1. ¿Kunsa yaqhep cristianonakajj David reyjam jisktʼasipjjaspa?

TAQENIW kusisita sum jakasiñ muntanjja. Ukhamäkchisa taqeniw awisajj jan walinakan uñjastanjja. Yamas yaqhep cristianonakajja, David reyjamaw jikjjatasipjjaspa, jupajj akham sasaw Jehová Diosar jisktʼäna: ‘¿Kunapachkamarak llaktʼat sarnaqästi? ¿Kunapachkamarak chuymajan sapüru llakisiskakïsti?’ sasa (Sal. 13:2, TNM).

2. ¿Kunsa aka yatichäwin yatjjataskañäni?

² Awisajj taqeniw wali llakita jikjjatastanjja, ukampis atipjsnawa, ¿kunanaksa ukatak lursna? Aka yatichäwinjja, kunanakas llakisiyistaspa ukanakatwa nayraqatajj mä qhawqha yatjjataskañäni. Ukjjarusti, jan waltʼäwinakan uñjasisajj kunsa pacienciampi suytʼañataki jan sint llakisiñatakejj lursna, ukwa sojjta toqet uñjaskañäni.

3. ¿Kunanakas llakisiyistaspa, ukat ukanak controlsnati?

³ Waljanakaw llakisiyistaspa, ukanakat yaqhepjja janiw chhaqtayksnati. Sañäni, sapa marajj qhawqhas isisa manqʼañasa ukat yaqha ukhamanakas jiljjattani uk janiw controlksnati. Escuelankiri jan ukajj trabajonkir compañeronakasajj qʼañu jucha lurañasataki, jan honradöñasatakiw chʼamañchapjjestaspa,  jiwasajj janirakiw uk controlksnati. Markasan lunthatasiñ chhaqtayañsa janirakiw puedksnati. ¿Kunatsa? Akapachanjja, jilaparte jaqenakajj janiw Biblian wiñay yatichäwinakaparjam sarnaqapkiti. Yaqhep jaqenakajja, ‘akapachan jakañat llakisisaw’ Jehová Diosar jan sirvjjapjjeti, aka mundon diosapajj uk sumwa yati (Mat. 13:22; 1 Juan 5:19). Cheqas ukhamïpanwa akapachajj kunayman jan walinakamp phoqantata, ukaw jaqenakar wal llakisiyi.

4. ¿Walja problemanïsajj kamachjjsnasa?

⁴ Walja problemanïsajj ukatakwa wal llakisjjsna. Sañäni, trabajat qollqesajj jan kunatak alcansipana, jan ukajj usutäsin jan trabajiñ pueditasatwa llakissna, jan ukajj trabajoswa aptʼassna ukatwa llakissna. ‘Diosan leyinakap pʼakintañatak yantʼat uñjasï ukhajj Diosat janit jitheqtkäjja’ sasaw llakisiraksna. ‘Supayan apnaqat jaqenakajj Diosan markapar jan waltʼaykani ukhajj kunsa lurañäni’ sasaw llakissna. ‘¿Ukanakat llakisiñajajj walikïskiti?’ sasin inas jisktʼasiraksna.

5. ‘Jan llakisipjjamti’ sasajja, ¿kamsañsa Jesusajj munäna?

⁵ Jesusajja, discipulonakaparojj ‘jan llakisipjjamti’ sänwa (Mat. 6:25). Ukampejj ¿janipuniw akchʼas llakisipjjañamäkiti sañti munäna? Janiwa. Jehová Diosan yaqhep nayra servirinakapajj wali llakitaw uñjasipjjäna, ukampis Jehová Diosajj jupanakar munasiskakïnwa (1 Rey. 19:4; Sal. 6:3). * Jan llakisipjjamti sasinjja, Jesusajj problemanakasat jan sinti llakisiñatakiw chʼamañchaskistäna. Wal llakissna ukhajja, inas Diosarojj jan sum sirvjjsnati. Ukhamajja, wali llakita uñjasiñäni ukhajj ¿kunsa lursna? (“ Kunjamsa uk lursna” sat recuadro uñjjattʼäta).

6. Filipenses 4:6, 7 textorjamajja, ¿kunas jan sinti llakisiñatak yanaptʼistaspa?

⁶ 1) Orasiñasapuniwa. Problemanakasajj wal llakisiyistani ukhajja, Jehová Diosaruw oracionan yanaptʼa mayisiñasa, ukaw sumak jikjjatasiñatak yanaptʼistani (1 Ped. 5:7). Oracionasar istʼasajja, ‘Jehová Diosaw sumankañap churistani uka sumankañapasti jaqenakajj kuntï amuyki ukat sipansa jukʼampiwa’ (Filipenses 4:6, 7 liytʼañataki). Jehová Diosajj wali chʼamani espíritu santopampiw jan sint llakisiñatak yanaptʼistani (Gál. 5:22).

