1, 2. ¿Kunas 33 maran Pentecostés urojj pasäna?

 33 MARAN Pentecostés uröjjänwa. Jerusalén markanjja 120 discipulonakaw domingo alwajj mä altus utan tantachatäsipkäna (Hech. 1:13-15; 2:1). Jesusajja, mä qhawqha urunak nayrakiw uka markan quedasipjjañap discipulonakapar mayïna, ukanwa mä suma bendición katoqapjjañapäna (Hech. 1:4, 5). ¿Kunas ukan pasäna?

² Mä akatjamatwa “wali chʼaman thayas thaytʼankaspa ukham alajjpachat istʼasïna”, utpachaw wal suynarakïna. “Ukatjja lajjranakar uñtat nakhaskir ninanakwa jupanakajj uñjapjjäna”, uka ninanakasti pʼeqenakapjjan nakhäna, “taqenirakiw espíritu santompi phoqtʼatäpjjäna”, ukajj wali musparkañänwa (Hech. 2:2-4). Ukhamatwa Jehová Diosajj espíritu santop uka discipulonakar churäna (Hech. 1:8). Jupanakaw espíritu santompi * nayrïr ajllitanakäpjjäna, jupanakarakiw alajjpachat Jesusamp chik apnaqanipjjañapäna.

3. Pentecostés urun ajllitäpkäna uka discipulonakajj ¿kunatsa espíritu santompi ajllitäpjjatapat jan pächasipkäna?

³ Jumatï tantachatäsipkäna uka altus utankasmäna ukhajja, kunatï uka urun paskäna uk janipuniw armkasmänti. Lajjrar uñtat mä ninaw pʼeqemjjan nakhaspäna, yaqha arunak parlañwa qalltarakismäna (Hech. 2:5-12). Ukhamatwa  espíritu santompi ajllitätam qhan yatismäna. Ukampis ¿Diosajj ukham musparkañpunti maynir ajlli, mä tiemponakti taqenir ajlliraki? Janiwa. Kunjamatsa uk yattanjja uk uñjañäni.

4. ¿Mä pachpa tiemponakti nayrïr cristianonakajj alajjpachar sarañataki ajllitäpjjäna? Uk qhanañchtʼam.

⁴ Maynejj ajllitäki uka horasat parltʼañäni. Pentecostés urunjja janiw 120 discipulonakakejj espíritu santompi ajllitäpkänti, jan ukasti qhepat 3.000 jaqenakarakiw Jesusan arsutaparjam espíritu santo katoqapjjäna, jupanakajj bautisasipkäna ukhaw espíritu santompi ajllitäpjjäna (Hech. 2:37, 38, 41). Ukampis qhepa maranakanjja alajjpachar saririnakajj janiw bautisasipkäna ukhapuni ajllitäpkänti. Sañäni, samaritanonakajj bautisatäjjapjjäna uka qhepatwa ajllitäsipkäna (Hech. 8:14-17). Corneliompi utapankirinakampisti janïr bautisatäpkäna ukhaw ajllitäjjapjjarakïna, ukajj janiw uñjasirïkänti (Hech. 10:44-48).

5. Maynejj espíritu santompi ajllitäki ukhajja, ¿kunas 2 Corintios 1:21, 22 textorjamajj pasi?

⁵ Maynejj espíritu santompi ajllitäki ukhajj kunas pasi uka toqet jichhajj parltʼarakiñäni. Yaqhepajj Jehová Diosan ajllitätap amuyasipjje ukhajj janiw creyirjamäpkiti, ‘kunatsa nayar ajllpachïtu’ sasaw sapjjaraki. Yaqhepanakajj janiw ukham amuyapkarakiti. Ukhamäpansa janisa, apóstol Pablojj kunas ajllitanakampejj pasi ukwa akham sasin qhanañchi: “Jupar creyipjjta uka qhepatwa Diosajj churapjjämaw siskäna uka espíritu santompejj Cristo taypi selljjatapjjtamjja. * Uka espíritu santojj kuntï herenciat katoqkañäni ukan mä garantiapawa” sasa (Efes. 1:13, 14). Jehová Diosajj maynir ajllitapjja espíritu santop toqew qhan yatiyi. Ukhamajj ajllitanakar churaski uka espíritu santojj ‘mä garantiawa’, ukhamatwa jupanakajj oraqen jakañat sipansa alajjpachan wiñay jakañ suyapjje (2 Corintios 1:21, 22 liytʼañataki).

