Deuteronomio 22:25-27 textonkki uka leyejj janiw chachajj juchaniti janicha uk qhanstayañatakïkänti, chachan juchapajj qhanäjjänwa. Uka leyejj tawaqon jan juchanïtap qhanstayañatakïnwa. Uka texto nayrajj kuna toqetsa parläna uk yatjjatañäni.

Uka versiculonakat nayrajj aka toqet parläna: mä chachatï casarasiñatak parlat mä tawaqompi “markan” ikintasïna ukhajja, uka chachajj adulterio juchwa luräna. Uka tiemponjja casarasiñatak parlat tawaqonakajj niyas casaratäpkaspa ukham uñjatäpjjänwa, ukatwa adulterio jucha luräna. Ukampis ¿uka tawaqojj kunjam uñjatäñapänsa? “Markan jan artʼasitap” laykojja jupajj adulterio jucha luririt uñjatäñapänwa. Jupatï arnaqasispänjja, jaqejj istʼasin aparaspänwa, ukampis janiw arnaqaskänti. Ukhamajj panpachaniw juchanïpjjäna (Deut. 22:23, 24).

Ukjjarojja, tawaqojj pampan jan wali lurat uñjasïna ukhajja, Leyejj akham sarakïnwa: “Mä jaqetejj pampan mä casarasiñatak parlat tawaqoru jikjjatani, ukatsti munkir jan munkir jupampi ikintani, ukapachasti chacha saparukiw jiwayasini uka warmimpi ikintatapata, tawaqosti janiw kuna kamachatäkanisa, jupasti janiw kuna jachʼa juchsa lurkiti jiwayatäñatakejja. Uka luräwisti kipkaw: kunjämatejj mä jaqejj mayni jaqe masiparu jiwayañataki jikjjati ukhama. Uka jaqesti sapakwa tawaqorojj pampan jikjjatäna. Tawaqojj qawqhas warariskpachänwa, ukampis chʼusa pampätap laykojj, janiw khitis arjjatkpachänti” (Deut. 22:25-27).

Uka textorjamajja, juezanakajj tawaqoruw creyipjjäna. “Tawaqojj qawqhas warariskpachänwa, ukampis chʼusa pampätap laykojj, janiw khitis arjjatkpachänti” sasaw juezanakajj amuyapjjäna. Ukhamajj janiw tawaqojj adulterio juch lurkänti. Ukampis chachajj “munkir jan munkir” tawaqor jan wali luratapatjja pä juchanïnwa: maya, tawaqoruw abusäna; paya, adulterio jucha lurarakïna.

Ukhamasti uka leyejj tawaqon jan juchanïtap qhanstayañatakïkchïnsa, chachajj tawaqor abusatapa adulterio jucha luratapwa qhanstayarakïna. Cheqansa kunas pasäna ukjja juezanakaw sum yatjjatapjjpachäna, ukatjja Diosajj walja kuti ewjjkäna ukarjamaw kun lurañsa amtapjjarakpachäna (Éx. 20:14; Deut. 13:14; 17:4).