Amuyatajj janiwa. Supayajj janiw Evar akham siskänti: ‘Jan manqʼañäki uka achu manqʼasajja, cuerpomakiw jiwani, espiritumajj jakaskaniwa’ sasajja. Antisas Supayajj asiru taypejj akham sänwa: ‘Janiw jiwkätati’ sasa. Mä arunjja, ‘jakaskätawa, Diosat jitheqtasajj jukʼamp kusisitaw aka oraqen jakasïta’ sañwa munaskäna (Gén. 2:17; 3:3-5).

Almajj janiw jiwirïkiti sasin parlapki uka kʼari yatichäwejj niyakejjay Edenan jan uñstkchïnjja, ¿kunapachas uka yatichäwejj uñstpachäna? Janiw ukajj sum yatiskiti. Falso religionanakajj Uma Juicionwa chhaqtjjapjjäna. Noé chachampi familiapampikiw salvasipjjäna, jupanakakiw Diosarojj sirvjjapjjäna, ukhamasti falso religionanakan kʼari yatichäwinakapajj qʼala chhaqtayatäjjänwa.

Almajj janiw jiwkiti sasin jichhürunakan parlapki uka yatichäwejja, Uma Juicio qhepatwa uñstaskpachäna. Diosajj Babel sat lugarana jaqenakan arunakap mayjtʼaykäna ukhajj ‘oraqpacharuw jaqenakajj aywitatäna’, ukapachaw ‘almajj janiw jiwirïkiti’ sat yatichäwi taqe cheqar apasipjjpachäna (Gén. 11:8, 9). Ukhamajj janiw kunapachas uka kʼari yatichäwejj uñstäna uk yatktanti. Ukampis kʼarin awkipa Supayaw uka yatichäwi uñstayäna. Uka kʼari yatichäwin aka oraqpachar phoqantatap yatisajj wal Supayajj kusispacha (Juan 8:44).