1, 2. ¿Kunatsa sapa marajj Jesusan jiwatap amtañatak tantachastanjja?

 NIYA 2.000 maranak nayrajja, Jesusajj jiwas laykuw jakäwip churäna, ukhamatwa wiñay jakañ katoqaraksna. Janïr jiwañapäkäna uka arumajja, tʼantʼampi vinompi aptasaw kunjamsa jiwatap amtapjjañapäna uk uttʼayäna. Wali munasiñat jakäwip churatap amtasipkakiñapatakiw discipulonakaparojj mayïna (1 Cor. 11:23-26).

² Cristianonakajj Jesusar wal munasitas laykuw uka mayitapar istʼtanjja (Juan 14:15). ¿Kunapachas Jesusan sacrificiot loqtasitapar wali valoranit uñjatas uñachtʼaysna? Jesusan jiwatapajj amtaskani uka nayra ukhamarak uka qhepatwa uñachtʼaysna. Mä toqetjja, Jehová Diosar orañatakiw tiempo apstʼasiñasa, kunjamsa jiwatapajj jaqenakar yanaptʼi uk amuytʼañatakiw tiempo apstʼasiñasaraki. Maysa toqetjja, jukʼamp jaqenakar invitañatakejj jukʼamp horanak predicañatakiw tiempo apstʼastanjja, ukhamat jaqenakajj jiwasamp chika uka wakiskir tantachäwinkapjjañapataki. Ukhamajj Jesusan jiwatap amtañatakejj janipun kunas jarkʼistpanti.

3. ¿Kuna toqenakatsa aka yatichäwin yatjjataskañäni?

³ Jehová Diosan servirinakapajja, Jesusan jiwatap amtañatakejj wal chʼamachasiwaytanjja. Kunjamsa uk lurañatakejj chʼamachasiwaytan uk kimsa toqet aka yatichäwin yatjjataskañäni: 1) Jesusan mayitaparjamaw jiwatap amttanjja, 2) yaqhanakaruw Jesusan jiwatap amtañatak invittanjja, 3) jan waltʼäwinakan uñjaskasas Jesusan jiwatap amttanwa.

4. 1) ¿Kuna cheqa yatichäwinakas Jesusan jiwatap amtañatak tantachäwin sapa marajj qhanañchasi? (Lucas 22:19, 20). 2) ¿Kunatsa uka cheqa yatichäwinak amuyañajj wali wakiskirejja?

⁴ Jesusan jiwatap amtañatak sapa mara tantachasktan ukanjja,  mä discurso toqew yaqhep jisktʼanakajj Bibliamp qhanañchasi. ¿Kunatsa Jesusan jiwañapajj wakisïna? ¿Kunjamsa mä sapa chachan jiwatapampejj taqe jaqenakan juchanakapajj perdonasi? Uka jisktʼanakaruw uka tantachäwin qhanañchasi. Ukatsti khitinakas tʼantʼatsa manqʼapjjaspa, vinotsa umtʼapjjaspa, tʼantʼas vinos kun sañs muni ukanakaw ukan qhanañchasiraki (Lucas 22:19, 20 liytʼäta). Discursojj arstʼaskani ukhajja, oraqen jakañ suytʼasipki ukanakajj kuna bendicionanaksa katoqapjjani ukanakat lupʼipjjañäni (Is. 35:5, 6; 65:17, 21-23). Biblian uka cheqa yatichäwinakapjja, janiw aleq ukhamak uñjañasäkiti. Walja millón jaqenakajja, Jesusan jiwatapajj qhawqha valoranisa uk janiw amuyapkiti ni yatipkarakisa. Janirakiw kunjamtï Jesusajj jiwatap amtañatak uttʼayawayki ukham amtapkiti. ¿Kunatsa ukajj ukhamäpacha?

