1, 2. 1) ¿Kunapachas wali munat amigosana jan ukajj mä familiarasan jiwatapat jukʼamp amtastanjja? 2) ¿Kunsa Jesusajj janïr jiwayapkäna uka arumajj uttʼayäna?

 WALI munat amigosasa jan ukajj mä familiarasas jiwi ukhajja, walja tiempos paskchejj jupat amtasipuntanwa. Jukʼampis kunürutï jiwki uka uruw sapa mara amtastanjja.

² Sapa mararakiw walja millón jaqenakajj khitirutï wal munasktan ukan jiwatap amtañatak aka oraqpachan tantachastanjja: jupajj Jesucristowa (1 Ped. 1:8). Jupaw juchampit jiwañampit jiwasar salvañatak vidap churawayi, uk amtañatakiw tantachastanjja (Mat. 20:28). Discipulonakapajj jiwatap amtapjjaspa ukwa Jesusajj munäna. Janïr jiwayapkäna uka arumajja, Jesusajj mä wakiskir cena uttʼayäna, ukatsti akham sasaw mä mandato churäna: “Akjja nayat amtasisin lurasipkakim” sasa (Luc. 22:19).

3. ¿Kunanakatsa aka yatichäwin yatjjataskañäni?

³ Walja millón jaqenakaw Criston jiwatap amtañatak tantachtʼasipjje, jupanakat jila partejj aka oraqen jakañatak suytʼäwinïpjjewa, jukʼanikiw alajjpachar sarañatak suytʼäwinïpjje. Aka yatichäwinjja, kuna razonanakatsa uka pä gruponakajj Jesusan jiwatap amtañatak tantachäwir sarañ sapa mara munapjje ukanakatwa yatjjataskañäni, kunjamsa ukankañajj yanaptʼistu ukwa yatjjataskarakiñäni. Kunatsa ajllit cristianonakajj uka tantachäwinkapjje ukanakat mä qhawqha uñjas qalltañäni.

4. ¿Kunatsa ajllit cristianonakajj Jesusan jiwatap amtañatak tantachäwin tʼantʼatsa manqʼapjje vinotsa umtʼapjjaraki?

⁴ ¿Kuna razonanakatsa ajllit Cristianonakajj Jesusan jiwatap amtañatak tantachäwir sapa mara sarañ munapjje? Maya: tʼantʼat manqʼañataki vinot umtʼañataki. ¿Kunatsa uk lurapjje? Uk yatiñatakejja, kunsa Jesusajj aka oraqenkkäna uka qhep qhepa arumajj luräna uk amtañäni. Pascua amtasajja, Tatitun Cenapa sasin uñtʼatäki ukwa Jesusajj uttʼayäna. Jupat jan jitheqtiri 11 apostolonakapar tʼantʼampi vinompi pasayasajja, manqʼapjjam umtʼapjjam sasaw säna. Jupanakarojj aka pä pactonakat jan ukajj pä acuerdonakatwa parläna: machaq pactompita, Reinotak pactompita (Luc. 22:19, 20, 28-30). * Uka pactonak utjatapatwa uka apostolonakasa, mä qhawqha cristianonakas alajjpachan reyïpjjaspa sacerdotëpjjarakispa (Apoc. 5:10; 14:1). Uka pä pactonakajja, aka oraqen jiltʼapki uka ajllit cristianonakamppachatakiwa, ukatwa Jesusan jiwatap amtañatak tantachäwin jupanakajj tʼantʼatsa manqʼapjje vinotsa umtʼapjje.

5. ¿Kunsa ajllit cristianonakajj suytʼäwip toqet yatipjje?

