1. ¿Kunatsa familian munasiñajj jukʼat jukʼatwa chhaqtaski sasin sissna?

AKA qhepa urunakanjja jaqenakajj ‘jan munasirinakäpjjaniwa’ sasaw Bibliajj säna (2 Tim. 3:1, 3). Ukajj jichha tiemponwa phoqasiski. Sañäni, walja matrimonionakaw divorciasipjje, awk taykanakajj jupanakpuraw chʼajjwapjje, wawanakasti janis khitis jupanakar munkaspa ukhamwa amuyasipjje. Maysa toqetjja, yaqhep familianakajj pachpa utans jakapkchejja janiw munasiñ uñachtʼayasipkiti. Familianak ewjjtʼiri mä chachajj akham siwa: “Taykasa awkisa wawanakapas mä utanaksa jakasipkchejja janiw jupanakpur parltʼasipkiti. Computadorampi tabletampi celularampi video juegonakampikiw tiempo aptʼasipjje, janis uñtʼasipkaspa ukhamaw jakasipjje” sasa.

2, 3. 1) Romanos 12:10 textorjamajj ¿khitinakarus taqe chuyma munasiñasa? 2) ¿Kunsa aka yatichäwin yatjjataskañäni?

² Akapachan janiw munasiñajj utjkiti, jiwasajj janiw jupanakjamäñ munktanti (Rom. 12:2). Jan ukasti, familiasarusa jilat kullakanakarus taqe chuyma munasiñatakiw chʼamachasiñasa (Romanos 12:10 liytʼañataki). ¿‘Taqe chuyma munasiña’ sasajj kuna kasta munasiñatsa parlasktanjja? Kunjam munasiñatï sum apasir familian utjki uka kasta munasiñatwa parlasktanjja. Congregacionasankir jilat kullakanakar ukhamwa munasiñasa, jupanakaw Diosar serviñan familiasajja. Jiwasatï ukham taqe chuyma munasiñäni ukhajja, maynit maynikam yanaptʼasisaw Jehová Diosar mayachtʼat servipjjañäni (Miq. 2:12).

³ Taqe chuyma munasirïñatakejja, Jehová Diosampita yaqhep servirinakapampit yatjjatañaw yanaptʼistani, ukwa aka yatichäwin yatjjataskañäni.

4. ¿Santiago 5:11 textojj kamsis Jehová Diosan munasiñap toqetjja?

⁴ Jehová Diosajj kunjam Diosasa uka toqetwa Bibliajj parlistu. Sañäni, “Diosajj munasiñawa” sistuwa (1 Juan 4:8). Uk yatiñajj Jupar jakʼachasiñatakiw yanaptʼistu. Ukatjja, “Jehová Diosajj wali munasir chuymaniwa” sasaw Bibliajj sarakistu (Santiago 5:11 liytʼañataki). Uka arunakajj qhawqsa Jehová Diosajj munasistu ukwa uñachtʼayistu.

5. ¿Kunjamsa Jehová Diosajj khuyaptʼayasirïtap uñachtʼayistu, ukat kunjamsa Jupat yateqassna?

⁵ Santiago 5:11 texton Jehová Diosajj wali munasir chuymaniwa sasin siski ukamp chikajj wali khuyaptʼayasiriwa sarakiwa. Ukham Diosätapaw jupar jakʼachasiñatak yanaptʼistu (Éx. 34:6). Mä toqetjja, juchanakas perdonasaw khuyaptʼayasirïtap uñachtʼayistu (Sal. 51:1). Biblian khuyaptʼayasiña sasinjja, janiw maynir perdonaña sañak munkiti. Jan ukasti, maynejj maynir tʼaqesir uñji ukhajja, jupat sinttʼasisajj yanaptʼañatakiw chʼamachasi ukwa sañ munaraki. Mä taykajj wawapar wal munasi, Jehová Diosajj ukat sipans jukʼampwa yanaptʼañ munistu sasaw Bibliajj qhanañchi (Is. 49:15). Tʼaqesktan ukhajja, khuyaptʼayasiñapatwa jiwasar yanaptʼistu (Sal. 37:39; 1 Cor. 10:13). Jiwasajj Jehová Diosat yateqasisaw jilat kullakanakasar perdonañasa, janirakiw jupanakatak chuyma ustʼata sarnaqañasäkiti (Efes. 4:32). Maysa toqetjja, jan waltʼäwinakan uñjasipkipan jupanakar yanaptʼasaw khuyaptʼayasirïtas uñachtʼayaraksna, munasiñat mayninakar khuyaptʼaytan ukhajja, Jehová Diosat yateqasitaswa uñachtʼaytanjja, jupjam taqe chuyma munasirejj janiw utjkiti (Efes. 5:1).