5. Jilaparte apostolonakajj jiwjjapjjäna uka qhepatjja, ¿kunjamsa Jesusan jiwatap amtapjjäna?

⁵ Jesusan apostolonakapat niya taqenejj jiwjjapjjäna uka qhepatjja, falso cristianonakaw cristiano congregación taypir mantapjjäna (Mat. 13:24-27, 37-39). Jupanakajj ‘qʼewjat yatichäwinak parlapjjäna, ukhamat discipulonakar jitheqtayasajj jupanak toqer apañataki’ (Hech. 20:29, 30). ¿‘Qʼewjat yatichäwinak’ yatichapkäna ukanakat mayajj kawkïrïnsa? Jesusajj janiw cuerpop ‘mä kutiki jupa pachpa loqtasisajj waljanin juchanakap apaskiti’ sasin yatichañ qalltapkäna ukawa. Cristojj sacrificiot loqtaskäna ukajj kutin kutiniw loqtasiñapa sasaw yatichapjjarakïna, ukampis Bibliajj janiw uk yatichkiti (Heb. 9:27, 28). Jichhürunakanjja, suma chuyman walja jaqenakaw uka kʼari yatichäwinakar creyipjje. Eucaristía b sasin uñtʼatäki uk amtañatakiw sapa semana jan ukajj sapürojj iglesiar sarapjje. Maysa toqetjja, yaqhep religionanakajj awisakiw Jesusan jiwatap amtapjje, ukampis jupanakat jilapartejja, Jesusan jiwatapajj kamsañs muni uk janiw amuyapkiti. Inas yaqhepanakajj akham jisktʼasipjjchi: “¿Cheqapunit juchanakajajj Jesusan jiwatapjjar perdonatäspa?” sasa. Jesusan sacrificiot loqtasitapajj janiw juchanakas perdonañatak yanaptʼkiti sasaw creyiyapjje, ukatwa yaqhepajj ukham jisktʼasipjje. Ukampis ¿Jesusan cheqpach arkirinakapajj kunsa lurapjje?

6. ¿Kunsa Bibliat yatjjatir mä grupojj 1872 maran amuyäna?

⁶ 1870 maranakanjja, Charles Russell jilatan pʼeqtʼataw Bibliat yatjjatir mä grupojj Diosan Arupat wali sum yatjjatañ qalltäna. Jesusan sacrificiot loqtasitapajj qhawqha valoranipunisa, kunjamsa jiwatapajj amtasiñapa ukwa jupanakajj yatiñ munapjjäna. 1872 maranjja, Bibliamp yanaptʼayasisaw Jesusajj taqe jaqenakar jiwañampit juchampit kutsuyañatak jiwatap amuyapjjäna. Kuntï yatjjatapkäna ukjja, janiw jupanakatakik imasipkänti. Jan ukasti libronakaru, periodiconakaru, revistanakar qellqasaw ukanak yatiyapjjäna. Ukatsti nayrïr cristianonakjamarakiw maran mä kuti Jesusan jiwatap amtañ qalltapjjäna.

7. ¿Kuntï Bibliat yatjjatirinakajj qalltan yatjjatapkäna ukajj kunjamsa jichhürunakan yanaptʼistu?

⁷ ¿Kunanaktï uka cristianonakajj walja maranak nayrajj yatjjatapkäna ukajj kunjamsa yanaptʼistu? Chʼamachasitanakaparojj Jehová Diosajj bendisïnwa, ukhamatwa Jesusan sacrificiot loqtasitapajj kamsañsa muni, kunanaksa ukampejj jiwasatakisa taqe jaqenakatakis jikjjatani ukanak qhan amuytanjja (1 Juan 2:1, 2). Ukatjja Diosar istʼir jaqenakatakejj pä kasta suytʼäwi utjatapwa Biblian yateqaraktanjja: yaqhepanakajj jan jiwir cuerpo katoqapjjani, millón millón jaqenakasti aka oraqenwa wiñay jakañ katoqapjjarakini. Jehová Diosajj  qhawqsa munasistu, Jesusan sacrificiot loqtasitapajj qhawqsa yanaptʼistu ukanakat lupʼtan ukhajja, Jehová Diosarojj jukʼampiw jakʼachastanjja (1 Ped. 3:18; 1 Juan 4:9). Ukatwa Diosat jan jitheqtir nayra jilat kullakanakjamajj yaqha jaqenakar Jesusan jiwatap amtañatak invittanjja, kunjamtï Jesusajj jiwatap amtañas munkäna ukham amtañataki.

8. ¿Kunsa Jehová Diosan servirinakapajj Jesusan jiwatap amtañatak tantachäwir invitañatakejj lurtanjja? (Fotonak uñjjattʼäta).

⁸ Jehová Diosan servirinakapajja, walja maranakaw Jesusan jiwatap amtañatakejj invitasktanjja. 1881 maranjja, aka pachpa revistajj Estados Unidos markankir jilat kullakanakarojj Allegheny (Pensilvania) markankir mä utan tantachasipjjañapatakiw invitäna, ukhamat Jesusan jiwatap amtañataki. Ukatjja sapa congregacionaw Jesusan jiwatap amtañ qalltjjapjjäna. Ukampis marzo de 1940 maranjja, Bibliat yatiñ muniri jaqenakar invitapjjañapatakiw publicadoranakarojj chʼamañchtʼasïna. 1960 maranwa Betelajj congregacionanakar imprimit invitacionanak apayañ qalltäna. Ukhat jichhakamajja, Jehová Diosan Testigonakapajj walja millón invitacionanakwa lakirawaytanjja. ¿Kunatsa uk lurañatakejj wal chʼamachastan, tiemps apstʼasiraktanjja?

