1. ¿Kun lurañas jiwasatak chʼamakïspa?

 SAPÜRUW amtanakar purtanjja. Awisajj mä amtar puriñajj facilakiwa, kunsa desayunon manqtʼasiñäni jan ukajj kuna horarus ikjjañäni uk facilak amttanjja. Ukampis awisajj mä amtar puriñajj chʼamakïspawa. Kunsa kʼumaräñatakisa, kusisit jakasiñatakisa, familiasatakisa, jan ukajj Diosar adorañatakis lurañäni ukanak amtañajj chʼamakïspawa. Kuntï amtktan ukajj jiwasarusa familiasarus yanaptʼaspa ukwa muntanjja, jukʼampis Jehová Diosar kusisiyaspa ukwa muntanjja (Rom. 12:1, 2).

2. ¿Kunanakas suma amtanakar puriñatak yanaptʼistaspa?

² Aka yatichäwinjja, kunanakas suma amtanakar puriñatak yanaptʼistaspa ukwa kimsa toqet yatjjataskañäni. 1) Taqe kuns sum yatjjataña, 2) kunsa Jehová Diosajj amuyi uk amuykiptʼaña, 3) kawkïris walïspa uk amuykiptʼaña. Mä kuns sum amuytʼañatakejj kunsa lursna uks yatjjataskarakiñäniwa (Prov. 2:11).

TAQE KUNS SUM YATJJATAÑA

3. ¿Kunatsa suma amtar puriñatakejj taqe kuns sum yatjjatañasa?

³ Suma amtar puriñatakejj taqe kuns sum yatjjatañasawa. ¿Kunatsa ukajj wali wakiskirejja? Wali usuntat mä jaqes doctoran ukar sarkaspa ukham amuytʼañäni. ¿Uka doctorajj jankʼakit jupar jan revisasa jan ukajj jan kun jisktʼasas mä tratamiento churani? Janiwa. Jiwasampejj ukhamarakiwa, suma amtanakar puriñatakejj nayraqat sum yatjjatañasawa. ¿Kunjamsa uk lursna?

4. Proverbios 18:13 textorjamajj ¿kunas mä toqet sum yatjjatañatak yanaptʼiristam? (Fotonak uñjjattʼarakïta).

 ⁴ Mä toqet sum yatjjatañatakejja, jilapartejj jisktʼasiñaw yanaptʼiristam. Kusistʼañatak mä tantachäwirus invitapkiristam ukham amuytʼañäni. ¿Uka tantachäwir sarañamajj wakisiti? Janitejj khitis uka tantachäwi sarayani jan ukajj kunanakas ukan lurasini uk yatksta ukhajja, invitktam ukarojj akham sasaw jisktʼasma: “¿Kawkjansa ukat kunapachas uka tantachäwejj apasini? ¿Qhawqhanis sarapjjani? ¿Khitis sarayani? ¿Khitinakas sarapjjani? ¿Kunanakas lurasini? ¿Alcoholan umañanakajj utjaniti?” sasa. Ukanak jiskjjattʼasiñaw mä suma amtar puriñatak yanaptʼätam (Proverbios 18:13 liytʼäta).

5. Mä toqet sum yatjjatasajj ¿kunsa lurañama?

⁵ Uka toqet sum yatjjatasajja, kunanaktï yatjjatkta ukarjamaw sum amuytʼasiñama. Inas akanak amuytʼchisma: ¿Jehová Diosan mandatonakapar jan istʼirinakat uka tantachäwinkapjjani? Alcoholani umañanakajj utjani ukhajj ¿ukanak controlirejj utjaniti? ¿Uka tantachäwejj jan wali loqhe fiestaruch tukjjaspa? (1 Ped. 4:3). Jan ukajj ukar sarañ laykuch ¿congregacionan tantachäwipat faltasïta, jan ukajj predikiris jan sarkäta? Uka toqenakat sum amuytʼasiñaw mä suma amtar puriñatak yanaptʼätam. Ukampis janiw ukak lurañajj wakiskiti. Jumajj kunsa luräta uk amuytʼasjjchïtasa, akham sasaw jisktʼasiñama: “¿Kunsa Jehová Diosajj uka toqet amuyi?” sasa (Prov. 2:6).

