Alajjpachankkasajja, mayninakamp sum trabajtʼañatakejj kunjam chuymanïñas wakisi uk Jesusajj sum yateqäna. Aka oraqenkjjäna ukhajja, jupamp chik trabajirinakatakejj wali yateqaskayänwa. ¿Kunjamsa jiwasajj Jesusat yateqasiraksna? Uka toqet yatjjatkasajja, kimsa wiñay yatichäwinakat amuytʼaskañäni, ukanakaw mayninakamp sum trabajiñatakisa, mayachtʼatäñatakisa, mayninakar yanaptʼañatakis yanaptʼistani.

Mayninakamp sum trabajtʼirejja, humilde chuymaniwa. Jupamp chik trabajirinakarojj wali valoranitwa uñji, janirakiw wali wal tukkiti. Jesusajj awkipatwa ukham humilde chuymanïñ yateqäna. Jehová Dios sapakis taqe kun Luriri sasin uñtʼatächejja, jupamp trabajkäna ukhajj kunjamsa Yoqapajj wali sumanak luräna uk qhanstayarakïnwa. Uk akham sasaw Diosajj qhanañchäna: “Jaqerojj jiwasar uñtasit lurañäni” sasa (Gén. 1:26). Uka arunak istʼasajja, Awkipajj kunja humilde chuymanis ukwa Jesusajj amuyäna (Sal. 18:35).

Aka oraqenjja, Jesusajj humilde chuymanirakïnwa. Jaqenakajj luratanakapat jachʼañchapjjäna ukhajja, jupajj Jehová Diosarupuniw jachʼañchirïna (Mar. 10:17, 18; Juan 7:15, 16). Discipulonakap taypin sumankaña utjañapatakiw chʼamachasirakïna. Jupanakarojj amigonakaparjamaw uñjäna, janiw esclavonakapäpkaspas ukham uñjkänti (Juan 15:15). Jupanakan humilde chuymanïñ yateqapjjañapatakejj kayunakaps jareqänwa (Juan 13:5, 12-14). Jiwasajj Jesusjamarakiw  jiwasamp chik trabajirinakarojj wali valoranit uñjañasa. Jiwas pachpatak llakisiñat sipans jupanakat llakisiñasawa. Kunapachatï ‘maynit maynikam respetastan’, janirak khitis lurañanakan nayrankki ukat llakisisktan ukhajja, walja sumanak luraraksna (Rom. 12:10).

Humilde chuymanejja, ‘walja ewjjtʼirinakampejj taqe kunas sumaru saratap’ sum amuyi (Prov. 15:22). Qhawqha experiencianïskañänisa jan ukajj kunanaksa lurañ yatiskañänejja, janiw khitis taqe kun yatkapunispati. Jesús pachpaw jan taqe kun yatitap amuyasïna (Mat. 24:36). Pantjasiri discipulonakapajj kunsa amuyapjje uks yatiñ munarakïnwa (Mat. 16:13-16). Ukatwa jupamp chik trabajirinakajj Jesusamp kusisitakïpjjäna. Jiwasampejj ukhamarakiwa, jiwasatï humilde chuymanïñäni, jan taqe kun yatitassa amuyasiñäni, mayninakar istʼañatakis jankʼakiñäni ukhajja, sumankañ utjañapatakiw yanaptʼañäni, ukham mayachtʼatäsajj ‘taqe kunas sumaruw sararakini’.

Yamas ancianonakajja, juntuk kuns lurapki ukhajj Jesusat yateqasisajj humilde chuymanïpjjañapapuniwa. Jupanakajj akwa amtapjjañapa: espíritu santojj kawkïr ancianorus arsuñapatak yanaptʼakispawa, ukhamat taqpach ancianonakajj mä suma amtar puripjjañapataki. Ancianonakajj tantachasipki ukanjja, janiw khitis arstʼañatakejj jarkʼatjam amuyasiñapäkiti, ukhamatwa congregacionar yanaptʼkir suma amtanakar puripjjani.

Mayninakamp sum trabajtʼirejja, mayninakajj kunjamäsipkis uk amuytʼasipuniwa. Janiw munañaparjamak lurkiti, mayninakarojj istʼarakiwa. Jesusajja walja kutiw kunjamsa Awkipajj jan munañaparjamak luräna uk uñjäna. Ukanakat mayajj akawa: jaqenakajj jiwañar katuyatäpkchïnsa, Jehová Diosajj jupanakar salvañatakiw Yoqapar khitanïna (Juan 3:16).

Jesusajj janiw munañaparjamak kuns lurkänti, wakiskäna ukhajj mayninakar istʼarakïnwa. Jesusajj Israel markankir jaqenakan ukarukis khitatäkchïnjja, mä fenicia warmirojj yanaptʼänwa (Mat. 15:22-28). Discipulonakapajj qhawqsa lurapjjaspa uks amuytʼarakïnwa, janiw ukat jukʼamp lurapjjañap suykänti. Pedro amigopajj jaqenak nayraqatan jupar jan uñtʼiris tukkchïnjja, Jesusajj jupar perdonänwa, qhepatjja wali importante luräwinak churarakïna (Luc. 22:32; Juan 21:17; Hech. 2:14; 8:14-17; 10:44, 45). Jesusan ukham luratapajja, jan munañasarjamak kuns lurañatakiw yanaptʼistu, ukhamatwa taqenis amuytʼasirïtas yatipjjani (Filip. 4:5).