6. ¿Ajllitanakajj kunsa alajjpachar sarañatak lurapjjañapa?

 ⁶ Mä cristianojj espíritu santompi ajllitäjje ukhajja, ¿seguropuniti alajjpachar saraspa? Janiwa. Alajjpachar sarañatak ajllitätap sumsa maynejj yatkchejja, aka ewjja arunakwa amtañapa: “Jilatanaka, jawsatäpjjatamsa ajllitäpjjatamsa jan aptʼasiñatak jukʼampi chʼamachasipjjam. Jumanakatejj taqe ukanak lurapjjäta ukhajja, janipuniw tinkupkätati” (2 Ped. 1:10). Ukhamasti mä cristianojj alajjpachar sarañatak ajllitäkchisa, Diosat jan jitheqtkani ukhakiw alajjpachar sarani (Filip. 3:12-14; Heb. 3:1; Apoc. 2:10).

7. ¿Kunjamatsa ajllitanakajj alajjpachar sarañatak jawsatäpjjatap yatisipjje?

⁷ Ukhamajj ¿kunjamatsa maynejj alajjpachar sarañatak jawsatätap yatisi? Apóstol Pablojj Roma markan ‘santöñatak jawsatäpkäna’ ukanakar qellqkäna ukanwa ukajj qhan amuyasi. Jupajj akham sänwa: “Diosan espiritupajj janiw esclavor tukuykistuti, ukhamat mayamp ajjsaras jakañasataki, jan ukasti uka espíritu taypiw Diosan wawapjam katoqatätanjja, uka espiritun chʼamañchtʼataw ‘¡Abba, alajjpachankir Awki!’ sasin artʼasiraktanjja. Diosan espiritupajj chuymasamp chikaw Diosan wawanakapätas qhanañchi” sasa (Rom. 1:7; 8:15, 16). Ukhamasti Diosajj espiritup taypiw ajllitanakarojj alajjpachar sarañatak jawsatäpjjatap qhan yatiyi (1 Tes. 2:12).

8. 1 Juan 2:20, 27 textonakarjamajja, ¿kunatsa alajjpachar saririnakatakejj “ajllitapunïsktawa” sasin jaqenakan satäñajj jan wakiski?

⁸ Alajjpachar sarañatak jawsatäpki ukanakan chuymapansa amuyupansa jan pächasipjjañapatakejj Jehová Diosaw yanaptʼi (1 Juan 2:20, 27 liytʼañataki). Ajllitanakajj mayni cristianonakjamarakiw congregación taypi Jehová Diosampi yatichayasipjjañapa. Ukampis “ajllitapunïsktawa” sasin jaqenakan satäñajj janiw jupanakatak wakiskiti. Jupanakarojj Jehová Diosaw wali chʼaman espiritup taypi yatiyi, ukhamat jan akchʼas pächasipjjañapataki.

9. Efesios 1:18 textorjamajja, ¿maynejj ajllitäki ukhajj kunanakas mayjtʼi?

⁹ Maynejj Jehová Diosamp ajllitäki ukhajj kunas jupar pasi uk amuyañajj Diosan jilapart servirinakapatakejj chʼamakïspawa. Cheqas janiw taqenejj alajjpachar sarañatak ajllitäktanti, ukatwa uk amuyañajj chʼamäspa. Diosajja janiw jaqenakarojj alajjpachan jakapjjañapatak lurkänti, jan ukasti aka oraqen wiñay jakapjjañapatakiw luräna (Gén. 1:28; Sal. 37:29). Ukampis mä qhawqhaniruw Diosajj alajjpachan jakapjjañapatak ajlli. Maynir ajllki ukhajja, kunjam jakañtï suykäna uksa, amuyunakapsa akatjamatwa mayjtʼayi, ukhamat alajjpachan jakañ munapjjañapataki (Efesios 1:18 liytʼañataki).