6. ¿Davidampi Jonatanampejj qhawqsa munasipjjäna?

⁶ Biblianjja, wali suma amigonakatwa parli, jupanakat maynejj Davidampi Jonatanampiwa. “Jonatanajj Davidampejj wali suma amigonakapuniw tukupjjäna, ukatsti Jonatanajj  jupa kipkarjamaw munasïna” sasaw Bibliajj qhanañchi (1 Sam. 18:1). Saúl reyejj apnaqkäna uka qhepatjja, Davidaw reyïñapäna, juparojj Jehová Diosaw ajllïna. Uk yatisajja, Saúl reyejj wal Davidat envidiasïna colerasirakïnwa, ukatwa jiwayañ munäna. Ukampis Saulon Jonatán yoqapajja, janiw awkipjam lurañ munkänti. Antisas Davidampejj amigöñataki maynit maynikam yanaptʼasiñatakiw juramentompi arsupjjäna (1 Sam. 20:42).

7. ¿Kunatsa Jonatanampi Davidampi amigöpjjañapajj chʼamakïspänjja?

⁷ Jonatanampi Davidampi amigöpjjañapajj chʼamakïspänwa ukatwa jupanakan suma amigöpjjatapajj wali musparkañajja. Sañäni, Jonatanajj Davidat sipansa 30 maranak jilïrïnwa ukatwa ‘Davidajj waynäskiwa janiw experiencianïkiti janiw jupamp amigöpkiristi’ sasin Jonatanajj amuyaspäna. Ukampis janiw ukham amuykänti antisas wali respetompiw Davidar uñjäna.

8. ¿Jonatanajj Davidan suma amigopänwa sasajj kunatsa sissna?

⁸ Jonatanajj Davidat envidiasispänwa, Saulon yoqapjamajj nayaw reyiñatak derechonïtjja sasaw amuyarakispäna (1 Sam. 20:31, TNM). Ukampis, janiw ukham lurkänti, antisas humilde chuymanïnwa, Jehová Diosarus jan jitheqtasaw servirakïna, ukatwa Diosajj Davidar trono churañ amtkäna ukar taqe chuyma apoyäna. Davidarus taqe chuymaw yanaptʼarakïna, uk uñjasajj Saúl reyejj wal coleräna (1 Sam. 20:32-34).

9. Jonatanajj janiw Davidar enemigoparjam uñjkänti, ¿kunjamatsa uk yattanjja?

⁹ Jonatanajj Davidar taqe chuymaw munasïna, ukaw enemigoparjam jan uñjañatak yanaptʼäna. Jonatanajj wali suma flechtʼirïnwa guerranakans jan ajjsarasaw nuwasirïna. Jupampi, Saúl awkipampejj ‘jachʼa pakanakat sipansa wali jalirïpjjewa, leonanakat sipansa jukʼampi chʼamanïpjjewa’ sasaw jaqenakajj sapjjerïna (2 Sam. 1:22, 23). Ukhamajja, guerranakan atipjirïtapat jachʼa jachʼaw Jonatanajj tukuspäna, ukampis janiw kuns Davidar atipañ amtampejj lurirïkänti janirakiw Davidajj guerranakan atipirïkäna ukanakatsa envidiasirïkänti, antisas Davidan jan ajjsarirïtapata Jehová Diosar confiyirïtapat wal kusisïna. Sañäni, Davidajj Goliatar jiwaykäna uka qhepatwa Jonatanajj Davidar munasiñ qalltäna. ¿Kunjamsa jiwasajj jilat kullakanakasar taqe chuyma munasitas uñachtʼaysna?

10. ¿Chuymatpach maynit maynikam wal munasipjjam siski ukajj kamsañsa muni?

