1. ¿Kunatsa waljanejj Bibliar jan confiyjjapjje?

 JICHHÜRUNAKANJJA, jaqenakajj janiw yaqhanakar facilak confiyjjapjjeti. Waljaniw politiconakarusa, cientificonakarusa, negocionak luririnakarus respetapjje, ukampis “¿cheqapunit jaqenakar yanaptʼañ munapjjpacha?” sasaw jisktʼasipjje. Cristianöpjjtwa sapki uka iglesia pʼeqtʼirinakarus janiw respetapkiti. Jupanakajj Bibliaruw istʼapjjta sapkchisa, jaqenakajj janiw Bibliar confiyjjapjjeti.

2. Salmo 119:160 qellqatarjamajja, ¿kuna toqetsa jan payachasktanjja?

² Jehová Diosajj ‘cheq parlir Diosätapatsa’ kunatï jiwasatakejj walïki uk thaqerïtapatsa janiw servirinakapajj payachasktanti (Sal. 31:5; Is. 48:17). Diosan Arupanjja, “taqpach arunakamajj cheqawa” sasaw qhanañchi, ukatwa kunanaktï Bibliajj siski ukar confiysna (Salmo 119:160 liytʼäta). Kuntï Bibliat yatjjattʼat mä chachajj siskäna ukhamwa amuyaraktanjja, jupajj akham sasaw qellqäna: “Taqe kunanaktï Diosajj siski ukanakat janipuniw kunas kʼarïkiti, kunanaktï siski ukanakajj phoqasipuniniwa. Diosan markapankirinakajj kuntï Diosajj arski ukar confiyapjjaspawa, kuna laykutejj ukanak arsur Diosaruw confiyapjje” sasa.

3. ¿Kuna toqenakatsa aka yatichäwin yatjjataskañäni?

³ ¿Kunjamsa yaqhanakarojj Diosan Aruparu jiwasjam confiyapjjañapatak yanaptʼsna? Ukatakejj aka kimsa toqenakat yatjjataskañäni: Biblian yatichäwinakapajj janiw mayjtʼayatäkiti, Biblian profecianakapajj phoqasipuniwa, jaqenakan cambiapjjañapatakis chʼamanirakiwa.

4. ¿Kunatsa yaqhepanakajj Bibliajj mayjtʼayatawa sasin amuyapjje?

⁴ Jehová Diosajja, jupat jan jitheqtiri niya 40 chachanakampiw Biblian libronakap qellqayäna. Ukampis Bibliajj qellqaskäna uka original qellqatanakatjja, jichhürunakan janiw ni mayas utj-jjeti. Jan ukasti copianakan copianakapakiw utj-jjestu.  Ukatwa yaqhepajj akham sasin jisktʼasipjje: “¿Kuntï qalltan qellqaskäna uka pachpti Bibliajj saskpacha?” sasa. ¿Kunjamatsa Bibliajj jan mayjtʼayatätap yatsna?

5. ¿Kunjamsa Hebreo Arut Qellqatanakajj copiasiwayi? (Nayrïr paginankir dibujo uñjjattʼäta).

⁵ Kuntï Bibliajj siskäna uk jarkʼaqañatakejja, Jehová Diosajj Bibliat copianak lurapjjañapatakiw markapar mayïna. Israel markan reyinakaparojj Leyit copianak lurasipjjam sasaw säna, levitanakarusti markar Leyit qhanañchapjjañapatakiw mayirakïna (Deut. 17:18; 31:24-26; Neh. 8:7). Babiloniar apat judionakajj markapar kuttʼanjjapjjäna uka qhepatjja, copianak lurañatak wali yatjjattʼat mä qhawqhaniw Hebreo Arut Qellqatanakat walja copianak lurapjjäna (Esd. 7:6, notanaka). Jupanakajj amuyumpiw copiapjjerïna. Tiempompejja, arunak jaktʼasaw copiapjjerïna, letranak kunwa jaktʼapjjerïna, ukhamat copianakapajj jan pantjatäñapataki. Ukhamsa lurapjjerïkchïnjja, pantjasirïpjjatap laykojj copia lurkasajj mä jukʼa pantjasipjjerïnwa. Ukampis niyakejjay mä pachpa qellqatat walja copianakajj lurasiwaychejja, kawkjanakansa pantjasiwayapjje ukajj qhepat yatisjjänwa. Kunjamanakatsa uka pantjasitanakapajj yatisjjäna uk jichhajj yatjjatañäni.

