1, 2. ¿Jesusan sepulturapar sarapkäna uka warminakarojja mä angelajj kamsänsa, Jesusas kamsarakïnsa?

 JESUSAN jiwatapatjja 36 horanakatsa jilaw pasjjäna. 33 maran 16 de nisán urojj qhanjtanjjänwa. Uka uruw wali alwat mä qhawqha warminakajj Jesusan sepulturapar wali llaktʼata sarapjjäna, Jesusan jiwat cuerpoparojj suma olorani qollanakampi aceitenakampi uchañwa munapjjäna. Puripjjäna ukhajja, sepulturajj chʼusakëjjänwa. Mä angelajj jupanakar akham sänwa: “Jesusajj jiwatanak taypit jaktayatäjjewa, jichhajj Galilearuw jumanak nayra saraski, ukanwa jupar uñjapjjäta” sasa (Mat. 28:1-7; Luc. 23:56; 24:10).

² Uka warminakajj uka lugarat sarjjapjjäna ukhajja, Jesusajj jupanakar jakʼachasisajj akham sänwa: “Jilanakajar yatiyir sarapjjam, Galilear sarapjjañapataki, ukanwa jupanakamp jikisëjja” sasa (Mat. 28:10). Jesusajj wali wakiskiri arunakwa discipulonakapar yatiyañ munäna, ukatwa jiwatat jaktayatäsajj uka tantachäwi wakichañ qalltäna.

3, 4. ¿Kunatsa Mateo 28:19, 20 texton uñstki uka mandatojj janiw apostolonakatak mayakïkänti sasajj sissna? (Nayrïr paginankir dibujo uñjjattʼäta).

³ (Mateo 28:16-20 liytʼañataki). Jesusajj wakichkäna uka tantachäwinjja, kunsa discipulonakapajj nayrïr patak maranakan lurapjjañapäna ukwa qhanañchäna, jiwasajj ukwa jichhas luraskaraktanjja. Jesusajj akham sänwa: “Ukhamasti sarapjjam, taqe markankir jaqenakar nayan discipulojar tukuyapjjam.  [...] Taqe kuntï nayajj jumanakar yatichapksma ukanak phoqañ yatichapjjarakim” sasa.

⁴ Jesusajj taqpach discipulonakapan predicapjjañapwa muni. Uka mandatojj janiw 11 apostolonakapatak mayakïkänti. ¿Kunatsa ukham sistanjja? Kimsa razonanakaw utji. Maya, ‘predicapjjam’ sasin siskäna uka Galilea qollunjja janiw apostolonakakejj tantachatäpkänti. Amtapjjañäni, Jesusan sepulturap uñjir sarapkäna uka warminakarojj ‘Galileanwa jupar uñjapjjäta’ sasaw mä angelajj säna. Paya, apóstol Pablojj akham sänwa: “[Jesusajj] phesqa patakatsa jukʼampi jilatanakaruw uñstäna” sasa (1 Cor. 15:6). ¿Kawkinsa uñstäna?

5. ¿Kunsa 1 Corintios 15:6 textojj amuytʼayistu?

⁵ Galilean apaskäna uka tantachäwejj Mateo 28 capitulon qellqatawa. Pablojj uka tantachäwitwa 1 Corintios 15:6 texton parlaskpachäna. ¿Kunatsa ukham sistanjja? 1) Jesusan jilaparte discipulonakapajj Galileatäpjjänwa. Ukatwa waljanïpjjatap laykojj Galileankir mä qollun tantachasipjjpachäna, Jerusalenankir mä utarojj janiw waljanejj mantapkaspänti. 2) Jesusajj jaktjjäna uka qhepatjja, 11 apostolonakapampejj Jerusalenan tantachasjjapjjänwa. Jupatï apostolonakan predicañapaki munaspänjja, ukanwa “predicapjjam, discipulojar tukuyapjjarakim” sasajj sisjjaspäna. Ukampis Jesusajj Galilear sarapjjam sasaw apostolonakarusa, warminakarusa, yaqha discipulonakarus mayïna (Luc. 24:33, 36).