 Jiwasatejj amuytʼasirïñäni, janirak munañasaruk kuns lurkañäni ukhajja, mayninakamp trabajiñajj janiw chʼamäkaniti. Jesusajj taqenimpiw sum apasirïna, ukatwa enemigonakapajj jupat envidiasipjjäna, “impuesto cobririnakana ukhamarak jucharar jaqenakan amigopawa” sasaw juchañchapjjarakïna (Mat. 11:19). ¿Janit Jesusat yateqasisajj jan jiwasjamäpki ukanakampejj sum trabajkaraksna? Louis jilatajja, superintendente de circuitot servïna, Betelansa servirakïnwa, kunayman jilat kullakanakampiw trabajirakïna. Jilatajj akham siwa: “Nayjam pantjasiri jaqenakamp trabajiñajja, kunayman qalanakamp mä muralla lurañamp sasiwa. Niyakejjay qalanakajj jachʼan jiskʼanïchejja, perqañatakejj jukʼamp chʼamachasiñaw wakisini, ukampis perqajj cheqakiw mistuspa. Jilat kullakanakamp sumak trabajiñatakejja, naya pachpaw wal chʼamachasta, ukhamat trabajojj sum lurasiñapataki” sasa. ¡Ukham luratapajj wali askiwa!

¿Kunjamsa congregacionan maynit maynikam yanaptʼassna? Inas predicañatak gruposankir jilat kullakanakajj kunayman edadanïpjjchi, inas familiap taypin jiwasat sipans mayja luräwinïpjjarakchi. Jupanakamp predickañäni ukhajja, qhawqtï lurirjamäpki ukarjamaw prediksna jan ukajj kunjamsa predicañ munapjje ukarjamaw predicaraksna, ukhamatwa jupanakajj wali kusisit predicapjjani.

Suma amigonakajj ‘compartiñatak listokïpjjewa’ (1 Tim. 6:18). Jesusajj Jehová Diosamp trabajisajja, Awkipan jan kun imtʼasirïtapwa amuyäna. Jehová Diosajj “alajjpachanak wakichkäna” ukhajja, Jesusajj ‘ukankaskänwa’, ukhamatwa Jupat yateqäna (Prov. 8:27). Jesusajj aka oraqenkjjäna ukhajja, ‘kunanaktï Awkipat istʼkäna’ ukanak taqe chuymaw discipulonakapar yatiyäna (Juan 15:15). Jehová Diosat yateqasisajja, kunanaktï uñtʼktan kunanaktï lurañ yatktan ukanak jilat kullakanakarojj yatichañasarakiwa. Mayninakamp sum trabajtʼirejja, kunatï trabajor yanaptʼkaspa uk janiw mayninakar apnaqañ laykukejj jupatakik imtʼaskiti. Antisas kuntï yatki ukjja, taqe chuymaw mayninakar yatichi.

Maysa toqetjja, jilat kullakanakar chʼamañchtʼasaw kunatï jiwasankki uk churaraktanjja. Maynejj wal chʼamachasitasat taqe chuyma yuspäristu ukhajja, wal kusistanjja. Jesusajja kuna sumanaktï jupamp chik trabajirinakajj lurapkäna ukanakat chʼamañchtʼañatakejj tiemp apstʼasirïnwa (Mateo 25:19-23; Luc. 10:17-20 uñjjattʼarakïta). Nayat sipans “jukʼamp jachʼa luräwinakwa” lurapjjäta sasaw jupanakar säna (Juan 14:12). Janïr jiwayatäkäna uka arumajja, jupat jan jitheqtiri apostolonakaparojj akham sasaw felicittʼäna: “Yantʼanakan uñjaskta ukhas janiw jaytjapkistati” sasa (Luc. 22:28). Uka arunakajj walpun jupanakar chʼamañchtʼpachäna, jukʼamp luraskakiñatakiw yanaptʼarakpachäna. Jiwasatï jilat kullakanakasar felicittʼañatak tiemp apstʼasiñänejja, jupanakajj jukʼamp kusisitäpjjaniwa, jukʼampiw trabajipjjarakini.

Kayode sat mä jilatajj akham siwa: “Mayninakamp sum trabajiñatakejj janiw perfectöñamajj wakiskapuniti, mayninakan kusisita jan chʼama tukus trabajipjjañapatakejj yanaptʼasmawa” sasa. ¿Jumajj ukhamarakit mayninakamp trabajta? Kunjamsa mayninakamp trabajta ukjja, jilat kullakanakaruw jisktʼasma. Jesusan discipulonakapajj wali kusisitaw jupamp chik trabajipjjäna, ¿jumamp chik trabajirinakajj ukham kusisitarakit trabajipjje? Ukhamächi ukhajja, apóstol Pabljamarakiw “trabajir masinakamäpjjtwa, ukhamat kusisitäpjjañamataki” sasin säta (2 Cor. 1:24).