6. ¿Kunjamatsa Bibliat copianak luririnakan pantjasitanakapajj yatisispa?

⁶ Jichha tiempon Bibliat yatjjatirinakajja, Bibliat copianak luririnakajj kawkjanakans pantjasiwayapjje uk yatipjjaspawa. ¿Kunjamsa uk lurapjje? 100 jaqenakarus mä libron mä paginap amparamp copiapjjañapatak mayiskaspa ukham amuytʼañäni, jupanakat mayniw mä jukʼa pantjasi. ¿Kunjamatsa jupan pantjasitapajj yatisispa? Ukatakejj taqpach copianakaw igualtʼayasiñapa. Bibliat yatjjatatanakajj niya uka pachparakwa lurapjje, Bibliat copianak luririnakajj kawkjanakansa pantjasiwayapjje, jan ukajj kawkjanakansa jan phoqatpach copiapkäna uk yatiñatakejja, Bibliat walja copianakajj utjki ukanakwa igualtʼayapjje.

7. Bibliat copia luririnakat waljanejj wali amuyumpiw copiapjjäna, ¿kunjamatsa uk yattanjja?

⁷ Kunjamsa Bibliat copianak luririnakajj wali amuyumpi copiapjjerïna uk jichhajj uñjañäni. Hebreo Arut Qellqatanakat copiaskäna uka nayra ukhamarak phoqat qellqatajja, Códice de Leningrado satawa, uka copiajj 1008 jan ukajj 1009 después de Cristo maranakatawa. Ukampis jichha maranakanjja, walja qellqatanaka ukhamarak Biblian jiskʼa qellqatanakapaw (fragmentos) jikjjatasiwayi, uka qellqatanakajj Códice de Leningrado sat qellqatat sipans 1.000 maranak jukʼamp nayra maranakatawa. Maynejj inas akham amuychispa: “Uka qellqatanakat 1.000 maranakan kutin kutin copianak lurasajja, Códice de Leningrado qellqatampi jukʼamp nayra qellqatanakampejj janiw pachpäjjpachati” sasa. Ukampis ukajj janiw ukhamäkiti. ¿Nayra qellqatanakampi jichhak jikjjatat qellqatanakampi igualtʼayasajj Bibliat yatjjatirinakajj kunsa amuyawayapjje? Uka qellqatanakajj mä jukʼa mayj qellqatäkchisa, janiw Biblian yatichäwinakapajj mayjtʼayatäkiti.

8. ¿Griego Arut Qellqatanakat copianakampi yaqha nayra qellqatanakamp igualtʼayasajj kunas amuyasi?

⁸ Nayrïr cristianonakajja, kunjamtï Hebreo Arut Qellqatanakat copia luririnakajj lurapjjerïkäna ukhamarakwa lurapjjerïna. Jupanakajj wali amuyumpiw Griego Arut Qellqatanakan 27 libronakap copiapjjäna, uka copianakwa tantachäwinakansa predicacionansa apnaqapjjäna. Bibliat yatjjattʼat mä chachajja, Griego Arut Qellqatanakan copianakapampi uka tiempon utjir yaqha qellqatanakampiw igualtʼayäna. Biblian uka copianakapat parlkasinjja, akham siwa: “Cheqpachansa, walja copianakaw utji, […] jukʼamp  phoqatäpjjarakiwa” sasa. Griego Arut Qellqatanakat parlkasinjja, mä librojj akham siwa: “Jichha tiempon traducit Griego Arut Qellqatanakarojj confiysnawa, kuntï Biblia qellqerinakajj sañ munapkäna ukampejj pachpakiwa” sasa (Anatomy of the New Testament).

9. ¿Kunsa Isaías 40:8 textojj Biblian yatichäwinakapat qhanañchistu?

