1. ¿Qhawqsa Abrahanajj Diosar confiyäna uk amuytʼkasajj kamsasas jisktʼassna?

 WALJA jaqenakas Abrahanat parlir istʼapkchejja, jilapartejj jukʼakwa jupat yatipjje. Ukampis jiwasajj wali sumwa jupar uñtʼtanjja. Abrahanajj ‘taqe khitinakatï Diosar confiyapki ukanakan awkipawa’ sasaw Bibliajj qhanañchi, uks yatiraktanwa (Rom. 4:11). Ukampis inas akham jisktʼassna: “¿Abrahanan kayup arkiristti? ¿Abrahanjam Diosar taqe chuym confiyiristti?” sasa. Cheqas taqeniw uk lursna.

2. ¿Kunatsa Abrahanat yatjjatañajj wali wakiskirejja? (Santiago 2:22, 23).

² Abrahanat yatjjatañaw Diosar jupjam confiyañatakejj yanaptʼistaspa. Jupajj Diosar istʼapunirïnwa, ukatwa mä jaya oraqer sarjjäna, walja maranakaw carpanakan jakäna, wali munat Isaac wawapar sacrificiot loqtañatakis jankʼakirakïnwa. Ukanak lurasajj Diosar taqe chuym confiyatapwa uñachtʼayäna. Diosar confiyatapatsa luratanakapatsa, Jehová Diosajj wali sum jupar uñjäna, amigoparakïnwa (Santiago 2:22, 23 liytʼäta). Jehová Diosajj taqenis jupan suma uñjatäsna jupan amigopäsna ukwa muni, jumatakis ukwa munaraki. Ukatwa Pablompir Santiagompir Abrahanan sarnaqäwipat qellqayäna. Jichhajja, kuntï Diosan Abrahán serviripat Romanos capítulo 4 ukat Santiago capítulo 2 ukan siski ukwa yatjjatañäni.

3. ¿Kawkïr textotsa Pablompi Santiagompejj aytapjjäna?

³ Pablompi Santiagompejj Génesis 15:6 textotwa aytapjjäna, Abrahanajj “Jehová Diosaruw confiyäna, ukatwa Diosajj juparojj cheqapar sarnaqer jaqet uñjarakïna” sasaw ukan  qhanañchi. Kunapachatï maynejj Diosamp cheqapar uñjatäki ukhajja, Diosajj jupat kusisiwa, jan kuna jan wal luriritwa uñji, jan juchanit uñjaraki. Jehová Diosajj pantjasiri jucharara mä jaqerojj janis kuna juchanïkaspa ukhamwa uñjaspa, ukajj wali musparkañawa. Jumajj Diosamp ukham uñjatäñwa munarakpachätajja. Cheqas Diosajj jumar ukham uñjiristamwa. Kunatsa Jehová Diosajj Abrahanar cheqapar sarnaqerit uñjäna, Diosamp ukham uñjatäñatakejj kunsa lurañasa ukwa yatjjataskañäni.

4. ¿Kunas cheqapar sarnaqer jaqet uñjatäñasatakejj jarkʼistu?

⁴ Romanonakar qellqat cartapanjja, taqeniw juchararätanjja sasaw Pablojj säna (Rom. 3:23). ¿Kunjamsa Diosajj jiwasamp kusisitäspa, cheqapar sarnaqerit uñjarakistaspa? Uka jisktʼar qhanañchtʼañatakejj suma chuyman cristianonakarojj Abrahanatwa Pablojj parläna.

5. ¿Kunatsa Jehová Diosajj Abrahanar cheqapar sarnaqerit uñjäna? (Romanos 4:2-4).

⁵ Abrahanajj Canaán oraqen jakkäna ukhaw Jehová Diosajj jupar cheqapar sarnaqerit uñjäna. ¿Kunatsa ukham uñjäna? Janiw Moisesan Leyipar jan pantjasis istʼatapat ukham uñjkänti (Rom. 4:13). ¿Kunjamatsa uk yattanjja? Kuna laykutejj 400 jila maranak qhepatwa Israel markajj uka Ley katoqaskäna. Ukhamajj ¿kunatsa Jehová Diosajj Abrahanar cheqapar sarnaqerit uñjäna? Diosajj Abrahanat khuyaptʼayasïnwa, jupar confiyatapatwa cheqapar sarnaqerit uñjäna (Romanos 4:2-4 liytʼäta).

