1. Maynejj jachʼa juchar purtʼaski ukhajj ¿kun lurañapatakis yanaptʼasispa?

 CORINTO markankir congregacionan mä chachajj jachʼa juchar purtʼasïna ukhajj kunsa lurapjjañapa ukwa Pablojj Corinto congregacionar qellqäna, ukwa pasïr yatichäwin yatjjataniwaytanjja. Uka jaqejj janiw juchapat arrepentiskänti, ukatwa congregación taypit apsupjjäna. Ukampis kunjamtï aka yatichäwitak texton siskejja, jucha luririrojj arrepentisiñapatakejj yanaptʼasispawa (Rom. 2:4). ¿Kunjamsa ancianonakajj jucha luririr arrepentisiñapatak yanaptʼapjjaspa?

2, 3. Mä jilatana jan ukajj mä kullakan jachʼa juchar purtʼasitap yatstan ukhajj ¿kunsa lurañasa, ukat kunatsa uk lurañasa?

² Mä jilatan jachʼa juchar purtʼasitaps yatksna ukham amuytʼañäni, inas uk luratapat congregacionat apsut uñjaschini. Ukhamächi ukhajj ¿kunsa lursna? Ancianonakan jupar yanaptʼapjjañapatakejja, kunas pasi ukwa jupanakajj nayraqat yatipjjañapa. Ukhamajj ancianonakamp parltʼañapataki, yanaptʼa mayiñapatakiw jupar chʼamañchtʼañasa (Is. 1:18; Hech. 20:28; 1 Ped. 5:2).

³ Ukampis jupatï ancianonakar jan awisañ munkchi ukhajj ¿kunsa lursna? Niyakejjay jupan yanaptʼatäñap munstanjja, jiwasaw ancianonakamp parlirejj sarañasa. Ukham lurasajj jupar munasitaswa uñachtʼaytanjja, kuna laykutejj ancianonakaw jupar yanaptʼapjjaspa. Jupatï jan arrepentiskanejja, jukʼampiw Jehová Diosat jitheqtjjaspa, congregacionarus jan walitwa uñjayarakispa. Ukatwa chʼamäkchi ukhas jan ajjsaras ancianonakamp parlañasa, ukhamatwa Jehová Diosarusa jilatarus jan ukajj kullakarus munasitas uñachtʼayañäni (Sal. 27:14).

 ¿KUNJAMSA ANCIANONAKAJJ MÄ JACHʼA JUCHA LURIRIR YANAPTʼAPJJE?

 4. ¿Kuna amtampis ancianonakajj jachʼa jucha luririmp tantachasipjjañapa?

⁴ Mä jilatatï jan ukajj mä kullakatï jachʼa jucha lurchi ukhajja, congregacionankir ancianonakajj jupanakat kimsa wakichtʼat ancianonakaruw mä comité a taypinkapjjañapatak uttʼayapjje, ukhamat uka kimsa ancianonakajj juchachasirimp tantachtʼasipjjañapataki. Uka ancianonakajj humilde, altʼat chuymani ukhamäpjjañapawa, arrepentisiñapatak yanaptʼapkchinisa, janiw cambiañapatakejj obligapkaspati (Deut. 30:19). Ak sum yatipjjaraki: janiw taqenejj David reyjam arrepentisipkaniti (2 Sam. 12:13). Yaqhepajj Jehová Diosan ewjjtʼanakapar janiw istʼañ munapkiti (Gén. 4:6-8). Ukhamäkchisa, jucha luririn arrepentisiñapatakiw ancianonakajj kunayman toqet chʼamachasipjje. Jupamp tantachtʼasisajj ¿kunsa comité taypinkir ancianonakajj amtapjjañapa?

 5. Jucha luririmp tantachtʼasisajj ¿kuna ewjjtʼsa ancianonakajj amtasipjjañapa? (2 Timoteo 2:24-26; dibujo uñjjattʼarakïta).

