1. ¿Santiagon familiapajj kunjamänsa?

 JESUSAN Santiago jilapajja, Jehová Diosar jan jitheqtas serviri familianwa jilsüna. * José ukhamarak María awk taykapajj Jehová Diosar wal munasipjjäna, sum serviñatakiw chʼamachasipjjarakïna. Santiagojj janiw uka bendicionak katoqkänti, jilïr jilapajja jutañapäkäna uka Mesiasäñaparakïnwa. Ukham familia taypinkañajj Santiagotakejj mä suma privilegiönwa.

2. ¿Santiagojj jilïr jilapar respetomp uñjañatakejj kuna razonanakanïnsa?

² Santiagojj jilïr jilapar respetompi uñjañatakejj walja razonanakanïnwa (Mat. 13:55). Jesusajj 12 maranïkäna ukhajja, Qellqatanak wali sum uñtʼjjäna, ukatwa Jerusalén markankir yatichirinakajj wal musparapjjäna (Luc. 2:46, 47). Inas Santiagojj Jesusampi carpinterot trabajirakchïna. Ukhamächïna ukhajja, Jesús jilaparojj sum uñtʼpachäna. Nathan Knorr jilatajj akham sirïnwa: “Maynimp trabajisajja, waljanakwa jupat yateqtanjja” sasa. * Santiagojj inas Jesusat ak amuyarakchïna: “Jesusasti jiltaskakïnwa, yatiñapas ukhamarakiw jiljjattaskäna, Diosampis jaqenakampis wali munatarakïnwa” (Luc. 2:52). Ukhamïpanjja, Santiagojj Jesusan nayrïr discipulonakap taypinkañapänwa sasaw amuysna. Ukampis janiw ukhamäkänti.

3. Jesusajj aka oraqen predickäna ukhajja, ¿kunsa Santiagojj luräna?

 ³ Jesusajj aka oraqen predickäna ukhajja, Santiagojj janiw discipulopäkänti (Juan 7:3-5). Jesusan familiaranakapajj “jupajj loqheratawa” sapkäna ukanakat inas Santiagojj maynïrïchïna (Mar. 3:21). Jesusajj tʼaqesiñ lawar chʼakkatata jiwayatäkäna ukhajja, Santiagojj María mamapamp chikäskänwa sasajj janiw kunas qhanañchkiti (Juan 19:25-27).

4. ¿Kuna pä toqenakatsa aka yatichäwin yatjjataskañäni?

⁴ Qhepatjja, Santiagojj Jesusar confiyjjänwa, congregacionansa wali respetat ancianöjjarakïnwa. Aka yatichäwinjja, kunanaksa Santiagot yateqsna uk pä toqet uñjaskañäni. Maya, ¿kunatsa humildëñasa? Paya, ¿kunjamsa suma yatichirïsna?

5. Jesusajj jaktanisin Santiagor uñstkäna ukhajja, ¿kunsa Santiagojj luräna?

⁵ ¿Kunapachas Santiagojj Jesusan jan jitheqtiri discipulopäjjäna? Jesusajj jaktanjjäna uka qhepatjja, “Santiagoruw uñstäna, ukatjja taqe apostolonakaruw uñstarakïna” (1 Cor. 15:7). Jesusajj jilapar uñstäna uka qhepatwa Santiagojj discipulopäjjäna. Jesusan apostolonakapajj Jerusalenan mä altus utankasipkäna ukhajja, Santiagojj jupanakamp chikaw espíritu santo katoqañ suyaskäna (Hech. 1:13, 14). Qhepatjja, Santiagojj nayrïr patak maranakan utjkäna uka cuerpo gobernante taypinwa servïna (Hech. 15:6, 13-22; Gál. 2:9). Janïra 62 maräkäna ukhajja, Diosan amuytʼayatäsajj ajllit cristianonakaruw mä carta qellqäna. Uka cartajja, alajjpachar sarañataki suytʼäwinïkstansa, jan ukajj aka oraqen jakañatak suytʼäwinïkstansa taqeniruw yanaptʼistu (Sant. 1:1). Historia toqet yatjjatata Josefo sat chachan aruparjamajja, Ananías jachʼa jilïr sacerdotew Santiagor jiwayañapatak mayïna, jupajj Anás chachan yoqapänwa, judiorakïnwa. Santiagojj aka oraqen jakäwip tukuyañkamaw Jehová Diosar jan jitheqtas servïna.

