1. ¿Kunatsa Abrahanajj mä wawanïñ suyaskakïna?

 JEHOVÁ DIOSAJJA, oraqenkir taqe markanakaw jumat jutir wawanakam toqejj bendisitäpjjani sasaw Abrahán amigopar arsuwayäna (Gén. 15:5; 22:18). Niyakejjay Abrahanajj Diosar taqe chuym confiychïnjja, Diosan uka arsutapajj phoqasiniwa sasaw confiyäna. Ukampis Abrahanajj 100 maranïkäna, esposapas 90 maranïkäna ukhajja, Diosat jan jitheqtir uka pä servirinakapajj janïraw wawanïpkänti (Gén. 21:1-7). Bibliajj Abrahanat akham siwa: “Abrahanajj Diosan promesaparjamaw suytʼäna. Walja markanakan awkipäyäwa sasaw Abrahanajj Diosar confiyäna” sasa (Rom. 4:18). Kunjamtï yatktanjja, kuntï Abrahanajj wal suykäna ukajj phoqasïnwa, Isaacan awkipäjjänwa. ¿Kunatsa Abrahanajj Jehová Diosajj arsutap phoqaniwa sasin wal confiyäna?

2. ¿Kunatsa Abrahanajj Diosajj arsutap phoqaniwa sasin taqe chuym confiyäna?

² Niyakejjay Abrahanajj Jehová Diosar wali sum uñtʼchïnjja, kuntï Diosajj jupar arskäna ukarojj ‘taqe chuymaw confiyäna’ (Rom. 4:21). Diosar confiyatap laykojja, Jehová Diosajj cheqapar sarnaqer suma jaqetwa Abrahanar uñjäna (Sant. 2:23). Kunjamtï Romanos 4:18 textojj siskejja, Abrahanajj Diosar confiyänwa, suyarakïnwa. Kuntï apóstol Pablojj Romanos capítulo 5 ukan suytʼäwit siskäna uk jichhajj uñjañäni.

3. ¿Kunsa Pablojj suytʼäwit qhanañchi?

³ Kunatsa ‘suytʼañajj janiw chuyma pʼakintat uñjasiykistuti’  sasin confiysna uka toqetwa Pablojj qhanañchäna (Rom. 5:5). Kunjamsa suytʼäwisajj jukʼamp jiltaspa uk amuyañatakis yanaptʼarakistuwa. Kuntï Romanos 5:1-5 textojj siski uk yatjjatkasajja, kunjamsa suytʼäwimajj tiempompejj jukʼamp jilti ukwa amuytʼäta. Ukhamarus uka toqet yatjjatañajja, taqe chuym jukʼamp suytʼaskakiñamatakejj kunsa lurasma ukwa uñachtʼayarakïtam. Nayraqatjja, Pablojj janiw chuyma pʼakintat uñjasiykistuti sasin siskäna uka suma suytʼäwit parltʼañäni.

4. ¿Kuna toqetsa Romanos 5:1, 2 textojj parli?

⁴ (Romanos 5:1, 2 liytʼäta). Uka arunakjja, Pablojj Roma congregacionankir jilat kullakanakaruw qellqäna. Jupanakajj Jehová Diosatsa Jesusatsa yateqapjjänwa, Diosar confiyapjjatapsa uñachtʼayapjjänwa, cristianöjjapjjarakïnwa. Ukhamajj jupar ‘confiyapjjatap laykojj cheqapar sarnaqer jaqetwa’ Diosajj jupanakar uñjäna, espíritu santompiw ajllirakïna. Ukat uksarojja, mä suma suytʼäwinëjjapjjänwa, katoqañäniwa sasaw confiyapjjañaparakïna.

5. ¿Ajllitanakajj kuna suytʼäwinïpjjesa?

⁵ Qhepatjja, Pablojj kuna suytʼäwsa Diosajj jupanakar churäna uka toqetwa Efesonkir ajllit cristianonakar parläna. Jupanakajj “santo jilatanakar mä herenciar uñtat churki” ukwa katoqapjjani sasaw qhanañchäna (Efes. 1:18). Colosas markankir cristianonakarojj kawkinsa uka bendición katoqapjjañapäna ukwa sarakïna. Jupanakarojj akham sänwa: ‘Alajjpachanwa jumanakatak imatäskiʼ sasa (Col. 1:4, 5). Ukhamajj ajllit cristianonakajj alajjpachan wiñay jakañatak jaktañwa suytʼasipki, ukanwa Cristomp chik reyinakjam apnaqapjjani (1 Tes. 4:13-17; Apoc. 20:6).

6. ¿Mä ajllit jilatajj kamsis suytʼäwipatjja?