⁵ Paya: ajllit cristianonakajja, uka tantachäwin alajjpachar sarañatak suytʼäwinïpki ukatwa lupʼipjjaraki. Jehová Diosajj mä musparkañ suytʼäwi jupanakar churi: jupanakajj wiñayatakiw jan tukuskir cuerponi alajjpachan jakapjjani, Jesucristompi 144.000 taypinkir mayni ajllitanakamp chikaw servipjjani, janiw ukakïkiti, Jehová Diosarus uñjapjjarakiniwa (1 Cor. 15:51-53; 1 Juan 3:2). Ajllit cristianonakajj ukham suma bendicionanak katoqañatak jawsatäpjjatap yatipjjewa. Ukampis alajjpachan katoqatäñatakejj jiwañkamaw jan jitheqtas servipjjañapa (2 Tim. 4:7, 8). Alajjpachar sarañ suytʼäwipat amuykiptʼasajj walpun kusisipjje (Tito 2:13). ¿‘Yaqha ovejanakat’ kamsasirakispasa? (Juan 10:16). ¿Kuna razonanakatsa Jesusan jiwatap amtañatak tantachäwir sarapjje? Ukanakat mä qhawqha uñjañäni.

6. ¿Kunatsa yaqha ovejanakajj Jesusan jiwatap amtañatak tantachäwir sapa mara sarapjje?

⁶ ¿Kuna razonanakatsa yaqha ovejanakajj Jesusan jiwatap amtañatak tantachäwir sarañ munapjje? Maya: jupanakajj uñjiriw sarapjje, janiw tʼantʼatsa manqʼapkiti ni vinotsa umtʼapkiti. Aka oraqen jakañatak suytʼäwinïpki ukanakarojja, Jesusan jiwatap amtañatak tantachäwirojj 1938 maranwa nayrïr kuti invitasïna. Abril de 1938 maran misturi, La Torre del Vigía sat revistanjja, yaqha ovejanakan uka tantachäwir sarapjjañapajj “wali wakiskiriwa”, “kunas ukan lurasi uksa uñjapjjañaparakiwa” sasaw säna. Ukatsti akham sarakïnwa: “Jupanakatakejj kusiskañ horasarakiwa, ukajj walikïskiwa” sasa. Kunjamtï mä casarasïwir invitatäsajj kunjamsa casarasipjje uk uñjasajj kusistanjja, ukhamarakiw yaqha ovejanakajj Jesusan jiwatap amtañatak tantachäwir sarasin kunjamsa uk amtapjje uk uñjasajj kusisipjje.

7. ¿Kunatsa yaqha ovejanakajj Jesusan jiwatap amtañatak tantachäwin arstʼaski uka discurso istʼañ munapjje?

⁷ Paya: yaqha ovejanakajja suytʼäwipatwa lupʼipjjaraki. Jupanakajj kunas uka tantachäwin arstʼasini uk istʼañwa munapjje. Uka tantachäwinjja, jilapartejj Cristompita, 144.000 ajllit cristianonakampitwa arstʼasi, kunsa Waranqa Maranak apnaqasajj jan jitheqtas serviri cristianonak laykojj lurapjjani ukaw  arstʼasi. Alajjpachan apnaqerinakajja, Jesucristo Reyin pʼeqtʼatäsajj mä Paraisoruw aka oraq tukuyapjjani, istʼasirinakajj jukʼat jukʼatwa perfectöjjapjjarakini. Jesusan jiwatap amtañatak tantachäwinkir walja millón jaqenakajja, kunjamsa jutïrin profecianakajj phoqasini uk amuytʼasajj wal kusisipjje. Yaqhep profecianakajja, Isaías 35:5, 6; 65:21-23; Apocalipsis 21:3, 4 textonakankiwa. Kunjamsa machaq mundon munat amigonakapampis familiapampis jikisjjapjjani uk amuytʼasajja, taqe chuymaw uk suytʼapjje, jukʼampiw Jehová Diosar serviñ munapjjaraki (Mat. 24:13; Gál. 6:9).

8. ¿Kuna yaqha razonatsa yaqha ovejanakajj Jesusan jiwatap amtañatak tantachäwir sarapjje?

