1. Taqe kunas sumar sarañapatakejj ¿kunsa cristiano jilatanakajj lurapjjañapa?

 DAVID REYEJJ Salomonar akham sänwa: “Jumajj chʼamani saytʼasim, janirak ajjsaramti” sasa (1 Rey. 2:1-3). Taqe cristiano chachanakaw uka ewjjtʼarjam lurañatak chʼamachasipjjañapa. Taqe kunas sumar sarañapatakejja, Jehová Diosan mandatonakapar istʼaña, Biblian wiñay yatichäwinakaparjam sarnaqañwa yateqapjjañapa (Luc. 2:52). ¿Kunatsa wayna jilatanakan suma cristianöñatak chʼamachasipjjañapajj wali wakiskirejja?

2, 3. ¿Kunatsa wayna jilatanakan suma cristianöpjjañapajj wali wakiskirejja?

² Cristiano jilatanakajja, familiansa congregacionansa walja lurañanakanïpjjewa. Jumatï wayna jilatästa ukhajja, jutïrin kuna lurañanakamp phoqañamas wakisispa uka toqet inas lupʼirïsta. Inas jumajj precursoräña, siervo ministerialäña, ukat ancianöñ amtsta. Ukatjja inas casarasiñsa wawanakanïñsa munaraksta (Efes. 6:4; 1 Tim. 3:1). Uka amtanakam phoqañamatakisa, taqe kunas sumar sarañapatakis suma cristianöñamawa. b

³ ¿Kunas suma cristianöñatakejj yanaptʼiristam? ¿Kuna wakiskir lurañanak yateqañamas wakisi? Jutïrin katoqkäta uka luräwinakatakejj ¿kunjamsa wakichtʼasisma? Uk jichhajj uñjañäni.

4. ¿Khitinakatsa yateqasisma? (Fotompi dibujonakampi uñjjattʼarakïta).

⁴ Khitinakatsa yateqasisma uk sum ajllim. Diosat jan jitheqtir walja chachanakatwa Biblian parli, jupanakajj Diosar wal munasipjjäna, markaparus kunaymanitwa cuidapjjarakïna, jupanakatwa yateqasisma. Familiamansa congregacionansa suma cristiano jilatanakajj utjarakpachawa, jupanakats yateqasismawa (Heb. 13:7). Jan pantjasir Jesucristots yateqasirakismawa (1 Ped. 2:21). Taqe jupanakat sum amuytʼäta ukhajja, sapa maynejj kunja suma chuymanisa ukwa amuytʼañama (Heb. 12:1, 2). Ukjjarojj kunsa jupanakat yateqasisajj lurasma ukwa lupʼiñamaraki.

5. ¿Kunsa amuytʼasirïñatakejj lurañama, ukat kunatsa ukajj wali wakiskirejja? (Salmo 119:9).

⁵ ‘Amuytʼasirïñ’ yateqam, jarkʼaqarakim (Prov. 3:21). Khitinakatï amuytʼasirïpki ukanakajja, janïr mä amtar purkasajj sumwa amuytʼasipjje. Ukhamajj amuytʼasirïñ yateqam, uk jarkʼaqarakim. Kuna laykutejj walja waynanakaw akapachan pachpa amuyunakapampi chuymapamp apayasipjje (Prov. 7:7; 29:11). Ukhamarus televisionasa, peliculanakasa, internetasa, redes sociales ukanakas mayjtʼayapjjeristamwa. Ukhamajj ¿kunsa amuytʼasirïñatakejj lurasma? Nayraqatjja, Biblian wiñay yatichäwinakapwa sum yateqañama, ukatjja Jehová Diosajj mayktam ukajj kunatsa jumatak wali aski ukwa amuytʼañama. Ukjjarojj yateqkta ukarjam suma amtanakar purim, ukhamat Jehová Diosar kusisiyañataki (Salmo 119:9 liytʼäta). Amuytʼasirïñ yateqañajj suma cristianöñatakiw yanaptʼätam (Prov. 2:11, 12; Heb. 5:14). Kunjamsa amuytʼasirïñajj aka pä toqenakat yanaptʼiristam uk jichhajj uñjañäni: 1) kullakanakar respetomp uñjaña, 2) isthaptʼasiñ toqet suma amtanakar puriña.

6. ¿Kunjamsa mä amuytʼasir wayna jilatajj warminakar respetatap uñachtʼayaspa?

⁶ Amuytʼasirïñajj warminakar respetañatakiw yanaptʼätam. Inas mä wayna jilatajj mä kullakar jukʼamp sum uñtʼañ munchi. Janiw ukajj jan walïkiti. Ukampis amuytʼasir mä wayna jilatajja, janiw jan casarasiñ amtampejj mä kullakar arjjaykaniti, mensajenaks qellqkaniti ni yaqha ukhamanaks lurkaniti (1 Tim. 5:1, 2).  Jan ukajj mä kullakamp uñtʼasiskchi ukhajja, kullakar sum uñjayañatakejj janiw pani sapak sarnaqapjjañapäkiti, maynimpipuniw compañtʼayasipjjañapa (1 Cor. 6:18).