6. ¿Santiagompi religión pʼeqtʼirinakampejj kunansa jan igualäpkäna?

⁶ Santiagojj humilde chuymanïnwa. Kunsa tiempompejj Santiagojj luräna, kunsa religión pʼeqtʼirinakajj lurapjjarakïna uk amuytʼañäni. Jesusajj Diosan Yoqapätap qhan yatjjäna ukhajja, Santiagojj humilde chuymampiw ukar iyawsäna. Ukampis Jerusalenan jilïr sacerdotenakapajj janiw jupjam iyawsapkänti. Jupanakajja, Jesusan Lazaror jaktayatap sum yatisipkäna. Ukampis Jesusarojj janiw  Jehová Diosan khitanitaparjam katoqapkänti. Ukatwa juparusa, Lazarorus jiwayañ munapjjäna (Juan 11:53; 12:9-11). Qhepatjja, Jesusan jaktanitap jan khitis yatiñapatakiw chʼamachasipjjäna (Mat. 28:11-15). Jachʼa jachʼa tukurïpjjatapatjja, religión pʼeqtʼirinakajj janiw Jesusarojj Mesiasarjam katoqapkänti.

7. ¿Kunatsa jan jachʼa jachʼa tukurïñasäki?

⁷ Kunsa yateqsna: Janiw jachʼa jachʼa tukuñasäkiti, Jehová Diosampiw yatichayasiñasa. Kunjamtï mä usojj maynin lloqopar jan waltʼaykaspajja, ukhamarakiw jachʼa jachʼa tukuñajj chuymasar qalarayasin Jehová Diosar istʼañat jarkʼistaspa. Fariseonakajj ukhamarakiw chuymap qalarayasipjjäna, ukatwa Jesusajj Diosan Yoqapätapsa, espíritu santon yanaptʼatätapsa jan creyiñ munapkänti (Juan 12:37-40). Jachʼa jachʼa tukurïpjjatapajj janipuniw walïkänti, ukhamatwa wiñay jakañsa aptʼasipjjäna (Mat. 23:13, 33). Suma jaqëñatakisa, amuyunakas cambiañatakisa, suma amtanakar puriñatakisa, Diosan Arupampi, espíritu santopampi yanaptʼayasiskakiñajj wali importantewa (Sant. 3:17). Humilde chuymanïtap laykuw Santiagojj Jehová Diosamp yatichayasïna. Kunjamtï jichhajj uñjkañänejja, humilde chuymanïtapaw suma yatichirïñatak yanaptʼäna.

8. ¿Kunas suma yatichirïñatak yanaptʼistani?

⁸ Santiagojj janiw jachʼa yateqañ utanakar sarkänti. Uka tiemponkir religión pʼeqtʼirinakajja, Santiagorojj Pedrompiru Juanampirjamaw uñjapjjäna, jupanakajj ‘jan yatjjatata, aleq jaqenakat’ uñjatäpjjänwa (Hech. 4:13). Ukampis Santiagojj suma yatichirïnwa, ukwa sutipanïki uka libro liytʼasajj amuytanjja. Jiwasajj inas jupjamajj jachʼa yateqañ utanakar jan sarkarakstanti. Ukhamäkchisa, Jehová Diosan espiritupan yanaptʼapampi, Diosan markapan yanaptʼapampejj suma yatichirirakïsnawa. ¿Kunsa Santiagojj yatichirjamajj luräna, kunsa jupat yateqaraksna? Uk jichhajj uñjañäni.

