1. ¿Jehová Diosan wiñay jakañatak promesapat lupʼiñajj kunatakis yanaptʼistu?

 JEHOVÁ DIOSAJJA, jupar istʼapki ukanakarojj ‘wiñay jakañ’ churañwa arsuwayi (Rom. 6:23). Uka suma promesapat lupʼtan ukhajja, juparojj jukʼampwa munastanjja. Ak amuytʼañäni: alajjpachankir Awkisajj wal munasistu, ukatwa jupat janipun jitheqtañasatakejj wiñay jakañ churañ munistu.

2. ¿Wiñay jakañasatak Diosajj arsuwayki uka promesajj kunjamsa yanaptʼistu?

² Diosajj wiñay jakañ jiwasar churañatak arski uka promesapajja, yantʼanakan aguantañasatakiw yanaptʼistu. Enemigonakasajj jiwayämaw sasinsa amenazapkchistanejja, Jehová Diosar serviñ janipuniw jaytkañäniti. ¿Kunatsa ukham sistanjja? Mä razonajj akawa, kunjamtï yatktanjja Jehová Diosat jan jitheqtas jiwañäni ukhajja, jupaw jaktayistani, jan mayamp jiwañatak suytʼäw churarakistani (Juan 5:28, 29; 1 Cor. 15:55-58; Heb. 2:15). ¿Kunatsa wiñayatakiw jakañäni sasin confiytanjja? Ukatakejj mä qhawqha razonanak uñjañäni.

3. ¿Kunatsa Jehová Diosajj wiñayatakiw jakayistaspa sasin confiysna? (Salmo 102:12, 24, 27).

³ Jehová Diosajj jakañ chuririwa, wiñay jakirirakiwa, ukhamajj wiñayatakiw jakayistaspa (Sal. 36:9). Kawkïr textonakatï Jehová Diosajj utjapunïnwa siski, utjapuniniwa siskaraki ukanakat mä qhawqha uñjañäni. Salmo 90:2 qellqatajja Diosajj “wiñayatpach wiñayatak” utjatapwa qhanañchistu. Salmo 102 qellqatajj ukar uñtasitarakwa parli (Salmo 102:12, 24, 27 liytʼäta). Alajjpachankir Awkisat parlkasajja, Habacuc profetajj akham sasaw qellqäna: “Jehová Dios Tata, ¿janit jumajj wiñayatpachajj  utjkayäta? Nayan Diosaja, Santo Diosaja, jumajj jan jiwirïtawa” sasa (Hab. 1:12).

4. ¿Jehová Diosajj wiñayatpach utjapunitap amuyañatï jiwasatak chʼamächi ukhajj kunatsa jan llakisiñasäki?

⁴ ¿Jehová Diosajj “wiñayans wiñayapatak” jakirïtap amuyañajj jumatak chʼamakiti? (Is. 40:28). Janiw jumatakik uk amuyañajj chʼamäkiti. Elihú chachajj Diosat akham sänwa: “Jupan maranakapajj janiw jaktʼañjamäkiti” sasa (Job 36:26). Ukampis jiwasatï mä kuns jan sum amuykstan ukhajja, janiw ukajj janis cheqäkaspa ukham sañ munkiti. Amuytʼañataki, kunjamatsa luza qhanajj utji uk janis sum amuykstanjja, ukajj janis luza qhanajj utjkaspa ukham janiw sañ munkiti. Niya ukhamarakiwa, Jehová Diosajj jan qalltanïtapsa jan tukuyanïtapsa inas jaqejj janipun taqpach amuykchiñäniti, ukampis ukajj janis Diosajj wiñay jakir Diosäkaspa ukham janiw sañ munkiti. Kunatï Luririsat cheqäki uk yatiñajja, janiw qhawqsa mä kunats amuytan ukarjamäkiti (Rom. 11:33-36). Ukhamarus alajjpachasa, intisa, warawaranakas janïr utjkäna uka nayraw Diosajj utj-jjäna. Ukatwa Bibliajj akham sasin qhanañchi: “Jupaw chʼamapampejj oraq luri” sasa. Ukatsti sarakiwa: “Jupaw alajjpachanaksa [...] janatataraki” sasa (Jer. 51:15; Hech. 17:24). Kunatsa wiñayatakiw jaksna sasin confiytan ukatak yaqha razón uñjarakiñäni.

5. ¿Adanamp Evampejj kuna amtamp luratäpjjänsa?