7. Amuytʼasirïñ yateqki uka wayna jilatajj ¿kuna amtanakarus isisiñ toqetsa peinasiñ toqets purini?

⁷ Jehová Diosjam amuyuniti janicha ukjja, mä wayna jilatajj isisitapana peinasitapanwa uñachtʼayi. Jilapartejja, khitinakatï isinak diseñapki modat uñstayapki ukanakajj janiw Jehová Diosar respetapkiti, qʼañu juchanakan sarnaqapjjaraki. Ukatwa diseñapki uka chacha isinakajj wali tʼeqëpjje jan ukajj warmi isir uñtasitäpjje. Ukhamajj suma cristianöñatak chʼamachasir mä wayna jilatajja, kunjamsa isisini peinasini uk Biblian wiñay yatichäwinakaparjamaw amuytʼasiñapa, congregacionankir yateqaskañ cristianonakats yateqasiñaparakiwa. Akham sasaw jisktʼasispa: “¿Amtanakajajj amuytʼasirïtajti uñachtʼayi, mayninakar respetatajti uñachtʼayaraki? ¿Diosar servitajajj qhanat isisitajan amuyasi?” sasa (1 Cor. 10:31-33; Tito 2:6). Amuytʼasirïñ yateqapki uka wayna jilatanakarojja, janiw jilat kullakanakakejj respetomp uñjapkiti, jan ukasti Jehová Diosas ukhamwa uñjaraki.

8. ¿Kunjamatsa mä wayna jilatajj confiykañ jaqëtap uñachtʼayaspa?

⁸ Confiykañ jaqëñamawa. Ukhamäñatakejj taqe lurañanakamampiw phoqañama (Luc. 16:10). Jesusajj kunjamsa yateqaskañ sarnaqäna uk amuytʼam, jupajj janiw lurañanakap ukhamak jaytkänti, phoqapunirïnwa. Kuntï Jehová Diosajj maykäna ukajj chʼamäkchïnsa, phoqapunirïnwa. Jaqenakarojj munasïnwa, jukʼampis discipulonakaparuw wal munasïna, jupanak laykojj jakañ vidaps loqtasiwayänwa (Juan 13:1). Jesusat yateqasisajja, kuntï lurañamäki ukamp phoqañatakejj wal chʼamachasim. Janitï uk lurirjamäksta ukhajja, humilde chuymampiw experienciani mä jilatar yanap mayiñama. Janipun mä jukʼak luramti (Rom. 12:11). Antisas kuna lurañtï churapktam uk tukuyañatak chʼamachasim, ‘janiw jaqetakis lurkasma ukham lurañamäkiti, jan ukasti Jehová Diosatakis lurkasma’ ukhamwa lurañama (Col. 3:23). Cheqas janiw perfectöktati, ukhamajj qhawqtï lurirjamäkta ukakwa lurañama, pantjasitanakams reconosiñamarakiwa (Prov. 11:2).

9. ¿Kunatsa wayna jilatanakajj kunanaks sum lurañ yateqapjjañapa?

⁹ Cristiano jilatanakajj kunanaks sum lurañ yateqapjjañapawa. Ukanak lurañ yatiñaw congregacionan luräwinakamp sum phoqañatak yanaptʼätam, ukarakiw mä trabaj jikjjatañatakisa, trabajonïskakiñatakisa, gastomatakisa jan ukajj familiamar mantiniñatakis yanaptʼätam, mayninakampis sum apasirakïta. Ukanakat mä qhawqha uñjañäni.

10, 11. ¿Kunatsa mä wayna jilatatakisa congregacionatakis sum liyiña qellqaña yateqañapajj wakisi? (Salmo 1:1-3; foto uñjjattʼarakïta).

¹⁰ Liyiñsa qellqañsa sum yateqam. Bibliarjamajja,  Diosan Arupat sapür liytʼki, liytʼasajj lupʼiraki uka jaqejj kusisitawa, taqe kunas sumaruw sari (Salmo 1:1-3 liytʼäta). Ukhamatwa Jehová Diosan amuyup uñtʼäta, ukaw sum amuytʼasiñatakisa, Bibliarjam kun lurañatakis yanaptʼätam (Prov. 1:3, 4). Mä congregacionan ukham chachanakaw munasi. ¿Kunatsa ukham sistanjja?