⁹ Bibliat copia luririnakajja, nayra maranakatpachaw wali amuyumpi walja copianak lurañatak chʼamachasipjjäna, ukhamatwa jichhürunakan jan kun yaptʼata jan kun apaqata Bibliat liytʼtanjja, yatjjataraktanjja. b Biblian yatichäwinakapajj jichhürunakan phoqatpach utjañapatakejja, Jehová Diosaw yanaptʼawayi (Isaías 40:8 liytʼäta). Ukampis inas yaqhepanakajj akham sapjjchispa: “Biblian yatichäwinakapajj janis mayjtʼayatäkchejja, ukajj Diosats jutkaspa ukham janiw sañ munkiti” sasa. Kunatsa Bibliajj Diosan amuytʼayatawa sasin sistan uk jichhajj mä qhawqha yatjjatarakiñäni.

10. Kuntï 2 Pedro 1:21 texton siski ukan cheqätap uñachtʼayañatakejja, mä profecian phoqasitap qhanañchtʼam (dibujompi fotompi uñjjattʼäta).

¹⁰ Biblian utjki uka profecianakat waljaw phoqasiwayjje, ukanakat yaqhepajj walja maranak nayraw qellqasjjäna. Historia toqet yatjjatasiwayki ukarjamajja, walja profecianakaw phoqasiwayjje. Niyakejjay Jehová Diosajj uka profecianak qellqaychïnjja, ukanakajj phoqasiñapapunïnwa (2 Pedro 1:21 liytʼäta). Kunjamsa wali chʼamani Babilonia markajj katuntat uñjasïna uka toqet amuytʼañäni. 778 marat 732 antes de Cristo marakamajja, Babilonia markan katuntatäñapatwa Jehová Diosajj mä profecía Isaías profetar qellqayäna. Isaiasajj Ciro sat chachaw katuntani sasaw säna, kunjamsa uka markar katuntañapäna uksa wali sumwa qhanañcharakïna (Is. 44:27-45:2). Tiempompejja Babiloniajj qʼala tʼunjatäniwa, janiw khitis ukan jakjjaniti sasaw mä profecian qhanañcharakïna (Is. 13:19, 20). Taqpach uka profecianakajj kunjamtï qellqaskäna ukhampunwa phoqasïna. Mä tiempojj wali aytatäkäna  uka markarojja, 539 antes de Cristo maranwa medonakampi persanakampejj tʼunjapjjäna, jichhajja uka markajj laqayakëjjewa (Babilonia markajj tʼunjatäniwa sasaw Bibliajj qhanañchjjäna sat video uñtam, ukjja celularana jan ukajj tabletanwa ¡Wiñayatakiw kusisit jakasisma! sat libron 3 yatichäwi punto 5 ukan uñtasma).

11. ¿Kunjamsa Daniel 2:41-43 textojj phoqasiski?

¹¹ Biblian utjki uka profecianakajj janiw nayra tiemponak phoqasiwaykiti. Jichhürunakan yaqha profecianakan phoqasitapwa uñjaskaraktanjja. Reino Unido ukat Estados Unidos mayachtʼat potencia mundialatwa Daniel profetajj mä profecía qellqäna, ukajj kunjamsa wali musparkañ phoqasiski uk amuytʼañäni (Daniel 2:41-43 liytʼäta). Uka profeciarjamajja, uka potencia mundialan mä partepajj hierror uñtat ‘chʼamanïñapänwa’, mä partepasti ñeqʼer uñtat ‘jan chʼamanïñapänwa’. Uka profecian ukhampun phoqasitapwa uñjasktanjja. Uka pä markanakajj hierror uñtat wali chʼamanïpjjänwa, kuna laykutejj paypach guerra mundialanakan atipjasiñapatakejj uka markanakaw wal yanaptʼawayapjje, jichhas wali chʼamani ejercitopajj utjaskakiwa. Ukhamäkchisa markachirinakapajj sindicatonak uñstayasa, derechos civiles uka favor campañanak lurasa, movimientos independentistas ukanak uñstayasaw uka markanakarojj aynachtʼayapjje. Jichhakiw política internacional toqet amuytʼiri mä chachajj akham säna: “Jichhürunakanjja, oraqpachan utjki uka markanakat sipans Estados Unidos markaw política toqet jukʼamp tʼaqanoqtatajja” sasa. ¿Reino Unido markat kamsasirakispasa? Aka qhepa maranakanjja, Unión Europea ukankir markanakampejj kunjamsa apasipjje ukat may maya amuyapjjatapatwa Reino Unido markajj tʼaqanoqtat uñjasi. Ukham tʼaqanoqtaña utjatapatjja, Reino Unido ukat Estados Unidos mayachtʼat potencia mundialajj janiw mä amtaki kun lurañs puedkiti.