6. ¿Kunatsa Mateo 28:20 qellqatan uñstki uka arunakajj jichhürunakanwa phoqasiski sasajj sistanjja, kunjamsa ukajj phoqasiskaraki?

⁶ Jesusajj janiw 11 apostolonakarukejj “predicapjjam” sasin siskänti sañatakejja, kimsïr razonajj akarakïspawa. Qheparojja Jesusajj akham sasaw arkirinakapar säna: “Nayajj sapürupuniw jumanakampïskta, akapachajj tukuskani ukapachkama” sasa (Mat. 28:20). Kunjamtï Jesusajj siskänjja, jichhürunakanjja walja jaqenakaw Jesusan arkiripar tukusipki. Sapa maraw Jesusan 300.000 machaq discipulonakapajj Jehová Diosan Testigopjam bautisasisipki.

7. ¿Kuna toqetsa aka yatichäwin yateqaskañäni, kunatsa uka toqet yatjjatañajj wakisi?

⁷ Bibliat yateqerinakatjja waljaniw bautisasipjje. Ukampis yaqhepajj Criston discipulopäñjja ajjsarapjjewa. Yateqañjja munasipkiwa, ukampis janiw bautisasiñatak chʼamachasipkiti. Jumatï Bibliat maynir yatichaskstajja, jupajj yateqatarjam sarnaqañapataki ukhamarak Criston discipulopar tukuñapatak yanaptʼañwa munpachätajja. Aka yatichäwinjja, kunjamsa Diosan arunakapampejj yateqerin chuymapar purtʼsna, kunjamsa nayrar sartañapatakis yanaptʼsna ukwa yateqaskañäni. ¿Kunatsa uka toqet yatjjatañajj wakisi? Awisajja, maynirojj Bibliat yatichaskakiñäniti janicha uk amtañaw wakisini.

8. ¿Kunatsa yaqhep yateqerinakan chuymapar purtʼañajj chʼamakïspa?

⁸ Jaqenakajj munasiñat jupar servipjjaspa ukwa Jehová Diosajj muni. Ukatwa Bibliat yateqerinakarojj akanak amuyapjjañapatak yanaptʼañasa: Diosajj sapa maynitwa llakisi, sapa mayniruw wal munasiraki. “[Jehová] Diosajj wajchanakan awkipawa, [viuda] warminakan arjjatiripawa” uk amuyapjjañapatakiw yanaptʼañasaraki (Sal. 68:5). Diosajj qhawqsa jupanakar munasi uk amuyapjje ukhajja, Bibliat yateqerinakajj Diosar wal munasipjje. Ukampis yaqhep yateqerinakajj jan munasir awkin uywataw jilsuwayapjje, ukatwa jupanakatakejj Jehová Diosaru munasir  Awkirjam uñjañajj chʼamäspa (2 Tim. 3:1, 3). Ukhamasti Diosajj kunjam chuymanisa ukwa Bibliat yatichkasajj qhanstayañasa. Munasir Diosasajj wiñay jakasiñaswa muni, ukan jakasiñatakiw yanaptʼarakistu ukwa yateqerinakar amuytʼayañasa. ¿Kunampsa yanaptʼañatakejj lursna?

9, 10. ¿Kawkïr libronakampis Bibliat yatichañasa, kunatsa ukanakampipuni yatichañasa?

⁹ Aka libronakampiw yatichañasa: “¿Kunsa Bibliajj yatichistu?”, “Munasir Diosat janipun jitheqtañäniti”. Aka libronakajja, Diosan arunakapampi chuymar purtʼañatak wakichatawa. Sañäni, Kunsa yatichistu sat libron 1 yatichäwipanjja aka jisktʼanakaruw qhanañchasi: ¿Diosajj jan sinttʼasirïpachati? ¿Diosajj jiwasat llakispachati? ¿Diosan amigopäñ munasmati? Janipun jitheqtañäniti sat librojja, Biblian wiñay yatichäwinakaparjam sarnaqañajj kunjamsa sum jakasiñatak yanaptʼistu uk amuyañatakiw yateqerir yanaptʼani, Jehová Diosan amigopäñatakis yanaptʼarakiniwa. Uka libronakampejj walja kutis yaqhanakar yatichjjstanjja, Bibliat yateqerinakat sapa  maynejj kunan yanaptʼatäñsa muni ukarjamaw wakichtʼasiñasa.

