1. ¿Kunsa mä waynajj 1935 maran mä discurso istʼasajj luräna?

MÄ WAYNAJJ 1926 maranwa 18 maranïkasa bautisasïna. Awk taykapajj Jehová Diosan Testigopänwa, uka tiemponjja, Bibliat Yatjjatirinaka sasin uñtʼatäpjjänwa. Jupanakajj kimsa yoqall wawaparusa pä imill wawaparus Diosar servipjjañapataki Jesusat yateqasipjjañapatakiw yatichapjjäna. Diosar jan jitheqtas serviri uka waynajja, kunjamtï Bibliat Yatjjatirinakajj uka tiempon lurapjjerïkäna, ukhamarakiw sapa mara Tatitun Cenapan tʼantʼsa manqʼerïna vinsa umirïna. Ukampis “Walja jaqenaka” sat jan armkañ mä discurso istʼasajja, janiw uk lurjjänti. Ukjja Joseph Rutherford sat jilataw Washington (Estados Unidos) markan mä jachʼa tantachäwin 1935 maran arstʼäna. ¿Kuna toqetsa ukan qhanañchasïna?

2. ¿Kuna wakiskir qhanañchäwsa Rutherford jilatajj discursopan arstʼäna?

² Apocalipsis 7:9 texton ‘walja jaqenakat’ parlki ukanakajj khitinakäpjjesa ukwa Rutherford jilatajj discursopan qhanañchäna. Uka walja jaqenakajj alajjpacharuw sarapjjani, ukampis Diosar jan taqe chuyma servipjjatapat janiw Jesusamp chika apnaqapkaniti sasaw Bibliat Yatjjatirinakajj amuyapjjäna. Rutherford jilatajja, walja jaqenaka sasin uñtʼatäpki ukanakajj janiw alajjpachar sarañatak ajllitäpkiti sasaw Bibliampi qhanañchäna.  Jupanakajj Criston yaqha ovejanakapäpjjewa, * wali tʼaqesiñ tiempjja jakkiriw pasapjjani, wiñayatakiw aka oraqen jakasipjjarakini sasaw qhanañcharakïna (Apoc. 7:14). Jesusajj akham sänwa: “Yaqha ovejanakaw nayan utjarakitu, janiw aka uyunkirïpkiti, ukhamarus uka ovejanakarojj anakiniñajarakiwa. Uka ovejanakasti arunakaj istʼapjjaniwa, mä sapa tamakïpjjaniwa, mä sapa awatirikiw utjarakini” sasa (Juan 10:16). Uka ovejanakajj Diosar jan jitheqtas servirinakäpjjewa, aka oraqen mä paraison jakañwa suyasipki (Mat. 25:31-33, 46). Uka machaq qhanañchäwejj kunjamsa walja jilat kullakanakaru 18 maranïkäna uka jilatarus jan nayrjam amuyjjapjjañapatak yanaptʼäna uk uñjañäni (Sal. 97:11; Prov. 4:18).

3, 4. ¿Kunsa 1935 maran apaskäna uka jachʼa tantachäwin jilat kullakanakajj amuyasipjjäna, ukat kunatsa?

³ Kuntï, Rutherford jilatajj uka jachʼa tantachäwin jisktʼkäna ukajj jan armkañapunïnwa, akham sasaw jisktʼäna: “¿Khitinakatï aka oraqen wiñay jakasiñ suyasipkta ukanakajj saytʼasipjjasmati?” sasa. Uk istʼasajj mä 20.000 ukhanit chikat jilaw saytʼasipjjäna sasaw ukankirinakat maynejj säna. Ukatsti, arstʼir jilatajj akham sänwa: “¡Jumanakaw uka ‘walja jaqenakäpjjtajja’!” sasa. Ukatsti wali kusisitaw amparanakap tʼajjllirapjjäna. Saytʼasipkäna ukanakajja, alajjpachan jakañatak jan ajllitäpjjatapa, espíritu santompis jan ajllitäpjjatapwa amuyasipjjäna. Qhepürusti, 840 ukhaniw bautisasipjjäna, jupanakat jilapartejj yaqha ovejanakäpjjänwa.