⁶ Kuntï suytʼasipki ukjja, ajllit cristianonakajj wali valoranitwa uñjapjje. 1991 maranjja Frederick Franz jilatajj akham sänwa: “Kuntï suytʼapkta ukajj cheqapuniw phoqasini, 144.000 ajllitanakat sapa maynirakiw kuntï  Jehová Diosajj arsuwayapkitu uk katoqapjjäjja, kuntï katoqapkä ukajj wali sumäniwa, kunatï jichhürun utjapkitu ukat sipans jukʼampïniwa” sasa. ¿Walja maranak Diosar jan jitheqtas servisajj kunjamas jilatajj jikjjatasïna? Jupajj akham sarakïnwa: “Kuntï suytʼapkta ukarojj wali valoranit uñjasipkaktwa. [...] Jukʼamp maranak suyasajj jukʼamp valoranitwa uñjapjjta. Mä millón maranak suyañas wakischinejja, taqe chuymaw suyapjjäjja. Kuntï suytʼapkta ukarojj nayrat sipans jukʼamp valoranitwa uñjarakta” sasa.

7, 8. ¿Kunsa Diosar servirinakapat jilapartejj suyasipki? (Romanos 8:20, 21).

⁷ Jichhürunakan Jehová Diosar servipki ukanakat jilapartejj yaqha suytʼäwinïpjjewa. Jupanakajj Abrahanjamarakiw aka oraqen wiñay jakañ suyasipki, ukajj Diosan Reinopajj apnaqjjani ukhaw phoqasini (Heb. 11:8-10, 13). Pablojj uka suma suytʼäwit qellqarakïnwa (Romanos 8:20, 21 liytʼäta). Kuntï jutïrit Biblian yateqkayäta ukhajj ¿kunas chuymamar purtʼayätamjja? Kunjamsa juchat salvasisajj perfectöjjasma uk yatisajj ¿janit kusiskayäta? ¿Kunjamsa familiamasa jan ukajj amigonakamas Paraison jakañatak jaktanipjjani uk yatisajj janit kusiskayäta? Diosajj churkistu uka suytʼäwi utjatapatjja, jumajj jutïritak mä suma suytʼäwinïtawa.

⁸ Taqeniw wali kusiskañ suytʼäwinïtanjja: yaqhepajj alajjpachana, yaqhepajj aka oraqenwa wiñay jakañ suytʼasktanjja. Taqe chuyma suytʼaskakiñatakejj ¿kunsa lursna? Uk yatiñatakejj kuntï Pablojj qellqkäna uk yatjjataskakiñäni. Arunakapajj kuntï suytʼasktan ukajj phoqasipuniniwa sasin jukʼamp confiyañatakiw yanaptʼistani.

9, 10. ¿Kunas jiwasarojj Pablorjam pasarakistaspa? (Romanos 5:3; fotonak uñjjattʼarakïta).

⁹ (Romanos 5:3 liytʼäta). Pablon arunakaparjamajja, jan waltʼäwinakan uñjasiñajj kuntï suytʼasktan ukar jukʼamp confiyañatakiw yanaptʼistu, inas ukajj jan creyiñjamäkchiti. Taqpach cristianonakajj jan walinakan uñjasiñas  yattanwa. Kuntï Pablojj Tesalonicankir cristianonakar siskäna uk amuytʼañäni, jupajj akham sänwa: “Jumanakampïsipkayäta ukhajja, tʼaqesiñanakan uñjasiñäni sasajj janïräkipanwa sapjjayäsma. Kunjamtï jumanakajj yatipktajja ukhamapuniw pasäna” sasa (1 Tes. 3:4). Corintonkirinakarojj akham sasaw qellqarakïna: “Kuna problemanakantï nanakajj uñjasipkayäta [...] ukanak yatipjjañamwa munapjjta. [...] Inas jiwjjchiñäni sasaw sapjjarakiyäta” sasa (2 Cor. 1:8; 11:23-27).

¹⁰ Jichhürunakanjja, cristianonakajj kunayman jan waltʼäwinakanwa uñjasiraktanjja (2 Tim. 3:12). Jesusar confiyaña, jupar arkañ qalltkayäta ukhajj ¿kuna jan walinakans jumajj uñjasiyäta? Inas amigonakamas familiaranakamas jumat burlasipjjchïna, jan ukajj jan wal lurapjjchiyätam. ¿Taqe kunan honradötamat trabajoman jan walinakan uñjasirïtati? (Heb. 13:18). ¿Kuntï suytʼaskta uka toqet mayninakar predicatamat gobiernon jan waltʼayat uñjasirïtati? Kuna jan walinakanjjay uñjasstan, Pablojj ukanakat kusisiñasawa sasaw sistu. ¿Kunatsa kusisiñasa?