¹⁰ Bibliajj akham siwa: “Chuymatpach maynit maynikam wal munasipjjam” sasa (1 Ped. 1:22). Ukjja Jehová Diosatwa yateqassna. Jupajj wal munasistu, ukhamajj jiwasatï jupat jan jitheqtkañäni ukhajja, janiw kunas munasiñapat apaqkistaniti (Rom. 8:38, 39). ‘Chuymatpacha’ sasin traduciski uka arojja, griego arun maynir munasiñatak wal chʼamachasiña sañwa muni, awisajja yaqhep jilat kullakanakar munasiñatakejj ukham chʼamachasiñaw wakisini. Ukhamajj maynimp sum apasiñajj chʼamäni ukhajja, Bibliajj ‘maynit maynikam munasiñamp aguantasipjjam, espíritu santojj mayachtʼat jakasiñ churkistu ukarjam sarnaqañatak wal chʼamachasisa, sumankañan jakapjjam’ siski uka ewjjtʼaruw istʼañasa (Efes. 4:1-3). ‘Sumankañan jakasiskakiñatakejja’, janiw jilat kullakanakasan pantjasitanakap uñchʼukiñasäkiti, jan ukasti kunjamtï Jehová Diosajj jupanakar uñjki ukham uñjañatakiw chʼamachasiñasa (1 Sam. 16:7; Sal. 130:3).

11. ¿Kunatsa awisajj jilat kullakanakasar taqe chuyma munasiñajj chʼamakïspa?

 ¹¹ Awisajja jilat kullakanakasar taqe chuyma munasiñajj chʼamakiwa, yamas pantjasitanakap uñchʼuktan ukhajj jukʼamp chʼamawa. Ukaw nayra cristianonakampejj pasarakïna. Sañäni, Evodia, ukhamarak Síntique kullakanakatakejja, Pablomp chik “suma yatiyäwinak” yatiyañajj janiw chʼamäkänti. Ukampis uka pä kullakanakatakejj jupanakpura sum apasiñajj chʼamakïnwa. Ukatwa apóstol Pablojj ‘Tatitumpi mayakïpjjatap laykojj mä pachpa amuyunikïpjjañapatak jupanakar chʼamañchtʼäna’ (Filip. 4:2, 3).

12. ¿Kunsa jilat kullakanakar taqe chuyma munasiñatakejj lurañasa?

¹² Jilat kullakanakar taqe chuyma munasiñatakejj ¿kun lurañasasa? Sapürutjam jupanakar jukʼamp sum uñtʼañatakiw chʼamachasiñasa. Ukhamatwa jupanakar entiendiñasa munasiñas jan chʼamäkaniti. Jilat kullakanakasajj jilïrïskpasa waynäskpasa yaqha costumbrenïskpasa amigopäsnawa. Jonatanajja, Davidat sipan 30 mara jilïrinwa, ukhamäkchïnsa suma amigöpjjänwa. ¿Janit jiwasajj congregacionankir mä jilïri jan ukajj wayna jilat kullakanakamp amigökaraksna? Ukhamtï lurañänejja, ‘taqpach creyente masinakasar munasitaswa’ uñachtʼayañäni (1 Ped. 2:17).

13. ¿Janiw taqenirojj mä igualak munasksnati sasajj kunatsa sissna?

¹³ Jilat kullakanakasar taqe chuyma munasiñasawa sasinjja, ¿taqenirus mä igualakwa munañasa sañti munasktanjja? Janiwa, janiw uk puedksnati. Yaqhep jilat kullakanakajj jiwasjam amtanïpjjewa, ukatwa jupanakar jukʼamp munastanjja. Jesusajj taqpach apostolonakaparuw amigonakaparjam uñjäna, ukampis apóstol Juanaruw jukʼamp munasïna (Juan 13:23; 15:15; 20:2). Ukhamäkchïnsa taqeniruw sum uñjäna. Sañäni, apóstol Juanajj Santiago jilapampejj Diosan Reinopan jupamp chik qontʼasiñatak mayipkäna ukhajja, Jesusajj akham sänwa: “Khitis nayamp chikajj kupëjjajar jan ukajj chʼeqäjjajar qontʼasini uk sañajj janiw nayar  waktʼkituti” sasa (Mar. 10:35-40). Jiwasajj Jesusatwa yateqasiñasa, janiw wali munat amigonakasaruk sum uñjañasäkiti (Sant. 2:3, 4). Mayniruk sum uñjsna ukhajja, congregacionan tʼaqa tʼaq sarnaqañaw utjaspa (Jud. 17-19).