⁸ Kimsa: yaqha ovejanakajja, ajllit cristianonakar munasipjjatapa yanaptʼañ munapjjatapwa uñachtʼayañ munapjje. Diosan Arupanjja, ajllitanakampi aka oraqen jakañ suytʼirinakampejj wali mayachtʼatäpjjaniwa sasaw säna. Jichhajj uka toqet parlir mä qhawqha profecianak uñjañäni.

9. Zacarías 8:23 textonkir profeciarjamajja, ¿kunjamsa yaqha ovejanakajj ajllitanakar uñjapjje?

⁹ (Zacarías 8:23 liytʼäta). Yaqha ovejanakajj kunjamsa ajllit jilat kullakanakapar uñjapjje uk amuytʼañatakejja, mä suma uñachtʼäwimpiw uka profeciajj qhanañchi. “Mä judío” ukat ‘jumanakampi’ siski uka arunakajja, aka oraqen jiltʼapki uka ajllit cristianonakatwa parlaski (Rom. 2:28, 29). ‘Kunayman arunak parlir markanakat jutiri 10 chachanaka’ sasinjja, yaqha ovejanakat parlaskaraki. Jupanakajj ajllit cristianonakatwa wali chʼamampi ‘katthapisipjje’, mä arunjja janiw jupanakar jaytjapkiti, jupanakamp chikaw Jehová Dios saparuki adorapjjaraki. Ukhamajj Jesusan jiwatap amtañatak tantachäwinjja, yaqha ovejanakajj ajllit cristianonakamp mayachtʼatäpjjatap uñachtʼayañatakiw uka tantachäwinkapjje.

10. ¿Kunsa Jehová Diosajj Ezequiel 37:15-19, 24, 25 texton utjki uka profecian phoqasiñapatak luräna?

¹⁰ (Ezequiel 37:15-19, 24, 25 liytʼäta). Ajllit cristianonakampi yaqha ovejanakampejj mayachtʼataw trabajipjje, ukhamatwa Jehová Diosajj uka profecía arunak phoqasiyi. Uka profecianakajj pä lawanakatwa parli. Alajjpachar sarañatak ajllitanakajja, “Judá markataki” sat lawar uñtasitäpjjewa (uka tribu taypitwa Israelan reyinakapajj ajllisïna). Aka oraqen jakañ suytʼirinakasti, “Efrainan” lawapar uñtasitäpjjarakiwa. * Uka pä gruponakarojja, Jehová Diosajj mayachtʼañapänwa, ukhamat “mä sapa lawakïñapataki”. Ukhamatwa Cristo Jesús Reyipan pʼeqtʼata mayachtʼat servipjjañapäna. Ajllitanakampi yaqha ovejanakampejja, sapa maraw Jesusan jiwatap amtañatak tantachäwinkapjje, pä grupökasas ‘mä sapa tamakïpjjewa, mä sapa awatirinikïpjjarakiwa’ (Juan 10:16).

11. Mateo 25:31-36, 40 versiculonakan parlki uka ovejanakajja, ¿kunjamsa Criston jilanakapar yanaptʼapjje?

¹¹ (Mateo 25:31-36, 40 liytʼäta). Uka textonakan parlki uka ‘ovejanakajja’, tukuy tiempon jakiri cheqap sarnaqer jaqenakäpjjewa, aka oraqen jakañatak suytʼäwinïpjjewa, mä arunjja yaqha ovejanakat uñtʼatäpjjewa. Jupanakajj Criston jilanakaparuw jan jitheqtas yanaptʼapjje, jukʼampis oraqpachan predicasiñapataki yatichasiñapatakiw yanaptʼapjje (Mat. 24:14; 28:19, 20).

12, 13. ¿Kunjamanakatsa yaqha ovejanakajj Criston jilanakapar yanaptʼapjjaraki?

