Janiwa. Kuntï Davidajj qellqkäna ukajja, cheqänwa.

Kuntï Davidajj Salmo 61:8 qellqatansa, yaqha ukham versiculonakans qellqkäna uk amuytʼañäni. Jupajj akham sänwa: “Sutimatakiw nayajj wiñayatak alabanzanak cantäjja, ukañkamasti sapüruw nayajj promesanakaj phoqäjja”. “Jehová Dios Tata, nayan Diosaja, nayajj taqe chuymajampiw jumar jachʼañchsma, wiñayatakiw sutim jachʼañchäjja”. “Wiñayans wiñayapatakiw sutim jachʼañchäjja” sasa (Sal. 61:8; 86:12; 145:1, 2).

Davidajj uka arunak qellqkäna ukhajja, janis jiwañapäkaspa ukham janiw amuykänti. Niyakejjay jaqenakajj juchararätas laykojj jiwirïstanjja, Davidajj juchararätap yatisajj mä urun jiwjjañap yatïnwa (Gén. 3:3, 17-19; Sal. 51:4, 5). Jehová Diosar jan jitheqtas serviri Abrahán, Isaac, Jacob chachanakan jiwjjapjjataps yatirakïnwa. Davidajj mä urun jiwjjañap yatïnwa (Sal. 37:25; 39:4). Ukampis Salmo 61:8 qellqatajja, Davidajj Diosar wiñayatak alabañ amtatapwa uñachtʼayi, mä arunjja jakkasin Diosar wiñayatak alabañ amtatapwa uñachtʼayi (2 Sam. 7:12).

Kunjamtï Salmo 18, 51, 52 qellqatanakan pʼeqeñchäwinakapan uñjktanjja, Davidajj pachpa sarnaqäwinakapatwa awisajj qellqäna. Salmo 23 qellqatanjja, Jehová Diosarojj ovejanakapar irpiri, samartʼayiri, jarkʼaqeri mä awatirïkaspas ukhamwa uñachtʼayi. Davidajj ukhamwa ovejanakapar uñjirïna, ukatwa jupajj ‘jakañapäkäna taqe uka urunakan’ Jehová Diosar serviñ munäna (Sal. 23:6).

Ak amtañasarakiwa, kuntï Davidajj qellqkäna ukajj Diosan amuytʼayatänwa. Qellqkäna ukanakat yaqhepanakajja, jutïrin phoqasiñapäkäna uka profecianakaniwa. Ukanakat mayajj akawa: Salmo 110 qellqatanjja, Tatitujajj alajjpachanwa Diosan ‘kupëjjapar qontʼasini’, chʼam katoqarakini sasaw Davidajj säna. Uka chʼamampiw Tatitojj Diosan enemigonakapar apnaqañapäna, ‘markanakarus juzgañapänaʼ. Davidajj Mesiasan nayra awkipänwa, uka Mesiasaw alajjpachat apnaqaniñapäna, juparakiw ‘wiñay sacerdotëñapäna’ (Sal. 110:1-6). Jesús pachpaw Salmo 110 qellqatajj jupat parlaskatap qhanañchäna, jutïrinwa ukajj phoqasini sarakïnwa (Mat. 22:41-45).

Kunjamtï uñjktanjja, Jehová Diosajj kunanakatï Davidan urunakapan pasañapäkäna ukanakwa qellqayäna, Jehová Diosar wiñayatak alabañatak jaktaniñapäkäna uka urunakan kunanakas pasañapäna ukanakwa qellqayarakïna. ¿Kunjamsa ukajj Salmo 37:10, 11, 29 qellqat amuytʼañatakejj yanaptʼistu? Uka versiculonakajja, kunjamsa nayra Israel markajj jakasïna ukwa uñachtʼayi, jutïrin Diosajj promesanakap phoqkani ukhajj kunjamsa oraqpachan jakasiñäni ukwa uñachtʼayaraki (“Nayamp chikaw jumajj Paraisonkäta” siski uka yatichäwi aka revistan liytʼarakïta, párrafo 8 ukankiwa).

Ukhamasti, Salmo 61:8 qellqatasa yaqha ukham versiculonakasa, kunjamsa Davidajj jakkasin nayra Israel markan Jehová Diosar alabañ munäna uk amuytʼañatakiw yanaptʼistu. Jehová Diosajj jutïrin jiwatanakar jaktaykani ukhajj kunjamsa Davidajj Jehová Diosar wiñayatak alabani ukajj cheqätapwa uñachtʼayarakistu.