9, 10. ¿Yaqhanakar Jesusan jiwatap amtañatak invitañatak chʼamachasitasajj khitinakampirus yanaptʼi? (Juan 3:16).

⁹ Mä toqetjja, kunsa Jehová Diosampi Jesusampejj taqe jaqenak laykojj lurawayapjje, uk yatipjjañapatakiw Jesusan jiwatap amtañatak jaqenakar invittanjja (Juan 3:16 liytʼäta). Kuntï uka arumajj nayrïr kuti uñjapkani istʼapkarakini ukajja, Jehová Diosaru jukʼamp  sum uñtʼañ munapjjañapataki jupan serviripäñ munapjjañapatak yanaptʼañapwa muntajja. Ukampis yaqhanakar invitañatak chʼamachasitasajj janiw jupanakaruk yanapkiti.

¹⁰ Inactivonakaruw invitaraktanjja. Jesusan jiwatap amtañatak invitasajja, Jehová Diosajj jupanakar munasiskakitapwa amtaytanjja. Jupanakat waljani uka tantachäwir sarapjjatapat wal kusistanjja. Jehová Diosar sirvkasajj kunja kusisitäpjjänsa, ukwa jupanakajj uka tantachäwin amtapjje. Mónica c kullakat parltʼañäni. COVID-19 pandemiajj utjkäna ukhaw wasitat predicañ qalltjjäna. Jesusan jiwatap amtañatak tantachäwejj 2021 maran apaskäna uka tantachäwinkasajja, jupajj akham sänwa: “Aka maran Jesusan jiwatap amtañajj nayatakejj jan armkañapunïnwa. 20 maranakatwa jaqenakar wasitat predicaskta, Jesusan jiwatap amtañatakis invitaskta. Taqe chuymaw uk lurtjja, kuntï Jehová Diosasa Jesusas naya layku lurawayapki ukat yuspärañatakejj janiw arujas utjkituti” sasa (Sal. 103:1-4). Jaqenakajj invitación churktan uk katoqasipjjpansa janisa, jupanakar invitañatakejj chʼamachasiskaktanwa, kuna laykutejj chʼamachasitasarojj Jehová Diosajj wali valoranitwa uñji.

11. ¿Kunjamsa Jehová Diosajj Jesusan jiwatap amtañatak invitañatak chʼamachasitasar bendisistu? (Ageo 2:7).

¹¹ Jesusan jiwatap amtañatak invitañatak chʼamachasktan ukarojja, Jehová Diosajj wal bendisiwayi. 2021 maran COVID-19 pandemia utjatapat jarkʼatas uñjaskchiyätanjja, 21.367.603 jaqenakaw uka tantachäwinkapjjäna. Jehová Diosan Testigonakapajj oraqpachan qhawqhanïktantï ukat niya pä ukhamp jaqenakaw tantachasiwaytanjja. Cheqas Jehová Diosatakejj janiw qhawqhanis tantachastan ukajj importantëkiti, jan ukasti jaqenakaw jukʼamp importantejja (Luc. 15:7; 1 Tim. 2:3, 4). Jehová Diosajj Jesusan jiwatap amtañatak invitktan uka toqew suma chuymani jaqenakar jikjjatañasatak yanaptʼistu (Ageo 2:7 liytʼäta).

12. ¿Kuna jan walinakas Jesusan jiwatap jan amtañatak jarkʼistaspa? (Foto uñjjattʼäta).

¹² Jesusan arsutaparjamajja, aka qhepa urunakan kunayman jan walinakanwa uñjasiñasäna: familiasajj jiwas contraw saytʼañapäna, arknaqataw uñjasiñasäna, guerranakasa, epidemianakasa, yaqha ukhamanakas utjañaparakïnwa (Mat. 10:36; Mar. 13:9; Luc. 21:10, 11). Awisajja, ukanakat mayaw Jesusan jiwatap jan amtañatakejj jarkʼistaspa. ¿Kunsa ukhaman uñjasisajj jilat kullakanakajj lurapjje, ukat kunjamsa Jehová Diosajj jupanakar yanaptʼawayi?

