1. ¿Kunjamsa Diosajj servirinakapan oracionanakapar jilapartejj jaysi?

 JEHOVÁ DIOSAJJ mä jilatana jan ukajj mä kullakan taqe chuyma orasitaparojj juma toqew jaysaspa, ¿uk yatiyätati? Cheqas Diosajj ancianonaka, siervo ministerialanaka, precursoranaka, publicadoranaka, wayn tawaqonaka, jilïrinaka, chachanaka jan ukajj warminak toqew servirinakapar yanaptʼi. Diosar munaski ukatï yanaptʼa mayiñatak ruwtʼaschi ukhajja, jilapartejj ancianonak toqe jan ukajj mayni servirinakap toqew Diosajj jupar ‘wal chuymachtʼi’ (Col. 4:11). ¡Jehová Diosar ukham serviñasa jilat kullakanakar yanaptʼañas mä jachʼa privilegiowa! Epidemianakajj sartki, mä akatjamat jan waltʼäwejj utjki jan ukajj arknaqat uñjasktan ukhaw jilat kullakanakasar yanaptʼsna.

2. Mä epidemiajj sartki ukhajj ¿kunatsa jilat kullakanakar yanaptʼañajj chʼamäspa?

² Epidemianakajj sartki ukhajja, maynit maynikam yanaptʼasiñajj jukʼamp chʼamäspawa. Inas jilat kullakanakarojj utapar visittʼir sarañ munsna, ukampis uk lurañajj inas jan walinak utjaychispa. Jan ukajj inas qollqet pistʼatanakarojj manqtʼasiñatak utasar invittʼañ munsna, ukampis ukajj janirakiw puediskaspati. Mayninakar yanaptʼañ wal munasksna, ukampis pachpa familiasaw tʼaqesiskaspa. Ukhampachas jilat kullakanakar wal yanaptʼañ muntanjja, qhawqtï lurirjamäktan ukarjam mayninakar yanaptʼtan ukhajja, Jehová Diosajj wal kusisiraki (Prov. 3:27; 19:17). Ukhamajj ¿kunsa lursna?

3. ¿Deysi kullakan congregacionapankir ancianonakat kunsa yateqassna? (Jeremías 23:4).

³ ¿Kunsa ancianonakajj lurapjjaspa? Jumatï congregacionan ancianöstajja, ovejanakar sumwa uñtʼañama (Jeremías 23:4  liytʼäta). Pasïr yatichäwin parlaniwayktan uka Deysi b kullakajj akham siwa: “Predicacionar mistuñatak grupojankir ancianonakajja, nayampis mayni jilat kullakanakampis predicapjjapunirïnwa, kunsa jupanakampiw lurapjjerïta” sasa. Ukham lurapjjatapatjja, COVID-19 pandemiajj qalltkäna ukhasa, yaqhep familiaranakapajj uka usump jiwapkäna ukhasa, facilak ancianonakajj Deysi kullakar yanaptʼapjjäna.

4. ¿Deysi kullakar yanaptʼañatakejj kunsa ancianonakajj janïräkipan lurapjjäna, kunsa ukat yateqsna?

⁴ Deysi kullakajj akham sarakiwa: “Ancianonakarojj suma amigonakajarjamaw uñjayäta, ukatwa jupanakarojj kunjamas jikjjatasiyäta, kunanakas llakisiyitäna ukanak awistʼasirïta” sasa. ¿Kunsa ancianonakajj ukat yateqasipjjaspa? Ancianonaka, janïr jan waltʼäwinak utjkipanwa ovejanakar sum uñjapjjañama, amigopäpjjañamarakiwa. Mä epidemia sartatap laykutï utanakapar jan visitañ puedipkstajja, jupanakamp kunjamat parlañatakis chʼamachasipjjapunim. Deysi kullakajj saskakiwa: “Awisajja, mä urunakwa walja ancianonakajj jawsanipjjerïtu jan ukajj qellqtʼanipjjerïtu. Liytʼarapipkitäna jan ukajj apayanipkitäna uka textonak uñtʼjjchiyätsa, chuymarupuniw purtʼitäna” sasa.

5. ¿Jilat kullakanakajj kunanakansa yanaptʼatäñ munapjje uk kunjamatsa ancianonakajj yatipjjaspa, ukat kunjamanakatsa jupanakar yanaptʼapjjaspa?