¹¹ Jilat kullakanakajja, yatichiri Bibliarjam sum ewjjtʼasiri chachanakan yanaptʼapwa munapjje (Tito 1:9). Jumatï liyiñsa qellqañsa sum yatïta ukhajja, Diosar jukʼamp confiyañatak chʼamañchtʼkir discursonaksa comentarionaksa sum wakichtʼasïta. Maysa toqetjja, Bibliat yatjjatkät ukhasa, tantachäwinakans asambleanakans discursonak istʼkät ukhas notanak qellqtʼasiñatakiw yanaptʼätam, ukaw Diosar jukʼamp confiyañatakisa, jilat kullakanakar chʼamañchtʼañatakis yanaptʼarakïtam.

12. ¿Kunas mayninakamp sum parltʼasiñatak yanaptʼiristam?

¹² Mayninakamp sum parltʼasiñ yateqam. Taqe cristiano jilatanakan sum parltʼasipjjañapajj wali importantewa. Mayninakamp parltʼasir chachajj kunsa mayninakajj piensapjje, kunjamas jikjjatasipjje uk sumwa istʼi, amuyarakiwa (Prov. 20:5). Maynejj kunjams amuyi kunjamas jikjjatasi uk yatiñatakejja, arupajj kunjamasa, uñnaqapajj kunjamasa, kuns luri uk amuyañwa yateqañama. Taqe ukanak jaqenakampïsakiw amuyasma. Jumatï correo electrónico jan ukajj mensajenak toqek mayninakamp parläta ukhajja, mayninakamp jikisis parlañajj jumatak wali chʼamäjjaniwa. Ukhamajj mayninakamp jikisis parlañatak chʼamachasim (2 Juan 12).

13. ¿Kunampsa mä wayna jilatajj yateqañapa? (1 Timoteo 5:8; foto uñjjattʼarakïta).

¹³ Taqe kuns juma pachpa jikjjatasiñ yateqam. Mä suma cristiano jilatajj jupa pachpasa familiaparus mantiniñ yatiñapawa (1 Timoteo 5:8 liytʼäta). Yaqhep markanakanjja, wayna jilatanakajj tatapata jan ukajj mä familiarapatwa mä kun lurañs yateqapjjaspa. Yaqha markanakansti colegiop pachpanwa mä kun lurañs yateqapjjaraki. Kunjamatjjay yateqchïta, taqe kun juma pachpa jikjjatasiñamatakejj mä kun lurañ yatiñamajj wakisipuniwa (Hech. 18:2, 3; 20:34; Efes. 4:28). Kun lurañatakis qʼaphäñamawa, mä kun qalltasajj tukuyañamapuniwa. Mayninakajj uk amuyapjjaniwa, kuna luratamats sum parlapjjarakini, ukhamatwa mä trabajo jikjjatasma, janirakiw uka trabajo aptʼaskätati. Kunjamtï yatjjataniwayktanjja, suma chuymanïñasa mä kun sum lurtʼañ yatiñas kuna lurañanaktï jutïrin katoqkäta uk sum phoqañatakiw yanaptʼätam. Ukanakat mä qhawqha uñjañäni.

14. ¿Kunas mä wayna jilatarojj Jehová Diosar sapürunjam serviñatak yanaptʼaspa?

¹⁴ Sapürunjamaw Jehová Diosar servisma. Suma cristiano jilatanakatjja, jilapartejj waynäkasaw precursorat serviñ qalltapjjäna. Precursoräñajj kunayman jaqenakar yanaptʼañataki, qollq sum apnaqañatakiw yanaptʼätam (Filip. 4:11-13). ¿Janit precursor auxiliarat serviñ qalltkasma? Ukamp qalltañaw precursor regularat serviñatak waljanir yanaptʼawayi. Ukarakiw yaqha toqenakat Jehová Diosar serviñatak yanaptʼiristam, inas siervo de construcción ukham sirvchisma jan ukajj betelitächisma.

15, 16. ¿Kunsa mä wayna jilatajj siervo ministerialäñatakisa jan ukajj ancianöñatakis lurañapa?

¹⁵ Siervo ministerialata jan ukajj ancianotwa servisma. Taqe jilatanakaw congregacionan ancianot serviñatakejj mayitanakampi jan ukajj requisitonakamp phoqañatakejj chʼamachasipjjañapa. Jilat kullakanakapar ukham serviñ amtir jilatanakajja, Bibliarjamajj ‘mä suma luräwi katoqañ’ munapjjatapwa uñachtʼayapjje (1 Tim. 3:1). Ancianot serviñatakejj siervo ministerialat serviñaw nayraqat wakisi. Siervo ministerialanakajj walja toqenakatwa ancianonakar yanaptʼapjje. Ancianonakasa siervo ministerialanakas humilde chuymampiw jilat kullakanakapar yanaptʼapjje, taqe chuymarakiw predicapjje. Mä jilatajj 17 maranit 19 marankamaw siervo ministerialäñatakejj mayitanaka jan ukajj requisitonak phoqaspa. Wali wakichtʼat mä siervo ministerialarojj 20 maranïkasaw ancianot serviñapatak uttʼayasispa.