6. ¿Kunatsa Jehová Diosajj mä jucharar jaqerojj cheqapar sarnaqerit uñji?

⁶ Maynejj Diosar confiyki ukhajja, Diosar “confiyatap laykojj cheqap sarnaqer jaqet uñjatawa” sasaw Pablojj ukjjar qhanañchäna (Rom. 4:5). Ukat akham sarakïnwa: “Mä jaqejj janis leyinakarjampun sarnaqkchejja, Diosajj cheqapar sarnaqer jaqetwa juparojj uñji, ukatwa jupajj wal kusisi. Uka toqet akham sasaw Davidajj parlarakïna: ‘Khitinakatï jan wali luratanakapat perdonatäpki ukanakajj kusisipjjpan, juchanakapat perdonatäpki ukanakas ukhamaraki. Kawkïri jaqen juchaptï Jehová Diosajj janipun amtasjjani uka jaqejj kusispan’ sasa” (Rom. 4:6-8; Sal. 32:1, 2). Diosajj jupar confiyirinakarojj taqpach juchanakapwa perdoni, janirakiw amtasjjeti. Jupar confiyirinakarojj cheqapar sarnaqeri jan kuna juchanitwa uñj-jje.

7. ¿Kunatsa Diosan nayra servirinakapajj cheqapar sarnaqerit uñjatäpjjäna?

⁷ Abrahanasa, Davidasa, Diosat jan jitheqtir yaqha servirinakas cheqapar sarnaqerit uñjatäpkchïnsa, pantjasiri juchararäsipkakïnwa. Ukampis Diosar confiyapjjatapatjja, jupanakajj Diosar jan adorapkäna uka jaqenakat sipans jan juchanit uñjatäpjjänwa (Efes. 2:12). Romanonakar qellqat cartapanjja, Jehová Diosan amigopäñatakejj jupar confiyañajj wali wakiskirïtapwa Pablojj qhanañchäna. Abrahanampi Davidampejj Diosar confiyapjjatapatwa jupan amigopäpjjäna, jiwasajj amigoparakïsnawa.

8, 9. ¿Yaqhepajj kuna pantjat amuyunïpjjesa, ukat kunatsa?

⁸ Cristianöpjjtwa sapki uka iglesianakan pʼeqtʼirinakapajja, walja patak maranakaw Diosar confiyañampi luräwinakampejj kunansa mayakïpjje uka toqet jiskhisiwayapjje. Yaqhepajja, salvasiñatakejj Jesucristo Tatitur creyiñakiw wakisi sasaw sapjje. Inas aka arunak istʼirïstan: “Jesusar iyawsam, ukat salvasïtawa” sasa. Ukham sañatakejj inas uka religión pʼeqtʼirinakajj Romanos 4:6 texto aytapjjchi, ukan Pablojj akham siwa: “Mä jaqejj janis leyinakarjampun sarnaqkchejja, Diosajj cheqapar sarnaqer jaqetwa juparojj uñji” sasa.  Ukampis yaqhepajja, salvasiñatakejj sagrado lugaranakar sarañaw wakisi, suma luräwinak lurañaw wakisi sasaw sapjje. Inas Santiago 2:24 textorjam ukham sapjjchi, ukan akham siwa: “Mä jaqejja janiw Diosar confiyatap laykukejj cheqapar sarnaqerit uñjatäkaniti, jan ukasti luräwinakap toqew cheqapar sarnaqer jaqet uñjatäni” sasa.

⁹ Jaqenakan ukham may may creyipjjatapatjja, Pablompi Santiagompejj janiw Diosar confiyañatsa luräwinakats mä pachpa amuyapkänti sasaw Bibliat yatjjatat yaqhep jaqenakajj sapjje. Diosamp suma uñjatäñatakejj jupar confiyañakiw wakisi sasins Pablojj amuykaspäna, ukampis Santiagojj luräwinakakiw wakisi sasins amuykaspäna ukhamwa sapjjaraki. Mä teólogo jaqejj akham siwa: “Pablojj cheqapar sarnaqerit uñjatäñatakejj luräwinakat sipans Diosar confiyañakiw wakisi sasin kunatsa säna uk janiw Santiagojj amuykänti” sasa. Ukampis Pablos Santiagos Jehová Diosan amuytʼayataw qellqapjjäna (2 Tim. 3:16). Kuntï sapkäna uk facilak amuytʼañatakejj mä qhanañchäwiw utji. Ukatakejj kunat parlkasas sapa maynejj cartap qellqäna uk yatjjatañäni.