⁵ Jehová Diosajj aka oraqen lurawaykäna uka jakirinakajja tiempompejj jiwapjjañapänwa, ukampis jaqenakakiw jan jiwapjjañapäkänti. Jupanakajj wiñayatakiw jakapjjañapäna. Ukampis Jehová Diosajj akham sasaw Adán chachar ewjjtʼäna: “Walimpi jan walimpi yatiñ churir qoqan achupjja, janiw manqʼañamäkiti. Kunürutejj uka qoqan achup manqʼäta ukhajja, cheqpachapuniw jiwäta” sasa (Gén. 2:17). Adanampi Evampitï Jehová Diosar istʼapjjasapänjja, janiw jiwapkaspänti. Tiempompejj jupanakar Diosajj “jakañ qoqan achupat” manqʼayaspänwa, ukhamatwa “wiñay” jakañatak luratäpjjatap amuyasipjjaspäna (Gén. 3:22). b

6, 7. 1) ¿Kunanakas jan jiwañatak luratätas uñachtʼayistu? 2) ¿Wiñayatak jakjjäta ukhajj kun lurañsa jumajj munta? (Fotompi dibujonakampi uñjjattʼäta).

⁶ Lejjwisajja jan ukajj lajjwisajja, kunanaktï taqpach jakäwisan yateqktan ukat sipans jukʼampinakwa imaspa, ukwa yaqhep cientificonakajj yatjjatasin qhanañchapjje. 2010 maranjja, lejjwisajj niya kimsa millón horanakan  grabat videomp sasiwa, taqpach uka video uñtañatakejj 300 maranak jilaw munasispa sasaw mä revistajj qhanañchäna. Kuntï uka revistajj siski ukat sipans inas lejjwisajj jukʼampinak imchispa. Ukampis uka revistajj akwa uñachtʼayi: kunanaktï 70 jan ukajj 80 maranakan yateqasin amtktan ukat sipans jukʼamp amtañatakiw Jehová Diosajj lejjwis lurawayi (Sal. 90:10).

⁷ Jehová Diosajj wiñay jakañ munañasatakiw lurawayistu. Diosajj “jaqen chuymaparusa wiñay jakañ munañwa uchäna” sasaw Bibliajj qhanañchi (Ecl. 3:11). Ukatwa jiwañajj jiwasatak mä enemigojja (1 Cor. 15:26). Ak amuytʼañäni, wal usunttan ukhajja, ¿ukhamakit jan kun luras jiwañ amtjjtanjja? Janiwa. Niya jilapartejja, doctoran ukaruw sartanjja, uka usut waliptañatakejj medicamentonakwa umaraktanjja. Cheqas jan jiwañatakejj taqe kunwa lurtanjja. Kunapachatï mä munat familiarasasa jan ukajj mä amigosas jiwi ukhajja, waynäskpansa jan ukajj jilïrïskpansa wal llakistanjja, janirakiw ratuk armañjamäkiti (Juan 11:32, 33). Diosajj wal munasistu, jupatï jan wiñay jakañas munkaspajja, janiw wiñay jakañ munañasatakisa ni wiñay jakañatakis lurkistaspänti. Ukampis wiñayaw jakasiñäni sasin creyiñatakejj yaqha suma razonanakaw utji. Kunanaksa Jehová Diosajj lurawayi kunanaksa luraskaraki ukanakat mä qhawqha uñjañäni, ukanakaw kuntï qalltan amtkäna ukan pachpakïskatap uñachtʼayistu.

8. ¿Kunsa Isaías 55:11 textojj Jehová Diosan amtapat qhanañchistu?

⁸ Adanamp Evampejj juchachasipjjänwa, ukatwa taqe wawanakapajj jiwtanjja, ukampis Jehová Diosajj janiw amtap mayjtʼaykiti  (Isaías 55:11 liytʼäta). Diosajj jupat jan jitheqtir servirinakapajj wiñayatak jakapjjañap munaskakiwa. ¿Kunjamatsa uk yattanjja? Jehová Diosajj amtap phoqañatakejj taqe kunwa lurawayi, arsuwayaraki.

9. ¿Kunsa Jehová Diosajj mä promesan arsüna? (Daniel 12:2, 13).