9. ¿Kunjamsa Santiagojj yatichirïna?

⁹ Yatichkasajja Santiagojj janiw jan amuykañ arunakamp parlirïkänti, ni jan amuykañsa qhanañchirïkänti. Ukhamïpansti, jaqenakajj kunsa lurapjjañapäna, kunjamsa lurapjjañapäna  uk sum yatipjjäna. Kunjamsa Santiagojj fácil amuykañ yatichäna uk uñjañäni. Cristianonakajja, tʼaqesiyata uñjaskasas jan chuyma ustʼata sarnaqañatakejj dispuestokïñasawa. Uka toqet akham sasaw qellqäna: “Aguantirinakarojj ‘kusisitäpjjewa’ sasaw sistanjja. Kunjamsa Job chachajj aguantäna ukjja jumanakajj istʼapjjtawa, kunjamsa Jehová Diosajj bendisïna uksa yatipjjaraktawa, Jehová Diosajj wali munasir chuymaniwa, wali khuyaptʼayasirirakiwa” sasa (Sant. 5:11). Kunjamtï uñjktanjja, Santiagojj Diosan Arupampiw yatichirïna. Jehová Diosajj Job chachjam jan jitheqtas servirinakaparojj bendisipuniwa, ukjja Santiagojj Diosan Arupampiw jaqenakar amuytʼayäna. Uk yatichañatakejja, fácil amuykañ arunakampiw amuytʼayäna, sum qhanañcharakïna. Ukham lurasasti, jupak jachʼañchasiñat sipansa, Jehová Diosaruw jachʼañchäna.

10. ¿Santiagot yateqasisajj kunjamsa yatichsna?

¹⁰ Kunsa yateqsna: Fácil amuykaña ukat Diosan Arupampiw yatichañasa. Janiw qhawqsa yattan uk jaqenakar uñachtʼayañ amtampi yatichañasäkiti, jan ukasti qhawqsa Jehová Diosajj yati, jupanakat llakisiraki uk uñachtʼayañ amtampiw yatichañasa (Rom. 11:33). Bibliarjampun yatichasaw uka amtarjam lurtanjja. Sañäni, kunsa jiwasajj jupäsna ukhajj lursna uk yateqerinakasar sañat sipansa, Biblian utjki uka sarnaqäwinakampiw amuytʼasipjjañapatak jupanakar yanaptʼañasa. Kunjamsa Jehová Diosajj amuyi, kunjamas chuymapan jikjjatasi uk amuyapjjañapatakiw yanaptʼañasaraki. Ukham lurañäni ukhajja, jiwasar kusisiyañat sipansa, Jehová Diosar kusisiyañatakiw kuntï yateqapki ukarjam lurapjjani.

11. Santiagojj jakkäna uka tiemponjja, ¿kuna jan walinakansa yaqhep cristianonakajj uñjasipjjäna, kunjamsa jupanakar ewjjtʼäna? (Santiago 5:13-15).

¹¹ Mayninakajj kunjamäsipkänsa uk sumwa Santiagojj amuyäna. Jupajja kuna jan walinakansa jilat kullakanakajj uñjasipjjäna uk sumwa amuyäna. Kunsa lurapjjañapa uka toqetsa qhan ewjjtʼarakïna, ukaw cartapan qhan amuyasi. Yaqhep cristianonakajj janiw ewjjtʼanakaparjam jankʼak lurapkänti (Sant. 1:22). Yaqhepanakasti qollqeninakarukiw sum uñjapjjäna (Sant. 2:1-3). Yaqhepanakasti jan amuytʼasisakiw kuns parlapjjarakïna (Sant. 3:8-10). Uka cristianonakajj ukham jan walinakansa uñjasipkchïnjja, jupanakajj cambiapjjaspawa sasaw Santiagojj amuyäna. Munasiñampi, qhana arunakampiw jupanakar ewjjtʼäna. Diosar serviñan aynachtʼatäpkäna ukanakarojj ancianonakan yanaptʼap thaqapjjañapatakiw chʼamañchtʼarakïna (Santiago 5:13-15 liytʼäta).