⁵ Ancianonakajj Jehová Diosan wali valorani chhaqat ovejaparjamaw jucha luririr uñjapjje (Luc. 15:4, 6). Ukhamajj jucha luririmp tantachtʼasipjje ukhajja, ancianonakajj janiw toqesirjam parlapjjañapäkiti, munasiñampiw uñjapjjañapa. Janirakiw coleratasa ni sinti formalas jucha luririmp tantachasipjjañapäkiti, ni aleq yatiñatakikis jisktʼapjjañapäkaspa ukham amuyapjjañapäkiti. Antisas kuntï 2 Timoteo 2:24-26 (liytʼäta) texton siski ukarjamaw suma chuymanïpjjatap uñachtʼayapjjañapa. Chuymapar purtʼañatakejj taqe horasans suma chuymanïpjjatapa, khuyapayasirïpjjatapa, llampʼu chuymanïpjjatapwa uñachtʼayapjjañapa.

 6. Jucha luririmp janïr tantachtʼaskasajj ¿kunjamsa ancianonakajj Jehová Diosjam amuyañatak wakichtʼasipjje? (Romanos 2:4).

⁶ Ancianonakajj Jehová Diosjam amuyañatakiw wakichtʼasipjje. Apóstol Pablon arunakapatwa amtasipjje, jupajj akham sänwa: “Diosajj wali khuyapayasirïtap laykuw juman arrepentisiñamatak yanaptʼañ munasktamjja” sasa (Romanos 2:4 liytʼäta). Ukhamajj juchachasirinakar Jehová Diosjam khuyapayasiñamp uñjañatakiw chʼamachasipjje. Taqe kunat sipans akwa amtapjjañapa: jupanakajj awatirinakäpjjewa, instruccionanakarjamaw lurapjjañapa, Cristots yateqasipjjañaparakiwa (Is. 11:3, 4; Mat. 18:18-20). Jucha luririmp janïr tantachtʼaskasajja, comité taypinkir ancianonakajj juchachasirir arrepentisiñapatak yanaptʼañatakejj Jehová Diosaruw orasipjjañapa. Kuntï Bibliasa qellqatanakasas siski ukwa yatjjatapjjañapa. Juchachasirejj kunsa amuyi uk  amuyañatakisa, kunatï paski uk sum amuyañatakis Jehová Diosaruw yanaptʼa mayipjjañapa. Kunanakas ukham chuymanïñatakisa, ukham amuyañatakisa, juch lurañapatakis apawayi ukwa amuytʼapjjañaparaki (Prov. 20:5).

7, 8. Jucha luririmp tantachtʼaskasajj ¿kunjamanakatsa ancianonakajj Jehová Diosjam paciencianïpjjatap uñachtʼayapjjaspa?

⁷ Ancianonakajj Jehová Diosjam paciencianïpjjañapawa. Kunjamsa Jehová Diosajj nayra tiempon juchachasirinakar uñjäna uks amtasipjjarakiwa. Amuytʼañataki, Diosajj pacienciampiw Cainar amuytʼayäna, Cainajj istʼasispäna ukhajj sumat uñjatäspänwa, ukampis jan cambiañ munatapat kuna jan walinsa uñjasispäna uksa Diosajj jupar sarakïnwa (Gén. 4:6, 7). Maysa toqetjja, David reyir cheqañchañatakejj Natán profetaruw Jehová Diosajj khitäna, uka profetajj mä uñachtʼäwimpiw chuymapar purtʼäna (2 Sam. 12:1-7). Jan istʼasir Israel markarus ‘kutin kutinirakiw’ Jehová Diosajj ‘profetanakap khitäna’ (Jer. 7:24, 25). Jehová Diosajj servirinakapar yanaptʼañatakejja, janiw jupanakan arrepentisipjjañapkamajj suykänti, antisas jupaw nayraqatajj juch lurasipkchïna ukhas arrepentisipjjañap mayïna.