⁴ Ukhat uksarojj qalltan parlaniwayktan uka waynasa, walja waranqa jilat kullakanakasa, Tatitun Cenapan janiw tʼantʼsa manqʼjjapjjänti ni vinsa umjjapjjänti. Kunjamtï mä jilatajj jikjjataskänjja, ukhamarakiw waljanejj jikjjatasipjjäna, uka jilatajj humilde chuymampiw akham säna: “1935 maranwa Tatitun Cenapan qhep qhepa kuti tʼantʼsa manqʼawayta vinsa umawayarakta, Jehová Diosajj janiw alajjpachar sarañajataki espíritu santopampi ajllkitänti ukwa amuyasiyäta. Antisas aka oraqen jakañwa suyayäta, ukhamat aka oraqe paraisor tukuyañan yanaptʼañataki” sasa (Rom. 8:16, 17; 2 Cor. 1:21, 22). Ukhat aksarojja, walja jaqenaka sasin uñtʼatäpki ukanakajj jukʼampiw jiljjattawayi, ajllit cristianonakat aka oraqen jiltʼapki ukanakamp maynit maynikam yanaptʼasisaw trabajisipkaraki.

5. ¿Khitinakatï tʼantʼsa jan manqʼjjapjje ni vinsa umjjapjje ukanakarojj kunjamsa Jehová Diosajj uñji?

⁵ Khitinakatï 1935 marat aksarojj Tatitun Cenapan tʼantʼsa jan manqʼjjapjje ni vinsa umjjapjje ukanakarojj ¿kunjamsa Diosajj uñji? Mä Testigojj ajllitäkaspas ukham amuyasisaw tʼantʼsa manqʼaspa vinsa umaspa, ukampis qhepat jan ajllitätapwa amuyasispa, jupanakarojj ¿kunjamsa Diosajj uñjaraki? (1 Cor. 11:28). Yaqhepajj alajjpachar sarañatak ajllitätwa sasin pantjasisaw tʼantʼsa manqʼapjjäna vinsa umapjjäna. Ukampis jupanakatï arrepentisipjjani, janirak tʼantʼsa manqʼjjapjjani, ni vinsa umjjapjjani, Diosarus jan jitheqtas servisipkakini ukhajja, Diosajj yaqha ovejanakaparjamaw katoqjjarakini. Jupanakajj Jesusan jiwatapajj amtaski ukan janis tʼantʼsa manqʼjjapjjchi ni vinsa umjjapjjchejja, kuntï Jehová Diosampi Jesusampejj jupanak layku lurawayki ukat yuspärañatakejj sarasipkakiwa.

6. ¿Kun lurapjjañapsa Jesusajj angelanakar mayïna?

⁶ Apocalipsis capítulo 7 ukan ajllit cristianonakata yaqha ovejanakat uñtʼatäpki uka walja jaqenakatwa parli. Niyakejjay wali tʼaqesiñ tiempojj wali jakʼankjjchejja, uka capitulot jukʼamp yatjjatañajj wali chʼamañchtʼkirïniwa. Ukanjja, Jesusajj angelanakaruw tʼunjir pusi thayanaka katjjasisipkakiñapatak mayïna. Jupanakajj ajllitanakan sello katoqañapkama mä arunjja, Diosajj jan jitheqtasa servirinakapat katoqañapkamaw thayanak katjjasisipkakiñapäna (Apoc. 7:1-4). Ajllit cristianonakajj Diosar jan jitheqtasa servipjjatapatjja, alajjpachanwa Cristomp chika sacerdotenakjama reyinakjama apnaqapjjani (Apoc. 20:6). 144.000 ajllit cristianonakajj alajjpachankjjapjjani ukhajja, Jehová Diosasa Jesusasa angelanakas wal kusisipjjani.

7. Apocalipsis 7:9, 10 textorjamajja, ¿khitinakarus apóstol Juanajj uñjäna, ukat kunsa jupanakajj lurasipkäna? (Nayrïr paginankir dibujo uñjjattʼäta).