10. ¿Pablojj kuna ‘luräwinakatsa’ jilapartejj parlaskäna? (Romanos 3:21, 28; dibujonak uñjjattʼarakïta).

¹⁰ ¿Kuna ‘luräwinakatsa’ Pablojj Romanos 3 ukat 4 capitulonakan parlaskäna? Jilapartejj ‘leyir istʼasin luratanakatwa’ parlaskäna, mä arunjja Diosajj Moisés toq israelitanakar churkäna uka Leyitwa parlaskäna (Romanos 3:21, 28 liytʼäta). Amuyatajja, yaqhep judío cristianonakatakejj janiw Leyejj tukuskänti, uka Leyirjam lurañajj wakisiskakïnwa. Ukatwa Pablojj Abrahanat parläna, ukhamat Diosamp suma uñjatäñatakejj ‘leyirjam lurañat’ sipans Diosar confiyañak wakisjjatap uñachtʼayañataki. Kuntï Pablojj siskäna ukajj wali chʼamañchtʼkiriwa, kuna laykutejj akwa yatichistu: jiwasatï  Diosampir Cristompir confiyañänejja, Jehová Diosampejj wali suma uñjatäsnawa.

11. ¿Kuna ‘luräwinakatsa’ Santiagojj parlaskäna?

¹¹ Santiago capítulo 2 ukan parlki uka ‘luräwinakajja’, Pablojj parlkäna uka ‘leyir istʼasin luratanakampejj’ janiw pachpäkiti. Santiagojj cristianonakan sapür lurañanakapatwa parlaskäna. Uka luräwinakajj cheqapunit mä cristianojj Diosar confiyi janicha ukwa uñachtʼayi. Santiagojj parlkäna uka pä uñachtʼäwinakat jichhajj yatjjatañäni.

12. ¿Kunjamsa Santiagojj Diosar confiyañampi luräwinakampejj mayakïtap qhanañchäna? (Dibujonak uñjjattʼarakïta).

¹² Nayrïr uñachtʼäwinjja, cristianonakajj janiw khitirus yaqhachapjjañapäkiti, mä pachpakwa taqenirus uñjapjjañapa sasaw Santiagojj säna. Ukanjja kunjamsa mä jaqejj mä qamir jaqer sum uñjäna ukampis mä pobre jaqer jiskʼachäna uka toqetwa parläna. Uka jaqejj Diosar confiytwa siskchïnsa, luratanakapampejj Diosar jan confiyatapwa uñachtʼayaskäna (Sant. 2:1-5, 9). Payïr uñachtʼäwinjja, kunjamsa mä jaqejj mä jilataru jan ukajj mä kullakar isi jan ukajj manqʼa necesitatap uñjkasas jan yanaptʼkäna uka toqetwa parläna. Jupajj Diosar confiytwa siskchïnsa, luratanakapamp jan uñachtʼayatap laykojj ukham satapajj inamayakïnwa. Santiagojj akham sasaw qellqäna: “Janitejj luratanakajj utjkchejja, Diosar confiyañajj jiwatawa” sasa (Sant. 2:14-17).

13. Diosar confiyatas luratanakasampiw uñachtʼayañasa sañatakejj ¿khititsa Santiagojj parläna? (Santiago 2:25, 26).

¹³ Kunjamsa maynejj Diosar confiyatap luratanakapamp uñachtʼayi uka toqet parlañatakejja, Santiagojj Rahab warmitwa parläna (Santiago 2:25, 26 liytʼäta). Rahab warmejj Jehová Diosat parlir istʼänwa, israelitanakar yanaptʼaskataps yatirakïnwa (Jos. 2:9-11).  ¿Kunsa Diosar confiyatap uñachtʼayañatakejj luräna? Mark uñaqer sarapkäna uka pä israelitanakaruw jan jiwayatäpjjañapatak jarkʼaqäna. Ukham luratapatjja, pantjasirïkasas jan israelitäkasas Abrahanjam cheqapar sarnaqerit uñjatänwa. Rahab warmin luratapajja, Diosar confiyatas luratanakamp uñachtʼayañajj kunja wakiskirisa ukwa yatichistu.