⁵ Mä toqetjja, jilat kullakanakajj kunanakansa yanaptʼatäñ munapjje uk yatiñatakejj wali amuyumpiw ancianonakajj jisktʼapjjañapa (Prov. 20:5). ¿Jilat kullakanakan manqʼañanakapasa, medicamentonakapasa, yaqha ukhamanakas utjaskiti? ¿Trabajopsa jan ukajj utapsa aptʼasirjamäsipkiti? ¿Gobiernojj yanaptʼanak churki ukanak katoqañatakejj yanaptʼatäñti munapjje? Yaqhep jilat kullakanakajja, Deysi kullakarojj manqʼañanakampi yaqha ukhamanakampiw yanaptʼapjjäna. Ukampis kullakarojj ancianonakan munasiñamp uñjapjjatapa, Bibliamp chʼamañchtʼapjjatapaw jukʼamp yanaptʼäna. Deysi kullakajj akham siwa: “Ancianonakajj nayampiw orapjjeri. Kamsasas orapjjeri uk janiw amtaskti, ukampis oracionanakap istʼasajj kunjamas jikjjatasiyäta uk janiw armaskti. Jehová Diosajj ‘janiw sapäktati’ siskitaspas ukhamänwa” sasa (Is. 41:10, 13).

6. ¿Kunjamsa congregacionan maynit maynikamajj yanaptʼassna? (Fotonak uñjjattʼäta).

⁶ ¿Kunsa congregacionajj luraspa? Jilat kullakanakar yanaptʼañatakejj ancianonakaw nayrankapjje. Ukampis Jehová Diosajj taqeniruw mayninakar yanaptʼañatakisa chʼamañchtʼañatakis  mayistu (Gál. 6:10). Mä usutar yanaptʼañatakejj mä jukʼaksa lurañänejja, jupar munasitas amuyasajj wali chʼamañchtʼatäspawa. Mä jilatar chʼamañchtʼañatakejj mä tarjeta jan ukajj mä dibujo wawanakajj lurapjjaspa. Wayn tawaqonakajj mä kullakarojj alarapir sarasa jan ukajj yaqha ukhamampiw yanaptʼapjjaspa. Mayninakasti mä usutatakejj manqʼa phaytʼasaw utapar jaytanipjjaspa. Mä usojj taqe cheqan utj-jje ukhajja, congregacionan taqeniw chʼamañchtʼatäñ muntanjja. Inas tantachäw tukuyarojj Tantachasiñ Utansa jan ukajj videoconferencia toqes jilat kullakanakamp parltʼañatakejj mä jukʼamp quedassna. Ancianonakajj chʼamañchtʼatäñ munapjjarakiwa. Yaqhep jilat kullakanakajja, ancianonakar yuspärañatakejj tarjetanakwa lurarapipjje. Mä epidemiajj sartki ukhajja, ancianonakajj wali ocupatäpjjewa. “Jumanakajj maynit maynikam chʼamañchtʼasisipkakim, maynit maynikamas yanaptʼasisipkakim” siski uka ewjjtʼarjam lurañatak chʼamachasitasajj wali sumapuniwa (1 Tes. 5:11).

7. ¿Kuna jan walinakansa mä akatjamat utjir jan waltʼäwejj maynir uñjasiyaspa?

⁷ Mä akatjamat jan waltʼäwejj utjki ukhajja, mä chʼipjjtanakwa maynin jakäwipajj cambiaspa. Inas utjirinakapsa, utapsa jan ukajj mä munat amigopsa familiarapsa aptʼaschispa. Ukanakajj jilat kullakanakasar pasarakiwa. ¿Kunsa jupanakar yanaptʼañatakejj lursna?

8. ¿Kunsa ancianonakasa awk taykanakas janïr mä akatjamat jan waltʼäwi utjkipan lurapjjañapa?