⁷ Juanajj 144.000 reyinakata sacerdotenakat parlañ tukuyasajja, Armagedón guerra jakkirpach pasir ‘walja jaqenakwa’ uñjaraki. Uka grupojj nayrïr grupot sipan jukʼamp waljanïpjjewa, qhawqhanipunïpjjes ukajj janiw yatiskiti (Apocalipsis 7:9, 10 liytʼañataki). ‘Jupanakajj kayukam purir janqʼo isinakampi isthapitäpjjewa’, ukajj Supayan apnaqat ‘aka qʼañu pachatsa jitheqtatäpjjatapa’ Diosarus Cristorus jan jitheqtas servipjjatapwa uñachtʼayi (Sant. 1:27). Jehová Diosasa Jesusas kuntï jiwasanak layku lurawayapki uka kawsaw salvatätanjja sasaw jachʼat arnaqasipjjaraki. Palmera ramanakas aptʼasitäpjjarakiwa. Ukampejja, Diosajj Jesusar Reyit uttʼayatapa, Jesusamp apnaqatäñ munapjjatapwa uñachtʼayapjje (Juan 12:12, 13 uñjjattʼarakïta).

8. ¿Kamsis Apocalipsis 7:11, 12 textojj Jehová Diosan alajjpachankir familiapatjja?

⁸ (Apocalipsis 7:11, 12 liytʼañataki). Walja jaqenaka sasin uñtʼatäpki uk uñjasajja, ¿kunjamakis alajjpachankirinakajj jikjjatasipjjäna? Jehová Diosar wali kusisita jachʼañchaskirwa Juanajj jupanakar uñjäna. Uka visión phoqasir uñjasajja, Diosampi alajjpachankir familiapampejj wal kusisipjjani, kunattejj walja jaqenaka sasin uñtʼatäpki ukanakajj jakkiriw wali tʼaqesiñ tiempo pasapjjani.

9. Apocalipsis 7:13-15 textorjamajja, ¿kunsa walja jaqenaka sasin uñtʼatäpki ukanakajj lurasipki?

⁹ (Apocalipsis 7:13-15 liytʼañataki). Walja jaqenaka sasin uñtʼatäpki ukanakajja, ‘kayukam purir isinakapwa tʼajjsusipjje, Corderon wilapampiw isinakap janqʼoptayapjje’ sasaw Juanajj säna. Ukajja, qʼoma conciencianïpjjatapa, Diosamp sumat uñjatäpjjatapwa uñachtʼayi (Is. 1:18). Jupanakajj Diosar jakäwip katuyasisaw bautisasipjje, Jesusan jiwataparus taqe chuymaw confiyapjje, Diosan amigopäpjjarakiwa (Juan 3:36; 1 Ped. 3:21). Ukatwa Diosan tronop nayraqatan ‘uruy aruma’ Jupar servipjje, mä arunjja aka oraqenwa servipjje. Jupanakatakejj Reinow nayranki ukatwa predicapjje Jesusan discipulopar tukuñapatakis jaqenakar yanaptʼapjje (Mat. 6:33; 24:14; 28:19, 20).

10. Walja jaqenaka sasin uñtʼatäpki ukanakajja, ¿kamsasas taqe chuyma confiyapjje, ukat Diosan kuna promesap phoqasirsa uñjapjjani?

¹⁰ Walja jaqenaka sasin uñtʼatäpki ukanakajja, wali tʼaqesiñ tiempo pasatatsa Diosajj cuidaskakistaniwa sasaw confiyapjje. ¿Kunatsa? “Tronon qontʼatäki uka Diosajja jupanakar jarkʼaqañatakiw mä carpa wakichani” siw Bibliajja. Ukatjja yaqha ovejanakajj aka promesa phoqasirwa uñjapjjarakini: “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa,  jachañasa ni usuyasiñasa jukʼamp utj-jjaniti”. Ukjja, walja tiempow suyapjjäna (Apoc. 21:3, 4).

11, 12. 1) Apocalipsis 7:16, 17 textorjamajja, ¿kuna bendicionanaksa walja jaqenaka sasin uñtʼatäpki ukanakajj katoqapjjani? 2) Jesusan jiwatapajj amtaski ukanjja, ¿kunsa yaqha ovejanakajj lurapjjaspa, ukat kunatsa uk lurapjje?