¹² Jesusan jiwatap amtañatak uru janïr purinkipanjja, sapa maraw yaqha ovejanakajj Criston jilanakapar yanaptʼapjjatap uñachtʼayapjje. ¿Kunjamsa uk lurapjje? Semananak faltkipanwa oraqpachan invitacionanak jaqenakar  churapjje, ukhamat sarañ munirinakajj uka tantachäwir sarapjjañapataki (“ ¿Jesusan jiwatap amtañatak tantachäwitakejj wakichtʼasisktati?” sat recuadro uñjjattʼäta). Congregacionapan janis ajllit cristianonakajj utjkchejja, oraqpachanwa Jesusan jiwatap amtañatakejj wakichtʼasipjje. Criston jilanakapar ukham yanaptʼasajja, yaqha ovejanakajj wali kusisitäpjjewa. Kuntï ajllit cristianonak layku lurapki ukjja, Jesús laykuw lurasipki, ukwa jupanakajj yatipjje (Mat. 25:37-40).

¹³ Alajjpachar sarañatak suytʼäwinïskañänisa jan ukajj aka oraqen jakañatak suytʼäwinïskañänisa, ¿kuna razonanakatsa Jesusan jiwatap amtañatak tantachäwinkañ muntanjja?

14. ¿Kunjamsa Jehová Diosampi Jesusampejj jiwasanakar wal munasipjjatap uñachtʼayapjje?

¹⁴ Jehová Diosampiru Jesusampiruw munasiñapat yuspärtanjja. Jehová Diosajj kunaymanitwa munasiñap uñachtʼayistu. Ukampis Yoqapar jiwas layku tʼaqesiñapataki jiwañapatak khitanitapaw taqet sipans jilanki (Juan 3:16). Jesusajj taqe chuyma vidap churasaw jiwasar munasitap uñachtʼayaraki (Juan 15:13). Cheqas kunanaktï jiwasar munasipjjatap laykojj lurapki ukanakatjja, janiw kunampis kuttʼayksnati, ukampis sum sarnaqatasampiw yuspärasirïtas uñachtʼaysna (Col. 3:15). Jesusan jiwatap amtañatak tantachäwinkasajja, jiwasar munasipjjatapat yuspärataswa uñachtʼaytanjja, jupanakar munasitassa uñachtʼayaraktanwa.

15. Ajllit cristianonakasa yaqha ovejanakasa, ¿kunatsa Jesusan vidap loqtasitapar wal yuspärapjje?

¹⁵ Jiwasar juchat kutsuyañataki Jesusajj vidap churkäna uka regalotwa wal yuspärtanjja (Mat. 20:28). Ajllit cristianonakajja, uka laykuw mä suma suytʼäwinïpjje, ukatwa Jesusan ukham luratap wali valoranit uñjapjje. Criston sacrificiot loqtasitapar confiyapjjatap laykojja, Jehová Diosajj cheqapar sarnaqer jaqetwa jupanakar uñji, wawanakaparjamaw katoqjjaraki (Rom. 5:1; 8:15-17, 23). Yaqha ovejanakasti, Jesusan jupanak layku vidap loqtasitaparojj wali valoranitwa uñjapjjaraki, Criston wilap wartasitapar confiyapjjatap laykuw jupanakajj Diosamp sumat uñjatäpjjaspa, juparus servipjjaspa, ‘jachʼa tʼaqesiñatsa’ salvasipjjarakispa (Apoc. 7:13-15). Paypach gruponakajj Jesusan jiwatap amtañatak tantachäwirojj sapa maraw sarapjje, ukhamatwa Jesusan jupanak layku vidap churasitapar yuspärapjjatap uñachtʼayapjje.

16. ¿Kuna yaqha razonatsa Jesusan jiwatap amtañatak tantachäwir sartanjja?

¹⁶ Jesusaruw istʼañ muntanjja. Kuna suytʼäwinïskañänisa, kuntï Jesusajj lurasipkakim siskäna uk lurañ munapuntanwa, akham sasaw uka arumajj jiwatap amtapjjañapatak arsuwayäna: “Akjja nayat amtasisin lurasipkakim” sasa (1 Cor. 11:23, 24).