11. ¿Kunatsa aguantañatak chʼamachasiñasa?

¹¹ Jan waltʼäwinakajj aguantañatakiw yanaptʼistu, ukatwa kusistanjja. Romanos 5:3 textojj akham siwa: “Tʼaqesiñanakajj aguantañatakiw yanaptʼistu” sasa. Niyakejjay taqe cristianonakajj jan walinakan uñjasstanjja, taqeniw aguantañatakejj jankʼakïñasa. Aguantañäni ukhakiw kuntï wal suyasktan uk katoqañäni. Jesusajj qalarar oraqer purir jathanakatwa parläna, jiwasajj janiw uka jathanakar uñtasit jaqenakjamäñ munktanti. Jupanakajj “Diosan arunakap” kusisitaw katoqtʼasipjje, ukampis “tʼaqesiyata jan ukajj arknaqata uñjasisajj” aynachtʼapjjewa (Mat. 13:5, 6, 20, 21). Cheqas janiw khitirus jan waltʼayata jan ukajj yantʼanakan uñjasiñajj gustkiti, ukampis aguantañajj yanaptʼistuwa. ¿Kunjamsa yanaptʼistu?

12. ¿Kunatakis aguantañajj yanaptʼistu?

¹² Kunjamsa aguantañajj yanaptʼistu uk akham sasaw discípulo Santiagojj qellqäna: “Jumanakatejj aguantasipkakïtajja, jukʼamp suma wakichtʼat jaqëpjjätawa, ukhamatwa jumanakajj phoqatäpjjäta, taqe kunansa sanöpjjäta, janirakiw kunas faltapkätamti” sasa (Sant. 1:2-4). Ukhamajj ¿kunatakis aguantañajj yanaptʼistu? Santiagon arunakaparjamajja, aguantañajj jukʼamp paciencianïñataki, Diosar jukʼamp confiyañatakiw yanaptʼistu. Janiw ukakïkiti, aguantañajj yaqha toqenakatwa yanaptʼarakistu.

13, 14. ¿Kunsa aguantasajj jikjjattanjja, kunjamsa ukajj suytʼaskakiñatak yanaptʼistu? (Romanos 5:4).

¹³ (Romanos 5:4 liytʼäta). Pablojj “aguantañasti Diosamp sum uñjatäñatakiw yanaptʼistu” sasaw säna. Ukajj janiw jan walinakan uñjasktan ukhajj Jehová Diosajj kusiskaspas ukham sañ munkiti, jan ukasti jupat jan jitheqtas aguantatasat jupajj wal kusisi. Cheqas kunjamsa aguantatasajj Jehová Diosar kusisiyi uk yatiñajj ¿waljjay chʼamañchtʼistojja? (Sal. 5:12).

¹⁴ Abrahanat amuytʼañäni. Jan walinakan aguantatapatwa Jehová Diosajj jupar sum uñjäna. Amigoparjamaw uñjäna, cheqapar sarnaqer jaqetwa uñjarakïna (Gén. 15:6; Rom. 4:13, 22). Jiwasampejj ukhamarakiwa. Diosajj janiw taqe kunanaktï jupar serviñatak lurktan ni congregacionan privilegionakanïtasatsa sum uñjkistuti, jan ukasti jupat jan jitheqtas aguantatasatwa sum uñjistu. Qhawqha maranïskañänisa, kunaymanins jakaskañäni jan ukajj mä kuns sum lurtʼirïskchiñänisa, taqeniw aguantsna. ¿Mä yantʼant jumajj uñjasiskta? Jumatï Diosat jan jitheqtkäta  ukhajja, Diosajj sum jumar uñjarakïtam, janipun uk armamti. Qhawqsa Jehová Diosajj jiwasat kusisi uk yatiñajj kuntï suytʼasktan uk taqe chuym suytʼaskakiñatakiw yanaptʼistu.

15. ¿Kamsasas Pablojj qhanañchaskakïna, ukat kamsasas jisktʼasiraksna?

¹⁵ Kunjamtï uñjktanjja, jiwasatï aguantañäni ukhajj Diosajj sumwa uñjistani, ukwa Pablojj qhanañchäna ¿Kamsasas Pablojj ukjjar qhanañchäna? Jupajj akham sänwa: “Diosamp sum uñjatäñasti suytʼañatakiw yanaptʼistu, suytʼañasti janirakiw chuyma pʼakintat uñjasiykistuti” sasa (Rom. 5:4, 5). Uka nayrajja, Romankir cristianonakajj mä suytʼäwinïpjjatapwa Pablojj Romanos 5:2 texton qhanañchäna, jupanakajj ‘Diosan jachʼañchatäñ suytʼasipkäna’. Ukatwa akham jisktʼassna: “Niyakejjay uka cristianonakajj mä suytʼäwinëjjapjjchïnjja, ¿kunatsa Pablojj suytʼäwit wasitat parläna?” sasa.

