¿Aka 2020 maran Yatiyañataki sat revistanakajj mistkäna ukanak liytʼawaytati? Ukhamächi ukhajja, aka jisktʼanakar qhanañchtʼam:

¿Kunjamsa ajllit cristianonakar uñjañasa?

Jehová Diosarojj taqe chuymaw servipjje uk wali askitwa uñjtanjja. Ukampis janiw jupanakarojj mayninakat sipan wali importantëpkaspas ukham uñjañasäkiti. Jiwasajj janiw mayninakar jachʼañchir jaqëñasäkiti (Jud. 16). Janiw jupanakarojj kunjamatsa ajllitäpjje uka toqet jisktʼañasäkiti (w20.01, páginas 28, 29).

¿Jehová Diosajj sapa mayni jiwasat wal llakisi sasin kunatsa confiysna?

Jehová Diosajj janïr naskayätan ukhatpachwa uñtʼjjestu sasaw Bibliajj qhanañchi. Jupajj mayisitanakas istʼiwa. Kunjamäsktansa kunanaksa lupʼisktan ukanak sum yati. Kunanaktï lurktan ukanakajj Diosar llakisiyaspawa jan ukajj kusisiyaspawa (1 Crón. 28:9; Prov. 27:11). Jehová Diosaw markaparojj irpanistu (w20.02, página 12).

¿Kunapachas parlañasa kunapachas amukïñasa?

Jehová Diosatjja, kusisitaw taqenir parltanjja. Mayniru juchar purtʼasirjam amuytan ukhajja, jankʼakiw jupamp parltanjja. Jilïr irpirinakajja, maynir ewjjtʼañ wakisitap amuyasajj jankʼakiw parlapjjaraki. Ukampis kawkjantï predicañajj jarkʼatäki uka cheqan kunjamas predicasi ukanak janiw jiskhiñasäkiti ni yatstan ukas uk parlañasäkiti. Kunatï jan arsuñäki ukanak janiw mayninakar parlañasäkiti (w20.03, páginas 19-21).

¿Joel capítulo 2 texton tʼiju tʼijunakat parlki ukajj Apocalipsis capítulo 9 texton parlki uka tʼiju tʼijunakampejj kunanakansa jan igualäki?

Joel 2:20-29 textonjja, Jehová Diosajj tʼiju tʼijunakjja, jayaruw apanukü, kunanaktï tukjapki ukanakat nayaw kuttʼayjjapjjäma sasaw Diosajj säna. Uka qhepatsti espíritu santopwa Diosajj apayaniraki. Apocalipsis 9:1-11 libron parlki uka profeciajj Diosan ajllit cristianonakatwa parlaski. Jupanakajj tʼiju tʼijunakjam jan ajjsarasaw Diosan juchañchäwi arunakap aka jan wali pachan yatiyapjje, ukaw jupanakar colerayi (w20.04, páginas 3-6).

¿Jichhürunakanjja khitis norte toqenkir reyejja?

Rusia markampi jupar yanapiri markanakampiw norte toqenkir reyejja. Jupanakaw Diosan markaparojj jan waltʼayañatak arknaqapjje, predicañsa jarkʼapjje, Testigonakarus uñisipjjaraki. Norte toqenkir reyejja, sur toqenkir reyir atipañatakiw wal chʼamachasi (w20.05, páginas 12, 13).

¿Gálatas 5:22, 23 texton parlki uka cualidadanakakit “espíritu santon” achup taypinki?

Janiwa. Espíritu santojj jukʼamp cualidadanak uñachtʼayañatakiw yanaptʼistaspa. Ukanakat mayajj kunatï cheqapäki uk lurañawa (Efes. 5:8, 9). (w20.06, página 17).

¿Internetar kunanaktï apkatktan ukanakat kunatsa amuyasiñasa?

Kunanaktï Internetar apkatktan ukajja, jiwas pachpats wal jachʼañchasksna, janis humilde chuymanïksna ukhamwa mayninakar amuyaysna (w20.07, páginas 6, 7).

Chawlla katuñ sum yatipki ukanakatjja, ¿kunsa cristianonakajj yateqassna?

Kuna horasansa kawkjansa chawllajj utji ukawjanakanwa katupjje. Chawlla katuñ herramientanakap sum apnaqañwa yatipjje. Qotan jan walinakajj utjki ukhas katur sarasipkakiwa. Jiwasajj jupanakjamarakiw jan ajjsaras predicañasa, yatichañasa (w20.09, página 5).

¿Kunjamanakatsa Bibliat yateqerinakarojj Diosar jukʼamp munasipjjañapatak yanaptʼsna?

Biblia sapüru liyiñapataki, kuntï liyki ukjjat lupʼiñapatakiw chʼamañchtʼañasa. Diosar orasiñwa yatichañasaraki (w20.11, página 4).

‘Taqeniw Cristo taypi jaktayatäpjjaniʼ sasajj ¿khitinakamppachatsa Pablojj parlaski? (1 Cor. 15:22).

Apóstol Pablojj janiw taqe jiwatanakan jaktapjjañapat parlkänti. ‘Taqeni’ sasinjja, ajllit cristianonakas jaktanipjjarakiniwa sañwa munaskäna. ‘Cristo Jesusamp mayakïpjjatap laykuw Diosajj jupanakar santor tukuyi’ (1 Cor. 1:2; 15:18) (w20.12, páginas 5, 6).

Ajllit cristianonakajj ‘qhep qhepa trompetajj tuktʼaskani uka tiempon mä chʼipjjtanaki cambiatäjjapjjani’ ukhajja, ¿kunsa lurapjjani? (1 Cor. 15:51-53).

Jupanakajj Cristomp chikaw hierrot lurat varampi jaqenakar awatipjjani (Apoc. 2:26, 27) (w20.12, páginas 12, 13).