12. ¿Kunatakis phoqasiwayki uka profecianakajj yanaptʼistu?

¹² Biblian utjki uka walja profecianakan phoqasitapajja, kunanaktï Diosajj jutïritak arsuwayki ukanakajj phoqasipuniniwa sasin confiyañatakiw yanaptʼistu. Mä salmo qellqerjamaw jikjjatasiraktanjja, jupajj Jehová Diosar akham sänwa: “Juman salvatäñwa nayajj wal munta, kuna laykutejj juman arumajj mä suytʼäwi churitu” sasa (Sal. 119:81). Jehová Diosajj munasiñatwa Biblia toqejj “mä suma suytʼäwi jutïritak” churañ munistu (Jer. 29:11). Jehová Diosajj kunanaktï jutïritak arski ukarjamaw mä suytʼäwisajj utjistu, ukampis ukajj janiw jaqenakan chʼamachasitaparjamäkiti. Ukhamasti Diosan Arupar jukʼamp confiyañatakejj Bibliankir profecianakat jukʼamp yatjjatasipkakiñäni.

13. ¿Kunatsa Bibliarojj confiyaraksna? (Salmo 119:66, 138).

¹³ ¿Kunatsa Bibliar confiyaraksna? Kuna laykutejj ewjjtʼanakaparjam sarnaqerinakarojj yanaptʼiwa (Salmo 119:66, 138 liytʼäta). Niya divorciasiñampïsipkäna uka chacha warminakajja, Biblian ewjjtʼanakapar istʼasaw jichhajj kusisita mayachtʼata jakasipjje. Ukham cristiano familiankir wawanakajja, munasiri familia taypinwa jilsupjje, suma uñjatäpjjewa, munatäpjjarakiwa (Efes. 5:22-29).

14. Kunjamsa Biblian ewjjtʼanakapajj jukʼamp suma jaqëñatak yanaptʼistu uk mä uñachtʼäwimp qhanañchtʼam.

¹⁴ Biblian yatiñani ewjjtʼanakaparjam sarnaqasajja, sinti jan wali jaqenakas cambiapjjaspawa. Carcelankir Jack c sat chacharojj kunjamsa Biblian ewjjtʼanakapajj yanaptʼäna uk uñjañäni. Jupajj wali nuwasiri jaqënwa, jiwayatäñatak juchañchat taqe presonakatjja, jupaw  jukʼamp jan wali jaqet uñtʼatänjja. Ukampis mä urojja, Bibliat yatichaskäna uk istʼañatakiw qontʼasïna. Jilatanakan munasirïpjjatapajj chuymaruw purtʼäna, ukatwa Bibliat yateqañ qalltäna. Biblian yatichäwinakapar istʼasajja, jukʼamp sumaw sarnaqjjäna, suma jaqëjjarakïnwa. Tiempompejja, publicadoräjjañatakejj Biblian mayitanakap phoqjjänwa, ukatsti bautisasjjarakïnwa. Mayni presonakarojj taqe chuymaw Diosan Reinopat parljjäna, uka presonakat pusiniruw Diosar uñtʼapjjañapatak yanaptʼarakïna. Jiwayapjjañapäkäna uka urojj purinjjäna ukhajja, Jack chachajj janiw nayrjamäjjänti. Abogadonakapat maynejj akham sänwa: “Jack chacharojj 20 maranak nayraw uñtʼawayta, jichhajj janiw nayrjamäjjeti. Jehová Diosan Testigonakapamp yateqañaw vidap cambiañapatak yanaptʼawayi” sasa. Jack chachajj jiwayatäkchïnsa, vidap cambiatapajj Diosan Arupar confiyañatakiw yanaptʼistu, jukʼamp suma jaqëñasatak yanaptʼañatak chʼamanïtapar confiyañatakiw yanaptʼarakistu (Is. 11:6-9).