10. ¿‘Mayamp nasiñajj’ kamsañsa muni? (Qhanañchäwi uñjjattʼäta).

¹⁰ Kunapachatï mä cristianojj espíritu santompi ajllitäki ukhajja, ‘mayampiw nasi’, jan ukajj ‘alayat nasi’. * ‘Mayamp nasipki’ jan ukajj “espíritu santot nasipki” ukanakajja, kunjamas jikjjatasipjje ukajj janiw jan ajllitäpki ukanakarojj qhanañchañjamäkiti sasaw Jesusajj sarakïna (Juan 3:3-8, nota).

11. ¿Kunanakas ajllit cristianon amuyunakapan mayjtʼi?

¹¹ Mä cristianojj ajllitäjje ukhajj ¿kunanakas amuyunakapan mayjtʼi? Janïr ajllitäkasajja, aka oraqen jakañwa taqe chuym suyäna.  Jehová Diosajj taqe jan walinak chhaqtayañapa ukhamarak aka oraqe paraisor tukuyañapwa suyäna. Inas jiwatat jaktat mä familiaparu jan ukajj mä munat amigoparu katoqañ suychïna. Ukampis ajllitäjjasajj amuyunakapajj mayjäjjewa, ¿kunatsa ukhamäpacha? ¿Janit aka oraqen jakañ munjjpacha? ¿Akapachan sinti jan walinaka llakinaka utjatapatti ukham amuyjjpacha? ¿Aka oraqen wiñay jakañajj qariñäkaspas ukhamti amuyjjpacha? Janiwa. Antisas Jehová Diosaw espíritu santopampejj amuyupsa kunjam jakañtï suykäna uksa mayjtʼayi.

12. 1 Pedro 1:3, 4 textorjamajja, ¿ajllitäpjjatap yatisipjje uka cristianonakajj kunjamas jikjjatasipjje?

¹² Ajllitäpki uka cristianonakajj Diosat uka bendición katoqañatakejj janis askïpkaspa ukham amuyasipjje, ukampis Jehová Diosan jupar ajllitapat janiw akchʼas pächasipkiti. Antisas kuntï katoqapkani uk yatisajj wal kusisipjje, Diosarus wal yuspärapjjaraki (1 Pedro 1:3, 4 liytʼañataki).

13. ¿Kunjamsa ajllitanakajj aka oraqen jakañar uñjapjje?

¹³ Ukhamajj alajjpachar jankʼak sarañatakejj ¿ajllitanakajj jiwjjañti munapjjpacha? Apóstol Pablow uk sum qhanañchäna. Ajllitanakan cuerpopajj carpanakäpkaspas ukham qhanañchasajja akham sänwa: “Khitinakatï aka carpanktan ukanakajja, wali llaktʼataw ayqosktanjja. Jiwasajj janiw aka carpa apsusiñ munktanti, jan ukasti alajjpachankirïki uka utampiw isthapisiñ muntanjja, ukhamat kunatï jiwirïki ukajja jakañampi manqʼantatäñapataki” sasa (2 Cor. 5:4). Ukhamasti ajllitanakajj janiw aka oraqen jakañampi qaritäpkiti, janirakiw jankʼak jiwañsa munapkiti. Antisas aka oraqen wali kusisitaw jakasipjje, familianakapampi amigonakapampi Jehová Diosar sapür serviñatakis wal chʼamachasipjje. Kun lurkasasa alajjpachar sarañat janiw armasipkiti (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Kunanakas maynirojj espíritu santompi ajllitäkaspas ukham amuyañar apaspa, ukampis ukajj kunatsa jan ukhamäkaspa?