17. ¿Kunjamsa Jesusan jiwatap amtañatak tantachäwinkañajj Jehová Diosar jukʼamp jakʼachasiñatak yanaptʼistu?

¹⁷ Jehová Diosar jukʼamp jakʼachasiñatakiw yanaptʼistu (Sant. 4:8). Kunjamtï uñjaniwayktanjja, Jesusan jiwatap amtañatak tantachäwinkañajj Jehová Diosajj churkistu uka suytʼäwit lupʼiñatakiw yanaptʼistu, kunjamsa jiwasar wal munasitap uñachtʼayistu uka toqet lupʼiñatakiw yanaptʼarakistu (Jer. 29:11; 1 Juan 4:8-10). Jupajj churkistu uka suytʼäwitsa, munasiñapan jan tukusirïtapatsa janiw payachasktanti. Uka toqet lupʼtan ukhajja, jukʼampiw Jehová Diosar munastanjja, suma amigoparakïtanwa (Rom. 8:38, 39).

18. ¿Kuntï Jesusajj lurkäna uka toqet lupʼiñajj kunjamsa yanaptʼistu?

 ¹⁸ Jesusat yateqasiñasatakiw chʼamañchistu (1 Ped. 2:21). Jesusan jiwatap amtañ uru jakʼajja, janïr jiwayatäkäna uka qhepa semanajj kunsa Jesusajj aka oraqenkkasajj luräna, kunjamsa jiwayapjjäna, jaktarakïna, uka toqenakatwa Bibliat liytʼasajj amthaptanjja. Ukatjja Jesusan jiwatap amtañatak tantachasktan uka arumajja, qhawqsa Jesusajj munasistu uka toqetwa discursojj amtayarakistu (Efes. 5:2; 1 Juan 3:16). Kunjamsa Jesusajj taqe chuyma sacrificiot loqtasïna, uka toqet liytʼañasa, lupʼiñasa, ‘kunjamtï Jesusajj sarnaqkäna ukham sarnaqañatakiwʼ chʼamañchistu (1 Juan 2:6).

19. ¿Kunsa Diosan wali munata jakaskakiñatakejj lurañasa?

¹⁹ Jehová Diosan amigopäskakiñatakiw yanaptʼistu (Jud. 20, 21). Jupar istʼañataki, sutip jachʼañchañataki, chuymap kusisiyañatak chʼamachastan ukhajja, Diosan wali munataw jakasisktanjja (Prov. 27:11; Mat. 6:9; 1 Juan 5:3). Jesusan jiwatap amtañatak tantachäwir sarañajja, “¡wiñayatakiw juman amigomäskakiñ munta!” sasin Jehová Diosar sañatakiw chʼamañchtʼistu, uksti sapüruw luratanakasamp uñachtʼaytanjja.

20. ¿Kuna razonanakatsa Jesusan jiwatap amtañatak tantachäwir sartanjja?

²⁰ Alajjpachar sarañatak suytʼäwinïskañänisa jan ukajj aka oraqen jakañatak suytʼäwinïskañänisa, Jesusan jiwatap sapa mara amtañatakejj walja razonanakaw utji. Uk amtañatak tantachtʼasktan ukhajja, khitirutï wal munasktan ukan jiwatapwa amttanjja: jupajj Jesucristowa. Jukʼampisa, Jehová Diosajj jiwasar salvañatak Yoqapar khitanisajj qhawqsa munasistu ukwa amttanjja. Aka 2022 maranjja, viernes 15 de abril arumaw Jesusan jiwatap amtaskañäni. Jehová Diosarus Yoqaparus wal munastanjja, ukatwa jiwasatakejj Jesusan jiwatap amtañatak tantachäwinkañajj wali importantejja.