⁸ Jehová Diosat yateqasisajj ¿kunjamsa ancianonakajj jachʼa jucha luririr yanaptʼapjjaspa? Kunjamtï 2 Timoteo 4:2 texton siskejja, ‘wali pacienciampiw’ jucha luririrojj uñjapjjañapa. Kunatï walïki uk lurañapatakejja, taqe horasans tranquiloki suma arunakampipuniw jupar parlapjjañapa. Ancianonakatï coleramp apayasipjjaspajja, jucha lurirejj janiw ewjjtʼa katoqasiñ munjjaspati, janirakiw arrepentisiñs munjjaspati.

9, 10. ¿Kunsa ancianonakajj juchachasirir amuytʼayañatakejj lurapjjaspa?

⁹ Jilatasa jan ukajj kullakas kunjamatsa juchar purtʼasiwayi uk yatiñatakiw ancianonakajj chʼamachasipjjañapa. Aka jisktʼanakaw jupanakar yanaptʼaspa: ¿Bibliat jan yatjjatjjatapata jan ukajj predikir sapa kut jan sarjjatapatti jukʼat jukʼat aynachtʼawayi? ¿Janit Jehová Diosarojj sapa kuti jan ukajj taqe chuym orasjjäna? ¿Jan walinak lurañ munañampit chuymapan jukʼat jukʼat apayasjjäna? ¿Jan wali amigonakampit chikachasïna jan ukajj kusistʼañatakejj kunatï jan walïki ukanakch ajllïna? ¿Kunjamas Jehová Dios Awkipajj amtanakapatsa luratanakapats jikjjatasi uk amuyiti?

¹⁰ Ancianonakajj wali amuyumpiw jucha luririr jisktʼapjjañapa, ukampis janiw jan yatipjjañapajj wakiski uka toqenakat jisktʼapjjañapäkiti. Munasiñamp jupar uñjañajja, arstʼasiñapataki, kunjamats juchar purtʼasi uk amuyañapatakiw yanaptʼaspa (Prov. 20:5). Kunjamtï Natán profetajj Davidar mä uñachtʼäwimp amuytʼaykänjja, ukhamarakiw ancianonakajj mä uñachtʼäwimp jucha luririr amuytʼayapjjaspa. Ukhamat kuntï lurki ukajj jan walïtap amuyañapataki. Inas nayrïr kuti tantachtʼasipkani ukhajj jucha luratapat llakthapisjjchispa jan ukajj arrepentisjjchispa.

11. ¿Kunjamsa Jesusajj jucha luririnakar uñjäna?

¹¹ Ancianonakajj Jesusjamäñatakiw chʼamachasipjje. Tarsonkir Saulorojj akham sasaw Jesusajj jisktʼäna: “¿Saulo, Saulo, kunatsa nayar arknaqesta?” sasa. Jan wal luraskatap amuyasiñapatakiw wali yatiñamp ukham jisktʼäna (Hech. 9:3-6). Apocalipsis 2:20, 21 texton Jesusajj ‘Jezabel warmit’ akham sänwa: “Jupan arrepentisiñapatakejj nayajj tiemp churtwa” sasa.

12, 13. Jucha luririn arrepentisiñapatak tiemp churañatakejj ¿kunsa ancianonakajj lurapjjaspa? (Fotonak uñjjattʼarakïta).

¹² Ancianonakajj Jesusat yateqasipjjañapawa, juchachasirejj janis arrepentisiñ munkaspa ukham janiw jankʼak amtapjjañapäkiti. Jucha luririnakat yaqhepanakajja, comité  taypinkir ancianonakamp nayrïr kut tantachtʼasipki ukhaw arrepentisipjjatap uñachtʼayjjapjje, ukampis yaqhepajj jukʼamp tiemp necesitapjje. Ukhamajj inas ancianonakajj jucha luririmp mä kutik tantachasiñat sipans jukʼamp tantachasipjjchini. Nayrïr kuti tantachtʼasipki uka qhepatjja, inas jucha lurirejj kuntï ancianonakajj jupar sapki uka toqet amuytʼaschispa, ukat oracionan Jehová Diosar humilde chuymamp perdón mayisirakchispa (Sal. 32:5; 38:18). Ukjjar tantachasipkani ukhajja, inas kuntï amuykäna ukasa chuymapas cambyjjarakchispa.