12. Bibliat yateqerinakasar yanaptʼkasajja, ¿kunatsa cambianiwa sasin amuyañasa?

¹² Kunsa yateqsna: Mayninakajj kunjamäsipkisa uk sumwa amuyañasa, cambiapjjaniwa sasaw amuyañasaraki. Walja yateqerinakatakejja, Biblian ewjjtʼanakaparjam lurañajj janiw faciläkiti (Sant. 4:1-4). Nayra jakäwinakap jaytjjasin cristianjam jakjjapjjañapatakejj tiempow munasispa. Santiagot yateqasisajja, kunansa Bibliat yateqerisajj cambiañapa uk jan ajjsarasaw jupar sañasa. Janiw cambykaspati sasajj janiw amuyañasäkiti, Jehová Diosaw humilde chuymaninakarojj jupan ukar irpanini, cambiañatakis chʼam churani sasaw confiyañasa (Sant. 4:10).

13. Santiago 3:2 textorjamajja, ¿Santiagojj kamsänsa?

¹³ Jupas mayninakat jilankkaspa ukham janiw Santiagojj amuyaskänti. Santiagojj janiw Jesusan jilapätap laykusa, Diosar serviñan suma privilegionak katoqatap laykus mayninakat jilankkaspas ukham tukkänti. Antisas jupanakarojj “munat jilanakaja” sasaw säna (Sant. 1:16, 19; 2:5). Janipunis pantjasirïkaspa ukham janiw tukkarakïnti. Antisas  “taqeniw walja kuti pantjastanjja” sasaw jupamppachat säna (Santiago 3:2 liytʼäta).

14. ¿Kunatsa pantjasirïtas qhan sañasa?

¹⁴ Kunsa yateqsna: Taqeniw pantjasirïtanjja, ukwa amtañasa. Khitinakarutï Bibliat yatichktan ukanakat jilankksnas ukham janiw amuyañasäkiti. ¿Kunatsa? Jiwasatï janipunis pantjasirïksna ukham yateqerisar amuyayañäni ukhajja, janipuniw kuntï Diosajj maykitu uk phoqañ puedkäti sasaw amuyaspa. Ukampis Biblian wiñay yatichäwinakaparjam sarnaqañajj jiwasatakis awisajj chʼamakïtap qhan sañäni, kunjamsa Jehová Diosajj cambiañatak yanaptʼistu uks cuenttʼarakiñäni ukhajja, jupas Jehová Diosar serviñ pueditap amuyañapatakiw yanaptʼañäni.

15. ¿Kunjam uñachtʼäwinakampis Santiagojj yatichirïna? (Santiago 3:2-6, 10-12).

¹⁵ Santiagojj chuymar purtʼkir uñachtʼäwinakampiw yatichäna. Ukham yatichañatakejj espíritu santow yanaptʼäna. Janiw ukakïkiti, Jesús jilïr jilapajj kuna uñachtʼäwinakampis yatichirïna ukanakat yatjjatasaw kunjamsa yatichaspa uk yateqarakpachäna. Santiagojj cartapan qellqkäna uka uñachtʼäwinakajja, fácil amuykayawa, kunsa uka uñachtʼäwinakat yateqassna ukas qhanarakiwa (Santiago 3:2-6, 10-12 liytʼäta).

16. ¿Kunatsa chuymar purtʼkir uñachtʼäwinakamp yatichañasa?

¹⁶ Kunsa yateqsna: Chuymar purtʼkir uñachtʼäwinakampiw yatichañasa. Wakiskir uñachtʼäwinakampi yatichtan ukhajja, kuntï yatichktan uk amuytʼapjjañapatakiw jaqenakar yanaptʼtanjja. Uka uñachtʼäwinakat amuytʼañajj Biblian wakiskir yatichäwinakap jan armasipjjañapatakiw yanaptʼani. Jesusajj uñachtʼäwinakampejj wali sum yatichañwa yatïna, Santiago jilapajj jupatwa yateqasïna. Santiagon uñachtʼäwinakapat maya yatjjatañäni, kunatsa ukajj chuymar purtʼkiri uk uñjarakiñäni.