7. ¿Kunjamsa Jehová Diosar mayisiñasa?

⁷ Jehová Diosar oracionan mayiskasajja, kunas llakisiyistu, kunjamas jikjjatastan taqe ukanakwa yatiyañasa. Kuna jan walintï uñjasktan ukatï askichañjamäskchi ukhajja, kunjamsa uk askichsna, ukarjamas luraraksna ukatakiw Diosar yatiña ukat chʼama mayiñasa. Jan askichañjamäkchi ukhajja, jan ukat sinti llakisiñatakiw yanaptʼa mayisiñasaraki. Kunas llakisiyistu uk qhan mayisiñäni ukhajja, kunjamsa Jehová Diosajj mayisitasar istʼistu uk tiempompejj amuyañäniwa. Jan jankʼak istʼkistani ukhajja, orasiskakiñasawa. Diosajj jan qarjtasa qhan mayisiñaswa muni (Luc. 11:8-10).

8. ¿Oracionan llakinakas yatiykasajj kunsa lurañasaraki?

⁸ Jehová Diosar llakinakas oracionan yatiykasajja, jan walinakan uñjaskasas kuna sumanakas utjistu ukanakat lupʼisajj yuspärañasawa. Awisajja, kunjamas jikjjatastan uk yatiyañatakejj janiw arunakas utjkaniti. Ukampis ‘mirä amp suma yanaptʼita’ sasakis sañänejja, Jupajj istʼistaniwa (2 Crón. 18:31; Rom. 8:26).

9. ¿Cheqpachapuni jarkʼaqatäñatakejj kunsa lurañasa?

 ⁹ 2) Jiwasaruki confiyañat sipansa Jehová Diosaruw confiyañasa. Khä 700 antes de Cristo maranakanjja, Judá markajj asirionakan tʼunjatäña, esclavopäñ wal ajjsarasajja, Egipto markaruw yanaptʼa mayipjjäna (Is. 30:1, 2). Ukham lurasajj jan walinwa uñjasipjjäta sasaw Jehová Diosajj Judá markankirinakar säna (Is. 30:7, 12, 13). Kunjamsa cheqpachapun jarkʼaqasipjjaspa uk Isaías profetap toqew markapar säna. Isaiasajj akham sänwa: ‘Jumanakatejj paciencianïpjjäta, confiyapjjarakïta ukhajja, chʼamanïpjjätawa’ sasa (Is. 30:15b, TNM).

10. ¿Kunjamanakan uñjasisas Jehová Diosar confiyatas uñachtʼaysna?

¹⁰ Kunjamanakan uñjasisas Jehová Diosar confiyatas uñachtʼaysna uk uñjañäni. Akanakat amuytʼañäni: maya, wali suma pagat trabajo churañwa munapjjestaspa, ukampis uka trabajojj walja tiempwa apaqestaspa, Diosarus janiw sum sirvjjsnati. Paya, trabajonkir mä compañerosawa jan ukajj compañerasaw jiwasampïñ munaspa, ukampis janiw Testigökiti. Kimsa, inas wali munat familiasat maynejj akham sischistaspa: “Jumatï Diosar serviskakïtajja, janiw familiamäjjati” sasa. Ukhamanakan uñjasiñajj wali chʼamawa, ukampis Jehová Diosaw ukanakar atipjañatakejj yanaptʼistani (Mat. 6:33; 10:37; 1 Cor. 7:39). Ukhaman uñjasisajj ¿Jehová Diosar confiyañäniti, ewjjtʼanakaparus istʼarakiñäniti?

11. Diosar serviñan jarkʼata uñjaskasajja, ¿Bibliankir kawkïr ejemplonakatsa jan ajjsarayasiñatakejj yatjjatsna?

¹¹ 3) Diosan nayra servirinakapatwa yateqasiñasa. Biblianjja, jan ajjsarayasiñasa Jehová Diosar confiyañas qhawqha wakiskirisa uka toqet walja yateqaskay ejemplonakaw utji, jan suma ejemplonakas utjarakiwa. Suma ejemplonakat yatjjatkasajja, Diosar serviñan jarkʼata uñjaskasajj kunas jan ajjsarapjjañapatak jupanakar yanaptʼäna, ukwa amuytʼañasa. Sañäni, Judionakan jilïr autoridadanakapajj apostolonakar jan predicapjjañapatak jarkʼapjjäna ukhajja, jupanakajj jan ajjsartʼasaw akham sapjjäna: “Jaqenakar istʼañat sipansa Diosar istʼapjjañajawa” sasa (Hech. 5:29). Jawqʼjata uñjasipkäna uka qhepatsa, janiw ajjsarayasipkänti. ¿Kunatsa? Jehová Diosajj jupanakampïskatapa, jupanakar wal munasitapwa yatipjjäna, ukatwa Diosan arunakap yatiyasipkakïna (Hech. 5:40-42). Estebanar jiwayañataki katuntapkäna ukhajja, jupajj ukhamarakiw jan ajjsarayaskänti, ‘ajanupajj mä angelan ajanupäkaspas ukhamaw uñjasirakïna’ (Hech. 6:12-15). ¿Kunatsa? Jehová Diosajj jupar munasitapwa yatïna, ukatwa jan ajjsarayaskänti.