 KUNSA JEHOVÁ DIOSAJJ AMUYI UK AMUYKIPTʼAÑA

6. Santiago 1:5 textorjamajj ¿kunatsa Jehová Diosar yanaptʼa mayiñasa?

⁶ Kunsa Jehová Diosajj amuyi uk yatiñatakejj juparuw yanaptʼa mayiñama. Jupajj yatiñanïñ mayipki ukanakarojj “taqenirus taqe chuyma walja chuririwa, khititejj maykani ukatakis janirakiw coleraskaniti” (Santiago 1:5 liytʼäta). Jupajj churkistu uka yatiñanïñaw amtatasajj jupar kusisiyaniti janicha uk yatiñatak yanaptʼistu.

7. Kunjamsa Jehová Diosan amuyup yatisma uk qhanañchtʼam.

⁷ Jehová Diosar yanaptʼa mayisajja, kunjamsa mayisitamar jaystam uk amuyañatakiw chʼamachasiñama. Viajkasas chhaqkasma ukham amuytʼañäni. Inas uka cheqan jakir mä jaqer yanaptʼa maychisma, ukampis jisktʼasisajj ¿janïr kamskipanti uka cheqat sarjjasma? Janiwa, antisas wali atencionampiw jupar istʼasma. Jehová Diosar yanaptʼa mayitamampejj niya ukhamarakiwa, Jehová Diosar yatiñanïñ mayisajja, kamsasktamsa uk istʼañatakiw chʼamachasiñama. Ukatakejj kuntï yatiñ munkta uka toqet parlir mandatonakapata Bibliankir wiñay yatichäwinakapatwa yatjjatañama. Kusistʼañatak mä tantachäwirus invitapkiristam ukham amuytʼaskakiñäni. Sarätati janicha uk janïr amtkasajja, Bibliajj kamsis loqhe fiestanakatsa, jan wali jaqenakamp chikachasiñatsa, munañas lurañat sipans Diosan  Reinop nayrat uchañatsa uka toqenakatwa sum amuytʼasiñasa (Mat. 6:33; Rom. 13:13; 1 Cor. 15:33).

8. Jumatï mä toqet yatjjatañatak yanaptʼa munsta ukhajj ¿kunsa lurasma? (Foto uñjjattʼarakïta).

⁸ Inas mä toqet yatjjatañatakejj yanaptʼa munchisma. Ukatakejj experiencian mä jilata jan ukajj mä kullakaw yanaptʼiristam. Ukampis juma pachpa yatjjatañamajj wakisirakiwa. Bibliat yatjjatañatakejj walja yanaptʼanakaw utji, inas Jehová Diosan Testigonakapan Bibliat yatjjatapjjañapataki ukat Cristianjam jakañatak yanaptʼir textonaka sat qellqatanakat yatjjatchisma. Amtapunim, Jehová Diosar kusisiyir amtaruw puriñama.

9. Amtatasajj Jehová Diosar kusisiyaniti janicha uk ¿kunjamatsa yatsna? (Efesios 5:17).

⁹ Amtatasajj Jehová Diosar kusisiyaniti janicha uk yatiñatakejja, nayraqatajj juparuw sum uñtʼañasa. Proverbios 9:10 textojj akham siwa: “Wali Santo Diosar uñtʼañajja amuytʼasirïñwa churi” sasa. Ukhamajj amuytʼasirïñatakejja, Jehová Diosajj kunjam chuymanisa, kunas amtapajja, kunarus munasi, kunarus uñisi ukanak yatiñasawa. Akham sasaw jisktʼasisma: “Jehová Diosajj kunjam chuymanisa uk yatisajj ¿kuntï amtkä ukajj jupatak walikïniti?” sasa (Efesios 5:17 liytʼäta).