¹⁰ Ukampis Kunsa yatichistu jan ukajj Janipun jitheqtañäniti sat libronakat sipansa yaqha qellqatankki uka yatichäwit yateqerimajj yatjjatañ munaspa ukhajja, jupa pachpa yaqha horasan uka qellqat liytʼañapatakiw chʼamañchsna. Ukatjja Kunsa yatichistu jan ukajj Janipun jitheqtañäniti sat libronakampiw yatichaskaksna.

11. ¿Kunapachas yateqerimpejj oración lurañ qalltsna, kunjamsa jupampejj oración toqet parlaraksna?

¹¹ Bibliat sapa kuti yatichkasajj oracionampipuniw qalltañasa. ¿Kunapachatsa oracionampi qalltañas tukuyañas wakisispa? Jilapartejja curso bíblico qalltjjtan uka qhepa semananakaw oración lurañajj wakisjjaspa. Diosan Arupjja espíritu santon yanaptʼapampikiw sum amuysna ukwa yateqerinakajj amuyapjjañapa. Yaqhep yatichirinakajja, Santiago 1:5 texto liytʼasaw oración toqet parltʼapjje, ukan akham siwa: “Jumanakat maynitejj yatiñanïñ munchejja, Diosar mayiskakpan” sasa. Ukatjja akham sasaw yateqerir jisktʼapjjaraki: “¿Kunjamsa yatiñanïñatak Diosar yanaptʼa maysna?” sasa. Inas yateqerejj oracionanwa mayissna sischispa.

12. ¿Kunjamsa Bibliat yateqerirojj Salmo 139:2-4 qellqatampejj Diosar sum orasiñapatak yanaptʼsna?

¹² Yateqerirojj orasiñwa yatichañasa. Jehová Diosajj oracionanakam wal istʼañ muni sasaw yateqerir qhanañchañasa. Kunatï chuymasan utjki ukanaksa, kunatï jan yaqhanakar arsuñjamäki ukanaksa Diosar yatiysnawa sasaw qhanañchañasaraki. Cheqas Jehová Diosajj taqpach amuyunakaswa yati (Salmo 139:2-4 liytʼañataki). Ukatjja, jan wali amuyunaka jan wali costumbrenaka apanukuñapatakejja, Bibliat yateqerirojj Jehová Diosar yanaptʼa mayisiñapatakiw chʼamañcharaksna. Amuytʼañatakejj mä yateqerit parltʼañäni, jupajj mä qhawqha tiempow Bibliat yateqjje, ukampis Diosar jan uñtʼirinakan uñstayat mä fiestapaw wal jupar gusti. Jan walïtap yatkchisa, kunatï uka fiestan utjki ukajj gustaskakiwa. ¿Kunjamsa jupar yanaptʼsna? Chuymapan kunjamas jikjjatasi uk Jehová Diosar taqpach yatiyañapatakiw chʼamañchañasa, Diosajj kunanakarutï munaski ukar munasiñapataki yanaptʼa mayisiñapatakiw chʼamañchañasaraki (Sal. 97:10).

13. 1) ¿Kunatsa yateqerinakarojj tantachäwir jutapjjañapatak qalltatpach invittʼañasa? 2) ¿Kunjamsa mä yateqerirojj tantachäwir jutañ jan ajjsarañapatak yanaptʼsna?

¹³ Yateqerirojj tantachäwinakar jutañapatakiw qalltatpach invittʼañasa. ¿Kunatsa? Kunanaktï tantachäwin istʼkani uñjkarakini ukanakajj chuymaparuw purtʼaspa, Diosar jukʼamp jakʼachasiñapatakiw yanaptʼarakispa. Ukhamajj ¿Kunjamsa tantachäwinakajj apasi? sat video uñtayapjjañäni, ukatsti tantachäwir jutañapatak invittʼapjjarakiñäni. Puedstan ukhajja, ‘utamaruw irptir jutä’ sasaw sissna. Bibliat yatichir sarktan ukhajja yaqha jilat kullakanakaruw jupan ukar irpsna. Ukhamatwa yateqerejj congregacionankir mayni jilat kullakanakar uñtʼjjani, tantachäwir sarkani ukhasa janiw jan uñtʼatäkaspas ukham amuyaskaniti.