12. 1 Pedro 3:14 ukat 4:14 textonakarjamajja, ¿kunatsa arknaqat uñjasisajj kusisitäsna?

¹² Jehová Diosajj milagronak lurapjjañapatakiw apostolonakar chʼam churäna, ukatwa Diosajj jupanakampïskatapat jan pächasipkänti (Hech. 5:12-16; 6:8). Jehová Diosajj janiw jiwasarojj jichhürunakan milagronak lurañatak chʼam churkistuti, ukampis cheqapar sarnaqatas layku tʼaqesiyat uñjasiñäni ukhajja, kusisitäñäniwa ¿kunatsa? Jehová Diosajj munasiñampiw uñjistani espiritupsa churarakistaniwa, ukwa Biblia toqejj qhanañchistu (1 Pedro 3:14; 4:14 liytʼañataki). Ukhamajja, jutïrin arknaqata uñjaskañäni ukhajj kunsa lurañäni ukat llakisiskañat sipansa, Jehová Diosaw yanaptʼistani salvarakistani sasin jukʼamp confiyañatakejj kunsa lursna ukatakiw jichhajj chʼamachasiñasa. Nayrïr discipulonakjamaw Jesusan promesapar confiyañasa. Jesusajj akham sänwa: “Nayaw arunaksa yatiñsa churasipkäma, enemigonakamajj  taqeni mayachtʼasipkani ukhasa, janiw jupanakajj kun sañs puedepkätamti” sasa. “Aguantapjjatam laykojj jakañanakamsa salvasipjjätawa” sasaw sarakistu (Luc. 21:12-19). Maynejj Diosar jan jitheqtasa jiwañkam serviwayi ukhajja, jupajj kunjam jaqënsa uk Jehová Diosajj sumwa amtaski, ukatsti jaktayjjarakiniwa, uk amtañasapuniwa.

13. Khitinakatï ajjsarayasipkäna Jehová Diosarus jan confiyapkäna ukanakat yatjjatañajj ¿kunjamsa yanaptʼistaspa?

¹³ Khitinakatï ajjsarayasipkäna Jehová Diosarus jan confiyapkäna ukanakatsa yateqasiraksnawa. Uka sarnaqäwinakat Biblian yatjjatañajja, jan jupanakjam lurañatakiw yanaptʼistani. Judá markankir Asá reyit parltʼañäni, apnaqañ qalltkäna ukhajja, mä jachʼa ejercitompi nuwasiñatakejj Jehová Diosaruw confiyäna, ukham luratapat atipjänwa (2 Crón. 14:9-12). Ukampis qhepatjja, Israel markan Baasá reyipampi nuwasiñapäkäna ukhajj ¿kunas pasäna? Uka ejercitojj jukʼakikchïnsa, Jehová Diosar nayrjam confiyañat sipansa, sirionakaruw yanaptʼayasiñatak pagäna (2 Crón. 16:1-3). Wali usuntatäsin jiwirjamajjäna ukhasa, janiw Jehová Diosar yanaptʼa maykänti (2 Crón. 16:12).

14. ¿Kunsa Asá reyin pantjasitanakapat yateqsna?

¹⁴ Qalltanjja, Asá reyejj jan waltʼäwinakan uñjasisajj Jehová Diosaruw yanaptʼa mayisirïna. Ukampis qhepatjja, Diosar yanaptʼa mayisiñat sipansa amtaparjamakiw kuns lurjjäna. Amuyuparjamajja, Israel markampi nuwasiñatak sirionakar yanaptʼa mayiñajj waljamakïnwa. Ukampis ukham luratapajj mä jukʼa tiempokiw Judá markar yanaptʼäna. Jehová Diosajj mä profetap toqejj akham sänwa: “Siria markankiri reyin ejercitopajja jumarojj apanukjjtamwa, Tatitu Diosamaru jan iyawsatam layku, jan ukasti Siria markankir reyiru alkatasitam layku” sasa (2 Crón. 16:7). ¿Kunsa ukat yateqsna? Jiwasajj janiw Asá reyjam kuns amtasarjamak lurañasäkiti, Jehová Diosan Arupampiw yanaptʼayasiñasa. Awisajja, jankʼaki mä amtar puriñaw wakisini. Ukhamäkchinisa pacienciampi suytʼañäni Jehová Diosar confiyarakiñäni ukhajj suma amtaruw puriñäni.