⁸ ¿Kunsa ancianonakajj lurapjjaspa? Ancianonaka, jilat kullakanakarojj mä akatjamat jan waltʼäwejj utjkaspa ukatak wakichtʼasipjjañapatak yanaptʼapjjam. Taqpach congregacionajj kunsa salvasiñatakisa jumanakar kun yatiyañatakis lurapjjañapa ukanak yatipjjañapatakejja, janïrjat yanaptʼapjjam. Pasïr yatichäwin parlaniwayktan uka Margaret kullakajj akham siwa: “Congregacionatak ewjjtʼanak churaski uka mä discursonjja, ancianonakajj bosquen nakhaski uka nina jiwarayañajj janïraw taqpachajj tukuskiti, autoridadanakatejj sarjjapjjam sistani jan ukajj jukʼamp jan waltʼañajj utj-jjani ukhajja, ratukiw uka cheqat sarjjañasa sasaw amtayapjjetäna” sasa. Uka discursojj horasarupuniw arstʼasïna, kuna laykutejj phesqa semananak qhepatjja jukʼampiw uka bosquejj nakhantjjäna. Awk taykanaka, familiampi Bibliat yatjjatasajja, mä akatjamat jan waltʼäwejj utjkaspa ukhajj kunsa sapa maynis lurapjjasma uka toqet parltʼasipjjam. Jumanakatï wakichtʼatäpjjäta, wawanakamas wakichtʼatäpjjarakini ukhajja, jan waltʼäwinakajj utjkani ukhajj janiw sint sutjasipkätati.

9. ¿Kunsa ancianonakajj mä jan waltʼäwi janïr paskipansa uka pasatatsa lurapjjañapa?

⁹ Jumatï superintendente de grupo ukham serviskstajja, grupomankir jilat kullakanakan celular numeropa uta direccionap mayiñatakejj janiw mä akatjamat jan waltʼäwi puriniñap suyañamäkiti. Mä lista lurasim, uka listajj actualizatäñaparakiwa. Ukhamatwa mä akatjamat jan waltʼäwejj utjkani ukhajj sapa publicadoramp facilak parltʼasipjjäta, kunan yanaptʼañas wakisi uksa amuyapjjarakïta. Ukatjja ancianonakan coordinadoraparuw uk yatiyañama, jupajj circuito jilataruw yatiyjjarakini. Ukham juntuk trabajisajja, jukʼamp sumwa jilat kullakanakar yanaptʼapjjaspa. Bosquejj nakhantkäna ukhajja, Margaret kullakan superintendente de circuitopajj ancianonakar yanaptʼañatakejj 36 horanakaw jan ikin trabajïna, uka ancianonakajj yaqha cheqanakar sarjjapjjäna uka 450 jilat kullakanakar jikjjatañataki yanaptʼañatakiw chʼamachasisipkäna (2 Cor. 11:27). Ukhamatwa taqe khitinakatï alojasiñ munapkäna ukanakatakejj mä lugarajj jikjjatasïna.

10. ¿Kunatsa ancianonakatakejj ovejanakar uñjañajj wali importantejja? (Juan 21:15).

¹⁰ Ancianonakajj Bibliampiw jilat kullakanakar chʼamañchtʼapjjañapa, chuymachtʼapjjañaparakiwa (1 Ped. 5:2). Mä jan waltʼäwejj utjki ukhajja, jilat kullakanakajj walikïsipkiti, manqʼañanïpjjeti,  isinïpjjeti, alojasipjjañapatak mä lugaras utjiti ukwa nayraqat uñjapjjañapa. Ukampis walja phajjsinak qhepatjja, jan waltʼäwin uñjasirinakajj Bibliamp chʼamañchtʼatäñsa chuymachtʼatäñsa munasipkakispawa (Juan 21:15 liytʼäta). Comité de Sucursalankir Harold sat jilatajja, jan waltʼäwinakan uñjasipkäna ukanakampejj waljanimpiw parltʼäna, jupajj akham siwa: “Walikëjjañatakejj walja tiempow munasi. Jilat kullakanakajj wasitats nayrjam jakasjjapjjchejja, mä munat familiarapana jan ukajj mä munat amigopan jiwatapatsa, kunatï wali munatäkäna uk aptʼasipjjatapatsa jan ukajj mä jan waltʼäwin uñjasiwayapkäna ukanakatsa amtasisipkakispawa. Ukanak amtasinwa maynejj wasitat wal llakisjjaspa. Ukajj janis Diosar confiyapkaspa ukham janiw sañ munkiti, taqeniw ukhaman uñjassna” sasa.

11. ¿Mä jan waltʼäwin uñjasipki uka familianakajj kunanakan yanaptʼatäñsa munapjjaspa?