16. ¿Kunjamatsa maynejj Biblian parlki uka suytʼäwejj phoqasipuniniwa sasin confiyaspa? (Fotonak uñjjattʼarakïta).

¹⁶ Kunjamsa suytʼäwisajj jiltaskakispa uk amuyañäni ukhajja, kuntï Pablojj sañ munkäna uk amuyarakiñäniwa. Aka oraqen wiñayatak jakasiñ toqet nayrïr kut parlapkayätam uk amuytʼam. Ukajj wali sumäkchïnsa, inas jumatakejj jan cheqaw sañjamäkchïnti. Ukampis Jehová Diosar jukʼamp sum uñtʼjjasasa, Biblian promesanakapat jukʼamp yatjjatasasa, kuntï suytʼaskta ukajj phoqasipuniniwa sasaw jukʼat jukʼat jukʼamp confiyjjpachätajja.

17. Bautisaskta uka qhepat ¿kunjamsa suytʼäwimajj jukʼamp jiltäna?

¹⁷ Bautisaskta uka qhepatsa, Diosar jukʼamp uñtʼjjasasa, jupar jukʼamp munasjjasasa, kuntï suytʼaskta ukajj jukʼampiw jiltpachäna (Heb. 5:13-6:1). Kuntï Romanos 5:2-4 textojj siski ukhamwa uñjaspachäyätajja. Kunayman jan walinak aguantasajja, kunjamsa Jehová Diosajj sum uñjtam uk amuyarakpachätawa.  Qhawqsa Jehová Diosajj jumat kusisi uk yatisajja, jupajj promesanakap phoqapuniniwa sasin jukʼampiw confiypachätajja. Qalltat sipansa suytʼäwimajj jukʼampiw jiltarakpacha. Jichhajj cheqapunïskiw sisjjpachätawa, wali valoranit uñjpachätajja, chuymaruw purtʼarakpachätamjja. Kuntï suytʼaskta ukajj jakäwiman qhanaw uñjaspacha, kunjams familiamar uñjta, kunanaks amtta, kunjamsa tiempom apnaqta ukanakanwa uñjaspacha.

18. ¿Kuna garantiysa Jehová Diosajj churistu?

¹⁸ Diosamp sum uñjatäñajj suytʼañatakiw yanaptʼistu siskäna uka qhepatjja, Pablojj aka wakiskir yatichäw qhanstayarakïna: kuntï suytʼasktan ukajj phoqasipuniniwa. ¿Kunatsa ukar confiysna? Pablojj akham sasaw cristianonakar Diosan garantiap churäna: “Suytʼañasti janirakiw chuyma pʼakintat uñjasiykistuti, Diosan munasiñapajj jiwasar churat espíritu santo taypiw chuymanakasan phoqtʼatäski” sasa (Rom. 5:5). Ukhamajj kuntï suytʼaskta ukajj phoqasipuniniwa sasajj taqe chuymaw confiyasma.

19. ¿Kunarus taqe chuym confiytanjja?

¹⁹ Abrahanat amtasiñamapuniwa. Jehová Diosajj mä promesa jupar luräna, jupat kusisitänwa, amigoparjamaw uñjarakïna. Kuntï Abrahanajj suykäna ukajj phoqasïnwa. Bibliajj akham siwa: “Abrahanajj paciencianïtap uñachtʼaykäna uka qhepatwa uka promesa katoqäna” sasa (Heb. 6:15; 11:9, 18; Rom. 4:20-22). Jiwasatï Jehová Diosat jan jitheqtkañäni ukhajja, Abrahanjamarakiw kuntï suytʼasktan ukajj chuyma pʼakintat jan jaytkistaniti, jan ukasti kuntï suytʼasktan uk katoqañäniwa. Suytʼäwisajj cheqawa, wal kusisiyarakistu (Rom. 12:12). Pablojj akham sasaw qellqäna: “Suytʼañasatak yanaptʼkistu uka Diosay chuymanakamarojj phoqatpach kusisiñampi sumankañampi phoqantpan, juparu confiyapjjatam layku, ukhamat jumanakajj espíritu santon chʼamapampi taqe chuyma suytʼapjjañamataki” sasa (Rom. 15:13).