¹⁶ Siervo ministerialäñataki ancianöñatak mayitanakajja jan ukajj requisitonakajj Bibliankiwa, qhawqsa Jehová Diosarusa, familiamarusa, congregacionarus munasta ukarjamarakiwa (1 Tim. 3:1-13; Tito 1:6-9; 1 Ped. 5:2, 3). Uka mayitanakampi jan ukajj requisitonakamp phoqañajj janiw kuna chʼamäkisa, ukatakejj uka requisitonak sum amuyañatakiw chʼamachasiñama, Jehová Diosaruw ukanak phoqañatakejj yanaptʼa mayiñamaraki. c

17. ¿Kunjamsa mä wayna jilatajj suma esposöñatakisa familiap pʼeqtʼañatakis wakichtʼasispa? (Foto uñjjattʼarakïta).

¹⁷ Casarasisajj familiamar pʼeqtʼañaw waktʼarakïtam. Kunjamtï Jesusajj siskänjja, yaqhep jilatanakajj solteröskakiñwa amtapjje (Mat. 19:12). Ukampis jumatï casarasïtajja, casarat chachjamajj familiamar pʼeqtʼañamäniwa (1 Cor. 11:3). Mä chachajj esposapar munasispa, kunanaktï necesitki ukanak churaspa,  kunjamas jikjjatasi uk amuyaspa, Diosar serviñatakis yanaptʼaspa ukwa Jehová Diosajj muni (Efes. 5:28, 29). Kunjamtï aka yatichäwin yatjjataniwayktanjja, suma chuymanïñasa mä kun sum lurtʼañasa, mä arun amuytʼasirïñasa, warminakar respetañasa, confiykañ jaqëñas suma esposöñataki familiam sum pʼeqtʼañatakiw yanaptʼätam.

18. ¿Kunjamsa mä wayna jilatajj wawapar sum uywañatak wakichtʼasispa?

¹⁸ Inas wawanïchïta. Jumatï casarasïtajja, inas wawanïchïta. Waw sum uywañatakejj Jehová Diosat waljanak yateqasiñaw yanaptʼiristam (Efes. 6:4). Jehová Diosajj qhawqsa Jesús Yoqaparojj munasïna jupat kusisïna uk qhanwa jupar säna (Mar. 1:11). Jumatï wawanïyäta ukhajja, qhawqsa wawamar munasta uk sapa kutiw jupar sañama, suma luratanakapat felicittʼañamarakiwa. Jehová Diosat yateqasir jilatanakajja, suma cristianöñatakiw wawanakapar yanaptʼapjje. ¿Kunjamsa jichhatpachajj wawamar sum uywañatak wakichtʼasisma? Ukatakejj familiamarus congregacionankir jilat kullakanakarus munasiñampiw uñjañama, qhawqsa jupanakar munasta wali valoranit uñjarakta uk jupanakar sañamarakiwa (Juan 15:9). Ukhamäñajj janiw casaraskäta wawanïkät ukhakejj yanaptʼkätamti, jan ukasti jichhatpachaw Jehová Diosasa, familiamasa, congregacionas wali valoranit uñjapjjätam.

19, 20. ¿Kunsa mä wayna jilatajj suma cristianöñatakejj luraspa? (Nayrïr paginankir fotonak uñjjattʼäta).

¹⁹ Jumatï mä wayna jilatästajja, janiw justupakejj mä suma cristianökätati. Suma cristianöñatakejj khitinakatsa yateqasisma uk sum ajlliñamawa, amuytʼasirïñamawa, confiykañ jaqëñamawa, kunanaks sum lurañ yateqañamawa, jutir urunakatakis wakichtʼasiñamarakiwa.

²⁰ Kunanaktï lurañamäki ukanakat amuytʼasajja, inas ukanak lurañajj wali chʼamäkaspas ukham amuychïta. Ukampis jan desanimasimti, ¡chʼamachasiskakim! Jehová Diosajj jumar yanaptʼañwa muntamjja, janipun uk armamti (Is. 41:10, 13). Congregacionamankir jilat kullakanakajj yanaptʼapjjarakïtamwa. Kunjamtï Jehová Diosajj munki ukham jaqëjjäta ukhajja, wali sumaw kusisit jakasïta. Wayna jilatanaka, jumanakarojj walpun munasipjjsma, suma cristianöñatak chʼamachasitanakamar Jehová Diosajj bendisiskakispa ukwa munapjjta (Prov. 22:4).