¹³ Juchachasirin arrepentisiñapatakejja, ancianonakajj jupat khuyaptʼayasipjjañapawa, lugaraparuw uchasipjjañaparaki. Chʼamachasitanakapar bendisiñapatakisa, juchachasirin amuytatasiñapatakisa, arrepentisiñapatakis Jehová Diosaruw orasipjjañapa (2 Tim. 2:25, 26).

14. Juchachasirin arrepentisiñapatakejj ¿khitikis cheqpachapun yanaptʼi, ukat kunatsa ukham sistanjja?

¹⁴ Juchachasirejj arrepentisjje ukhajj wal kusistanjja (Luc. 15:7, 10). Juchachasirin cambiañapatakejj wals ancianonakajj chʼamachasipkchejja, ¿khitis cheqpachapun juchachasirir yanaptʼi? Apóstol Pablojj akham sänwa: “Inas Diosajj [juchachasirinakar] arrepentimiento churchini” sasa (2 Tim. 2:25). Ukhamajj amuyupana chuymapan cambiañapatakejj janiw mä jaqejj juchachasirir yanaptʼkaspati, jan ukasti Jehová Diosakiw saranukki uka cristianor cambiañapatak yanaptʼaspa. Apóstol Pablojja, maynejj arrepentisjje ukhajj kuna sumanakas utji ukwa qhanañcharakïna. Ukarjamajja juchachasirejj kunatï cheqäki uk sumwa amuyjjaspa, amuytatasispawa, Supayan trampanakapats escapjjarakispawa (2 Tim. 2:26).

15. Juchapat arrepentiski ukarojj ¿kunjamsa ancianonakajj yanaptʼasipkakispa?

¹⁵ Juchachasirejj arrepentisjjani ukhajja, ancianonakajj pastoreo lurañatak visitasipkakiñapawa, ukhamat jupar akanakan yanaptʼañataki: Diosar jukʼamp confiyaskakiñapataki, Supayan tentacionanakapar atipjaskakiñapataki, kunatï cheqapäki uk luraskakiñapataki  (Heb. 12:12, 13). Cheqas janiw ancianonakajj kuntï juchachasirejj lurki uk khitirus awisapjjañapäkiti. Ukampis ¿kunas congregacionar yatiyasiñapa?

“TAQENIN NAYRAQATAPAN CHEQAÑCHAM”

16. 1 Timoteo 5:20 textorjamajj “taqenin nayraqatapan” sasajj ¿khitinakats Pablojj parlaskäna?

¹⁶ (1 Timoteo 5:20 liytʼäta). Pablojj Timoteo anciano masiparojj akham sänwa: “Juchan sarnaqasipki ukanakarojj taqenin nayraqatapan cheqañcham” sasa. ¿Khitinakats parlaskäna? Janiw congregacionpachat parlkänti, jan ukasti kuntï juchachasirejj lurkäna ukjjat yatir mä qhawqha jilat kullakanakatwa parlaskäna. Inas jupanakajj jucha lurir uñjapjjchïna, jan ukajj inas jucha lurirejj jupanakar jucha luratap arsuschïna. Ancianonakajj wali amuyumpiw uka jilat kullakanakar uka asunto atiendesjjatapsa juchachasirir cheqañchasjjataps yatiyapjjañapa.

17. Jilaparte congregacionankirinakatï maynin jucha luratap yatjjapjjchi jan ukajj yatjjapjjani ukhajj ¿kunas congregacionan yatiyasiñapa, ukat kunatsa ukajj yatiyasiñapa?

¹⁷ Awisajj congregacionankirinakat waljaniw maynin jucha luratap yatipjjaspa, jan ukajj yatjjapjjaspa. Ukhamajj “taqenin nayraqatapan” sasinjja, Pablojj taqpach congregacionatwa parlaskäna. Ukhamajj mä ancianow congregacionankir mä jilatana jan ukajj mä kullakan censuratätap yatiyjjañapa. ¿Kunatsa ukajj yatiyasiñapa? Pablon arunakaparjamajj “ukhamat mayninakajj juch lurañ ajjsarapjjañapataki”, janirak jachʼa juchar purtʼasipjjañapataki.

