JEHOVÁ DIOSAJJ walja regalonakwa churistu, kunjamsa uka regalonakat disfrutañäni uks jiwas pachpaw amtsna, wal ukat yuspärtanjja. Uka regalonakat mayajj vinowa. Vinot parlkasinjja Bibliajj akham siwa: “Tʼantʼajj kusisiñatak luratawa, vinosti jakañ vidarojj kusisiyiwa” sasa (Ecl. 10:19; Sal. 104:15). Ukampis yaqhepanakajj alcohol umañar yatintatäpjjewa. Ukhamarus kawkjans jakasipjje kunjam costumbrenïpjjesa ukarjamaw alcohol umañat may may amuyapjje. ¿Kunjamsa cristianonakajj alcohol umañar uñjañasa?

Alcohol umañat mä amtar puriñatakejj janiw kawkjansa jakastan, kawkjansa jilsuwaytan ukarjamajj amtañasäkiti, jan ukasti kunjamsa alcohol umañar Diosajj uñji ukarjamaw amtañasa. Ukham lurasajj jukʼamp kusisitäñäniwa.

Oraqpachanjja jaqenakajj sapa kutiw alcohol umapjje, walj umapjjaraki. Yaqhepajj sum jikjjatasiñatakiw umapjje. Yaqhepajj problemanakap armañatakiw umapjjaraki. Yaqhep lugaranakanjja, amuytʼasir jaqëpjjatap uñachtʼayañataki jan ukajj wali chʼamanïpjjatap uñachtʼayañatakiw alcohol wal umapjje.

Ukampis cristianonakajj wali munasir Luririsampiw irpayastanjja. Arupanjja, alcohol jiljas umasajj kuna jan walinakans uñjassna uka toqetwa ewjjtʼistu. Proverbios 23:29-35 textonjja machantasir jaqejj kuna jan walinakans uñjasi ukatwa parli. a Europa toqenkir Daniel sat anciano jilatat amuytʼañäni. Janïr Testigökasajj kunjamäns jakäwipajj ukat parlkasajj akham siwa: “Alcohol sint umasajj jan wali amtanakaruw puriyäta, sinti jan walinakanwa uñjasirakiyäta, ukanakajj jichhakamaw chuym wal usuyitu” sasa.

¿Kunas suma amtanakar puriñatakisa, alcohol wal umatasat problemanakan jan uñjasiñatakis yanaptʼistani? Ukatakejj Jehová Diosjam amuyañaw yanaptʼistaspa.

Bibliajj alcoholat kamsisa, kunatsa jaqenakajj alcohol umapjje uk mä qhawq jichhajj yatjjatañäni.

Diosan Aruparjamajja, alcohol mä jukʼa umtʼañajj walikïskiwa. Vino umtʼañajj wali sumarakïspawa, uka toqet Eclesiastés 9:7 texton akham siwa: “Kusisit manqtʼasinim, kusisit chuymampi vinom umtʼasirakim” sasa. Jesusasa Jehová Diosat jan jitheqtir yaqhep servirinakapas yaqhep horasanakajj vino umtʼapjjänwa sasaw Bibliajj qhanañchi (Mat. 26:27-29; Luc. 7:34; 1 Tim. 5:23).

Alcohol mä jukʼa umtʼañampi machjasiñampejj janiw pachpäkiti. Bibliajj akham sasaw qhan ewjjtʼistu: “Janirak vinompis machjasipjjamti” sasa (Efes. 5:18). Ukat akham sarakiwa: ‘Machirinakajj janiw Diosan Reinop katoqapkaniti’ sasa (1 Cor. 6:10). Kunjamtï uñjtanjja, Jehová Diosatakejj jiljas umañasa machantasiñas janiw walïkiti. Jaqenakan amuyunakapamp apayasiñat sipansa, kunjamtï Jehová Diosajj uñjki ukham uñjañatakiw chʼamachasiñasa.

Yaqhepajj akham sapjjewa: “Walja alcohol umkasas janiw machantaskti” sasa. Ukampis ukham amuyañajj jan waliruw purtʼasiyistaspa. Bibliarjamajja, khitinakatï ‘vinon esclavopäpki’ ukanakajj chachäpas warmïpas jachʼa juchanakaruw purtʼasipjjaspa, janirakiw Jehová Diosampis sum apasjjapjjaspati (Tito 2:3; Prov. 20:1). Yaqhepanakajj ‘jiljas umirïpjjatapat’ janiw machaq mundor mantapkaniti sasaw Jesusajj sarakïna (Luc. 21:34-36). Ukhamajj kuna jan walinakarutï alcohol umañajj purtʼasiykaspa ukanakat ¿kunjamsa mä cristianojj jitheqtaspa?

