1. ¿Kuna toqets jilaparte jaqenakajj llakisipjje?

 KUNJAMSA jilaparte jaqenakajj jupanakatak llakisipjje uk inas amuysta, ukatwa redes sociales ukanakans jupanakak yäqatäñ munapjje, kunanaktï lurapki ukanaks uñachtʼayañ munapjje. Ukampis jukʼanikiw Jehová Diosar jachʼañchapjje. Aka yatichäwinjja, Jehová Diosar jachʼañchañajj kamsañs muni, kuna razonanakats jupar jachʼañchañasa ukwa yatjjataskañäni. Kunjamsa Diosar jachʼañchsna, kunjamsa jupajj jutïrin sutip jachʼañchani ukwa yatjjataskarakiñäni.

¿JEHOVÁ DIOSAR JACHʼAÑCHAÑAJJ KAMSAÑS MUNI?

2. ¿Kunjamsa Jehová Diosajj Sinaí qollun wali chʼamanïtap uñachtʼayäna? (Dibujo uñjjattʼarakïta).

² Biblianjja, jachʼañchaña arojj maynin musparkañ luratapat parlañatakiw apnaqasi. Israel markajj Egipton esclavöñat salvatäjjapjjäna ukhat mä jukʼa tiempotjja, Jehová Diosajj kunja chʼamanisa uk wali musparkañwa uñachtʼayäna. Kunjamäpachänsa uk amuytʼañäni: walja israelitanakaw Jehová Diosajj kamsanisa uk istʼañatakejj Sinaí qollu jakʼan saytʼatäsipki. Uka qollu patjjan mä chʼamak qenayaw uñjasi. Ukhamaruw oraqejj mä akatjamat khatattaraki, qollut jewqʼew mistuski, lliju llijunakaw uñjasi, qʼejjo qʼejjonakaw istʼasi, niya oqartʼayirpachaw pututun phustʼasitapajj istʼasiraki (Éx. 19:16-18; 24:17; Sal. 68:8). Taqe ukanak uñjasinjja, Jehová Diosajj kunja chʼamanisa uk amuyasajj walpun israelitanakajj musparapjjpachäna.

3. ¿Kunjamsa Jehová Diosar jachʼañchsna?

 ³ ¿Jiwasajj Jehová Diosar jachʼañcharaksnati? Jïsa, jachʼañchsnawa. Mä toqetjja, Jehová Diosajj kunja chʼamanisa kunja suma chuymanisa ukanakat jaqenakar parlasaw jupar jachʼañchsna. Maysa toqetjja, taqe kuns jupan yanaptʼapamp luratasat reconosisaw jupar jachʼañcharaksna (Is. 26:12). Uka toqet David reyiw wali yateqaskañajja. Mä kutejj Israel markpach nayraqatanwa mä oracionan akham säna: “Jehová Dios Tata, taqe kunanakatï alajjpachansa aka oraqens utjki ukanakajj jumankiwa, ukatwa jumajj jachʼätajja, chʼamanïtasa, sutimas wali sumawa, kʼajkir qhanätawa, musparkañarakïtawa” sasa. Oración tukuyjjäna ukhajja, ‘taqpach congregacionaw Jehová Diosar jachʼañchäna’ (1 Crón. 29:11, 20).

4. ¿Kunjamsa Jesusajj Jehová Diosar jachʼañchäna?