18. Bautisat mä jilatatï jan ukajj kullakatï 18 maranit minusanïchi, jachʼa juchar purtʼasirakchi ukhajj ¿kunsa ancianonakajj lurapjjañapa? (Foto uñjjattʼarakïta).

¹⁸ Bautisat mä jilatatï jan ukajj kullakatï 18  maranit minusanïchi, jachʼa juchar purtʼasirakchi ukhajja, congregacionankir ancianonakajj jupanakat pä ancianonakaruw ajllipjjañapa, ukhamat jucha luririmpi ukat Testigo tatap mamapamp tantachtʼasipjjañapataki. b Uka ancianonakaw kunsa tatap mamapajj wawapan cambionak lurañapatakisa arrepentisiñapatakis lurawayapjje uk yatjjatapjjañapa. Juchachasiritï suma chuymanïchi, tatap mamapamp yanaptʼayasiskarakchi ukhajja, uka pä ancianonakajj jupanakamp tantachtʼasipjjañapatakejj janiw mä comité ukan uttʼayasiñapajj wakiskiti sasaw amtapjjaspa. Cheqas Diosan arsutaparjamajj awk taykanakaw wawanakaparojj munasiñamp cheqañchapjjañapa (Deut. 6:6, 7; Prov. 6:20; 22:6; Efes. 6:2-4). Ukatjja ancianonakajj wakiskani ukarjamaw awk taykapamp parltʼapjjañapa. Ukhamat jupanakajj wakiski ukarjam wawapar yanaptʼasipkiti janicha uk yatiñataki. Ukampis bautisatäki 18 maranit minusanïkaraki ukatï jan arrepentisiñ munkchi, janirak cambiañ munkchi ukhajja, comité de ancianos uka taypinkir ancianonakaw jupampisa Testigo tatap mamapampis tantachtʼasipjjañapa.

“JEHOVÁ DIOSAJJ WALI MUNASIR CHUYMANIWA, WALI KHUYAPTʼAYASIRIRAKIWA”

19. ¿Kunjamsa ancianonakajj Jehová Diosat yateqasisajj jachʼa jucha luririnakar uñjapjje?

¹⁹ Comité taypinkir ancianonakajja, congregacionan qʼomäñapatakiw wal chʼamachasipjje, kuna laykutejj Jehová Diosaw jupanakar uka luräw churi (1 Cor. 5:7). Ukhamäkchisa kunayman toqetwa juchachasirirojj arrepentisiñapatak yanaptʼapjje, cambiaspawa sasaw taqe chuym suytʼapjjaraki. Ukhamatwa Jehová Diosat yateqasipjjatap uñachtʼayapjje, jupajj “wali munasir chuymaniwa, wali khuyaptʼayasirirakiwa” (Sant. 5:11). Kamsasas apóstol Juanajj wali jilïrëjjäna ukhajj munasiñamp qellqäna uk amuytʼañäni, jupajj akham sänwa: “Munat wawanakaja, jan juchar purtʼasipjjañamatakiw akanak qellqanipjjsma. Maynitejj juchar purini ukhajja, jiwasajj mä yanapirinïtanwa, jupajj Awkimp chikäki uka Jesucristowa, jupajj cheqapar uñjiriwa” sasa (1 Juan 2:1).

20. ¿Kunsa jutïr yatichäwin yatjjataskañäni?

²⁰ Llakkañäkchisa, awisajj mä cristianojj janiw jachʼa jucha luratapat arrepentisiñ munkiti. Ukatï pasaspa ukhajja, juchachasirir congregacionat apsuñaw wakisjjaspa. Ukhamanakan ¿kunsa ancianonakajj lurapjje? Jutïr yatichäwinwa uka toqet yatjjataskañäni.