⁹ Jiwatanakajj jaktanipjjaniwa wiñayatakirakiw jakapjjaspa sasaw Jehová Diosajj mä promesa arsuwayi (Hech. 24:15; Tito 1:1, 2). Jupat jan jitheqtas serviri Job chachajja, Jehová Diosajj jiwatanakar wal jaktayañ munatapat janiw payachaskänti (Job 14:14, 15). Daniel profetajj jiwatanakan jaktaniñap yatïnwa, wiñay jakañ katoqapjjañapsa yatirakïnwa (Sal. 37:29; Daniel 12:2, 13 liytʼäta). Jesusan tiempopan jakir judionakajja, Jehová Diosajj jupat jan jitheqtir servirinakaparojj “wiñay jakañ” churañap yatipjjänwa (Luc. 10:25; 18:18). Jesusajj walja kutiw uka promesat parläna juparus Awkipaw jaktayäna (Mat. 19:29; 22:31, 32; Luc. 18:30; Juan 11:25).

10. ¿Nayra tiempon jiwatat jaktañajj utjkäna ukajj kunsa uñachtʼayi? (Dibujo uñjjattʼäta).

¹⁰ Jehová Diosaw jakañ churistu, jiwatanakar jaktayañatakis chʼamanirakiwa. Sarepta markankir mä viuda warmin yoqapar jiwatat jaktayañatakejj Jehová Diosaw Elías profetar chʼam churäna (1 Rey. 17:21-23). Tiempompejja, Diosan yanaptʼapampiw Eliseo profetajj Sunem markankir mä warmin yoqapar jiwatat jaktayäna (2 Rey. 4:18-20, 34-37). Jupanakan jiwatat jaktapjjatapasa mayninakan jiwatat jaktapjjatapasa, Jehová Diosajj jiwatanakar jaktayañatak chʼamanïtapwa uñachtʼayi. Jesusajj aka oraqenkkäna ukhajja, Awkipajj jiwatat jaktayañatak jupar chʼam churatapwa uñachtʼayäna (Juan 11:23-25, 43, 44). Jichhajj Jesusajj alajjpachankjjewa, juparojj ‘Diosaw taqe autoridad churi, alajjpachansa ukhamarak aka oraqensa’. Ukhamajj “taqe khitinakatï sepulturankapki” ukanakar wiñay jakasipkakiñapatak jaktayañ arsuwayki uka promesap phoqaniwa (Mat. 28:18; Juan 5:25-29).

11. ¿Kunjamsa Jesusan juchampit jiwañampit jiwasar kutsuyatapat wiñay jakañ katoqsna?

¹¹ ¿Kunatsa Jehová Diosajj Yoqapan wali tʼaqesis jiwañap permitpachäna? Jesús pachpaw uka jisktʼar qhanañchäna, akham sasa: “Diosajj aka mundor wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa (Juan 3:16). Diosajj juchampit jiwañampit jiwasar kutsuyañatakiw Yoqapar churäna, ukhamatwa juchanakasat perdonistu, ukhamatarakwa wiñay jakañ katoqsna (Mat. 20:28). Diosan uka wakiskir amtapatjja, apóstol Pablojj akham sasaw qhanañchäna: “Niyakejjay jiwañajj mä jaqe taypi utjchejja, jiwatat jaktañajj mä jaqe taypiw utjaraki. Kunjamtï taqenis Adán kawsajj jiwarasipkejja, ukhamarakiw taqenis Cristo taypejj jaktayatäpjjani” sasa (1 Cor. 15:21, 22).

12. ¿Kunjamsa Jehová Diosajj amtap phoqani?

¹² Jesusajj discipulonakapar orasiñ yatichkäna ukhajja, Diosan Reinop jutañapataki, Awkipan munañapajj aka oraqen lurasiñapatak mayipjjañapatakiw yatichäna (Mat. 6:9, 10). Diosan amtapat mayajja, jaqenakajj aka oraqen wiñay jakapjjaspa ukawa. Uk phoqañatakejja, Jehová Diosajj Reinopan apnaqañapatakiw Jesucristo Yoqapar Reyit uttʼayäna, ukatjja 144.000 jaqenakaruw tantachthapiraki, ukhamat Jesusamp chik Diosan munañap phoqapjjañapataki (Apoc. 5:9, 10).

13. ¿Kunsa Jehová Diosajj jichhürunakan luraski, ukat kunsa jumajj lurañama?