⁴ Jesusajj aka oraqenkkäna ukhajja, kunaymanitwa Awkipar jachʼañchäna. Milagronak lurasajj Jehová Diosan chʼamapamp ukanak luratapwa qhanañchirïna (Mar. 5:18-20). Diosat parlasasa mayninakar munasiñamp uñjasas juparuw jachʼañchirïna. Mä kutejj sinagoganwa Jesusajj yatichaskäna, jupar istʼirinak taypin 18 maranak demonion tʼaqesiyat mä warmiw ukankarakïna. Demonion mantatäsajj wali kʼumthapitänwa, janiw cheqaptirjamäkänti. ¡Ukajj wali llakkañänwa! Uka warmin wal tʼaqesitap amuyasajja, Jesusajj wal jupat sinttʼasïna, munasiñampiw akham sarakïna: “Warmi, jumajj uka usumat qollatäjjtawa” sasa. Ukatjja amparampiw jupar loqjjattʼäna, ukaratpachaw uka warmejj cheqaptjjäna, ukatsti “Diosaruw jachʼañchäna” (Luc. 13:10-13). Uka warmejj qollatäjjatapat wal Diosar yuspäräna, ukhamajj Jehová Diosar jachʼañchañatakejj razonanakanïnwa, jiwasas ukhamaraki.

¿KUNA RAZONANAKATS JEHOVÁ DIOSAR JACHʼAÑCHTANJJA?

5. ¿Kuna razonanakats Jehová Diosar respetañasa?

⁵ Jehová Diosarojj wal respetatasatwa jachʼañchtanjja. Jupar respetañatakejj walja razonanakaw utjistu. Jehová Diosajj taqe chʼamaniwa, chʼamapajj jan tukuskirirakiwa (Sal. 96:4-7). Wali yatiñanïtapajj luratanakapanwa qhan uñjasi. Jupaw jakañ churistu, kuntï jakañatak necesitktan ukanaks churarakistuwa (Apoc. 4:11). Jupajj jan jaytjasiriwa (Apoc. 15:4). Kunanaktï lurki ukajj sumarupuniw sari, promesanakaps phoqapuniwa (Jos. 23:14). Ukatwa Jeremías profetajj jupar akham sispachäna: “Markanakankir taqe yatiñan jaqenak taypinsa taqe reinonakap taypinsa, janipuniw kunäkipans jumjamajj utjkiti” sasa (Jer. 10:6, 7). Ukhamajj alajjpachankir Awkisar respetañatakejj walja razonanakaw utjistu. Ukampis janiw jupar respetañ mayakejj wakiskiti, juparojj munasiraktanwa.

6. ¿Kunatsa Jehová Diosar munastanjja?

⁶ Jehová Diosarojj taqe chuyma munasitasatwa jachʼañchtanjja. Juparojj wali suma chuymanïtapatwa wal munastanjja. Jupajj khuyaptʼayasiriwa, sinttʼasirirakiwa (Sal. 103:13; Is. 49:15). Jiwasar tʼaqesir uñjasajj llakisirakiwa (Zac. 2:8). Jupar jakʼachasiñasatakisa amigopäñasatakis yanaptʼistuwa (Sal. 25:14; Hech. 17:27). Jupajj humilde chuymanirakiwa, “alajjpacharu ukhamarak oraqer uñtaniñatakiw altʼasi, jupaw humilde jaqerojj laqʼa polvot wayti” (Sal. 113:6, 7). Taqeniw ukham suma Diosar jachʼañchañ muntanjja (Sal. 86:12).

7. ¿Kun amuyapjjañapatakis jaqenakar yanaptʼsna?

⁷ Jehová Diosarojj jaqenakan jupar uñtʼapjjañap munatasatwa jachʼañchtanjja. Waljaniw kunatï Jehová Diosat cheqäki uk jan yatipkiti. Kuna laykutejj Supayaw sinti jan  wali kʼarinak Diosjjat uñstayi, jaqenakajj ukar creyipjjarakiwa (2 Cor. 4:4). Jehová Diosajj vengasirïkaspasa, janis jiwasat llakiskaspa, jupas kunayman tʼaqesiñanak utjaykaspa ukhamwa jaqenakajj amuyapjje. Ukampis jiwasajj kunatï cheqäki ukwa yattanjja. Jehová Diosajj kunjam Diosasa uk amuyapjjañapatakejja, jiwasaw jaqenakar yanaptʼsna, ukhamatwa jupar jachʼañchtanjja (Is. 43:10). Jichhajj Salmo 96 capitulonkir yaqhep versiculonakapatwa yatjjataskañäni, ukanjja Jehová Diosar jachʼañchañatwa parli, uk yatjjatañaw kunjams Diosar jachʼañchsna uk amuyañatak yanaptʼistani.