15. ¿Kunatsa Jehová Diosan servirinakapajj mayni jaqenakamp jan igualäktanjja? (Fotonak uñjjattʼäta).

¹⁵ Biblian cheqa yatichäwinakaparjam sarnaqasajja, Jehová Diosan servirinakapajj sumankañanwa jakasipjje, mayachtʼatäpjjarakiwa (Juan 13:35; 1 Cor. 1:10). Ukham jakasipjjatapajj wali musparkañawa, kuna laykutejj akapachankir jaqenakajj política toqet kunayman amuyunak utjatapatsa, yaqha kasta jañchininakar jiskʼachañ utjatapatsa, qollqeninakampi pobrenakampi jiskʼachasiñ utjatapatsa, tʼaqa tʼaqaw sarnaqapjje. África toqen jakasiri Jean sat waynarojja, mayachtʼat sarnaqatasaw chuymapar purtʼäna. Kunapachatï markapan guerra civilajj qalltäna ukhajja, ejercitoruw mantäna, ukampis qhepatjja uka jakʼankir mä markaruw escapjjäna, ukanwa Jehová Diosan Testigonakapar uñtʼäna. Jean waynajj akham siwa: “Cheqpach religionankirinakajj janiw politicar mitisipkiti, ni tʼaqa tʼaqas sarnaqapkiti. Jan ukasti, maynit maynikamaw munasipjje, ukwa yateqawayta” sasa. Ukat akham sarakiwa: “Nayajj markaj layku nuwasiñatakiw  jakäwijan wal chʼamachasiyäta, ukampis Biblian cheqa yatichäwinakap yateqjjayäta ukhajja, Jehová Diosaruw jakäwij katuyasjjayäta” sasa. Uka waynajj janiw nayrjamäjjänti. Yaqha cheqat jutir jaqenakamp nuwasiskañat sipansa, jichhajj taqe jaqenakaruw Biblian sumankañ churir yatiyäwinakap yatiyaski. Biblian ewjjanakapajj taqe kasta jaqenakaruw wali sum yanaptʼi, ukajj Diosan Arupar confiyañasatakiw yanaptʼistu.

16. ¿Kunatsa Diosan Arupar confiyañatak chʼamachasiñasajj wali importantejja?

¹⁶ Aka jan wali pachajja, jan walit jukʼamp jan waliruw sarani, Biblian cheqa yatichäwinakapar confiyatasas yantʼataw uñjasini. Inas jaqenakajj Biblian cheqa yatichäwinakapatsa, Jehová Diosajj markapar irpañatak suma phoqeri amuyasir esclavor uttʼayatapatsa payachasiñas munapjjchini. Ukampis jiwasatï Diosan Arupajj cheqwa yatichi sasin confiyañänejja, ukanakar saykatañäniwa. Jehová Diosan leyinakaparojj ‘taqe tiempona, tukuykamaw’ istʼañäni (Sal. 119:112). ‘Jan phenqʼasisaw’ Biblian cheqa yatichäwinakapat yaqhanakar yatiytanjja, Biblian ewjjtʼanakaparjam sarnaqapjjañapatakis chʼamañchtanjja (Sal. 119:46). Arknaqapkistu ukham sinti jan wali yantʼanaksa, ‘pacienciampi, wali kusisitaw’ aguantañäni (Col. 1:11; Sal. 119:143, 157).

17. ¿Kunsa 2023 maratak ajllit textojj amtayistani?

¹⁷ Jehová Diosajj cheqa yatichäwinakap jiwasar uñtʼayatapat walpun yuspärtanjja. Pantjata, saranukuta jan wali pachansa jakstanjja, Biblian cheqa yatichäwinakapajj mä amtampi sum jakasiñatakiw yanaptʼistu, kunjamsa aka jan wali pachan jaksna uksa qhanwa yaticharakistu. Diosan Reinopajj apnaqjjani ukhajj kunja sumas jakasjjañäni uk suytʼañasatakiw yanaptʼarakistu. 2023 maratak ajllit textojja, Diosan taqpach arunakapajj cheqäskapuniwa sasin jukʼamp confiyañasatakiw yanaptʼistani (Sal. 119:160).