14. Kuntï Pablompi Santiagompejj qellqapkäna ukajj janiw igualäkänti, ¿kunjamsa uk qhanañchtʼasma?

¹⁴ Kunjamtï uñjawayktanjja, Pablompi Santiagompejj janiw Diosar confiyañatsa luräwinakats mä igualak qhanañchapkänti. Mä toqetjja, janiw kunapachas Leyirjam lurasajj Jehová Diosamp suma uñjatäpkasmati sasaw Pablojj judío cristianonakar säna. Maysa toqetjja, Santiagojj taqe cristianonakajj luräwinakapampiw Diosar confiyapjjatap uñachtʼayapjjañapa sasaw qhanañcharakïna.

15. ¿Kunjamanakats Diosar confiyatas luratanakasamp uñachtʼaysna? (Fotonak uñjjattʼarakïta).

¹⁵ Cheqapar sarnaqerit uñjatäñatakejj Diosar confiyir Abrahanan kayup sum arkapjjañamawa sasin Jehová Diosajj siskistu ukajja, janiw kuntï Abrahanajj lurkäna uka kikpa luraña sañ munkiti. Kunayman toqetwa Diosar confiyatas uñachtʼaysna. Congregacionar jutapki uka machaqanakarojj munasiñampiw katoqsna, yanap wal munapki uka jilat kullakanakaruw yanaptʼsna, familiaranakasarus suma luräwinakampiw yanaptʼsna. Taqe ukanakajj Jehová Diosar wal kusisiyi (Rom. 15:7; 1 Tim. 5:4, 8; 1 Juan 3:18). Diosar confiyatas uñachtʼayañatakejj taqe chuymaw predicañasaraki, ukaw jukʼamp importantejja (1 Tim. 4:16). Diosan promesanakap phoqasitaparusa, kunjamsa jupajj mä kuns sum luri ukarus taqeniw confiysna, ukampis ukar confiyatasjja luratanakasampiw  uñachtʼayañasa. Ukhamtï lurañänejja, Jehová Diosajj cheqapar sarnaqeritwa uñjistani, amigoparakïñäniwa, janiw ukat payachasiñasäkiti.

16. ¿Kunsa Abrahanajj suyäna, ukat kunarus confiyäna?

¹⁶ Romanos capítulo 4 ukanjja, suytʼañajj wali wakiskirïtapwa Abrahanat yateqaraksna. Jehová Diosajj ‘walja markanakaw’ Abrahán toqejj bendisitäpjjani sasaw arsuwayäna. ¡Abrahanan uka suytʼäwipajj wali sumänwa! (Gén. 12:3; 15:5; 17:4; Rom. 4:17). Ukampis Abrahanajj 100 maranïkäna, Sarajj 90 maranïkarakïna ukhajja, janïraw wawanïpkänti. Jaqen amuyupatakejj janiw wawanëjjapjjaniti sañjamäspänwa. Ukhaman uñjasiñajj Abrahanatak wali chʼamäkchïnsa, “Diosan promesaparjamaw suytʼäna. Walja markanakan awkipäyäwa sasaw Abrahanajj Diosar confiyäna” (Rom. 4:18, 19). Tiempompejj kuntï Abrahanajj wal suykäna ukajj phoqasïnwa, Isaacan awkipäjjänwa (Rom. 4:20-22).

17. ¿Kunjamatsa Diosamp cheqapar sarnaqerit uñjatäsna, ukat jupan amigopäsna?

¹⁷ Jehová Diosajj Abrahanarjamarakiw cheqapar sarnaqerit uñjistaspa, amigoparakïsnawa. Pablojj Abrahanat akham sänwa: “‘Cheqapar sarnaqer jaqet uñjatänwa’ siski uka arunakajja, janiw jupa sapatakikejj qellqaskänti, jan ukasti khitinakatï cheqap sarnaqer jaqet uñjatäpkani ukanakampitakiw qellqasirakïna, mä arunjja jiwasampitaki. Jïsa, khititejj Jesús Tatitusar jiwatanak taypit jaktayki uka Diosar creyitas laykuw cheqap sarnaqer jaqet uñjatäñäni” sasa (Rom. 4:23, 24). Ukhamajj Abrahanjamaw Diosar confiyañasa, luräwinakasampiw uk uñachtʼayañasa, suytʼañasarakiwa. Jutïr yatichäwinjja, kuntï Pablojj Romanos capítulo 5 ukan parlkäna uka suytʼäwitwa yatjjataskañäni.