¹¹ (Apocalipsis 7:16, 17 liytʼañataki). Añchhitajj Diosan yaqhep servirinakapajja, qollqe jan utjipana jan waltʼäwinak utjipana guerra utjipanwa manqʼat pistʼat jakasipjje. Yaqhepajj Diosar servipjjatap laykuw carcelankapjje. Ukampis akapachan tukjäwip jakkirpach pasasajja, janiw manqʼat pistʼata jakasjjapjjaniti, Diosatsa walja yatichäwinakwa katoqapjjani, uk yatisaw walja jaqenaka sasin uñtʼatäpki ukanakajj wali kusisitäpjje. Diosajj Supayan apnaqat akapachar ‘nakhantir intir uñtata’ colerapampi tukjkani ukhajja, janiw jupanakarojj tukjkaniti, antisas jarkʼaqaniwa. Wali tʼaqesiñ tiempo jakkirpach pasirinakarojja, Jesusaw ‘jakañ churir umanakaru’ irpani, mä arunjja wiñay jakañ katoqapjjañapatakiw yanaptʼani. Ak amuytʼañäni: walja jaqenaka sasin uñtʼatäpki ukanakajj suma suytʼäwinïpjjewa, walja millón jaqenakajj jakawayapki ukanakatjja, jupanakakiw wiñay jan jiwasa jakapjjaspa (Juan 11:26).

¹² Yaqha ovejanakajja, ukham suytʼäwinïpjjatapat Jehová Diosarusa Jesusarus wal yuspärapjje. Jehová Diosajj janis jupanakarojj alajjpachan jakapjjañapatak ajllkchejja, ajllit cristianonakarjamaw wal munasi, valoranit uñjaraki. Uka paypacha gruponakaw Jehová Diosarusa Jesusarus jachʼañchapjjaspa. Mayjja, Jesusan jiwatap amtaski ukar sarasaw jachʼañchapjjaspa.

13, 14. ¿Kunatsa Jesusan jiwatap amtañatakejj taqenis sarañasa?

¹³ Aka qhepa maranakanjja, Jesusan jiwatap amtaski ukan 1.000 saririnakat niya maynikiw tʼantʼsa manqʼe vinsa umaraki. Mä arunjja, jilaparte congregacionanakan janiw maynis tʼantʼsa manqʼkiti ni vinsa umkiti. Ukhamajj uka tantachasirinakat jilapartejj aka oraqen jakasiñwa suyasipki. Ukampis ¿kunatsa ukar sarapjje? Casarasirin mä amigopajj munasiñ uñachtʼayañataki, apoyañatakiw casarasïwir sari. Ukhamarakiw yaqha ovejanakajj Jesusampiru ajllitanakampir  munasitap uñachtʼayañataki, apoyañatak sarapjje. Ukham lurasajj Jesusan jiwatapat yuspärapjjatapwa uñachtʼayapjje, Jesusan jiwatap laykuw aka oraqen wiñay jakasipjjani.

¹⁴ Jesusan mandatopar istʼasaw yaqha ovejanakajj Jesusan jiwatap amtañatakejj sarapjjaraki. Jesusajj jiwatap amtañataki cena uttʼaykäna ukhajja, jan jitheqtir apostolonakaparojj “akjja nayat amtasisin lurasipkakim” sasaw säna (1 Cor. 11:23-26). Ukhamajj aka oraqen ajllit cristianonakat yaqhepajj jakasipkakini ukhakamajja, yaqha ovejanakajj Tatitun Cenap amtasipkakiniwa. Jupanakajj taqe jaqenakaruw uka tantachäwir sarapjjañapatak aka oraqpachan invittʼapjje.

15. ¿Kunjamsa Jesusan jiwatap amtañataki tantachäwin Diosarus Cristorus jachʼañchsna?

¹⁵ Jesusan jiwatap amtkañäni ukhajja, Diosarusa Cristorus mayachtʼataw cantasa orasa jachʼañchsna. Aka maratak wakichat discurson pʼeqenchäwipajja, “Kuntï Jehová Diosasa Jesucristos jiwas layku lurawayapki ukar yuspäratas uñachtʼayapjjañäni” satawa. Uka discurso istʼasajja, jukʼampiw Diosarus Cristorus yuspärañäni. Tʼantʼampi vinompi pasayaskani ukhajja, tʼantʼajj Jesusan cuerpopampi sasitapa vinojj Jesusan wilapamp sasitapwa amtapjjañäni. Jehová Diosajj wiñay jakañ katoqañasatakiw munat yoqaparojj aka oraqen jiwañapatak khitanïna uksa amtarakiñäniwa (Mat. 20:28). Jehová Diosaru Jesusaru munasirinakajj taqeniw uka tantachäwirojj sarapjjani.