14. Jehová Diosar jukʼamp munasiñajj ¿kunatakis yateqerir yanaptʼani?

¹⁴ Yateqerinakarojj Diosar jukʼamp jakʼachasipjjañapataki amtampiw yatichañasa (Efes. 4:13). Maynejj jiwasampi Bibliat yateqañ qalltki ukhajja, kunjamsa yatichäwinakajj jupar yanaptʼaspa ukatakwa jilapart llakisispa. Ukampis Jehová Diosar jukʼamp munasjje ukhajja, kunjamsa mayninakarus jilat  kullakanakarus yanaptʼaspa ukanakatwa llakisjje (Mat. 22:37-39). Maysa toqetjja, yateqerinakarojj Diosan Reinopar donacionanakampi yanaptʼañajj kunja wakiskirisa ukwa tiempopar yatichañasaraki.

15. ¿Kunjamsa yateqerirojj jan waltʼäwinak askichañ yanaptʼsna?

¹⁵ Jan waltʼäwinak askichañwa yateqerir yatichañasa. Amuytʼañatakejj mä yateqerisat parltʼañäni, jupajj janïr bautisat mä publicadoräkaspas ukham sañäni. “Mä jilataw chuym ustʼayitu” sasin yatiyistaspa ukhajja, ¿kamachsnasa? Jupar arjjatañat sipansa jan ukajj jilatar arjjatañat sipansa, Bibliajj kamsisa ukwa jupampi yatjjatañasa. Kunsa luraspa ukwa qhanañchañasaraki: maya, jilatarojj perdonaspawa, luratapsa armjjarakispawa. Paya, jilatampiw sumankthapiñatak munasiñamp parlarakispa (Mateo 18:15 uñjjattʼarakïta). Kunsa saspa uk wakichtʼasiñapatakiw yateqerir yanaptʼañasa. Mä jan waltʼäwi askichañatakejj akïr yanaptʼanak apnaqañwa yatichsna: Jehová Diosan Testigonakapan Bibliat yatjjatapjjañapataki, jw.org^®, JW Library^®. Janïr bautisaskasin jan waltʼäwinak askichañ yateqani ukhajja, bautisatäjjasajj jukʼamp sumaw jilat kullakanakampi apasjjani.

16. ¿Kunjamsa yaqha jilat kullakanakar irpañajj yateqerisar yanaptʼaspa?

¹⁶ Bibliat yatichktan ukhajj yaqha jilat kullakanakaruw invittʼañasa, congregacionanak tumptʼir jilatarus invittʼañasarakiwa. ¿Kunatsa? Kunjamtï 13 parrafon siskayätanjja, ukhamatwa yateqerejj jilat kullakanakar uñtʼani. Ukatjja, jan waltʼäwinakar atipjañwa jupanakat yateqarakini. Jupanakajj jiwasat sipansa jukʼamp sumwa yanaptʼapjjaspa. Mä yateqerisajj cigarro fumañ jaytañatakis wal chʼamachasiskaspa ukham sañäni. Ukhamäspa ukhajja, jupjam wal chʼamachasisa uka vicio jaytir mä jilataruw irpsna. Inas jupajj yateqerisar uka vicio jaytañapatak yanaptʼchispa. Jiwasatï jukʼamp experienciani mä jilat nayraqatan yatichañ ajjsarstan ukhajja, juparuw yatichañapatak maysna. Ukhamasti jilat kullakanakampiw yanaptʼayasiñasa. Amtañäni, yateqerisarojj Diosar jukʼamp jakʼachasiñapataki amtampiw yatichañasa.

17, 18. Bibliat maynir yatichaskakiñäniti janicha uk amtañatakejj ¿kunanakatsa amuytʼañasa?

