¿Aka 2021 maran Yatiyañataki sat revistanakajj mistkäna ukanak liytʼawaytati? Ukhamächi ukhajja, aka jisktʼanakar qhanañchtʼam:

Santiago 5:11 textojja, Jehová Diosajj “wali munasir chuymaniwa”, “wali khuyaptʼayasirirakiwa” sasajj ¿kunsa amuytʼayistu?

Jehová Diosajj wali khuyaptʼayasiri Diosawa, jupajj pantjasitanakas perdonañatakejj jankʼakiwa. Wali munasirïtap laykojja, yanaptʼañsa wal munarakistu, ukwa Santiago 5:11 textojj amuytʼayistu. Jehová Diosatwa yateqasiñasa (w21.01, página 21).

¿Kunatsa Jehová Diosajj yaqhepanakar autoridad churi?

Munasiñatwa uk luri. Ukhamatwa alajjpachankiri ukat aka oraqenkir familiapajj sumana ukhamarak organiztʼata jakasipjje. Ukar respetiri familianakanjja, khitis kun lurañatakis amtañapa, khitis uk nayraqat lurañapa uk sapa mayniw yati (w21.02, página 3).

¿Kunatsa cristianonakajj mensaje apayañatak utjki uka aplicacionanak wali amuyumpi apnaqapjjañapa?

Maynitï uka aplicacionanak apnaqañ munchi ukhajja, kuna kasta jaqenakampis chikachasini uk sumwa ajlliñapa. Wali jachʼa gruponakanjja, ajlliñajj wali chʼamawa (1 Tim. 5:13). Ukanak toqejja inas maynejj jilamp jilamp parljjchispa, kunatï jan sum yatiski ukanak parljjchispa, yaqhepajj jilat kullakanak toqew qollqe ganañ amtapjjaspa (w21.03, página 31).

¿Kuna razonanakatsa Jehová Diosajj tʼaqesiñatsa jiwañatsa Jesusar jan jarkʼaqkäna?

Maya, judionakar mä maldicionat salvañatakiw Jesusajj lawar chʼakkatat jiwañapäna (Gál. 3:10, 13). Paya, Jehová Diosajj Yoqapar tʼaqesiñat jan jarkʼaqasajja, Jachʼa Jilïr Sacerdotëñapatakiw wakichtʼaskäna. Kimsa, Jesusajj Awkipat jiwañkam jan jitheqtasajja, wali jan walinakan uñjaskasas Jehová Diosarojj jan jitheqtas serviskaksnawa ukwa uñachtʼayarakïna (Job 1:9-11) (w21.04, páginas 16, 17).

¿Jaqenakaru utapan jikjjatañajj chʼamächi ukhajj kunsa lursna?

Kuna horanakas jaqenakajj utapankapjjaspa uka horasanakaruw predikir sarsna. Kunayman lugaranakanwa yatiysna. Kunayman toqetwa yatiyaraksna, sañäni, cartwa qellqsna (w21.05, páginas 15, 16).

“Ley phoqataj laykojj Leyitakejj jiwatäjjtwa” sasajj ¿kuna toqetsa Pablojj parlaskäna? (Gál. 2:19).

Moisesar churaskäna uka Leyiw jaqenakajj juchararäpjjatas qhanstayäna, ukatsti Israel markarojj Cristoruw irparakïna (Gál. 3:19, 24). Ukaw apóstol Pablorojj Jesusar creyiñataki yanaptʼäna. Ukhamatwa ‘Leyitakejj jiwatäjjäna’. Leyejj janiw jupjjar munañanëjjänti (w21.06, página 31).

¿Jehová Diosajj kunanaksa aguantaski?

Jehová Diosajj kunjamsa sutip qʼañuchapjje, waljanis Jupa conträpjje, gobiernop contras saytʼapjje, yaqhep wawanakapas Jupa contra saytʼapjje, Supayas sapa kuti kʼarisiraki, servirinakapas tʼaqesipjje ukanakwa aguantaski. Amigonakapan jiwatapsa, jan wali jaqenakajj mayninakar jan waltʼayatapsa, jaqenakajj aka oraqer jan waltʼayasipki ukanaksa aguantaskarakiwa (w21.07, páginas 9-12).

¿Paciencianïñ toqet kunsa Joseat yateqassna?

Joseajj jilanakapan ina chʼusat tʼaqesiyata uñjasïna ukwa jupajj aguantäna. Juparojj kʼarintapjjänwa, ukatsti walja maranakaw Egipto markan carcelan llawintata uñjasïna (w21.08, página 12).

¿Kuna thaljäwinakatsa Ageo 2:6-9, 20-22 texton parli?

Markanakajj janiw Reinon suma yatiyäwinakap istʼañ munapkiti, ukampis walja jaqenakajj uk yatiñ munapjjarakiwa. Markanakajj niyaw qhep qhepa kuti thaljatäpjjani, mä arunjja wiñayatak tukjata uñjasipjjani (w21.09, páginas 15-19).

¿Kunatsa predicasajj jan qarjtañasäki?

Jehová Diosajj qhawqsa chʼamachastan ukwa uñji, ukatsti kusisirakiwa. Jiwasatï chʼamachasiskakiñäni janirak qarjtkañäni ukhajja, wiñay jakañwa katoqañäni (w21.10, páginas 25, 26).

Levítico capítulo 19 ukajja, ¿kunjamsa “taqe sarnaqäwinakaman santöpjjam” siski uka ewjjtʼarjam lurañatak yanaptʼistu? (1 Ped. 1:15).

Uka versiculojj inas Levítico 19:2 textot apsutächi. Levítico capítulo 19 ukajja, kunjamsa 1 Pedro 1:15 textorjam sapüru sarnaqsna uka toqet walja ejemplonakaniwa (w21.12, páginas 3, 4).