16. ¿Kunansa ajllit cristianonakampi yaqha ovejanakampejj igualakïpjje?

¹⁶ Ajllit cristianonakasa yaqha ovejanakasa Jehová Diosatakejj wali importantewa. Paypach gruporuw igualak munasi, Yoqapan vidapampis alawayaraki. Ukhamajj ¿kunansa mayjäpjje? Ajllitanakajja, alajjpacharuw sarapjjani, yaqha ovejanakasti aka oraqenwa wiñayataki jakasipjjani ukanakwa mayjäpjje. Ukampis paypach grupow Diosatsa Cristotsa jan jitheqtapjjañapäkiti (Sal. 31:23). Jehová Diosajj paypach gruporuw espíritu santopampi yanaptʼaspa, uk janiw armañasäkiti. Ajllitäpas janisa, wakiski ukarjamaw sapa maynir espíritu santopampi yanaptʼarakispa.

17. ¿Kunsa ajllit cristianonakajj suyasipki?

¹⁷ Ajllit cristianonakajj janiw alajjpachar sarañataki suytʼäwini nasipkiti, jan ukasti Diosaw uka suytʼäwi chuymanakapar uchi. Jupanakajj alajjpachar sarañataki suytʼäwipatwa wal lupʼipjje, orasipjjaraki. Uka premio katoqañsa wal suyasipkaraki. Espíritu cuerpopajj kunjamänisa uk janis yatipkchejja, Jehová Diosampi Jesusampi angelanakampi mayni ajllitanakampi alajjpachan tantachasiñwa  suyasipki, ukhamat Diosan Reinopan apnaqañataki (Filip. 3:20, 21; 1 Juan 3:2).

18. ¿Kunsa yaqha ovejanakajj wali kusisita suyasipki?

¹⁸ Yaqha ovejanakan suytʼäwipajj aka oraqen wiñay jakasiñawa, ukajj chuymapatwa mistu (Ecl. 3:11). Jupanakajj aka oraqejj mä suma paraisor tukuyaskani ukan yanaptʼañwa wal suyasipki, ukanjja jupanak pachpaw utapsa, huertopsa yaqha ukhamanaksa lurasipjjani, jan usuntasaw familianakapampi jakasipjjarakini (Is. 65:21-23). Aka oraqpachan kunayman lugaranakar viajiñwa munapjje, ukhamat Jehová Diosan musparkañ luratanakap sum uñtʼañataki, sañäni qollunaka jachʼa lamar qotanaka ukat yaqha ukhamanak uñtʼañataki. Ukampis sapürutjamaw Jehová Diosampejj jukʼamp sum apasipjjani, ukaw jupanakar jukʼamp kusisiyi.

19. ¿Jesusan jiwatap amtañajj kun lurañatakis taqenir yanaptʼistani, ukat aka marajj kunürus amtaskañäni?

¹⁹ Jehová Diosajj sapa mayni servirinakaparuw mä suma suytʼäwi churi (Jer. 29:11). Jesusan jiwatap amtañatak tantachäwejja, kuntï Jehová Diosasa Jesusas wiñay jakañasatak lurawayapki ukat jachʼañchañatakejj taqenitakiw wali wakiskiri. Uka tantachäwiw cristianonakatakejj taqe tantachäwinakat sipan jukʼamp wakiskirejja. Aka marajja, sábado 27 de marzo uruw Jesusan jiwatapajj inti jalantaru amtasiskani. Uka wakiskir tantachäwir sarañajja, waljanitakejj janiw chʼamäkaniti, ukampis yaqhepajj jarkʼat uñjaskasa carcelan jistʼantatäkasaw amtapjjani. Oraqpachankir taqe congregacionanaka, gruponaka, visittʼir jutapkani ukanakaw Jesusan jiwatap wali kusisita amtapjjani, ukjja Jehová Diosampi, Jesusampi, angelanakampi, alajjpachankjjapjje uka ajllitanakampiw uñjasipkani.