¹¹ “Jachapki ukanakampejj jachapjjarakim” siski uka ewjjtʼarjamaw ancianonakajj lurapjjañapa (Rom. 12:15). Jan waltʼäwinakan uñjasirinakajja, Jehová Diosasa jilat kullakanakas qhawqsa jupanakar munasipjje uk amtayatäñwa munapjje. Ancianonakajj orapjjañapataki, Bibliat yatjjatapjjañapataki, tantachäwinakaru predicacionar sarapjjañapatakiw familianakar yanaptʼapjjaspa. Awk taykanakajj kunanaksa mä jan waltʼäwejj jan tukjkaspa uk jan armapjjañapatakiw wawanakapar yanaptʼapjjañapa, ukatakejj ancianonakaw awk taykanakar chʼamañchtʼapjjaspa. Awk taykanaka, Diosajj wawanakaman amigopapunïniwa, jupanakamp chiktʼatapunïskaniwa, uk wawanakamar amtayapjjam. Oraqpachankir jachʼa familiasajj jiwasar yanaptʼañatak jankʼakïpjjatap wawanakamar qhanañchtʼapjjam (1 Ped. 2:17).

12. Labores de socorro ukan yanaptʼañatakejj ¿kunsa congregacionankirinakajj lurapjjaspa? (Foto uñjjattʼäta).

¹² ¿Kunsa congregacionajj luraspa? Jumajj jakaskta uka cheqantï mä jan waltʼäwejj utjani ukhajja, kunansa yanaptʼasma uk ancianonakar jisktʼam. Jan waltʼäwin uñjasiwayapki uka jilat kullakanakaru jan ukajj labores de socorro ukan yanapir jilat kullakanakar alojañatakejja, inas utam mä jukʼa tiempotak churchisma. Inas manqʼañanaka, kunanaktï necesitapki ukanak churas yanaptʼchisma. Jakaskta uka cheqat wali jayantï mä akatjamat jan waltʼäwejj utjchi ukhajj ¿kunjamsa yanaptʼasma? Jan waltʼäwin uñjasirinakatak orasaw yanaptʼasma, obra mundial ukar donacionanak churasaw labores de socorro ukar yanaptʼarakisma (2 Cor. 1:8-11; 8:2-5). Mä jan waltʼäwejj utjki uka cheqarutï viajiñ puedstajja, kunjamsa yanaptʼasma uk ancianonakar jisktʼam. Invittʼapjjätam ukhajja, kuna  pachasa, kun lurasas yanaptʼasma ukatakejj wakichtʼapjjätamwa.

13. Predicacionajj jarkʼatäki uka lugaranakan ¿kuna jan walinakansa jilat kullakanakajj uñjasipjje?

¹³ Arknaqat uñjasiñajj jukʼampwa jilat kullakanakar jan waltʼayi. Predicañajj jarkʼatäki uka cheqan jakir jilat kullakanakajja, jichhakamas qollqet pistʼata, usuntat uñjasisipkakiwa, jan ukajj familiaranakapasa amigonakapas jiwapjjarakiwa. Jarkʼat uñjasisajj janiw ancianonakajj libre sarnaqapkiti, chʼamañchtʼatäñ munapki uka jilat kullakanakampejj janiw sum parltʼasiñs puedipkiti. Pasïr yatichäwin parlaniwayktan uka Andréi jilatajj ukhamanwa uñjasïna. Predicación grupopankir mä kullakajja, qollqet pistʼataw uñjasïna, autot sarkasaw mä accidentejj pasarakitayna. Kullakajj walja kuti operayasitapatjja, janiw trabajiñ puedkänti. Ukampis autoridadanakan jarkʼatpachasa, pandemiankasasa jilat kullakanakajj jupar yanaptʼañatakejj wal chʼamachasipjjäna, kunanaktï lurapkäna ukanak Jehová Diosajj sum uñjaskäna.

14. ¿Kunjamsa ancianonakajj Jehová Diosar confiyapjjatap uñachtʼayapjje?

¹⁴ ¿Kunsa ancianonakajj lurapjjaspa? Andréi jilatajj Jehová Diosaruw orasïna, kuntï lurirjamäkäna ukwa lurarakïna. ¿Kunjamsa Diosajj oracionapar jaysäna? Jan sinti jarkʼatäpkäna uka jilat kullakanak toqew Diosajj uka kullakar yanaptʼäna. Yaqhepajj doctoran ukaruw kullakar irpapjjäna, yaqhepasti qollqempiw yanaptʼapjjäna. Ukham mayachtʼatäpjjatapatsa taqe kun jan ajjsartʼas lurapjjatapatsa Diosajj bendisïnwa (Heb. 13:16). Ancianonaka, predicacionajj jarkʼatäkani ukhajj lurañanakamamp phoqañatakejj mayninakamp yanaptʼayasipjjam (Jer. 36:5, 6). Taqe kunat sipansa Jehová Diosar confiyapjjam. Jupaw jilat kullakanakar uñjañatakejj yanaptʼapjjätam.

