¿Aka 2019 maran Yatiyañataki sat revistanakajj mistkäna ukanak liytʼawaytati? Ukhamächi ukhajja, aka jisktʼanakar qhanañchtʼam:

Jehová Diosajj akham sistuwa: “Jumar tukjañäkis uka armjja janiw khitis jichhakam lurkiti” sasa, ¿uka arunakajj kamsañsa muni? (Is. 54:17).

‘Qhoru jaqenakan samananakapajj’ thayar uñtatäkchinisa, mä arunjja jiwasar chhaqtayañsa munapkchistanejja, Jehová Diosaw jarkʼaqestani sasaw confiyañasa (Is. 25:4, 5). Enemigonakasajj tʼaqesiykistu ukajj janiw wiñayatakïkaniti (w19.01, páginas 6, 7).

¿Kunatsa Diosajj cananeonakarusa jan istʼasir israelitanakarusa cheqaparuw uñjäna sasajj sistanjja?

Diosajj khitinakatï ajjtaskañ qʼañu juchanak lurapkäna ukanakarusa, wawanakaru warminakaru jan walinak luririnakarusa castigänwa. Maysa toqetjja jupar istʼirinakarusa, jaqe masipar cheqapar uñjirinakarusa bendisïnwa (w19.02, páginas 22, 23).

Jan Testigöki ukajj jiwas nayraqatan mä oración lurani ukhajja, ¿kunsa lurañasa?

Jiwasajj amukïñasawa, janirakiw respeto faltañasäkiti, ukampis janiw “amén” sañasäkiti, janirakiw mayninakampis amparat waythapisiñasäkiti. Jan ukajj Jehová Diosaruw chuymasan orassna (w19.03, página 31).

¿Wawanakar abusañajj kunatsa wali jachʼa juchajja?

Maynejj mä wawar abusi ukhajja, wawa contra, congregación contra, autoridadanak contra ukhamarak Dios contraw juchachasi. Kawkïr markanakantï wawanakar abusirinakar denunciañatak leyinakajj utjki ukanakanjja, jilïr irpirinakajj denunciapjjewa (w19.05, páginas 9, 10).

¿Amuyunakas apnaqki uka chʼamjja kunjamsa machaqar tukuysna?

Amuyus machaqar tukuyañatakejj akanakwa lurañasa: 1) Jehová Diosar orasiñasawa, 2) kunjam chuymanïtansa uk lupʼiñasawa, 3) suma amigonak ajlliñasawa (w19.06, página 11).

¿Kunjamsa arknaqat uñjaskañäni ukatak jichhatpach wakichtʼassna?

Jehová Diosar jukʼamp jakʼachasiñatak chʼamachasiñasawa, ‘Diosajj munasituwa janipuniw apanukkitaniti’ sasaw confiyañasa, sapüruw Biblia liyiñasa, orasiñasaraki. Diosan Reinopan utjkani uka bendicionanakajj cheqapuniw phoqasini sasaw confiyañasa, gustkistu uka textonak yatsuñasawa, Diosar jachʼañchañatak cancionanaksa yatsuñasarakiwa (w19.07, páginas 2-4).

¿Kunjamsa salvasipjjañapatak familiasar yanaptʼsna?

Kunjamäsipkisa uk amuyañatak chʼamachasiñasawa, yateqaskay sarnaqañasawa, paciencianïñasawa, munasirïñasarakiwa (w19.08, páginas 15-17).

Mateo 11:28 textorjamajj ¿Jesusajj kunjamsa samarañ churistu?

Diosan markapanjja munasiri irpirinakaw utjistu, jupanakamp chikaw Diosar sirvtanjja, wali wakiskir lurañanirakïtanwa (w19.09, página 23).

¿Kunjamsa Diosajj munañap lurañ munañatakisa phoqañatakisa chʼam churistu? (Filip. 2:13).

Biblia liytan lupʼiraktan ukhajja, munañap lurañ munañatakisa phoqañatakisa Diosaw chʼam churistu. Espíritu santojj kun lurañtï yatktan uk jukʼamp sum lurañatakiw yanaptʼistaspa (w19.10, página 21).

¿Kunsa mä amtar janïr purkasajj lurañasa?

Akanakwa lurañasa: 1) sumwa yatjjatañasa, 2) Diosaruw yatiña mayisiñasa, 3) kunatsa ukham lurañ muntan ukwa amuytʼasiñasa, 4) kunjamsa amtanakas phoqañäni uk yatiñasawa, 5) kun lurañtï munktan uk phoqerjamätanti janicha ukwa amuytʼañasaraki (w19.11, páginas 27-29).

¿Supayajj Evar arjjaykäna ukapachatti almajj janiw jiwirïkiti sasin amuyañajj utj-jjäna?

Amuyatajj janiwa. Supayajj ‘cuerpomakiw jiwani janiw espiritumajj jiwkaniti’ sasin janiw Evar siskänti, jan ukasti ‘janiw jiwkätati’ sasaw säna. Ukhamarusa Uma Juicionwa kʼari yatichäwinakajj chhaqtjjäna. ‘Almajj janiw jiwkiti’ sasin amuyañajja, Babel torre luririnakaru Diosajj taqe toqer anatatkäna uka nayraw uñstpachäna (w19.12, página 15).