17. Santiago 1:22-25 texton qellqatäki uka uñachtʼäwejja, ¿kunatsa wali yanaptʼkiri?

¹⁷ (Santiago 1:22-25 liytʼäta). Espejot parlir uñachtʼäwimpi Santiagojj yatichkäna ukajj wali yanaptʼkiriwa, ¿kunatsa ukham sistan? Kunsa ukampejj yatichañ munäna ukajj qhanaw amuyasi. Diosan Arupajj jiwasar yanaptʼañapatakejja, janiw liyiñasakïkiti, jan ukasti ukarjamaw lurañasaraki. Santiagojj parlkäna uka uñachtʼäwejja, jaqenakatakejj fácil amuykañänwa. Jupajj espejot uñkatasir mä jaqetwa  parläna. ¿Kunsa uka uñachtʼäwimpejj yatichañ munäna? Maynitï espejot uñkatasini, kuntï askichtʼasiñapäki uk uñjasajj jan kuns lurkani ukhajja, inamayakiwa. Jiwasatï Biblia liyisajj kunansa cambiañasa uk amuyasiñäni, cambiañatak jan chʼamachaskarakiñäni ukhajja, ukhamarakiw Biblia liyiñajj inamayakïni.

18. ¿Kunanaksa uñachtʼäwinakamp yatichkasajj lurañasa?

¹⁸ Mä uñachtʼäwimpi yatichkasajja, Santiagot yateqasiñatakejj akanakwa lursna: maya, uñachtʼäwejj kuna toqettï yatichasktan ukarjamäñapawa. Paya, parlkañäni uka uñachtʼäwejj jaqenakatak fácil amuykayäñapawa. Kimsa, kunsa ukampejj yatichañ muntan ukajj qhana amuykayäñaparakiwa. Wakiskir uñachtʼäwinak pienstʼañajj jiwasatak chʼamächi ukhajja, Índice de las publicaciones Watch Tower siski uka qellqatwa uñjjattʼsna. “Ejemplos” siski uka pʼeqeñchäwinjja, walja uñachtʼäwinakwa yatichañatak jikjjatañäni. Ukampis uñachtʼäwinakajja, mä microfonomp sasiwa, kuntï yatichañ munktan ukajj qhanäñapatakiw yanaptʼi. Ukhamajja, kuna wakiskir puntonaktï yatichañ munktan ukhaw uñachtʼäwinakamp yatichañasa. Janiw wali suma yatichirit uñjayasiñ laykukejj suma yatichirïñ munktanti. Jan ukasti, Jehová Diosan kusisit familiap taypir mantapjjañapatakiw walja jaqenakar yanaptʼañ muntanjja, ukatwa suma yatichirïñ muntanjja.

19. ¿Kunjamsa jilat kullakanakar munasitas uñachtʼaysna?

¹⁹ Santiagojj mä perfecto jilïr jilapampiw jilsüna, jiwasajj janiw ukham jilsktanti. Ukampis mä jachʼa familianwa jilat kullakanakamp chika Jehová Diosar sirvtanjja. Ukajj wali kusiskañawa, jupanakampïñatak tiempo apstʼasisa, jupanakat yateqasisa, jupanakamp chika predicasa, yatichasaw jilat kullakanakar munasitas uñachtʼaysna. Jiwasatï Santiagot yateqasisajj suma jaqëñatak chʼamachasiñäni, luratasansa, yatichatasansa jupat yateqasiñatak chʼamachasirakiñäni ukhajja, Jehová Diosaruw jachʼañchañäni, suma chuyman jaqenakarus alajjpachankir munasir Awkisar jakʼachasipjjañapatakiw yanaptʼarakiñäni.