¹⁴ Inas jumajj akham jisktʼassta: “¿Jehová Diosajj espíritu santopampi nayar ajllirakpachïtuti?” sasa. Ukhamächi ukhajja aka jisktʼanakat amuytʼañamaw wakisispa: ¿taqe chuymat jumajj Diosan munañap lurañ munta? ¿Taqe chuymat Diosan arunakap yatiyta? ¿Diosan Arupatsa ‘Diosan imantat yatiñapatsa’ jukʼamp yatjjatañti munta? (1 Cor. 2:10). ¿Jehová Diosajj predicacionan walti bendistam? ¿Diosampi suma apasipjjañapatakejj jumas mayninakar yanaptʼañamäkaspa ukhamti amuyasta? ¿Jehová Diosajj taqe kunanti jakäwiman yanaptam? Jumatï uka jisktʼanakaru ‘ukhamawa’ sasin sissta ukhajja, ¿alajjpachar sarañatak ajllitäpachätati? Janiwa. Taqe cristianonakaw ajllitäpansa janisa jumjam amuyapjjaraki. Ukhamarus Jehová Diosajj taqe servirinakaparuw espíritu santop taypejj chʼam churaspa. Ukampis jumatï “¿ajllitäpachätti janicha?” sasin pächassta ukhajja, janiw ajllit cristianöktati. Alajjpacharu sarañataki ajllit cristianonakajj janiw ukham pächasipkiti, jan ukasti jan pächasisaw alajjpacharu sarañ suyapjje.

15. ¿Espíritu santo katoqerinakajj janiw taqpachanejj alajjpachar sarapkaniti sasajj kunatsa sistanjja?

¹⁵ Nayra tiemponjja waljaniw espíritu santo katoqapjjäna sasaw Bibliajj qhanañchi, ukampis jupanakajj janiw alajjpachar sarañ suyapkänti. Amuytʼañataki, David reyejj espíritu santomp irpatänwa (1 Sam. 16:13). Ukaw Diosan imantat yatiñap amuyañatakisa, Bibliankir mä qhawqha cheqanak qellqañatakisa  yanaptʼäna (Mar. 12:36). Ukampis apóstol Pedrojj akham sänwa: “Davidajj janiw alajjpachar makatkiti” sasa (Hech. 2:34). Maysa toqetjja, Bautisir Juanajj ‘espíritu santompi phoqtʼatänwa’ (Luc. 1:13-16). Jesús pachpaw jupat akham säna: “Janiw khitis Bautisir Juanat sipans jukʼamp jilïrejj utjkiti” sasa. Ukampis janiw Reinon apnaqerejj alajjpachar sarkaniti sasaw sarakïna (Mat. 11:10, 11). Jehová Diosajj espíritu santopampi yanaptʼasaw walja musparkañanak uka chachanakar lurayäna, ukampis janiw alajjpachar sarañatak jupanakar espíritu santompi ajllkänti. ¿Jupanakajj alajjpachar saririnakat sipansa janit Diosar taqe chuym servipkpachäna? Janiw ukhamäkiti. Antisas Jehová Diosajj aka oraqen jakapjjañapatakiw jupanakar Paraison jaktayani (Juan 5:28, 29; Hech. 24:15).

16. Jichhürunakan Diosar servipki ukanakat jilapartejja, ¿kawkin jakañsa suyapjje?

¹⁶ Jichhürunakan Jehová Diosar servipki ukanakat jilapartejj janiw alajjpachar sarañ suyapkiti. Jan ukasti Diosan Reinopampi apnaqat aka oraqen jakañwa suyapjje. Nayra tiemponjja, ukhamarakiw Abrahanasa, Sarasa, Davidasa, Bautisir Juanasa, yaqha chachanakasa warminakasa aka oraqen jakañ suyapjjäna (Heb. 11:10).

17. ¿Kuna jisktʼanakarus jutïr yatichäwin qhanañchaskañäni?

¹⁷ Yaqhep ajllitanakajj aka oraqenwa jakasipki. Ukatwa yaqhep jisktʼanakajj utjaspa (Apoc. 12:17). Sañäni, maynitï alajjpachar sarañatak ajllitächi ukhajj ¿kunjamsa jupa pachpajj uñjasiñapa? Jesusan jiwäwip amtktan uka tantachäwin mä cristianor tʼantʼa manqʼeri vino umtʼiri uñjsna ukhajj ¿kunjamsa jupar uñjañasäspa? ¿Ajllitanakan sapa mara waljaptatapat llakisiñasäspati? Akjjar jutki uka yatichäwinwa uka jisktʼanakar qhanañchaskañäni.