10. Familiasana jan ukajj markasan costumbrenakapar arkañat sipans ¿kunatsa jiwasatakejj Biblian wiñay yatichäwinakapajj jukʼamp importantejja?

¹⁰ Jehová Diosar kusisiyañatakejja, awisajj kunatï familiasarusa jan ukajj amigonakasarus chuym ustʼaykaspa ukwa lursna. Ak amuytʼañäni, inas mä awk taykajj suma amtanïsajj wali qollqeni mä chachamp phuchapar casarañ munapjjchispa, ukampis janiw uka chachajj Diosar taqe chuym sirvkaspati. Inas jupanakajj phuchapan pisin jakasiñap jan munapkchiti, ukajj walikïskiwa. Ukampis ¿khitis phuchaparojj Diosamp sum apasiñapatak yanaptʼani? ¿Jehová Diosajj uka toqet kunsa amuypacha? Uka jisktʼanakan respuestapajj Mateo 6:33 textonkiwa, ‘Diosan Reinop nayraqat thaqasipkakiñapatakiw’ cristianonakar ukan chʼamañchtʼi. Cheqas awk taykasarojj jachʼaruw aptañ muntanjja, jakasktan uka lugarankir jaqenakarus respetaraktanwa, ukampis Jehová Diosar kusisiyañaw jiwasatak jukʼamp importantejja.

KAWKÏRIS WALÏSPA UK AMUYKIPTʼAÑA

11. Filipenses 1:9, 10 textorjamajj ¿kunas mä suma amtar puriñatakejj yanaptʼätam?

¹¹ Kuntï amtkta uka toqet parlir Biblian wiñay yatichäwinakap yatjjatasajja, kunanaks lurasma uka toqetwa sum amuytʼasiñama (Filipenses 1:9, 10 liytʼäta). ¿Kunjamsa uk lurasma? Kunayman amtanakar puriñ utjatap yatisajja, kawkïrsa ajllïta uk amtañatakejj sum amuytʼasiñamawa. Awisajj mä amtar puriñajj facilakïniwa, ukampis awisajj kuna amtarus purïta uk amuyañajj janiw faciläkaniti. Ukhamäkchinisa, amuytʼañaw chʼamäni ukhas suma amtanakar puriñatak yanaptʼätam.

12, 13. ¿Kunjamsa amuytʼirïñajj trabajo toqet mä suma amtar puriñatak yanaptʼiristam?

¹² Familiamar mantiniñatakis trabajo thaqkasma ukham amuytʼañäni. Pä trabajo utjipanjja, ukanakat sum yatjjatañamawa. Kuna kasta trabajosa, qhawqha horanak trabajiñasa, jayankiti jakʼankicha, yaqha ukhamanakamp yatjjatañamawa. Uka pä trabajonakajj Bibliarjamajj walikïskaspawa. Inas uka trabajonakat maynïrejj kunatï ukan luraski ukatsa jan ukajj jilpach pagasitapats wal guststam. Ukampis janïr mä trabajo ajllkasajj ¿kunanak amuytʼañas wakisispa?

¹³ Akwa amuytʼasma, uka trabajonakat inas maynïrejj mä qhawqha tantachäwinakar  sarañat jarkʼiristam. Jan ukajj inas familiaman seguro, kusisita, Jehová Diosan jakʼapankañapatak yanaptʼañatakejj tiempo apaqeristam. Uka toqenakat amuytʼasiñaw qollqe thaqañar chuyma uchañat sipansa, Jehová Diosar serviñ nayrar uchaskakiñatakisa, familiamar yanaptʼañatakis yanaptʼätam. Ukhamatwa mä suma amtar puritamat Jehová Diosan bendicionap katoqarakïta.