¹³ Jichhürunakanjja, Jehová Diosajj ‘walja jaqenaka’ sasin uñtʼatäpki ukanakaruw tantachthapiski, Reinopan jakapjjañapatakiw  wakichtʼaskaraki (Apoc. 7:9, 10; Sant. 2:8). Aka mundon jaqenakajj uñisisiñanaka guerranak kawsas tʼaqanoqtatäpkchejja, ‘walja jaqenaka’ sasin uñtʼatäpki uka taypinkirinakajj uñisisiñanak apanukuñatakiw chʼamachasipjje. Jupanakajj espadanakap aradon rejaparus tukuyapkaspa ukhamawa (Miq. 4:3). Walja jaqenakajj jiwapki uka guerranakan nuwasiskañat sipansa, jupanakajj ‘cheqpach jakañ’ jikjjatapjjañapatakiw jaqenakar yanaptʼasipki, ukatakejj cheqpach Diosampita amtanakapampitwa yatichapjje (1 Tim. 6:19). Niyakejjay jupanakajj Diosan Reinopar apoyapjjchejja, familiaranakapajj jupanak contraw saytʼapjjaspa jan ukajj qollqet pistʼataw uñjasipjjaspa, ukampis kunanaktï necesitapki ukanak Jehová Diosaw jupanakar churi (Mat. 6:25, 30-33; Luc. 18:29, 30). Taqe ukanakaw Diosan Reinopajj cheqapun utjatap uñachtʼayistu, Jehová Diosan amtaps phoqasiyaskakiniwa.

14, 15. ¿Jehová Diosajj wiñayatak jiwañar tukjañ arsuwayki ukajj kunjamsa phoqasini?

¹⁴ Jesusajj alajjpachan niyaw Diosan Reinopan Reyjam apnaqjje, Jehová Diosan promesanakapsa taqpachwa phoqarakini (2 Cor. 1:20). 1914 marat aksarojja, Jesusajj enemigonakapar atipjaskiwa (Sal. 110:1, 2). Niyaw Jesusasa 144.000 ajllitanakas phoqatpach  atipjapjjani, jan wali jaqenakarus tukjapjjarakiniwa (Apoc. 6:2).

¹⁵ Jesusajj Waranqa Maranak apnaqkani uka tiemponjja, jiwatanakaruw jaktayani, Jehová Diosar istʼir taqe jaqenakarus perfectöpjjañapatakiw yanaptʼarakini. Qhep qhepa yantʼa tukuyarojja, khitinakarutï Jehová Diosajj cheqapar sarnaqer jaqet uñjki ukanakajj “oraq katoqapjjani, wiñayatakiw ukan jakapjjarakini” (Sal. 37:10, 11, 29). Ukatsti “jiwañajja, mä arunjja qhepïri enemigojj tukjatäjjaniwa” (1 Cor. 15:26). ¡Ukajj wali kusiskañäniwa!

16. ¿Kuna importante razonatsa Jehová Diosar serviñasa?

¹⁶ Kunjamtï yatjjataniwayktanjja, wiñay jakañ suytʼäwit Bibliajj wali sumwa qhanañchistu. Aka jan wali qhepa urunakanjja, uka suma suytʼäwiw Diosat jan jitheqtañatak yanaptʼistu. Ukampis Jehová Diosarutï kusisiyañ munstan ukhajja, janiw vidas salvasiñ laykukejj Jehová Diosatsa Jesusats jan jitheqtañasäkiti, jan ukasti jupanakar taqe chuyma munasitasatwa jan jitheqtañasäkiti, ukaw jukʼamp importante razonajja (2 Cor. 5:14, 15). Ukham munasiñaw jupanakat yateqasiñasatak yanaptʼistu, kuntï suyktan ukanakat yaqhanakar parlañatakis yanaptʼarakistu (Rom. 10:13-15). Jan jiwas pachpat llakisiñataki mayninakar jukʼamp churañatak chʼamachasiñäni ukhajja, Jehová Diosajj jukʼampiw wiñayatak amigosäñ munani (Heb. 13:16).

17. ¿Kunatakis sapa maynejj chʼamachasiñasa? (Mateo 7:13, 14).

¹⁷ ¿Jiwasajj wiñay jakañ katoqarakiñäniti? Jehová Diosajj wiñay jakañ katoqañaswa muni, ukampis jiwasaw wiñay jakañar apir thakinkaskakiñatak chʼamachasiñasa (Mateo 7:13, 14 liytʼäta). ¿Wiñayatak jakjjañäni ukhajj kunjamas jakasjjañäni? Uka toqetwa jutïr yatichäwin yatjjataskañäni.