Jehová Diosan markapar kuttʼañ puedkaspa ukhamwa amuyjjarakispäna, Jehová Diosamp wasitat sum apasjjañatakis janirakiw chʼamachasjjaspänti.

¹¹ Janiw ukakïkänti, jilat kullakanakatï arrepentisir chachar jan perdonañ munapkaspäna ukhajja, Jehová Diosamp sum apasipjjatapwa aptʼasipjjaspäna, kuna laykutejj janiw Jehová Diosat yateqasipjjatap uñachtʼayapkaspänti, jan ukasti Supayat yateqasipjjatapwa uñachtʼayasipkaspäna. Jehová Diosajj arrepentisir juchararanakar perdonañatakejj dispuestokiwa, ukampis Supayajj jan khuyapayasiri, jan sinttʼasiri ukhamawa. Ukham lurasajj Supayampiw apnaqayasisipkaspäna, uka chacharojj Jehová Diosar serviñatwa jarkʼapjjarakispäna (2 Cor. 2:10, 11; Efes. 4:27).

12. ¿Kunjamsa Corintonkir congregacionankirinakajj Jehová Diosat yateqasipjjatap uñachtʼayapjjaspäna?

¹² Corintonkir congregacionankirinakajj ¿kunjamsa Supayat yateqasiñat sipans Jehová Diosat yateqasipjjatap uñachtʼayapjjaspäna? Arrepentisirinakar Jehová Diosjam uñjasaw uk uñachtʼayapjjaspäna. Biblia qellqerinakat yaqhepajj Jehová Diosat kamsapjjänsa uk amuytʼañäni. Davidajj Diosar akham sänwa: “Jumajj suma Diosätawa, perdonañatakis jankʼakirakïtawa” sasa (Sal. 86:5). Miqueas profetajj akham sasaw qellqarakïna: “¿Khitis jumjam Diosajja? ¿Khitis […] juchanakap perdoniri jumjam Diosajja?” sasa (Miq. 7:18). Isaías profetajj akham sarakïnwa: “Jan wali jaqejj thakip jaytpan, yaqhanakar jan walinak lurir jaqejja jan wali amuyunakap jaytpan, Jehová Diosan ukar kuttʼanjjpan, Diosasti jupat khuyaptʼayasiniwa, Diosasan ukar  kuttʼanjjpan, jupasti taqe chuymaw juparojj perdonani” sasa (Is. 55:7).

13. ¿Kunatsa juchapat arrepentisir jaqerojj congregacionar wasitat katoqasiñapäna? (“ ¿Qhawqha tiempots Corintonkir chacharojj congregacionar wasitat katoqasjjäna?” sat recuadro liytʼäta).

¹³ Jehová Diosat yateqasisajja, Corintonkir congregacionankirinakajj juchapat arrepentisirirojj taqe chuymaw katoqapjjañapäna, jupar munasipjjataps uñachtʼayapjjañaparakïnwa. Pablon instruccionanakapar istʼasajja, juchapat arrepentisir chachar perdonasajj ‘taqe kunan istʼasirïpjjatapwa’ uñachtʼayapjjäna (2 Cor. 2:9). Juchachasirejj congregacionat apsutäkäna ukhatjja, mä qhawqha phajjsinakakiw pasaskäna, ukampis cheqañchatäñajj arrepentisiñapatakiw uka jilatar yanaptʼäna. Ukhamajj congregacionan wasitat katoqatäjjañapatakejj janiw ancianonakan jukʼamp tiempo suyapjjañapajj wakisjjänti.

JEHOVÁ DIOSJAM CHEQAPAR UÑJIRI KHUYAPTʼAYASIRÏÑASAWA

14, 15. ¿Kunatï Corintonkir congregacionan paskäna ukat kunsa yateqsna? (2 Pedro 3:9; foto uñjjattʼarakïta).

¹⁴ Kuna jan walitï Corintonkir congregacionan paskäna ukajj kunjamsa askichasïna ukajja, “jiwasar yatichañatakiw qellqasiwayi” (Rom. 15:4). Uka sarnaqäwit akwa yateqtanjja: Jehová Diosajj janiw jachʼa jucha luririnakan markapankapjjañap permitkiti. Yaqhepajja, Diosajj khuyapayasirïtap laykojj juchapat jan arrepentisir jaqerojj congregacionankaskakiñap permitkaspasa ukhamwa  amuyapjjaspa. Ukampis ukajj janiw ukhamäkiti. Jehová Diosajj khuyapayasirïkchisa, janiw kunayman jan walinak lurasiñap permitkiti, janirakiw kunatï walïki jan walïkaraki ukjjat parlir mandamientonakap cambykiti (Jud. 4). Jehová Diosatï jan arrepentisir juchararanakan markapankaskakiñap permitispa ukhajja, jan khuyaptʼayasir Diosätapwa uñachtʼayaspa, kuna laykutejj congregacionankirinakaw jan walin uñjasipjjaspa (Prov. 13:20; 1 Cor. 15:33).

¹⁵ Ukhamäkchisa, Jehová Diosajj janiw khitin tukjatäñaps munkiti, ukwa uka sarnaqäwejj yaticharakistu. Jupajj taqenin salvasipjjañapwa muni. Amuyunakapsa luratanakaps cambiapki, jupamp wasitat sum apasiñatak chʼamachasipki ukanakat khuyaptʼayasiwa (Ezeq. 33:11; 2 Pedro 3:9 liytʼäta). Ukhamajj kunapachatï Corintonkir chachajj arrepentisjjäna, jan wali luratap jaytjjarakïna ukhajja, Jehová Diosajj Pablo toqew uka chachar perdonjjapjjañapatakisa wasitat congregacionar katoqjjapjjañapatakis jilat kullakanakar mayïna.

16. Corintonkir congregacionan jachʼa juchajj kunjamsa askichasïna ukajj ¿kunsa Jehová Diosat yatichtam, ukat kunjamas chuymaman jikjjatasta?

¹⁶ Kunatï Corintonkir congregacionan paskäna uka toqet yatjjatañajja, Jehová Diosajj kunja munasirisa, jan khitir yaqhachas cheqapar juzguirisa ukwa uñachtʼayistu (Sal. 33:5). Ukanak yatisajj jukʼampiw Jehová Diosar jachʼañchañ muntanjja. Cheqas taqeniw pantjasirïtanjja, sapa mayniw jupamp perdonatäñ munaraktanjja. Juchampit jiwañampit kutsuyatäñasatakejj Yoqaparuw Jehová Diosajj khitani, ukhamatwa juchanakas perdonistu, ¡walpun ukat jupar yuspärtanjja! Jehová Diosajj cheqpachapuniw servirinakapar munasi, kunatï sumäki ukwa jupanakatak munaraki, ¡uk yatiñajj walpun chuymachtʼistu!

17. ¿Kunanakatsa jutïr yatichäwinakan yatjjataskañäni?

¹⁷ Jichha tiempon maynitï jachʼa juchar purtʼaschi ukhajj ¿kunjamsa ancianonakajj Jehová Diosjam munasirïpjjatap uñachtʼayapjjaspa? ¿Kunjamsa juchachasirirojj arrepentisiñapatak yanaptʼapjjarakispa? Ancianonakatï maynir congregacionat apsuñ amtapjjani, jan ukajj congregacionar wasitat katoqañ amtapjjani ukhajj ¿kunsa lurañasa? Uka toqenakatwa jutïr yatichäwinakan yatjjataskañäni.