¿KUNJAMSA JEHOVÁ DIOSAR JACHʼAÑCHSNA?

8. ¿Kun lurasas Jehová Diosar jachʼañchsna? (Salmo 96:1-3).

⁸ (Salmo 96:1-3 liytʼäta). Jehová Diosarojj jupat parlasaw jachʼañchsna. Uka versiculonakajj Jehová Diosar cantañasataki, sutip jachʼañchañasataki, jaqenakar salvki uka suma yatiyäwinak yatiyañasataki, markanak taypin jupar jachʼañchañasatakiw servirinakapar chʼamañchtʼistu. Taqe ukanak lurasaw alajjpachankir Awkisar jachʼañchtanjja. Diosat jan jitheqtir judionakasa nayrïr patak maranakan jakir cristianonakasa, taqe horasanwa Jehová Diosan sutip arjjatapjjäna. Kunanaktï Diosajj jupanak layku lurkäna taqe ukanakats parlapjjarakïnwa (Dan. 3:16-18; Hech. 4:29). ¿Kunjamsa jupanakat yateqassna?

9, 10. ¿Kunsa Angelina kullakat yateqsna? (Foto uñjjattʼarakïta).

⁹ Estados Unidos markankir Angelina a kullakat parltʼañäni. Jupajj Jehová Diosan sutip jan ajjsartʼasaw trabajopan arjjatäna, niyakejjay trabajopan ukhak contratapjjchïnjja, trabajopankirinakamp maynit maynikam uñtʼasipjjañapatakiw mä tantachäwir invitapjjäna. Sapa mayniw jupanakat mä kuns cuenttʼañapäna. Kullakajj fotonakampiw Jehová Diosan Testigopäsajj kunja kusisitasa uk qhanañchtʼañ munäna, ukampis mä compañeropajj jupa nayrakiw Testigo awk taykanïtapat parläna, jupajj Testigonakat jan walinak parläna, kunarutï creyipki ukanakats burlasirakïnwa. Angelina kullakajj akham siwa: “Chuymajajj walpun putuqetäna, ukampis akham sasaw amuytʼasiyäta: ‘¿Jehová Diosjjat kʼarinak parlañap dejakïti, jan ukajj arjjatächa?’ sasa”.

¹⁰ Compañeropajj parlañ tukuyjjäna ukhajja,  Angelina kullakajj amukiw chuymapan ortʼasïna. Ukat suma arunakampiw jupar akham säna: “Niya igualakirakïtansä, tataj mamajajj Testigorakiwa, nayajj Testigorakïtwa” sasa. Uka tantachäwin mayjtʼasiñjamäkchïnsa, kullakajj tranquilokïskänwa. Kunjamsa jupajj Jehová Diosar wali kusisit serviski, uk uñachtʼayir mä qhawqha fotonakwa compañeronakapar uñachtʼayäna. Ukat wali amuyumpiw kunarutï creyki uk qhanañchtʼarakïna (1 Ped. 3:15). Kullakajj parlañ tukuyjjäna ukhajja, compañeropajj tranquilokëjjänwa, Testigo tatap mamapamp wali suma recuerdonakanïtaps arstʼarakïnwa. Kullakajj akham sarakiwa: “Jehová Diosarojj arjjatañasapuniwa, ukajj mä privilegiowa” sasa. Mayninakajj Jehová Diosat jan wals parlapkchinejja, jupar jachʼañchañasa arjjatañas taqe jiwasatakejj mä privilegiowa.

11. ¿Kunjamsa Diosan servirinakapajj Salmo 96:8 textorjam nayratpach phoqapjje?