13. Artiom jilatajj jan ajjsartʼasaw Jesusan jiwatap amtäna, ¿kunjamsa Jehová Diosajj ukham luratapat bendisïna?

¹³ Carcelana. Diosar servitapat carcelankapki uka jilat kullakanakajja, Jesusan jiwatap amtañatakejj chʼamachasipjjapuniwa. Artiom jilatat amuytʼañäni. 2020 maran Jesusan jiwatap amtasiñapäkäna uka semananakajja, jilatajj 17 metros cuadradoni mä cuarton jistʼantatänwa, uka cuartorojj phesqa presonakaruw llawintasirïna. Ukhamäkchïnsa, Jesusan jiwatap amtañatakejj kunatï jupan utjkäna ukanakwa tʼantʼa lanti vino lantejj wakichtʼasïna, jupa pachpatak mä discurso arstʼañatakiw amtarakïna. Ukampis jilatamp chik llawintatäpkäna uka mayni presonakajja, cigarro fumapjjerïna, jurnälarakiw jan wali arunak parlapjjerïna. Ukhamajj ¿kunsa Artiom jilatajj luräna? Jupanakarojj mä hora jan cigarro fumapjjañapataki ukhamarak jan wali arunak jan parlapjjañapatakiw mayïna. Uka presonakajj iyaw sapjjänwa. Jilatajj akham siwa: “Kunjamas Jesusan jiwatapajj amtasiñapa ukwa qhanañchtʼapjjäma sasaw jupanakar sayäta” sasa. Qalltan janis uka toqet yatiñ munapkchïnjja, Jesusan jiwatap amtir uñjasajj jukʼampinakwa jilatar jisktʼapjjäna.

14. COVID-19 pandemias utjchïnjja, ¿kunsa Diosan markapajj Jesusan jiwatap amtañatakejj luräna?

 ¹⁴ COVID-19 pandemiana. Pandemia utjatapatjja, Jehová Diosan markapajj janiw Jesusan jiwatap amtañatakejj mä lugaran tantachasiñ puedipkänti. Ukhampachas Jesusan jiwatapajj amtasïnwa. d Internetanïpkäna uka congregacionanakajja, videoconferencia toqew amtapjjäna. Ukampis ¿kunsa jan internetani walja millón jilat kullakanakajj lurapjjäna? Yaqhep markanakanjja, televisión toqe jan ukajj radio toqew mä discurso istʼapjjäna. Ukhamarus sucursalanakajj 500 jila arunakan grabasiñapatakiw yanaptʼapjjäna, ukhamat wali jaya cheqanakan jakirinakajj Jesusan jiwatap amtapjjañapataki. Yaqhep jilatanakaw uka grabacionanak jaya cheqankirinakar puriyapjjäna.

15. ¿Kunsa Sue sat Bibliat yateqerit yateqtanjja?

¹⁵ Familiamp jarkʼatpacha. Yaqhepanakajja, Jesusan jiwatap jan amtañatakejj familiapan jarkʼataw uñjasipjjäna. Ukaw Sue sat Bibliat mä yateqerirojj pasäna. 2021 maran Jesusan  jiwatap amtañatak mä uru faltkipanjja, familiajan jarkʼatajj janiw Jesusan jiwatap amtañatak tantachäwinkañ puedkäti sasaw Bibliat yatichiriparojj awisäna. Yatichiripajj Lucas 22:44 texto liytʼarapïna. Ukatjja, jan walinakan uñjasisajj Jesusat yateqasiñasawa, Jehová Diosaw yanaptʼitani sasin taqe chuyma confiyas orasiñasawa sasaw qhanañchtʼäna. Qhepürojja, Sue sat yateqerejj tʼantʼampi vinompi wakichtʼasïna, Internetanwa jw.org cheqan Diosar adorañataki alwa tantachäwitak mä video uñtäna. Jaypʼurusti, cuartopar llawintasisaw teléfono toqejj Jesusan jiwatap amtañatak discurso istʼäna. Ukat akham sasaw Bibliat yatichiriparojj qellqäna: “Masürojj walpun chʼamañchtʼawayistajja. Jesusan jiwatap amtañatakejj taqe kunpun lurawayta, ukampis Jehová Diosaw jukʼamp yanaptʼawayitu. Kunja kusisitätsa, kunja yuspäratätsa uk sañatakejj janiw arunakas utjkituti” sasa. Jumatï uka kullakjam uñjasiskstajja, ¿Jehová Diosajj yanaptʼitaniw sasmati?

16. ¿Jesusan jiwatap amtañatak chʼamachasitasarojj Jehová Diosajj bendisiniwa sasajj kunatsa confiysna? (Romanos 8:31, 32).

¹⁶ Jehová Diosajj Yoqapan jiwatap amtañatak chʼamachasitas wali valoranitwa uñji. Kunanaktï Diosajj jiwas layku lurawayki ukanakat yuspärañäni ukhajja, jupajj bendisipunistaniwa (Romanos 8:31, 32 liytʼäta). Jichha marajj Jesusan jiwatapajj amtaskani ukankañatakiw chʼamachasiñasa. Jesusan jiwatap amtaskani uka semananakan Jehová Diosatakejj jukʼampinak lurañäni.