¿2023 maran Yatiyañataki sat revistanakajj mistkäna ukanak liytʼawaytati? Ukhamächi ukhajj aka jisktʼanakar qhanañchtʼam:

¿Kunjamsa amuyus machaqar tukuysna? (Rom. 12:2).

Janiw mä qhawqha suma luräwinak lurañakejj wakiskiti. Chuymasan kunjamäsktansa ukwa uñakiptʼasiñasa, Diosan leyinakaparjam sarnaqañatakejj jakäwisan cambionak lurañaw wakisiraki (w23.01, páginas 8 y 9).

Kunanakatï aka mundon pasaski ukanak ¿kunjamsa wali amuyump uñjsna?

Kunanakas mundpachan pasaski ukanaksa, kunjamsa ukanakajj Biblian profecianakaparjam phoqasiski ukanaksa yatiñ muntanwa. Ukampis janiw amuyusatak parlasajj congregacionar tʼaqjjtayañasäkiti, jan ukasti kuntï Diosan markapajj qhanañchki ukarjamaw parlañasa (1 Cor. 1:10) (w23.02, página 16).

¿Kunansa Jesusan bautisasitapampi arkirinakapan bautisasitapampejj jan igualäki?

Jesusajj janiw jiwasjamajj Jehová Diosar jakäwip katuyaskänti, kuna laykutejj Diosar katuyasit mä markanwa nasïna. Niyakejjay perfectöchïnjja, janiw arrepentisiñapajj wakiskänti (w23.03, página 5).

¿Kunsa tantachäwinakan walja jilat kullakanakan comentapjjañapatakejj lursna?

Mä qhawqha arunakampikiw comentarionak arstʼañasa, ukhamatwa mayni jilat kullakanakajj arstʼapjjarakini. Jiwasatï taqpach arstʼjjañänejja, mayninakajj janiw kun comentañs puedjjapjjaspati (w23.04, página 23).

¿Isaías 35:8 texton parlki uka ‘Santo Thakejj’ kunasa?

Babilonia markat Israel markar sarkäna uka thakirojja, Jehová Diosajj “Santo Thaki” sasaw säna. ¿Jichha tiempon kunasa? 1919 marat walja maranak nayrajja, Biblia imprimiñampi Biblia traduciñampiw uka thak wakichasiñajj qalltäna. ‘Santo Thakejj’ mä paraisonjam jakasktan ukaruw Diosan markaparojj irpi, jutïrinjja markapajj walja bendicionanak katoqarakini (w23.05, páginas 15 al 19).

¿Kuna pä kasta warminakatsa Proverbios capítulo 9 ukan parli?

Proverbios librojj ‘jan amuytʼasir warmitwa’ parli, invitacionapar istʼirinakarojj ‘Sepultur manqharuw’ api. Maysa toqetjja, yaqha warmitwa parlaraki, jupajj ‘cheqpach yatiñamp’ sasiwa, jupan invitacionapar istʼirinakarojj “amuytʼasirïñ thaknam” irpasajj jakañaruw api (Prov. 9:1, 6, 13, 18) (w23.06, páginas 22 al 24).

¿Kunjamsa Jehová Diosajj Lot chachamp parlasajj humilde chuymanïtapsa amuytʼirïtapsa uñachtʼayäna?

Jehová Diosajj qollunak toqer sarañapatakiw Lot chachar mayïna. Ukampis Lot chachajj Zóar markar escapañatakiw Diosar ruwtʼasïna, Diosasti juparojj iyawsänwa (w23.07, página 21).

Esposopatï pornografía uñchʼukchi ukhajj ¿kunsa mä warmejj luraspa?

Janiw juchañchasiñapäkiti. Jehová Diosamp sum apasitapat lupʼiñapaw jukʼamp walïspa, kunjamsa Jehová Diosajj sinti jan walinakan uñjasir warminakar chuymachtʼäna uk Biblian liytʼasajja, uka toqetwa lupʼiñaparaki. Kunatï esposopar pornografía wasitat uñchʼukiñar apkaspa uk jan lurañapatakiw yanaptʼaspa (w23.08, páginas 14 al 17).

Maynejj Biblian yatichäwinakapar creyitasat jisktʼistani ukhajj ¿kunjamsa amuytʼasirïñajj suma chuymanïñatak yanaptʼistaspa?

Maynejj jisktʼistu ukajja, kunsa amuyi jan ukajj kunas llakisiyi uk amuyañatakiw yanaptʼistaspa, ukhamatwa suma chuymamp jaysañäni (w23.09, página 17).

¿Kunjamtï Mariajj chʼam katoqkäna ukat kunsa yateqsna?

Mesiasan mamapäñap yatïna ukhajja, Mariajj yaqhanakampiw yanaptʼayasïna. Gabriel angelampi Elisabetampejj Qellqatanakampiw jupar chʼamañchtʼapjjäna. Jilat kullakanakasajj ukhamarakiw chʼamañchtʼapjjestaspa (w23.10, página 15).

¿Kunjamanakatsa Jehová Diosajj oracionanakasar jaysistu?

Jehová Diosajj oracionanakas istʼañwa arsuwayi, amtaparjamaw jaysarakistu (Jer. 29:12). Oracionanakasajj niya igualäkchisa janiw mä kikpak jayskistuti, ukampis yanaptʼapunistaniwa (w23.11, páginas 21 y 22).

Niyakejjay Romanos 5:2 texton suytʼäwit parlchejja, ¿kunatsa versículo 4 ukan suytʼäwit wasitat parli?

Diosan suma yatiyäwinakapat istʼki ukhatpachajja, inas maynejj aka oraqen mä Paraison jakasiñ suychispa. Ukampis jan walinak aguantasasa, Jehová Diosamp suma uñjatätap yatisas jukʼampiw suytʼäwipajj jilti (w23.12, páginas 12 y 13).