¹¹ (Salmo 96:8 liytʼäta). Jehová Diosarojj kunanakatï utjkistu ukampiw jachʼañchsna. Diosan cheqpach servirinakapajj ukham lurasapuniw Jehová Diosar nayratpach jachʼañchapjje (Prov. 3:9). Israelitanakajj templo lurasiñapatakisa askichasiñapatakis donacionanakampiw yanaptʼapjjerïna (2 Rey. 12:4, 5; 1 Crón. 29:3-9). Jesusan yaqhep discipulonakapajja, juparusa apostolonakaparus ‘utjirinakapampiw yanaptʼapjjäna’ (Luc. 8:1-3). Nayrïr patak maranakanjja, cristianonakajj yaqha lugarankir jilat kullakanakarojj yanaptʼanakwa apayapjjerïna (Hech. 11:27-29). Jichhürunakan ukhamarakiw chuymasat donacionanak churasajj Jehová Diosar jachʼañchsna.

12. ¿Kunjamsa Jehová Diosarojj contribucionanakasamp jachʼañchtanjja? (Foto uñjjattʼarakïta).

¹² Kunjamsa Jehová Diosarojj contribucionanakamp jachʼañchasi uk mä experienciamp amuytʼañäni. 2020 maran mä sequiaw Zimbabue markan utjäna, jaya tiempo ukhamïpan walja millón jaqenakaw niy jiwarapjjäna. Prisca sat kullakas ukhamanwa uñjasirakïna. Sequias utjkchïnjja, kullakajj miercolesanakasa viernesanakas predikirejj mistupunirïnwa, oraq qholliñ tiempons mistupunirïnwa. Niyakejjay yapu lurañat sipans predicañar chuym uchchïnjja, vecinonakapajj wal jupat burlasipjjäna, “manqʼatjamaw jiwäta” sasaw sapjjäna. Ukampis jupajj jan payachasisaw akham sirïna: “Jehová Diosajj janipuniw servirinakapar jaytjkiti” sasa. Mä jukʼa tiempotjja,  contribucionanak churktan ukat irtasaw Diosan markapajj kunanaktï kullakajj necesitkäna ukanak churäna. Vecinonakapat yaqhepajj wal musparapjjäna, akham sapjjarakïnwa: “Diosajj janipuniw jaytjktamti, nanakajj jupar uñtʼañ munapjjaraktwa” sasa. Jupanakat paqallqoniw tantachäwinakar sarjjapjjäna.

13. Salmo 96:9 textorjamajj ¿kunsa Jehová Diosar jachʼañchañatakejj lursna?

¹³ (Salmo 96:9 liytʼäta). Jehová Diosarojj sum sarnaqatasampiw jachʼañchsna. Jehová Diosan sacerdotenakapajja, tabernaculon serviñatakisa templon serviñatakis jarisipjjañapänwa, qʼomäpjjañaparakïnwa (Éx. 40:30-32). Jiwasajj ukhamarakiw qʼomäñasa, ukampis janiw cuerposakejj qʼomäñapäkiti, jan ukasti taqe kunat sipans Dios nayraqatan qʼoma jan ukajj sum sarnaqañatakiw chʼamachasiñasa (Sal. 24:3, 4; 1 Ped. 1:15, 16). ‘Nayrajj kunjam jaqëkayätantï’ uk apanukuñatakisa ‘machaq jaqëñamp isthapisiñatakis’ chʼamachasiñasawa. Mä arunjja, jan wali amuyunaksa jan wali lurañanaks apanukuñasawa. Kunjamsa amuyusasa luratanakasas Jehová Diosan suma chuymanïtap uñachtʼayaspa ukwa yateqañasaraki (Col. 3:9, 10). Diosan yanaptʼapampejj qʼañu juchan sarnaqerinakasa, nuwasir jaqenakas cambiapjjaspawa machaq jaqëñampiw isthapisipjjarakispa.

14. ¿Kunsa Jack jilatat yateqsna? (Foto uñjjattʼarakïta).

