JERUSALÉN markankir Museo de las Tierras de la Biblia ukanjja, 700 ukat 600 antes de Cristo maranakan qellqata mä qalaw utji. Uka qaljja, jiwatanak imapjjerïkäna uka qarqa pʼiyanwa jikjjatapjjäna, Hebrón (Israel) marka jakʼana. Uka qalan qellqatajj akham siwa: “Hagav jaqen Hagaf yoqapajj Yahweh Sabaot ukampi maldisitäpan” sasa. Uka qellqatajj kuntï Bibliajj siski ukajj cheqätapwa uñachtʼayi. Ukanjja, Diosan Jehová jan ukajj Yahweh sutipaw nayra hebreo arun uñsti, YHWH letranakamp qellqata. Ukhamajja, Diosan Jehová sutipajj nayra tiempon wali uñtʼatänwa, jaqenakas sapüruw uka suti aytapjjarakirïna. Janiw ukakïkiti, jiwatanak imañ yaqha qarqa pʼiyanakanjja, ukhamarakiw yaqha ukham qellqtʼatanakajj jikjjatasiwayi. Uka pʼiyan imantasirinaka, tantachasirinakaw perqanakar Diosan sutip qellqapjjerïna, sutinakapamp chikaw Diosan sutip qellqapjjarakirïna.

Universidad de Georgia ukan arunak toqet yatjjatiri Rachel Nabulsi doctorajj uka qellqtʼatanak toqet akham siwa: “YHWH sutejj walja kuti qellqat uñstatapajj wali wakiskiriwa [...]. Israel markankirinakatakisa Judá markankirinakatakis YHWH sutejj wali importantënwa, ukwa [Biblian] textonakapasa qarqa pʼiyan qellqtʼat jikjjataskäna ukas uñachtʼayistu” sasa. Doctoran uka arunakapajja kuntï Bibliajj siski ukarjamawa, Biblianjja Diosan sutipajj hebreo arun YHWH letranakampi qellqatajj walja kutiw uñsti. Walja jaqenakan sutinakapanwa Diosan sutipajj uñstarakirïna.

Jikjjataskäna uka qalan Yahweh Sabaot qellqat arunakajja, “Ejercitonakan Jehová Diosapa” sañwa muni. Amuyatajja, Bibliajj qellqaskäna uka tiempon jakir jaqenakajj sapa kutiw Diosan sutipsa, “Ejercitonakan Jehová Diosapa” siski uka arunaksa apnaqapjjerïpachäna. Biblianjja 250 jila kutiw “Ejercitonakan Jehová Diosapa” siski uka arunakajj Antiguo Testamenton uñsti, jilapartejj Isaías, Jeremías, Zacarías uka libronakanwa uñsti.