Kunjamtï uñjktanjja, jiwasatï alcohol umañat mä amtar puriñatakejj costumbrenakasamp apayasiñäni ukhajja, sinti jan walinakanwa uñjassna. Ukhamajj manqʼañata jan ukajj umañat amtañasäki ukhajja, kunatï Jehová Diosar kusisiyki ukwa cristianonakjamajj lurtanjja. Bibliajj akham sasaw ewjjtʼistu: “Manqʼkasasa, umkasasa, jan ukajj kun lurkasasa taqe kunsa Diosar jachʼañchañatak lurapjjam” sasa (1 Cor. 10:31). Jichhajj mä qhawqha jisktʼanakampita Biblian wiñay yatichäwinakapampit yatjjatañäni.

¿Mayninakamp sum uñjayasiñatakit alcohol umtjja? Éxodo 23:2 textojj akham siwa: “Walja jaqenakar jan walinak lurir uñjasakejja janiw jan walinak lurañamäkiti” sasa. Uka versiculonjja, Jehová Diosajj jan walinak lurir jaqenakat jan yateqasipjjañapatakiw israelitanakar ewjjtʼaskäna. Uka ewjjtʼapajj cristianonakamppachatakiwa. Jiwasatï mayninakan amuyunakapampi luratanakapamp apayassna ukhajja, Jehová Diosan leyinakapwa pʼakintayistaspa, Diosats jitheqtayistaspawa (Rom. 12:2).

¿Chʼamanïtaj uñachtʼayañatakit umtjja? Yaqhep markanakanjja, wal umirinakas sapa kut umirinakas janiw jan walit uñjatäpkiti (1 Ped. 4:3). 1 Corintios 16:13 textojj akham sasaw ewjjtʼistu: “Amuyasipjjapunim, Diosar confiyañanjja suma saytʼatäpjjam, jan ajjsarirïpjjamti, chʼamani saytʼasipjjam” sasa. Ukhamajj alcoholajj janiw maynirojj wali chʼamani jaqer tukuykiti, jan ukasti jan amuytʼasiriruw tukuyi, suma amtanakar puriñas chʼamäjjarakiwa. Walja alcohol umañajj janiw wali chʼamanir tukuyktamti, antisas jan chʼamaniw jayttamjja. Isaías 28:7 textojja, khitinakatï alcohol kawsajj saranukupki ukanakajj liwinaqtapjjewa, lanktʼasipjjarakiwa sasaw qhanañchi.

Kunatï cheqapäki uk lurañ munstan ukhajja, Jehová Diosampiw yanaptʼayasiñasa, amuyasiñatakis chʼamachasiñasawa, Diosarus taqe chuymaw confiyañasaraki (Sal. 18:32). Ukatakejj wali amuyumpiw sarnaqañasa, Jehová Diosamp sum apasitas aptʼasiykistaspa uka amtanak apanukuñasarakiwa. Ukwa Jesusajj aka oraqenkkasajj luräna, ukatwa waljanejj wali chʼamani jan ajjsariri jaqerjam uñjapjjäna.

 ¿Problemanakajat armasiñatakit umtjja? Mä salmo qellqerejj akham sasaw Jehová Diosar säna: “Llakinakajj aynachtʼaykitäna ukhajja, jumaw nayar chuymachtʼistajja, tranquilokïñatakis yanaptʼistajja” sasa (Sal. 94:19). Jumatï llakinakanïstajja, jan alcohol umamti, jan ukasti Jehová Diosamp yanaptʼayasim. Ukatakejj Jehová Diosar kutin kutin jukʼamp orasiskakim. Waljanirojj congregacionankir experienciani mä jilatar ewjjtʼanak mayiñaw yanaptʼaraki. Maynejj jan walinakar saykatañatak alcoholak umjje ukhajja, yantʼanakar saykatañatakisa kunatï walïki uk lurañatakis janiw chʼamanëjjeti (Os. 4:11). Parlkayätan uka Daniel jilatajj akham siwa: “Llakimp jan aynachtʼañataki, naya pachpa jan sint juchañchasiñatakiw chʼamachasiskayäta, ukatwa ukanakar saykatañatakejj alcohol umayäta. Ukampis jukʼamp jan walinakanwa uñjasjjayäta, amigonakajas janiw utj-jjetänti, janis kunatakis sirvkirista ukhamwa amuyasjjayäta” sasa. ¿Kunas Danielar yanaptʼäna? Jupajj akham siwa: “Alcohol umañat sipans Jehová Diosan yanaptʼap munatajwa amuyasiyäta. Cheqas Diosan yanaptʼapampiw uka jan walinakar saykatawayta, atipjarakta” sasa. Ak janipun armañäniti: mä jan waltʼäwejj janis amuyusatakejj askichasirjamäkchinejja, Jehová Diosajj yanaptʼapunistaniwa (Filip. 4:6, 7; 1 Ped. 5:7).