15. ¿Biblia liykasajj kunsa lursna?

¹⁵ 4) Bibliankir textonak pʼeqesaruw yatsuñasa. Pacienciampi suytʼañasa Jehová Diosar confiyañas kunja wakiskirisa uk Biblia liykasin jikjjatañäni ukhajja, uka textonak pʼeqesar yatsuñatakiw chʼamachasiñasa. Ukatakejj inas jachʼat liytʼaña, jan ukajj qellqtʼasiña wakischispa, ukhamat repastʼañataki. Jehová Diosajja, Josué chacharojj Leyi libro liyiñapataki, kuntï liyki ukat uruy aruma lupʼiñapatakiw mayïna, ukhamat ukarjam sum phoqañapataki. Ukham lurañaw Josué chacharojj jan ajjsarañataki, Diosan markapar irpañatak yanaptʼäna (Jos. 1:8, 9). Jiwasajj ukhamarakiw Diosan Arupan chʼamañchtʼkir arunak jikjjatsna, ukaw jan walinakan uñjaskañäni ukhajj pacienciamp suytʼañataki, jan ajjsarañataki jan sint llakisiñatak yanaptʼistani (Sal. 27:1-3; Prov. 3:25, 26).

16. Jehová Diosajj jan sint llakisiñataki jupar confiyañatakejj ¿kunjamsa jilat kullakanakas toqe yanaptʼistu?

¹⁶ 5) Jilat kullakanakampiw chikachasiñasa. Jehová Diosajj jupanak toqew jan sint llakisiñataki, Jupar confiyañatak yanaptʼistu. Tantachäwinakanjja, plataformat yatichasinki ukasa, comentarionakasa jilata kullakanakamp parltʼasiñas wal yanaptʼistu (Heb. 10:24, 25). Congregacionankir mä munat amigosaru llakinakas yatiyañas wal chʼamañchtʼarakistaspa. Jupanakan chʼamañchtʼkir ‘suma arunakapajj’ jan sint llakisiñataki sumak jikjjatasiñatakiw yanaptʼistaspa (Prov. 12:25).

17. Hebreos 6:19 textorjamajja, ¿kunjamsa Diosan Reinop suytʼañajj jan waltʼäwinakan yanaptʼistaspa?

 ¹⁷ 6) Kuntï jutïrin katoqkañäni ukjjatwa lupʼiñasa. Diosan Reinop suytʼañajj “kunjamtï mä anclajj barcor katjjäskejja, ukhamarakiw jakäwisar katjjasi” mä arunjja, jan walinakan uñjasktan ukhajj jan sint llakisiñatakiw yanaptʼistu (Hebreos 6:19 liytʼañataki). Kunanakatï jichhajj llakisiykistu ukanakajj jutïrin janiw amtatäjjaniti sasaw Jehová Diosajj sistu, ukanakatwa lupʼiñasa (Is. 65:17). Niyas paraisonkjjsna ukhamwa amuytʼañasa, ukanjja suman jakasiñaw utjani, jan walinakas janiw utj-jjaniti (Miq. 4:4). Ukanakat jan armasiñatakejja, yaqhanakaruw uka suytʼäwisat parlañasaraki. Ukhamajj predicañataki, jaqenakar Jesusan discipulopar tukuyañatak chʼamachasipjjapuniñäni. Ukhamtï lurañänejja, ‘kuntï suyasipktan ukjja tukuykam jan pächasisaw suyasipkakiñäni’ (Heb. 6:11).

18. ¿Kunjamanakansa uñjasiñäni, kunas ukar saykatañatak yanaptʼistani?

¹⁸ Akapachan tukusiñapar jukʼamp jakʼachaskasajja, jukʼamp jan waltʼäwinakanwa uñjasiñäni, ukanakajj jukʼampiw llakisiyistaspa. Chʼamasar confiyañat sipansa Jehová Diosar confiyañaw uka jan waltʼäwinakan uñjaskasajj pacienciampi suytʼañataki, jan sint llakisiñatak yanaptʼistani, ukwa aka 2021 maratak apstʼat textojj amtayistu. Jichha marajja, Jehová Diosan aka promesapar confiyatas luratanakasampi taqenis uñachtʼayapjjañäni, Jupajj akham sistuwa: ‘Jumanakatejj paciencianïpjjäta, confiyapjjarakïta ukhajja, chʼamanïpjjätawa’ sasa (Is. 30:15, TNM).