15. Arknaqat uñjaskañäni ukhajj ¿kunsa mayachtʼatäñatakejj lurañasa?

¹⁵ ¿Kunsa congregacionajj luraspa? Arknaqat uñjaskañäni ukhajja, inas grup grupo tantachasjjchiñäni. Ukhamajj jichhaw taqenimpejj sum apasiñasa. Cheqas Supay contraw nuwasiñasa, janiw jiwaskamajj nuwasiñasäkiti. Jilat kullakanakan pantjasitanakaps perdonañasawa, jan waltʼayasiñanaks jankʼakiw askichañasa (Prov. 19:11; Efes. 4:26). Yanaptʼasiñatakejj jiwasaw nayrankañasa (Tito 3:14). Kunjamsa Andréi jilatan grupopankir jilat kullakanakajj uka kullakar yanaptʼapjjäna ukajj taqeniruw wal yanaptʼäna. Jupanakajj mä familjamaw jukʼamp mayachtʼatäjjapjjäna (Sal. 133:1).

16. Colosenses 4:3, 18 textorjamajja, ¿arknaqatäpki uka jilat kullakanakatakejj kunsa lursna?

 ¹⁶ Walja jilat kullakanakasaw autoridadanakan jarkʼatpachas Jehová Diosar servisipkaki. Yaqhepajj Diosar servipjjatapatwa carcelankapjje. Jupanakatakisa familiapatakis orarapiñasawa, carcelankir jilat kullakanakasar jan ajjsaras yanaptʼapjje ukanakatakis orarapiñasawa, jupanakajj carcelankir jilat kullakanakarojj Diosar confiyapjjañapatakiw yanaptʼapjje, kunanaksa necesitapjje ukanak churasa, tribunalanakan arjjatasaw yanaptʼapjjaraki (Colosenses 4:3, 18 liytʼäta). c Oracionanakasajj mayninakar wal yanaptʼaspa, uk janipun armapjjañäniti (2 Tes. 3:1, 2; 1 Tim. 2:1, 2).

17. ¿Kunjamsa arknaqat uñjaskañäni ukatakejj jichhatpach wakichtʼassna?

¹⁷ Arknaqapjjestani ukatakejja, jumas familiamas jichhaw wakichtʼasipjjañama (Hech. 14:22). Kuna jan walinakatï pasapkiristam ukanakat jan lupʼipjjamti, antisas Jehová Diosamp jukʼamp sum apasiñatak chʼamachasipjjam, wawanakamarus ukatak yanaptʼapjjam. Llakita uñjasisajj Jehová Diosar yatiyapjjam (Sal. 62:7, 8). Kuna razonanakas Diosar confiyañatakejj utji uka toqet familiamamp parltʼam. d Jumatï mä akatjamat jan waltʼäwitak wakichtʼatäyäta, Jehová Diosarus confiyarakïta ukhajja, jan ajjsarirïpjjañapataki tranquilöpjjañapatakiw wawanakamar yanaptʼäta.

18. ¿Kunjamsa jutïrin jakasjjañäni?

¹⁸ Diosan sumankañapaw jan llakisiñatak yanaptʼistu (Filip. 4:6, 7). Epidemianakajj sartki, mä akatjamat jan waltʼäwinakajj utjki jan ukajj arknaqat uñjasktan ukhasa, Jehová Diosajj sumankañapampiw jan sint llakisiñatak yanaptʼistu. Jiwasar cuidañatak wal chʼamachasipki uka ancianonak toqew yanaptʼistu, maynit maynikamas yanaptʼasiraksnawa, ukajj mä privilegiowa. Uka sumankañaw jutïrin uñjaskañäni uka jan waltʼäwinakar saykatañatakisa, ‘jachʼa tʼaqesiñ tiempotakis’ wakichtʼistu (Mat. 24:21). Uka tiemponjja, tranquilokïñasasa, mayninakar ukhamäpjjañapatak yanaptʼañas wali wakiskirïniwa. Ukampis jachʼa tʼaqesiñ tiempo pasatatjja, janiw kuna jan waltʼäwinakas llakisiyjjestaniti. Kunjamtï Jehová Diosajj munki ukhamaw kusisit jakasjjañäni: cheqpach sumankañaw wiñayatak utjistani (Is. 26:3, 4).