Jumatï awisanakak alcohol umsta ukhajja, aka mä qhawqha jisktʼanakwa jisktʼasisma: “¿Alcohol wal umatajat mä familiarajas jan ukajj mä suma amigojas parlituti?”. Ukhamächi ukhajja, jan amuyasis alcohol umañar yatintaskatama jan ukajj jan walir purtʼasiskatamwa ukajj uñachtʼayaspa. “¿Nayrat sipans jukʼampit jichhajj alcohol umtjja?”. Janis alcohol umañar yatitäkstajja, ukar saraskatamwa ukajj uñachtʼayaspa. “¿Mä qhawqha urunaka jan ukajj jukʼamp urunak alcohol jan umañajj nayatak chʼamati?”. Ukajj alcohol umañar yatintatamwa uñachtʼayi. Ukhamächi ukhajj inas alcohol umañ jaytañatakejj doctoranakamp yanaptʼayasiñamajj wakischini.

Ukham jan walinakan jan uñjasiñatakejja, yaqhep cristianonakajj janiw ni mä jukʼsa alcohol umtʼapkiti. Yaqhep jilat kullakanakarojj janiw alcoholan saborapajj gustkiti, ukatwa jan umapkiti.  Maynitï alcohol jan umañ amtchi ukhajja, jupar munasitas laykojj uk amtatapat kʼumiñat sipans respetañasawa.

Yaqhepajj kunsa jan jilañchjañatakejj lurapjjani uk jupanak pachpaw amtapjje. Inas qhawqsa alcohol umapjjani uk amtapjjchi. Jan ukajj inas qhawqha kutis umapjjani uk amtapjjarakchi, inas manqtʼasitar mä jukʼa umtʼañsa jan ukajj semanan mä kut umtʼañs amtapjjchini. Maysa toqetjja, kuna kasta alcoholsa umapjjani, jan umapkarakini ukwa amtapjjaspa. Yaqhepajj mä jukʼa vino jan ukajj cerveza umtʼapjje, ukampis janiw wali fuertëki uk umapkiti, ni coctelanaks ni mezclat umañanaks umapkiti. Maynitï qhawqsa umaspa uk sum amuytʼasi ukhajja, kuntï amtki ukar respetañajj jukʼamp facilakëjjewa. Amuytʼasir mä cristianotï uk lurañ amtchi, ukarjam lurañatak chʼamachasirakchi ukhajja, janiw kunats phenqʼasiñapäkiti.

Maysa toqetjja, mayninakat llakisiñasarakiwa. Romanos 14:21 textojj akham siwa: “Jukʼamp walïspaw aycha jan manqʼañajja, ni vino umañasa jan ukajj yaqhanak lurañasa, jilamatejj ukanak luratamat lanktʼaschi ukhajja” sasa. Mä arunjja, mayninakarojj munasiñamp uñjañasawa. Mä jilatarutï alcohol umatasajj colerayirjamächi ukhajja, jilatar munasitasat janiw uka horasan umkañäniti. Ukhamatwa mayninakar respetatas uñachtʼaytanjja, jiwasan askisak thaqañat sipansa mayninakan askip thaqataswa uñachtʼayaraktanjja (1 Cor. 10:24).

Cristianonakajj kuna leyinaktï gobiernojj alcohol umañ toqet apski ukarojj istʼaraktanwa. Inas menor de edadanakasa, auto apnaqerinakasa jan ukajj yaqhep maquinarianak apnaqerinakas janiw alcohol umapjjañapäkiti sasin leyinak apsupjjchi (Rom. 13:1-5).

Jehová Diosajj churkistu uka walja regalonakat kunjamsa disfrutañäni uk jiwaspachpa amtirwa Diosajj lurawayistu. Ukhamajj sapa mayniw kunsa manqʼañäni kunsa umañäni uk amtsna. Niyakejjay jiwas pachpa amtir luratästanjja, suma amtanakaruw puriñasa, amtanakasampejj alajjpachankir Awkisar kusisiyañ munataswa uñachtʼayañasaraki.