¹⁴ Jack jilatat parltʼañäni, jupajj wali nuwasirïnwa, sinti jan wali jaqerakïnwa, Demonio sasaw sutichapjjarakirïna. Sinti jan walinak luratapatjja, jiwayatäñapatakiw juchañchapjjarakïna. Ukampis jiwayatäñapäkäna uka urun janïr purinkipanjja, carcelar sarirïkäna uka jilatampiw Bibliat yateqañ qalltäna. Jupajj sinti jan walinaks lurkchïnjja, cambiänwa, Jehová Diosan Testigopäñatakiw bautisasjjarakïna. Jupajj janipuniw mä akchʼas nayrjamäjjänti, ukatwa jiwayatäñapäkäna uka urojj guardianakat yaqhepajj jachtʼasis jupat despedisipjjäna. Ukan trabajir mä sargentojj akham sänwa: “Jupajj taqe presonakat sipans sinti jan wali jaqepunïnwa, ukampis jichhajj taqet sipans wali suma jaqëjjewa” sasa. Jiwayjjapjjäna ukhat mä semana pasatatjja, jilatanakajj semanan apaski uka tantachäw sarayañatakiw carcelar sarapjjäna, janipun uka tantachäwinakar sarirïkäna uka presoruw ukan uñjapjjäna. ¿Kunatsa jupajj uka urun sarpachäna? Jupajj kunjamsa Jack chachajj cambiäna uk uñjasajj  wal musparäna, ukatwa kunjamsa Jehová Diosar adoraspa uk yatiñ munäna. Cheqas sum sarnaqatasampejj alajjpachankir Awkisarojj jachʼañchsnawa (1 Ped. 2:12).

¿KUNJAMSA JEHOVÁ DIOSAJJ AKAT MÄ JUKʼAMPIROJJ SUTIP JACHʼAÑCHANI?

15. Akat mä jukʼampirojj ¿kunsa Jehová Diosajj sutip phoqatpach jachʼañchañatakejj lurani? (Salmo 96:10-13).

¹⁵ (Salmo 96:10-13 liytʼäta). Salmo 96 tukuy versiculonakajja, Jehová Diosan cheqapar juzguir Reyïtapwa qhanañchi. ¿Kunjamsa Jehová Diosajj akat mä jukʼampirojj sutip jachʼañchani? Cheqaparjam juzgasaw uk lurani. Niyaw jachʼa Babiloniarojj sutip qʼañuchatapat tukjani (Apoc. 17:5, 16; 19:1, 2). Kunjamsa falso religionanakar tukjasi uk uñjasajja, inas yaqhepajj jiwasamp chik Jehová Diosar adorañ amtapjjchini. Armagedón guerranjja, Jehová Diosajj Supayan apnaqat akapachap qʼal tukjani. Khitinakatï jupar uñisipki sutip qʼañuchapki ukanakarojj taqeniruw tukjani, ukampis khitinakatï jupar munasipki, istʼapki, jachʼañchapkaraki ukanakarojj taqeniruw salvani (Mar. 8:38; 2 Tes. 1:6-10). Jesucristojj Waranqa Maranak Apnaqañ tukuyjjani, qhep qhepa yantʼajj tukuyjjarakini ukhajja, Jehová Diosajj phoqatpachwa sutip jachʼañchani (Apoc. 20:7-10). Uka tiempon oraqejj “Jehová Diosan jachʼañchäwip toqet uñtʼañampi phoqtʼatäniwa, kunjamtï umajj lamar qotar phoqantki ukhama” (Hab. 2:14).

16. ¿Kun lurañsa jumajj amtta? (Dibujo uñjjattʼarakïta).

¹⁶ ¡Taqe aka oraqpachankirinakajj Jehová Diosan sutip jachʼañchapkani ukhajj wali sumapunïniwa! Uka urun puriniñapkamajja, taqe horasan Diosasar jachʼañchañatakejj chʼamachasiskakiñäni. Niyakejjay uka luräwejj wali importantëchejja, Cuerpo Gobernantejj Salmo 96:8 texto 2025 maratakejj ajlliwayi, ukan akham siwa: “Jehová Diosan jachʼa sutip jachʼañchapjjam” sasa.