¹⁷ Yateqerisatï Bibliarjam sarnaqañatak jan chʼamachaskchi ukhajja, yatichaskakïti janicha sasaw jisktʼasiñasa. Ukampis janïr uk amtkasajja, kunanak lurañsa jan puedki uksa amuytʼañasarakiwa. Yaqhepajj mayninakat sipansa janiw jankʼaki Bibliarjam cambionak lurapkiti. Ukatwa akham jisktʼasiñasa: “¿Qhawqtï puedki ukarjamati nayrar sartaski? ¿Bibliat yateqki ukarjam sarnaqañatakit chʼamachasiski?” sasa (Mat. 28:20). Mä yateqerejj kʼachataksa cambionak lurchejja, cambiaskatapajj jakäwipan qhanäñapawa.

¹⁸ Maysa toqetjja, Bibliat yateqañajj janis  wakiskirïkaspa, jan ukajj janis valoranïkaspa ukham amuychi ukhajj ¿kunsa lursna? Amuytʼañäni: yateqeritï Kunsa yatichistu sat librot yateqañ tukuyjjchi, Janipun jitheqtañäniti sat libromp yateqañsa qalltjjarakchi, ukampis jan mä tantachäwirus sarkchi, janirak Jesusan jiwatap amtañatakis tantachaskchi, jan wakiskirïki ukanak laykukiraki Bibliat yatjjatañsa sapa kuti jittʼaychi ukhajja, jupampi qhan parltʼañaw wakisispa. *

19. Mä yateqerejj jan nayrar sartki ukhajja, ¿kamsasas jisktʼañasa, kunanakatsa amuytʼañasaraki?

¹⁹ Qalltañatakejj akham sasaw yateqerir jisktʼsna: “¿Kunas Jehová Diosan Testigopjam bautisasiñatak jarkʼtamjja?” sasa. Mä toqetjja, yateqerejj akham saspawa: “Bibliat yateqañajj wal gustitu, ukampis janipuniw Jehová Diosan Testigopäkäti” sasa. Jupatï walja tiempo yateqjjchejja, ¿jupar yatichañajj wakisiskakispati? Maysa toqetjja, yateqerejj kunatsa jan nayrar sartki ukwa sarakistaspa. Inas akham amuychi: ‘Janiw utat uta predikir sarañ puedkäti’ sasa. Kunsa amuyi uk yatiñäni ukhajja, jukʼamp sumwa jupar yanaptʼañäni.

20. Mä yateqerir yatichaskakiñäniti janicha uk amuytʼañatakejja ¿kunjamsa Hechos 13:48 textojj yanaptʼistu?

²⁰ Bibliat yateqerinakat yaqhepajja, Ezequiel tiempon jakiri israelitanakjamäpjjewa. Jehová Diosajja, uka israelitanakat Ezequiel profetar akham sänwa: “Jupanakasti jumajj mä munasiña qʼochunaka qʼochurïkasmas ukhamakwa amuyapjjtamjja, suma qʼochtʼirïkasmasa, arpsa sumsa toctʼkasma ukhama. Arunakam istʼasasa, [...] janiw uka arunakarjama sarnaqapkiti” sasa (Ezeq. 33:32). “Bibliat janiw yatichjjämati” sañajj chʼamakïspawa, ukampis ukham sañajj awisajj wakisiwa, ‘utjki uka tiempon jukʼakëjjatap layku’ (1 Cor. 7:29). Ukhamajj jan chʼamachasipki ukanakar yatichasa tiempo aptʼasiñat sipansa, ‘khitinakatï wiñay jakañatak suma chuymanïpki’ ukanakaruw thaqañasa (Hechos 13:48 liytʼañataki).

21. ¿Kawkïrisa 2020 maratak Bibliat apstʼat textojja, kunatsa uka textojj wali wakiskirejja?

²¹ Criston discipulonakapar tukupjjañapatakejj kunjamsa jaqenakarojj jukʼamp sum yanaptʼsna, ukatakiw 2020 maratak Bibliat apstʼat textojj yanaptʼistani. Uka arunakjja Jesusajj discipulonakapampi Galilea qollun tantachaskäna ukhaw arsüna. Amtapjjañäni, 2020 maratak Bibliat apstʼat textojj akïriwa: Sarapjjam, jaqenakar nayan discipulojar tukuyapjjam, bautisapjjarakim (Mat. 28:19).