14. Kunjamsa Filipenses 2:3 textojj ¿mayninakat jilanksnas ukham jan amuyañasatak yanaptʼistani?

¹⁴ Jiwasatï taqe chuyma munasirïñäni ukhajja, janiw jilat kullakanakasar atipañ layku kuns lurkañäniti. Jonatanajj janiw Davidat envidiaskänti, janirakiw jupa lanti reyïñsa munkänti. Jiwasajj jupatwa yateqasiñasa, janiw jilat kullakanakasarojj kuns sum lurañ yatipjjatapat envidiasiñasäkiti. Antisas kuntï Pablojj siskäna ukwa lurañasa, jupajj akham sänwa: “Mayninakarojj humilde chuymamp uñjapjjam, jumanakat sipansa jilïrïpkaspas ukhama” sasa (Filipenses 2:3 liytʼañataki). Cheqas congregacionanjja, taqeniw mä kunans yanaptʼtanjja. Jiwasatï humildëñäni ukhajja, jilat kullakanakasan suma luratanakap uñjañäniwa, jupanakats yateqasirakiñäniwa (1 Cor. 12:21-25).

15. ¿Kunatï Tanyampiru familiapampir paskäna ukat kunsa yateqsna?

¹⁵ Jan walinakan uñjasktan ukhajja, Jehová Diosajj jilat kullakanakas toqew taqe chuyma munasiñampi chuymachtʼistu, yanaptʼarakistu. Estados Unidos markan walja markanakat mä jachʼa tantachäwiw 2019 maran apasïna, uka tantachäwejj “Munasiñajj janipuniw tukuskiti” satänwa. Sábado uru tantachäwi tukuyarojj kunas mä familiar pasatayna uk uñjañäni. Kimsa wawanakani Tanya kullakajj kawkjantï alojatäkäna ukaruw autot kuttʼaskäna, ukhamaruw mä autojj jupa toqer jutasin autopar chocantäna. Kullakajj akham siwa:  “Janiw khitis usuchjatäpkäyätti, autot mistusajj thaki taypinwa wali sustjata sayasipkayäta. Ukhamaruw maynir autop toqer sarañatak jawsaniskir thaki ladon uñjapjjta. Jupajj mä jilatätaynawa, asambleatwa jutaskarakitayna. Janiw jupakejj ukham saytʼkänti, Suecia markat jutir phesqa delegadonakaw nanakar yanaptʼañatak saytʼapjjarakïna. Kullakanakajj nayampiru wawajampirojj wali munasiñampiw qhomanttʼapjjetäna, ukajj wal yanaptʼapjjetäna. ‘Walikïsipktwa’ sasinsa jilat kullakanakar sapkchiyätjja janiw jaytapkitänti, ambulancia purjjäna uka qhepatsa janiw jaytapkitänti, taqe kunanwa yanaptʼapjjetäna. Uka accidente pasapkitäna ukhajja, Jehová Diosan munasiñap qhanwa uñjapjjta. Ukaw jilat kullakanakarusa Jehová Diosarus jukʼamp munasiñataki yuspärañatak yanaptʼawayapjjetu” sasa. Yanaptʼatäñ munkayäta ukhajja, ¿mä jilatasa jan ukajj kullakas taqe chuyma munasirïtap uñachtʼayirïtamti?

16. ¿Kunatsa maynit maynikam taqe chuyma munasiñ uñachtʼayasiñasa?

¹⁶ ¿Jiwasatï maynit maynikam taqe chuyma munasiñäni ukhajj kunanaksa jikjjatañäni? Jilat kullakanakajj problemanakan uñjasipkani ukhajj chuymachtʼañäniwa, Jehová Diosar mayachtʼata, kusisit servipjjañapatakiw yanaptʼañäni. Jesusan cheqpach discipulopätaswa uñachtʼayarakiñäni. Uk uñjasajja, suma chuymani walja jaqenakajj Jehová Diosar serviñwa munapjjani, ukat jukʼampisa ‘wali munasiñampi khuyaptʼayasiri taqe kunan chuymachtʼasiri Jehová Diosaruw’ jachʼañchañäni (2 Cor. 1:3). Ukhamajja, taqe chuyma munasiñ yateqaskakiñäni, uñachtʼayaskakiñäni.