14. ¿Kunjamsa amuytʼirïñasa munasirïñas mayninakar jan lanktʼasiyañatak yanaptʼistaspa?

¹⁴ Amtatasajj mayninakar yanaptʼaspati janicha uk amuyañatakiw amuytʼañajj yanaptʼarakistu, ukhamat ‘jan khitirus lanktʼasiyañataki’ (Filip. 1:10). Kunjamsa isthaptʼasiñäni, kunjamsa kʼachachtʼasiñäni ukanak amtkasajj amuytʼañajj wakisirakiwa. Inas mä kasta isejj gustchistaspa, ukampis gustkistu  uka isi uchasitasatï congregacionan maynirusa jan ukajj jan Testigöki ukarus jan waltʼaychi ukhajj ¿kunsa lurasma? Amuytʼirïñaw kunjamas mayninakajj chuymapan jikjjatasipjje uk respetañatak yanaptʼistani. Munasirïtasat ‘mayninakan askipwa thaqañäni’, altʼat chuymanirakïñäniwa (1 Cor. 10:23, 24, 32; 1 Tim. 2:9, 10). Ukhamatwa amtatasajj mayninakar munasitassa respetatassa uñachtʼayani.

15. Amtaman sumar sarañapatakejj ¿kunsa lurañama?

¹⁵ Wali wakiskir amtar puriñatï waktʼstam ukhajja, uka amtam phoqasiñapatakejj kunanak lurañas wakisi uk amuytʼañamawa, Jesusajj mä kun lurañatakejj “qhawqhas munasini” uk amuytʼañatakiw yatichawayistu (Luc. 14:28). Ukhamajj mä amtam phoqañatakejja, qhawqha tiemposa, qhawqha qollqesa, kunanak lurañamas wakisini uk amuytʼañamawa. Awisajj inas uka amtamat familiamar awisañamächini, ukhamat kunsa uka amtaman phoqasiñapatakejj sapa maynejj lurapjjaspa uk yatiñataki, ukhamatwa uka amtam mayjtʼayañajj wakisiti janicha uk amuyasma, jan ukajj yaqha amtar puriñat wakisi uks amuyarakisma. Ukhamarus jumatï familiamar uka toqet jisktʼasïta, kamsapjjesa uk istʼarakïta ukhajja, amtaman sumar sarañapatakejj taqe chuymaw yanaptʼapjjätam (Prov. 15:22).

SUMA AMTANAKAR PURIÑA

16. Amtaman sumar sarañapatakejj ¿kunanaks lurañama? (“ ¿Kunjamsa suma amtanakar purisma?” sat recuadro liytʼarakïta).

¹⁶ Jumatï yatjjataniwayktan ukarjam luräta ukhajja, suma amtanakar puriñatakejj wakichtʼatäjjätawa. Mä suma amtar puriñatakejj taqe kunwa yatjjtajja. Jehová Diosar kusisiyir mä amtar puriñatakejj Biblian kawkïr wiñay yatichäwinakapas wakisi uks yatjjataraktawa. Ukhamajj uka amtaman sumar sarañapatakiw Jehová Diosar yanaptʼa mayiñama.

17. ¿Kunas suma amtanakar puriñatakejj wakisi?

¹⁷ Inas kunanaktï amtkayäta ukajj sumar sarchi. Ukhamäkchisa, suma amtanakar puriñatakejj janiw chʼikhi amuyumarukisa jan ukajj experienciamarukis confiyasiñamäkiti, jan ukasti Jehová Diosat jutki uka yatiñarjamapuniw kuns amtañama. Jupakipuniw cheqpach uñtʼañsa, amuytʼasirïñsa, sum amuytʼañsa churiristam, ukanakaw yatiñanïñatakejj wakisi (Prov. 2:1-5). Ukhamajj Jehová Diosaw jupar kusisiyir suma amtanakar puriñatak yanaptʼiristam (Sal. 23:2, 3).